(က)-နိုင်ငံတစ်ဝန်းလုံးတွင် နှစ်(၃၀) အငှားဖြင့်ချထားပေးသော မြေလွတ်၊ မြေလပ်နှင့် မြေရိုင်းဧကပေါင်း မည်မျှရှိသည်ကို သိလိုခြင်းနှင့် စပ်လျဉ်းသည့်မေးခွန်း

နိုင်ငံတစ်ဝန်းရှိ မြေလွတ်၊ မြေလပ်နှင့် မြေရိုင်းများကို စနစ်တကျနှင့် အကျိုးရှိရှိအသုံးချနိုင်ရန် လွန်ခဲ့သည့် ၁၉၉၁ ခုနှစ်ကတည်းက မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဗဟိုအဖွဲ့ကို ဖွဲ့စည်းဆောင်ရွက်ခဲ့ပါကြောင်း၊ ၎င်းအဖွဲ့မှာ တာဝန်နှင့်လုပ်ပိုင်ခွင့်များကို သတ်မှတ်ပြီး အကောင်အထည်ဖော် ဆောင်ရွက်ခဲ့ပါကြောင်း၊ ၂၀၁၂ ခုနှစ်တွင် မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဥပဒေကို သီးခြားဥပဒေတစ်ရပ် ပြဋ္ဌာန်းခဲ့ပြီး ၎င်းဥပဒေအရ မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဗဟိုကော်မတီကို ဖွဲ့စည်းအကောင်အထည်ဖော် ဆောင်ရွက်လျက်ရှိပါကြောင်း၊

မြေလွတ်၊ မြေလပ်နှင့်မြေရိုင်းများကို စိုက်ပျိုးရေး၊ မွေးမြူရေး၊ ဓာတ်သတ္တုထုတ်လုပ်ခြင်းနှင့် အစိုးရခွင့်ပြုထားသည့် ဥပဒေနှင့်ညီညွတ်သော အခြားလုပ်ငန်းများအတွက် လုပ်ပိုင်ခွင့် ချထားပေးခဲ့ရာ ၂၀၁၂ ခုနှစ်၊ မြေလွတ်၊ မြေလပ်နှင့် မြေရိုင်းများစီမံခန့်ခွဲရေး ဥပဒေ မပြဋ္ဌာန်းမီ ယခင် မြေလွတ်၊ မြေလပ်နှင့် မြေရိုင်းများစီမံခန့်ခွဲရေးဗဟိုအဖွဲ့မှ ခွင့်ပြုထားခဲ့သည့် ဧရိယာမှာ ဧကပေါင်း ၂၂၂၀၀၀၀ ကျော်ရှိပါကြောင်း၊ မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဥပဒေ ပြဋ္ဌာန်းပြီးနောက် ဗဟိုကော်မတီက ချထားပေးခဲ့သည့် ဧရိယာမှာ ဧကပေါင်း ၁၀၅၀၀၀ ရှိပါကြောင်း၊ တိုင်းဒေသကြီး/ပြည်နယ် လုပ်ငန်းအဖွဲ့များက ခွင့်ပြုခဲ့သောဧရိယာပေါင်း ဧက ၁၉၀၀၀၊ ၂၀၀၀၀ ခန့်ရှိပါကြောင်း၊ ထို့ကြောင့် မြေလွတ်၊ မြေလပ်နှင့် မြေရိုင်းများ စုစုပေါင်း လုပ်ကိုင်ခွင့်ပြုခဲ့သည့် ဧရိယာစုစုပေါင်းမှာ ဧက ၂၃၀၀၀၀၀ ကျော်ရှိကြောင်း၊

