(ခ)-မောင်တောမြို့၊ လေးမိုင်ရပ်ကွက်ရှိ အ.လ.က(၂)အခြေခံပညာ အထက်တန်း ကျောင်း(ခွဲ)အား အခြေခံပညာ အထက်တန်းကျောင်းအဆင့် တိုးမြှင့်ပေးရန် အစီအစဉ် ရှိ/မရှိနှင့်စပ်လျဉ်းသည့် မေးခွန်း

ပညာရေးဝန်ကြီးဌာနသည် ကိုယ်စားလှယ်တော်ကြီး၏ မဲဆန္ဒနယ် ရခိုင်ပြည်နယ်၊ မောင်တောမြို့နယ်အတွင်းတွင် ယခု စာသင်နှစ်အတွင်း အခြေခံပညာ မူလတန်းကျောင်း ခြောက်ကျောင်း၊ အခြေခံပညာ မူလတန်းလွန်ကျောင်း သုံးကျောင်း၊ အခြေခံပညာ အလယ်တန်းကျောင်း(ခွဲ) သုံးကျောင်း၊ အခြေခံပညာ အလယ်တန်းကျောင်း နှစ်ကျောင်း၊ အခြေခံပညာ အထက်တန်းကျောင်း တစ်ကျောင်း စုစုပေါင်း အခြေခံပညာ ကျောင်းပေါင်း ၁၅ ကျောင်း အဆင့်တိုးမြှင့် ဆောင်ရွက်ပေးခဲ့ပါကြောင်း၊ မိမိတို့ အခြေခံပညာ ဦးစီးဌာန၊ မောင်တောမြို့ အ.လ.က(၂) အခြေခံပညာ အထက်တန်းကျောင်း(ခွဲ) လေးမိုင် ရပ်ကွက်တွင် လက်ရှိ ကျောင်းသား ဦးရေ ယခုပညာသင်နှစ်တွင် ၁၅၂ ဦးသာ ပညာသင်ကြားလျက် ရှိပါကြောင်း၊ မိမိတို့ သတ်မှတ် ကျောင်းသားဦးရေ ပြည့်မီခြင်း မရှိသည်ကို စိစစ်တွေ့ရှိရပါကြောင်း၊ ထို့အပြင် အနီးဆုံး အထက်တန်းအဆင့်သင် ကျောင်း ဖြစ်သည့် မောင်တောမြို့ အမှတ် (၂) အခြေခံပညာ အထက်တန်းကျောင်းနှင့် လေးမိုင်ခရီးအတွင်းတွင် ရှိသည်ကို စိစစ်တွေ့ရှိပါကြောင်း၊ သို့ဖြစ်ပါ၍ ယခု ၂၀၂၀-၂၀၂၁ ပညာသင်နှစ်တွင် အဆင့်တိုးမြှင့်ပေးရန် ဦးစားပေး အစီအစဉ်မရှိပါကြောင်းနှင့် ကိုယ်စားလှယ်တော်ကြီး တင်ပြခဲ့သည့် အခြေခံပညာ အထက်တန်းပညာရပ်များကိုလည်း လက်ရှိတွင် သင်ကြားနေသည့် အခွင့်အလမ်း ရှိနေပါကြောင်း တင်ပြပါသည်။

