(င)-လယ်ယာမြေ စီမံခန့်ခွဲရေးနှင့် စာရင်းအင်း ဦးစီးဌာနအနေဖြင့် မြေကြီးမြေပုံ မှန်ကန်ရေးအတွက် မည်ကဲ့သို့ စီမံခန့်ခွဲ အကောင်အထည်ဖော် ဆောင်ရွက်နေသည်ကို သိလိုခြင်းနှင့်စပ်လျဉ်းသည့် မေးခွန်း

လယ်ယာမြေစီမံခန့်ခွဲရေးဦးစီးဌာန (ယခင် ကြေးတိုင်နှင့် မြေစာရင်းဦးစီးဌာန) မှ အဓိကအားဖြင့် နိုင်ငံ၏ လယ်ယာစိုက်ပျိုးမြေများ မြေကြီး မြေပုံမှန်ကန်စေရန် မြန်မာနိုင်ငံ တစ်ဝန်းလုံးတွင် ကွင်းပေါင်း ၉၃၇၀၀ ကျော်၊ ဧရိယာအားဖြင့် ဧရိယာဧက သန်း ၅၀.၅၇ ကျော်ကို ကွင်းဖွဲ့ပြီး ကွက်စိတ်မြေပုံများ ထုတ်ပေးထားပြီး ဖြစ်ကြောင်း၊ ၎င်းကွတ်စိတ် မြေပုံများသည် ဦးပိုင် တစ်ခုချင်းအလိုက် စိုက်ပျိုးလုပ်ကိုင်သည့် ဧရိယာများကို မှတ်တမ်းတင် စာရင်းကောက်ယူပြုစုမှု ဖြစ်ကြောင်း၊ လယ်ယာကဏ္ဍ စိုက်ပျိုးထုတ်လုပ်မှုစာရင်းနှင့် မြေအသုံးချမှု စာရင်းများ မှန်ကန်စွာ စာရင်းကောက်ယူပြုစုနိုင်ရန်အတွက် ဖြစ်ကြောင်း၊ ထိုကဲ့သို့ ဆောင်ရွက်သည့်အချိန်တွင် မြန်မာနိုင်ငံမြေစာရင်း လက်စွဲဥပဒေအခန်း(၁၉) မြေတိုင်းတာခြင်း ပြဋ္ဌာန်းချက်နှင့်အညီ ဆောင်ရွက်မှု ဖြစ်ပါကြောင်း၊ ယခုအချိန်တွင် လွှတ်တော်ကိုယ်စားလှယ်ကြီး မေးမြန်းသည့် မိမိမြေပုံ မှန်ကန်ရေးသည် အဓိက အရေးပါသည် ဖြစ်သည့်အတွက် လက်ရှိဆောင်ရွက်ရသည့် လုပ်ငန်းရပ်များအတွက်ကို အခြေခံကျသည့် လုပ်ငန်းစဉ်ကြီးဖြစ်သည့်အချက်သည် မမှားကြောင်း၊ မိမိတို့ မြေတိုင်းတာခြင်း ဆောင်ရွက်သည့်အချိန်တွင် အခြေခံသဘောတရားမတူညီသည့် လုံးဝန်း သည့် ကမ္ဘာ့မြေမျက်နှာပြင်ကို ညီညာပြန့်ပြူးသည့်စက္ကူပြင်ပေါ်တွင် ဖော်ပြနိုင်ရန် နည်းလမ်း အမျိုးမျိုးဖြင့် တိုင်းတာတွက်ချက်ရေးဆွဲခြင်း ဖြစ်ကြောင်း၊ မြေတိုင်းတာပုံထုတ်ပြီးသည့် မြေပုံများသည် လူများ၏ ပြုပြင်ပြောင်းလဲမှုများ၊ သဘာဝအကြောင်းတရားများ၊ ဒေသဖွံ့ဖြိုး တိုးတက်ရေး စီမံကိန်းလုပ်ငန်းများနှင့် စိုက်ပျိုးမြေဧရိယာ တိုးချဲ့လုပ်ကိုင်မှုများအတွက် လက်ရှိ မြေပြင်အခြေအနေသည် အစဉ်ပြောင်းလဲမှု ရှိကြောင်း၊ ထို့ကြောင့် အစဉ်အမြဲ မှန်ကန်နိုင်ရေး အတွက်တိုင်းတာမှုကို ဆောင်ရွက်ရမည့်အနေအထား ဖြစ်ကြောင်း၊ မြေပြင်အခြေအနေနှင့် မြေပုံ အစဉ်အမြဲ ကိုက်ညီနေမှုဆိုသည့်အချက်သည် လွယ်ကူမှုမရှိနိုင်သော်လည်း မြေပြင်အခြေအနေ နှင့် မြေပုံတွင် ဖော်ပြထားမှုများ ကွဲလွဲချက်မရှိစေရန် မြေကြီးမြေပုံ ကိုက်ညီမှန်ကန်စေရန် မိမိတို့ လယ်ယာမြေ စီမံခန့်ခွဲရေးနှင့် စာရင်းအင်းဦးစီးဌာနသည် နှစ်စဉ်မြေတိုင်း စီမံချက်များဖြင့် အကောင်အထည်ဖော် ဆောင်ရွက်လျက် ရှိကြောင်း၊

