တိုက်နယ်ဆေးရုံများရှိသော စေတီပြင်ကျေးရွာသည် ရသေ့တောင်မြို့နှင့် ၁၀ မိုင်၊ စစ်တွေမြို့နှင့် မိုင် ၆၀ အကွာတွင် တည်ရှိပါကြောင်း၊ စစ်တွေနှင့်ရသေ့တောင်မြို့ကို သွားမည်ဆိုပါက ရေလမ်းခရီး တစ်ခုတည်းကိုသာ အသုံးပြုသွားလာကြရပါကြောင်း၊ ၎င်းတိုက်နယ်ဆေးရုံကို ကျေးရွာပေါင်း ၄၈ ရွာမှ လူဦးရေပေါင်း ၃၅၀၀၀ ကျော်က အားကိုးအားထားပြုနေကြရပါကြောင်း၊ အဆိုပါဆေးရုံတွင် တာဝန်ကျနေသော တာဝန်ခံဆရာဝန်သည် ၂၀၁၈ ခုနှစ်၊ ဇွန်လ ၈ ရက်နေ့က ပြောင်းရွှေ့ သွားပါကြောင်း၊ ယနေ့အချိန်အထိ လူစားမရောက်ရှိသေးပါကြောင်း၊ လတ်တလောတွင် ရသေ့တောင် မြို့ဆေးရုံတွင် တာဝန်ထမ်းဆောင်နေသော လက်ထောက်ဆရာဝန်တစ်ဦးကို ပူးတွဲလာရောက် တာဝန်ထမ်းဆောင်စေခဲ့သည်ဟု သိရှိရပါကြောင်း၊ ၎င်းဆရာဝန်ကလည်း ရသေ့တောင်မြို့ကို သွားလိုက်လာလိုက်နှင့် အချိန်ပြည့်တာဝန်ထမ်းဆောင်နိုင်ရန် မပေးပါကြောင်း၊ ရသေ့တောင်မြို့ ပေါ်တွင် မြို့နယ်ဆရာဝန် တစ်ဦး၊ လက်ထောက်ဆရာဝန် နှစ်ဦး ရှိပါကြောင်း၊ မြို့နယ်ဆရာဝန်က သင်တန်းတက်ရန် သွားရ၊ အစည်းအဝေးသွားရနှင့် မြို့ပေါ်တွင်နေရသည်မှာ မရှိသလောက် ဖြစ်ပါကြောင်း၊ လက်ထောက်ဆရာဝန် နှစ်ဦးရှိသည့်အနက် တစ်ဦးကိုအခြားမြို့နယ်သို့ ပူးတွဲတာဝန် ထမ်းဆောင်စေခြင်းအားဖြင့် တစ်မြို့နယ်လုံး၏ ကျန်းမာရေးပြုစုစောင့်ရှောက်မှုကို မည်သို့မျှလွှမ်းခြုံ နိုင်မည် မဟုတ်ပါကြောင်း၊ ကျန်းမာရေးဝန်ကြီးဌာနကဲ့သို့ အရေးကြီးသည့်ဌာနတစ်ခုအနေဖြင့် ဆေးရုံ၊ဆေးခန်းများနှင့် အလှမ်းဝေးကွာသည့်နေရာများတွင် ပြောင်းရွှေ့အမိန့်များထုတ်မည်ဆိုပါက ပြောင်းရွှေ့ဝင်ရောက်လာမည့်ပုဂ္ဂိုလ်နှင့် ပြောင်းရွှေ့ထွက်ခွာသွားမည့်ပုဂ္ဂိုလ်များကို တစ်ပြိုင်တည်း အမိန့်ထုတ်ပေးရန် လိုအပ်ပါကြောင်း၊ လူစားမရောက်ရှိဘဲ လက်ရှိတာဝန်ထမ်းဆောင်နေသော ဝန်ထမ်းကို ပြောင်းရွှေ့စေလိုက်ခြင်းအားဖြင့် ဒေသခံပြည်သူများသည် ကျန်းမာရေးအတွက် အခက်အခဲများကို ရင်ဆိုင်ကြုံတွေ့နေကြရပါကြောင်း၊ မကြာသေးမီက စေတီပြင်ကျေးရွာအနီးရှိ ရွာတစ်ရွာတွင် ဆင်ရိုင်းနင်းပြီး လယ်သမားတစ်ဦးသေဆုံးသွားခဲ့ပါကြောင်း၊ သေဆုံးသူ နှင့်ပတ်သက်ပြီး သေမှုသေခင်းအတွက် Post Motel လုပ်ရန် ဆရာဝန်မရှိသည့်အတွက် အခက်အခဲ များစွာ ကြုံတွေ့ခဲ့ကြရပါကြောင်း၊ မြို့ကြီးပြကြီးများတွင် ဆေးရုံ၊ ဆေးခန်းများ များပြားနေသော်လည်း မိမိတို့၏မဲဆန္ဒနယ်မြေကျေးရွာများတွင် အပြင်ဆေးခန်းမရှိသည့်အတွက် အစိုးရဆေးခန်းများကိုသာ အဓိကအားကိုးနေကြရပါကြောင်း၊ ထို့ကြောင့် ဆေးရုံ၊ ဆေးခန်းနှင့်အလှမ်းကွာဝေးသော မိမိတို့၏ ကျေးရွာနေ ပြည်သူများ၏ ကျန်းမာရေးကို အချိန်ပြည့်စောင့်ရှောက်ပေးမည့် တိုက်နယ်ဆရာဝန် တစ်ဦး ရှိကိုရှိနေသင့်ပါကြောင်း၊
၎င်းတိုက်နယ်ဆေးရုံကို ၁၉၇၇ ခုနှစ်မှစတင်ပြီး ဖွင့်လှစ်ခဲ့ပါကြောင်း၊ ယခုအချိန်တွင် ၎င်းဆေးရုံ အတွက် ရင်ခွဲရုံတစ်ရုံကလည်း လိုအပ်လျက်ရှိပါကြောင်း၊ ကျေးရွာလူထုနှင့် ဆေးရုံကြီးကြပ်မှု ကော်မတီတို့က ညှိနှိုင်းပြီး ရင်ခွဲရုံတည်ဆောက်မည့်မြေနေရာကိုလည်း လျာထားပြီးဖြစ်ပါကြောင်း၊ သို့ဖြစ်ပါ၍ ရသေ့တောင်မြို့နယ်၊ စေတီပြင်တိုက်နယ်ဆေးရုံတွင် လစ်လပ်လျက်ရှိသော လက်ထောက် ဆရာဝန်နေရာအတွက် အမြန်ဆုံးအစားထိုးခန့်အပ်ပေးရန်နှင့် ယင်းဆေးရုံအတွက် ရင်ခွဲရုံတစ်ရုံ ဆောက်လုပ်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။
ရသေ့တောင်မြို့နယ် စေတီပြင်အတွက် ဆရာဝန်တစ်ဦးကို ရသေ့တောင်မှ ၁-၁၁-၂၀၁၈ ရက်နေ့က တွဲဖက်တာဝန်ထားပါကြောင်း၊ တွဲဖက်ဆိုသည်မှာ ထုံးစံအတိုင်း ၎င်း၏ကိုယ်ပိုင်ဆေးရုံမဟုတ်သည့် အတွက် ယာယီသဘောဖြစ်သည့်အတွက် စိတ်ဓာတ်ရေးရာအရ၊ ပါမစ်နစ်ကျသော သူလောက် မဖြစ်ပါကြောင်း၊ မိမိအနေဖြင့် ပါမစ်နစ်ကျရန်အတွက် အဆင့်ဆင့်လုပ်ရပါကြောင်း၊ ယနေ့ ၁ နာရီတွင် မိမိတို့ EC တွင် အားလုံးအဆင်သင့် ဖြစ်ပါကြောင်း၊ ယနေ့ဆောင်ရွက်ပြီး စေတီပြင်တိုက်နယ် ဆေးရုံတွင် ဆရာဝန်တစ်ဦးကို မကြာခင်တွင် ခန့်အပ်ပေးမည်ဖြစ်ပါကြောင်း၊ ခက်ခဲသောဒေသတွင် မလာသည့်အတွက် တစ်နှစ်လျှင် ဆရာဝန်ခေါ်သည့် ၆ ရာခိုင်နှုန်းကို ခက်ခဲဒေသက လူများခေါ် ပါကြောင်း၊ ယခုနှစ်တွင် ၇၂ ဦးခေါ်ထားပါကြောင်း၊ ၎င်းတို့ပြည်နယ်တိုင်းတွင် အနည်းဆုံး ခုနစ်နှစ် သို့မဟုတ် ၅ နှစ်ပြန်လုပ်ရမည် ဖြစ်ပါကြောင်း၊ ဆရာဝန်လိုအပ်ချက်များ အဆင်ပြေသွားမည် ဖြစ်ပါကြောင်း၊ နှစ်စဉ် ခေါ်နေပါကြောင်း၊ နောက်နှစ်တွင် စတင်ထွက်ရှိတော့မည် ဖြစ်ပါကြောင်း၊ တက်ရောက်နေသောသူ များစွာရှိနေပါကြောင်း၊ တိုင်းဒေသကြီးနှင့် ပြည်နယ်အားလုံးက ခက်ခဲသောဒေသက တိုက်နယ်ဆေးရုံကိုခန့်သည့် ဆရာဝန်ကို သေသေချာချာ ရှာရပါကြောင်း၊ ခွဲစိတ်ကုသမှုကို တတ်ကျွမ်းသောသူကို လွှတ်မှသာလျှင်အကျိုးရှိပါကြောင်း၊ ယခုလာမည့် ဆရာဝန်သည် ခွဲစိတ်မှုတွင်လည်း ကျွမ်းကျင်သောဆရာဝန်ဖြစ်ပါကြောင်း၊
ရသေ့တောင်မြို့နယ်၊ စေတီပြင်တိုက်နယ်ဆေးရုံတွင် လိုအပ်ချက်အရ ရေပိုက်လိုင်းတပ်ဆင်ခြင်း လုပ်ငန်းကိုလည်း ပြင်/ထိန်းစရိတ်မှ ပိုက်ဆံခွဲဝေပြီး စက်တင်ဘာ ၃၀ ရက်နေ့တွင် ပြီးစီးသွားပြီ ဖြစ်ပါကြောင်း၊ ရင်ခွဲရုံတည်ဆောက်ခြင်းနှင့် ရင်ခွဲရုံကိုဆက်သွယ်သော ကွန်ကရစ်လမ်းပြုလုပ်ခြင်း လုပ်ငန်းအတွက် ၂၀၁၈-၁၉ ဘဏ္ဍာရေးနှစ်တွင် ပြင်ဆင်ထိန်းသိမ်းရေးစရိတ်မှ ၁၆.၂၉ သန်း ခွင့်ပြုပြီးဖြစ်သည့်အတွက် ဆက်လက်ဆောင်ရွက်မည်ဖြစ်ပါကြောင်း၊ ထို့အပြင် မြို့နယ်ဆရာဝန်၊ တိုက်နယ်ဆရာဝန်၊ ဒုဦးစီးမှူးများက အစည်းအဝေးများတက်ရောက်ရသည်နှင့် အချိန်ကုန်ပါကြောင်း၊ ၎င်းတို့သည် အစည်းအဝေးသို့ လာခြင်းအားဖြင့် လူနာများကို ပစ်ပြီးလာရောက်ရသည့်အတွက် တိုင်းဒေသကြီးနှင့် ပြည်နယ်ဦးစီးမှူးများ၊ ညွှန်/ချုပ်များ တက်နိုင်သမျှ အစည်းအဝေးကို မလိုလျှင်မခေါ်ကြရန် မိမိအနေဖြင့်အမိန့်ထုတ်ထားပါကြောင်း၊ ဆက်လက်ပြီး၎င်းအမိန့်ကိုလည်း ၁ ရက်၊ ၂ နှစ်ရက်အတွင်းပြန်ပြီး Request လုပ်မည် ဖြစ်ပါကြောင်း၊ အဆိုပါမြို့နယ်တွင် မြို့နယ်ဆရာဝန်နှင့်တိုက်နယ်ဆရာဝန် နှစ်ဦး၊ သုံးဦးသာရှိသည့်အတွက် မခေါ်ပါကြောင်း၊ မိမိ ထပ်မံ၍အမိန့်သဘောမျိုး အကြောင်းကြားရန်ရှိပါကြောင်း ဖြေကြားပါသည်။