(င)-ဒဂုံမြို့သစ်(အရှေ့ပိုင်း)မြို့နယ်အတွင်းရှိ ဒေသခံများ အဓိကအသုံးပြုနေသော ကနောင်မင်းသားကြီး လမ်း၊ ဦးမြူလမ်း၊ အင်းဝလမ်း၊ မင်းရဲကျော်စွာလမ်းတို့မှာ ဆိုးရွားစွာပျက်စီးနေပါသဖြင့် ပြန်လည်ပြုပြင် ပေးရန်အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဦးနေကျော် (ဒဂုံမြို့သစ် (အရှေ့ပိုင်း) မဲဆန္ဒနယ်)

ရန်ကုန်တိုင်းဒေသကြီး၊ ဒဂုံမြို့သစ် (အရှေ့ပိုင်း) မြို့နယ်အတွင်းရှိ မင်းရဲကျော်စွာလမ်းမကြီးနှင့် ဦးမြူလမ်းတို့အား ဆက်သွယ်ထားပြီး ရပ်ကွက်ကြီးလေးခုတို့မှ အဓိကအသုံးပြုနေကြသော ၂၃၀၀ ပေရှည်လျားပြီး အကျယ် ၂၄ ပေ ရှိသည့် ကနောင်မင်းသားကြီးလမ်းတွင် ယခုအခါ ဆိုးရွားစွာ ပျက်စီးနေခြင်း၊ အင်းဝလမ်းနှင့် ကျန်စစ်သားလမ်းတို့အား ဆက်သွယ်ထားပြီး ရပ်ကွက်ငါးခုမှ အဓိက အသုံးပြုနေရသော ၁၁၉၀၀ ပေ ရှည်လျားပြီး အကျယ် ၂၄ ပေရှိသော ဦးမြူလမ်းမှာလည်း ဆိုးရွားစွာ ပျက်စီးလျက်ရှိခြင်း၊ မင်းရဲကျော်စွာလမ်းနှင့် အမှတ် (၂) လမ်းတို့အား ဆက်သွယ်ထားပြီး ရပ်ကွက် လေးခုနှင့် ဌာနဆိုင်ရာရုံးများ အဓိကအသုံးပြုနေကြရသော ၇၉၀၀ ပေရှည်လျားပြီး အကျယ် ၂၄ ပေရှိ အင်းဝလမ်းမှာလည်း ဆိုးရွားစွာပျက်စီးလျက်ရှိခြင်း၊ အနော်ရထာလမ်းနှင့် အမှတ် (၇) လမ်းမတို့အား ဆက်သွယ်ထားပြီး ၈၂၅၀ ပေရှည်လျားပြီး အကျယ် ၂၄ ပေရှိသော မင်းရဲကျော်စွာလမ်း၏ တစ်စိတ်တစ်ပိုင်းမှာလည်း ဆိုးရွားစွာပျက်စီးလျက်ရှိခြင်း၊ အထက်ပါလမ်းများ ပျက်စီးနေမှုကို လွန်ခဲ့သော တစ်နှစ်ခန့်က စည်ပင်သာယာအဖွဲ့နှင့် ဒေသခံများပူးပေါင်း၍ ကိုယ်ထူကိုယ်ထအသေးစား ပြင်ဆင်မှုများ လုပ်ဆောင်ခဲ့ကြပါကြောင်း၊ မကြာသေးမီက အဆိုပါလမ်းများသည် ပြန်လည်၍ ပျက်စီးသွားပါသဖြင့် ပြန်လည်ပြင်ဆင် ပေးနိုင်ရေးအတွက် မြို့နယ်စည်ပင်သာယာမှ တာဝန်ရှိသူများနှင့် သွားရောက်ဆွေးနွေးသည့်အခါ အဆိုပါလမ်းလေးလမ်းကို ခင်းပေးရန်ကိစ္စမှာ မြို့နယ်စည်ပင် သာယာရေးကော်မတီနှင့် မသက်ဆိုင်ကြောင်း၊ မြို့ပြအိုးအိမ်ဖြင့်သာ သက်ဆိုင်ကြောင်း သိခဲ့ရပါသည်။ ယခုလို အိုးအိမ်တွင်သာ တာဝန်ရှိသည်ဟု သိရသည့်အတွက် အိုးအိမ်မှတာဝန်ရှိသူများနှင့် သွားရောက်ဆွေးနွေး ခဲ့ကြပါကြောင်း၊ အဆိုပါ လမ်းလေးလမ်းကို ပြင်ဆင်ပေးရန် ကိစ္စမှာ အိုးအိမ်နှင့်မသက်ဆိုင်ကြောင်း၊ စည်ပင်သာယာသို့ လွှဲပြောင်းပေးပြီး ဖြစ်ကြောင်း ပြန်လည်ပြောကြားခဲ့ရာ ဘောလီဘောပွဲ ကြည့်ရသကဲ့သို့ ဖြစ်ခဲ့ရပါကြောင်း၊ သို့ဖြစ်ပါ၍ အဆိုပါ လမ်းများကို ပြင်ဆင်ပေးရန် မည်သူ့တွင်တာဝန်ရှိ၍ မည်သည့်အချိန်တွင် ဆောင်ရွက်ပေး မည်ကို သိလိုပါသဖြင့် ဒေသခံများ၏ကိုယ်စား မေးမြန်းပါသည်။