လယ်ယာမြေ စီမံခန့်ခွဲရေးနှင့် စာရင်းအင်းတို့သည် မြေကြီး၊ မြေပုံမှန်ကန်ရေး လုပ်ငန်းများကို ဆောင်ရွက်ရန် မိမိတို့ဌာနတွင် ခွဲဝေရရှိသည့် ဘဏ္ဍာရန်ပုံငွေ၊ လက်ရှိဝန်ထမ်း ခန့်ထားမှု အခြေအနေအပေါ်တွင်အမှီပြုပြီး ဌာန၏သုံးစွဲနိုင်သည့် ပစ္စည်းကိရိယာအင်အား တန်ဆာပလာ များနှင့် ဆောင်ရွက်နေရမှု အခြေအနေ ဖြစ်ကြောင်း၊  ၂၀၁၃-၂၀၁၄ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ်အထိ ကွင်းပေါင်း ၂၈၀၀၀ ကျော်ကို မြေတိုင်းတာ ဆောင်ရွက်ထားပြီး ဖြစ်ကြောင်း၊ လက်ရှိ ၂၀၁၈-၁၉ ဘဏ္ဍာနှစ်တွင် ကွင်းပေါင်း ၅၀၀၀ ကျော်ကို နေပြည်တော်နှင့် တိုင်းဒေသကြီး/ပြည်နယ် အသီးသီးတွင် တိုင်းတာဆောင်ရွက်လျက်ရှိကြောင်း

