ဘုတ်ပြင်းမြို့၊ အခြေခံပညာအထက်တန်းကျောင်း၊ နဝရက်(ခန်းမ) အဆောက်အဦနေရာတွင်(၁၅၀x ၃၀x ၂၂)ပေ အရွယ်အစားရှိ စံကိုက်(၂)ထပ် ကျောင်းဆောင်တစ်ဆောင် တည်ဆောက်ပေးရန် အစီအစဉ်ရှိ/မရှိနှင့် စပ်လျဉ်း၍ မေးမြန်းလိုပါကြောင်း၊
ဘုတ်ပြင်းမြို့ရှိ အခြေခံပညာအထက်တန်းကျောင်း၏ စာသင်ဆောင်အများစုသည် နှစ်သုံးဆယ်နီးပါး သက်တမ်းရှိပြီး အုတ်ညှပ် တစ်ထပ်အဆောက်အဦများသာ ဖြစ်ပါကြောင်း၊ တံခါးပေါက်အများစုသည် ပျက်စီးနေပြီး ဖြစ်သလို ပြန်လည်ပြုပြင်ထားရပါကြောင်း၊ ကျောင်းဝင်းအကျယ်က ၅.၃၅ ဧကရှိပြီး ကျောင်းဆောင် ၁၀ ဆောင်ရှိပြီး ကျောင်းဆောင် (၃)ဆောင်သည် သိပ္ပံခန်း၊ ကွန်ပျူတာခန်း၊ စတို၊ ဝန်ထမ်း အိမ်ရာ၊ ရုံးခန်းအဖြစ် အသုံးပြုနေရသည့်အတွက် စာသင်ဆောင် ခုနစ်ဆောင်မှ စာသင်ခန်း ၂၄ ခန်းကိုသာ အသုံးပြုစာသင်ကြားနေရပါကြောင်း၊
၂၀၁၈-၂၀၁၉ ပညာသင်နှစ်တွင် ကျောင်းသားကျောင်းသူ ၁၃၁၅ ဦး၊ ၂၀၁၉-၂၀၂၀ ပညာသင်နှစ်တွင် ၁၃၈၄ ဦး တိုးတက်ပညာသင်ကြားလျက်ရှိပါကြောင်း၊ စာသင်ခန်းတစ်ခန်းကို ပျမ်းမျှ ၅၈ ဦးနှုန်းခန့်ရှိပြီး တချို့အတန်းများတွင် ကျောင်းသား ၇၀ ကျော် ၈၀ နီးပါးအထိ ကြပ်တည်းစွာပညာသင်ကြားနေရပါကြောင်း၊ စာသင်ခန်း ၂၄ ခန်းအနက် ၁၉ ခန်းသည် သတ်မှတ်ကျောင်းသားဦးရေ ၄၀ ဦးထက် ပိုလျှံစွာ ထားရှိသင်ကြားနေရပါကြောင်း၊ နဝရက်(ခန်းမ)သည်လည်း ၁၂၀ ပေ၊ ၆၀ ပေ အုတ်တံတိုင်းသံဇကာကာ အဆောက်အဦဖြစ်ပြီး ဂိုလ်ဒေါင်ပျက်တစ်လုံးသာသာ အဆောက်အဦဖြစ်ပါကြောင်း၊
ဘုတ်ပြင်းမြို့၏ အဓိကကျက်သရေဆောင်ဖြစ်ရမည့် ဘုတ်ပြင်းမြို့ အခြေခံပညာ အထက်တန်း ကျောင်းကြီး၏ ဟောင်းနွမ်းပျက်စီးနေသော ကျောင်းဆောင်များတွင် ကြပ်တည်းစွာပညာသင်ကြားနေရသည့် မြို့၏ သားသမီးများအတွက် မြို့မိမြို့ဖမြို့သူမြို့သားများမှာ များစွာ စိတ်နှလုံးမချမ်းမြေ့ဖြစ်နေကြရပါကြောင်း၊ သို့ဖြစ်ပါ၍ ရုံးခန်း၊ ဟောခန်း၊ ဆရာဆရာမနားနေခန်း၊ စာကြည့်တိုက်တို့ပြည့်စုံစွာပါဝင်သည့် စံကိုက်နှစ်ထပ် ကျောင်းဆောင်တစ်ဆောင် တည်ဆောက်ပေးနိုင်ခြင်းရှိ/မရှိ သိရှိလိုပါကြောင်း မေးမြန်းပါသည်။
ပညာရေးဝန်ကြီးဌာနအနေဖြင့် ၂၀၁၉-၂၀၂၀ ဘဏ္ဍာရေးနှစ် ငွေလုံးငွေရင်းတည်ဆောက်ရေးရန်ပုံငွေဖြင့် တနင်္သာရီတိုင်းဒေသကြီးအတွင်း အသစ်ဆောက်လုပ်မည့် ကျောင်းတစ်ကျောင်း၊ အန္တရာယ်ရှိကျောင်းဆောင် အဖြစ်သိမ်းပြီး အသစ်ပြန်ဆောက်မယ့် ကျောင်း ၁၈ ကျောင်း၊ ကျောင်းသားဦးရေတိုးတက်လာ၍ အသစ်ဆောက်ပေးမည့်ကျောင်း ၂၀ ကျောင်း၊ သိပ္ပံဆောင်ဆောက်လုပ်ရန် ၂ ကျောင်း၊ စာကြည့်တိုက် ဆောက်လုပ်ရန် ၃ ကျောင်း စုစုပေါင်းအခြေခံပညာကျောင်းပေါင်း ၄၄ ကျောင်းကို ရန်ပုံငွေ ဦးစားပေးအဆင့်များခွဲခြားပြီး လျာထားဆောင်ရွက်ပြီး ဖြစ်ပါကြောင်း၊
ထိုသို့ လျာထားဆောင်ရွက်ပြီးပြီး လုပ်ငန်းများတွင် ဘုတ်ပြင်းမြို့နယ်၊ ဘုတ်ပြင်း အခြေခံပညာ အထက်တန်းကျောင်းအတွက် နှစ်ထပ် ကျောင်းဆောင်သစ်တစ်ဆောင် အသစ်ဆောက်လုပ်ရန်နှင့် စာကြည့်တိုက်အသစ်ဆောက်လုပ်ရန် ရန်ပုံငွေကိုလည်း ၂၀၁၉-၂၀၂၀ ဘဏ္ဍာရေးနှစ်အတွင်း လျာထားပြီးဖြစ်ပါကြောင်းနှင့် ခွင့်ပြုချက် ရရှိပါက ဆောက်လုပ်ပေးမည်ဖြစ်ပါကြောင်း ပြန်လည်ဖြေကြားပါသည်။