ဦးလှထွန်းကျော် (မောင်တော မဲဆန္ဒနယ်)က ဆက်စပ်မေးခွန်းမေးမြန်းပါသည်။

လေးမိုင်ရပ်ကွက်သည် လူဦးရေ ၅၀၀၀ ကျော် နေထိုင်ပြီး တိုင်းရင်းသားပေါင်းစုံ နေထိုင်ကာ တည်ငြိမ်အေးချမ်းသည့် ရပ်ကွက်တစ်ခုဖြစ်သည့်အတွက် နောင်တွင် ကျောင်းသားကျောင်းသူများ တိုးပွားလာမည့် အခြေအနေရှိသည့်အပြင် အထက်တန်းကျောင်း ဖွင့်လှစ်ခွင့်ရခဲ့ပါက ကျောင်းအဆောင်ကို NGO အဖွဲ့အစည်းတစ်ခု ဖြစ်သည့် CDNH အဖွဲ့ကမှ ၎င်းဒေသခံဖြစ်သည့် ဆွစ်ဇလန်နိုင်ငံက အလှူရှင် တစ်ယောက်အနေဖြင့်  (၁၅၀ x ၃၀)ပေ RC နှစ်ထပ်ဆောင် ဆောက်လုပ်ပေးမည့် အစီအစဉ် ရှိနေပါကြောင်း၊ ထို့ကြောင့် လက်ရှိ အထက်တန်းကျောင်း ပညာကို သင်ခွင့်ရသောလည်း မိမိတင်ပြထားသည့် အောင်ချက် ရာခိုင်နှုန်းကို ကြည့်ခြင်းအားဖြင့် ကျောင်းသားမိဘများသည် အားမရ ဖြစ်နေပါကြောင်း၊ ထို့ကြောင့် လာမည့် ၂၀၂၁-၂၀၂၂ ပညာသင်နှစ်တွင် ကျောင်းအဆင့် တိုးမြှင့်ပေးနိုင်မည့် အခြေအနေ ရှိ/မရှိကို ဖြေနိုင်ပေးနိုင်မည်ဆိုပါက ဖြေကြားပေးရန် တင်ပြပါသည်။

ပညာရေးဝန်ကြီးဌာန၊ ဒုတိယဝန်ကြီး ဦးဝင်းမော်ထွန်း

ပညာရေးဝန်ကြီးဌာနသည် နိုင်ငံသူ နိုင်ငံသား၊ လူငယ် လူရွယ်များ အားလုံး ပညာသင် အခွင့်အလမ်းပေးရန် ပြင်းပြစွာ ဆန္ဒရှိပါကြောင်း၊ တာဝန်လည်း ရှိပါကြောင်း၊ သို့သော် မိမိတို့သည် ဘဏ္ဍာရေး အခြေအနေအရ ကန့်သတ်ချက်များ ရှိသည့်အပြင်၊ လွှတ်တော် အစည်းအဝေးများတွင် ကျောင်းအဆင့်တိုး ဆောင်ရွက်ခြင်း လုပ်ငန်းများနှင့်ပတ်သက်ပြီး ဝေဖန်ဆွေးနွေးမှုများစွာ ရှိပါကြောင်း၊ ကျောင်းအဆင့် တိုးမြှင့်မှုများ များနေပြီး ပညာရေးဝန်ကြီးဌာနသည် မလိုအပ်သည့် ကျောင်းအဆင့်တိုးများ ဆောင်ရွက်နေသည် စသည်ဖြင့် ဆွေးနွေးမှုများ ရှိသည့်အပြင် ဘဏ္ဍာငွေ အနေအထားအားဖြင့်လည်း ကန့်သတ်မှု ရှိပါကြောင်း၊ ထို့ကြောင့် မိမိတို့သည် ဦးစားပေး အစီအစဉ် ဆောင်ရွက်ရပါကြောင်း၊ မိမိ တင်ပြချက်တွင် ဆောင်ရွက်ပေးနိုင်ခြင်း မရှိပါဟု မဖြေပါကြောင်း၊ ဦးစားပေး စာရင်းတွင် မပါဝင်သေးကြောင်း၊ မိမိတို့ ပညာရေး ဝန်ကြီးဌာနသည် ကိုယ်စားလှယ်တော်ကြီး၏ ဆန္ဒ၊ ဒေသခံပြည်သူများ၏ ဆန္ဒ၊ လူငယ်လူရွယ်များ၏ ဆန္ဒကို ဖြည့်ဆည်းပေးနိုင်ရန် ၎င်းကျောင်းကို အဆင့်တိုးမြှင့်ပေးရန်အတွက် တတ်နိုင်သမျှ၊ ကိုယ်စွမ်းဉာဏ်စွမ်း ရှိသမျှ ကြိုးပမ်းဆောင်ရွက်ပေးမည်ဖြစ်ပါကြောင်း ဖြေကြားပါသည်။