မြေကြီး မြေပုံမှန်ကန်မှုရှိစေရန် ဆောင်ရွက်သည့်အချိန်တွင် ယခင်သမားရိုးကျ မြေတိုင်းတာခြင်းနှင့် မြေပုံရေးဆွဲခြင်း စနစ်အနေဖြင့် ဆောင်ရွက်ခြင်း ဖြစ်သည့်အတွက် လူအင်အား အသုံးပြုရမှု ရှိကြောင်း၊ မြေပုံရေးဆွဲ ထုတ်လုပ်ရန်အတွက် အချိန်ကာလများ ရယူရကြောင်း၊ တိုင်းတာရရှိသည့် မြေပုံများသည် စက္ကူမြေပုံများ ဖြစ်သည့်အတွက် မြေပြင်ပြောင်းလဲမှု အခြေအနေများကို အချိန်နှင့်တစ်ပြေးညီ မှတ်တမ်းတင်နိုင်စေရန် အကန့်အသတ်များ ရှိနေသည့်အတွက် တိကျမှန်ကန်မှု အားနည်းခြင်းစသည့် အခြေအနေမျိုးများ ရှိခဲ့ကြောင်း၊ ၎င်းအားနည်းချက်များကို ကျော်လွှားပြီး မိမိတို့ နိုင်ငံတော်မှ အကောင်အထည်ဖော် ဆောင်ရွက်လျက်ရှိသည့် e-government လုပ်ငန်းနှင့် One Map Myanmar စီမံကိန်း အကောင်အထည်ဖော် ဆောင်ရွက်နေသည့် လုပ်ငန်းများနှင့် ဆက်စပ်ပြီး အသုံးပြု ဆောင်ရွက်နိုင်စေရန် စီမံလုပ်ကိုင်လျက်ရှိကြောင်း၊ ထိုကဲ့သို့ ဆောင်ရွက်သည့်အချိန်တွင် ၂၀၁၃-၂၀၁၄ ခုနှစ်မှစပြီး ခေတ်မီမြေတိုင်း ပစ္စည်းကိရိယာများ အသုံးပြု မြေတိုင်းတာမှုနှင့် မြေပုံရေးဆွဲခြင်းဆိုင်ရာ နည်းစနစ်များနှင့် UTM စနစ်သုံး ဒီဂျစ်တယ်မြေပုံများ တိုင်းတာ ထုတ်လုပ်မှုကို နှစ်စဉ်ရန်ပုံငွေ ခွင့်ပြုချက်အရ အစီအမံများ ချမှတ်ဆောင်ရွက်လျက်ရှိကြောင်း၊ အချိန်တိုအတွင်းတွင် မှန်ကန်တိကျသည့် ဒီဂျစ်တယ်မြေပုံကို ရရှိစေရန်အတွက် Remote Sensing and GIS နည်းပညာဖြင့် အသုံးပြုပြီ ဂြိုလ်တုဓာတ်ပုံများ ရယူအသုံးပြုပြီး မြေပုံထုတ်လုပ်ခြင်းကို ဆောင်ရွက်လျက်ရှိကြောင်း၊

တစ်နိုင်ငံလုံး အတိုင်းအတာဖြင့် မြေကြီးမြေပုံ မှန်ကန်ရေး ဆောင်ရွက်နိုင်စေရန်အတွက် လွှတ်တော်ကိုယ်စားလှယ်ကြီး မေးမြန်းသည့်အတိုင်း လိုအပ်ချက်အရ မိမိတို့တွင် ဝန်ထမ်းအင်အား၊ ခေတ်မီမြေတိုင်းကိရိယာနှင့် ဆက်စပ်ပစ္စည်းများ၊ ဘဏ္ဍာရန်ပုံငွေများစွာ ကျခံသုံးစွဲရမှုနှင့် အချိန်ကာလ လိုအပ်ချက်များ ရှိနေသည့် အနေအထားတွင် ရှိသည့် လက်ရှိ ဝန်ထမ်းအင်းအားဖြင့် ခွင့်ပြုရန်ပုံငွေများ အကောင်းဆုံးဖြစ်စေရန် ကြိုးပမ်း ဆောင်ရွက် လျက် ရှိကြောင်း၊