ခွင့်ပြုခဲ့ပြီးသော မြေလွတ်၊ မြေလပ်နှင့် မြေရိုင်းများကို သတ်မှတ်ကာလ လေးနှစ်ပြည့်မြောက်ပြီးသည့် အချိန်အထိ မြေပြင်မှာ အမှန်တကယ် စိုက်ပျိုးလုပ်ကိုင်မှုမရှိသည့် ဧရိယာများကို ခွင့်ပြုမိန့်ပြန်လည် ရုပ်သိမ်း၍ နိုင်ငံတော်အတွက် အကျိုးရှိစွာ ပြန်လည်အသုံးချနိုင်ရေးနှင့် အမှန်တကယ် စိုက်ပျိုးလုပ်ကိုင်ထားသော သတ်မှတ်စည်းမျဉ်းစည်းကမ်း နှင့်အညီ အကောင်အထည်ဖော် ဆောင်ရွက်ထားသည့် မြေဧရိယာများအတွက် ခွင့်ပြုမှုကို ပြန်လည်စိစစ်ဆောင်ရွက်ပေးနိုင်ရေး မိမိတို့ မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးအဖွဲ့က စီမံခဲ့ပါကြောင်း၊ ယခုအစိုးရလက်ထက်တွင် အဆိုပါကိစ္စနှင့်ပတ်သက်၍ အထူးအဖွဲ့များဖွဲ့စည်းပြီး စီစဉ်ဆောင်ရွက်ခဲ့ပါကြောင်း၊ ဤသို့ ဆောင်ရွက်သည့်အခါ ပြန်လည်သိမ်းယူရမည့်မြေလွတ်၊ မြေလပ်နှင့် မြေရိုင်းများ စီမံခန့်ခွဲရေး ဗဟိုကော်မတီက အတည်ပြုသည့် ဧကပေါင်း ၁၃၇၀၀၀၀ ခန့်ရှိပါကြောင်း၊ စစ်ဆေးစိစစ် အတည်ပြုချက်အရ အမှန်တကယ် လုပ်ကိုင်သည့်ဧကများပေါ်တွင် ပြင်ဆင်မိန့်များ ပြန်လည် ထုတ်ပြန်ပေးသွားမည် ဖြစ်ပါကြောင်း၊ အမှန်တကယ် လုပ်ကိုင်မှုမရှိသော မြေဧရိယာများမှာ နိုင်ငံတော်၏ မြေလွတ်၊ မြေလပ်နှင့် မြေရိုင်းစာရင်းကို ပြန်လည်ရောက်ရှိသွားပြီ ဖြစ်ပါကြောင်း၊ ကျန်ရှိနေသေးသော ပြည်နယ်နှင့် တိုင်းဒေသကြီးများအလိုက် စိုက်ပျိုးလုပ်ကိုင်ခြင်းမရှိသော ဧရိယာများကို ပြန်လည်သိမ်းယူရန် အထူးလုပ်ငန်းအဖွဲ့များနှင့် ဆက်လက်စိစစ် ဆောင်ရွက်လျက်ရှိပါကြောင်း၊

၂၀၁၈ ခုနှစ်၊ စက်တင်ဘာလ ၁၀ ရက်နေ့တွင် မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဥပဒေကို ပြင်ဆင်သည့်ဥပဒေ ပြဋ္ဌာန်းခဲ့ပြီးဖြစ်ပါကြောင်း၊ ပြင်ဆင်သည့်ဥပဒေအရ စိုက်ပျိုးရေးလုပ်ငန်းကို ဧက ၃၀၀ အထိ၊ မွေးမြူရေးလုပ်ငန်းကို ဧက ၅၀ အထိ၊ တိုင်းဒေသကြီး/ပြည်နယ်အဆင့်တွင် လျှောက်ထားခွင့်ပြုချက် ရယူနိုင်ပါကြောင်း၊ ၎င်းပမာဏထက်ပိုသော ဧရိယာဧကများအတွက် ဗဟိုသို့ လျှောက်ထားခွင့်ပြုချက် ရယူဆောင်ရွက်နိုင်မည် ဖြစ်ပါကြောင်း၊ ပြန်လည်သိမ်းယူပြီးသည့် မြေလွတ်၊ မြေလပ်နှင့် မြေရိုင်းများကို ဒေသခံပြည်သူများ ရယူလုပ်ကိုင်မည်ဆိုပါက စိစစ်ခွင့်ပြု ချထားပေးမည် ဖြစ်ပါကြောင်း၊ ဤသို့ဆောင်ရွက်နိုင်မှု တိုင်းဒေသကြီး/ပြည်နယ်အစိုးရအဖွဲ့များ အနေဖြင့် မိမိတို့ဒေသအတွင်း မြေယာမဲ့များကို စီမံခန့်ခွဲချထားပေးမည်ဆိုပါက ဥပဒေ၊ နည်းဥပဒေ၊ လုပ်ထုံးလုပ်နည်းများနှင့်အညီ လျှောက်ထားလာသည့်အပေါ် ခွင့်ပြုဆောင်ရွက်သွားနိုင်မည် ဖြစ်ပါကြောင်း၊ မြေလွတ်၊ မြေလပ်နှင့် မြေရိုင်းများ အသုံးပြုမှုအားလုံးကို ဥပဒေနှင့်အညီ ဖြစ်စေရေး ဆောင်ရွက်လျက်ရှိကြောင်း၊ ထို့ကြောင့် နိုင်ငံတစ်ဝန်းလုံးတွင် လုပ်ပိုင်ခွင့်ပြုခဲ့သည့် မြေလွတ်၊ မြေလပ်နှင့် မြေရိုင်းများ ဧရိယာဧကပေါင်းသည် လက်ရှိစိစစ်အတည်ပြုမှုအရ ၂၃၀၀၀၀၀ ရှိပြီး ယနေ့အထိ ပြန်လည်သိမ်းယူပြီးသော ဧရိယာဧကမှာ ၁၃၇၀၀၀၀ ကျော်ရှိပါကြောင်းနှင့် အဆိုပါသိမ်းယူထားသော မြေဧကများအပေါ် လုပ်ပိုင်ခွင့်၊ အသုံးပြုခွင့်များကို ၂၀၁၂ ခုနှစ်၊ မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဥပဒေ၊ နည်းဥပဒေ၊ လုပ်ထုံးလုပ်နည်း၊ ညွှန်ကြားချက်များနှင့်အညီ လျှောက်ထားလုပ်ကိုင် ဆောင်ရွက်သွားနိုင်မည်ဖြစ်ပါကြောင်း ရှင်းလင်းဖြေကြားပါသည်။