လယ်ယာမြေ စီမံခန့်ခွဲရေးနှင့် စာရင်းအင်းဦးစီးဌာနဖြင့် လက်ရှိအသုံးပြုလျက်ရှိသည့် ကွင်းမြေပုံ များ မြေကြီးနှင့် မြေပုံအစဉ်အမြဲ မှန်ကန်မှုရှိပါက နိုင်ငံတော်၏ မြေယာဆိုင်ရာ မူဝါဒများ ချမှတ်သည့်အချိန်၊ လယ်ယာကဏ္ဍဖွံ့ဖြိုးမှုဆိုင်ရာ စီမံကိန်းများ အကောင် အထည်ဖော် ဆောင်ရွက်သည့်အချိန်၊ ဖြစ်ပေါ်လာသည့် အခြေအနေ အခက်အခဲများကို ဖြေရှင်းပေးသည့် အချိန်တွင် မြေအသုံးချမှုဆိုင်ရာ စာရင်းအင်းနှင့် စိုက်ပျိုး ထုတ်လုပ်မှုဆိုင်ရာ စာရင်းအင်း အချက်အလက်များသည် တိကျမှန်ကန်မည်ဖြစ်သည့် အခြေအနေ ဖြစ်ကြောင်း၊ ထို့ကြောင့် လယ်ယာမြေ စီမံခန့်ခွဲရေးနှင့် စာရင်းအင်း ဦးစီးဌာနဖြင့် မြေကြီးမြေပုံနှင့် မြေစာရင်းမှန်ကန်စေရန်၊  ဝန်ထမ်းအင်အား၊ ရန်ပုံငွေရရှိမှုအပေါ် အခြေခံပြီး နှစ်စဉ် စီမံချက်များကို အထူးကြိုးစား ချမှတ်ဆောင်ရွက်လျက်ရှိကြောင်း၊ ယခုအချိန်တွင် ဌာန၏ ဝန်ထမ်းအင်အား ဖွဲ့စည်းပုံ တိုးမြှင့်ခွင့်ပြုချက်ကို နိုင်ငံတော်အစိုးရက ခွင့်ပြုထားပြီးဖြစ်သည့်အတွက် မိမိတို့တွင် ရှိသည့် ဝန်ထမ်းအင်အားများကို အပြည့်အဝ ခန့်ထားနိုင်ပြီး ရန်ပုံငေ ွခွဲဝေရရှိမှုအပေါ် မူတည်ပြီး လုပ်ငန်းများကို ယခုထက် ပိုမိုလျင်မြန်စွာ အကောင်အထည်ဖော် ဆောင်ရွက်သွားမည် ဖြစ်ကြောင်း ရှင်းလင်းဖြေကြားပါသည်။

ဦးတင်ကိုကိုဦး(ခ) ဦးအတွတ် (ဘီးလင်း မဲဆန္ဒနယ်) က ဆက်စပ်မေးခွန်း မေးမြန်းပါသည်။

One Map Myanmar နှင့် Digital Map ကို သေသေချာချာ လုပ်နေသည့်အကြောင်း၊ ဝန်ထမ်းများလည်း ထပ်မံဖြည့်စွက်ထားသည်ဟု ပြောသည့်အတွက် ၎င်းဝန်ထမ်းများနှင့် ပတ်သက်ပြီး One Map Myanmar နှင့် ချိတ်ဆက်ပြီး အသုံးပြုနိုင်စေရန် နည်းပညာနှင့် ပတ်သက်ပြီး ပြင်ဆင်မှုများ မည်ကဲ့သို့လုပ်ဆောင်ထားသည်ကို ဆက်စပ်မေးမြန်းပါသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ၊ ဒုတိယဝန်ကြီး ဦးလှကျော်

ရန်ကုန်တိုင်းဒေသကြီး တိုက်ကြီးမြို့နယ်တွင် သင်တန်းကျောင်းဖွင့်လှစ်ထားကြောင်း၊ ဝန်ထမ်း များတွင် ခွင့်ပြုအင်အားနှင့်အညီ အသုတ်လိုက်၊ အသုတ်လိုက် မိမိတို့ ခန့်ထားပြီး၊ တစ်ပြိုင်တည်း သင်တန်းကို အခြေခံသင်တန်းမှစပြီး တိုက်ကြီးတွင်ရှိသည့် ဗဟိုမြေစာရင်း လေ့ကျင့် သင်တန်းကျောင်းတွင် သင်တန်းပေးလျက် ရှိကြောင်း၊ ထိုမှတစ်ဆင့် အဆင့်မြင့်သည့် ဝန်ထမ်း များကို အဆင့်မြင့်ပညာရပ်များ၊ အဆင့်မြင့်ပညာရပ်တွင် Remote Sensing and GIS နည်းပညာကို ထိတွေ့ဆက်စပ်ပြီး သုံးစွဲနိုင်သည့် အခြေအနေမျိုးရရှိစေရန်အတွက် စွမ်းရည်မြှင့်တင်သည့် သင်တန်းများကို ဖွင့်လှစ်ပေးလျက် ရှိပါကြောင်း ပြန်လည်ဖြေကြားပါသည်။