(ဃ)-မြန်မာနိုင်ငံတွင် ဖွင့်လှစ်သင်ကြားနေသည့် ပြည်တွင်းကျောင်းများ၊ ပြည်ပနိုင်ငံဆက်နွှယ်ကျောင်းများ စစ်မှန်မှုနှင့် ခွင့်ပြုသက်တမ်း ရှိ/မရှိကိုမည်သည့်ဌာနက စိစစ်ခွင့်ပြုပေးသည်နှင့် စပ်လျဉ်းသည့် မေးခွန်း

ပညာရေးဝန်ကြီးဌာန၊ အဆင့်မြင့်ပညာဦးစီးဌာနတွင်ရှိသည့် တက္ကသိုလ်များတွင် ဖွင့်လှစ်သည့် သင်တန်းများနှင့် အခြားဝန်ကြီးဌာနများနှင့် ပညာရေးဝန်ကြီးဌာနတို့ ပူးပေါင်း၍ သင်ကြားပေးအပ် လျက်ရှိသည့် Diploma၊ Degree၊ မဟာဘွဲ့နှင့်  ဒေါက်တာဘွဲ့လက်မှတ်များ၏ မှန်ကန်ခိုင်မာမှုနှင့် အရည်အသွေး ပြည့်မီတို့နှင့် စပ်လျဉ်း၍ ဖွင့်လှစ်သည့် သင်တန်းများတွင် သင်ကြားမည့် သင်ရိုးမာတိကာနှင့် သင်ရိုးညွှန်းတမ်းများကို သက်ဆိုင်ရာ တက္ကသိုလ်များရှိ ပညာရေးအဖွဲ့၏ ထောက်ခံချက်၊ ဘာသာရပ်ဆိုင်ရာ သင်ကြားရေးအဖွဲ့၊  Board of Study ၏ ထောက်ခံချက်များဖြင့် ပါမောက္ခချုပ်က တာဝန်ခံတင်ပြရပြီး အမျိုးသားပညာရေး မူဝါဒကော်မရှင်နှင့် အမျိုးသား သင်ရိုးညွှန်းတမ်းကော်မတီ၊ အမျိုးသားပညာရေး အဆင့်အတန်းနှင့် အရည်အသွေးအာမခံမှု အကဲဖြတ်ရေးကော်မတီနှင့် ပါမောက္ခချုပ်များ ကော်မတီတို့၏ သဘောတူညီမှုဖြင့် ဆုံးဖြတ် ဆောင်ရွက်ကြခြင်း ဖြစ်ပါကြောင်း၊ ကိုယ်ပိုင်ကျောင်းများကို မှတ်ပုံတင်ရန်အတွက် ကိုယ်ပိုင် ကျောင်းများကို ကိုယ်ပိုင်ကျောင်းမှတ်ပုံတင်သည့် ဥပဒေ၏ အခန်း(၁) ပုဒ်မ ၂  ပုဒ်မခွဲ (က) ပါ ပြဋ္ဌာန်းချက်အရ ခွင့်ပြုစိစစ်ဆောင်ရွက်ပေးလျက် ရှိပါကြောင်း၊ ပညာရေးဝန်ကြီးဌာန၊ အခြေခံပညာ ဦးစီးဌာနသည် အထက်ပါကိုယ်ပိုင်ကျောင်း မှတ်ပုံတင်ဥပဒေနှင့်အညီ ဖွင့်လှစ်သင်ကြားနေသည့် အခြေခံပညာအဆင့် ကိုယ်ပိုင်ကျောင်းနှင့် ဘာသာရပ်သင်ကိုယ်ပိုင် သင်တန်းများကိုသာ ကြီးကြပ် ဆောင်ရွက်လျက်ရှိပြီး အဆိုပါ ကိုယ်ပိုင်ကျောင်းများ၏ သင်ကြားမှု အရည်အသွေး ပြည့်မီရေးကို အစိုးရအခြေခံပညာ ကျောင်းများနည်းတူ ကြပ်မတ်စီမံ ဆောင်ရွက်လျက်ရှိပါကြောင်း၊ ပညာရေး ဝန်ကြီးဌာနက သတ်မှတ်ထားသည့် အခြေခံပညာသင်ရိုးညွှန်းတမ်းနှင့် သင်ရိုးမာတိကာများပါ ဘာသာရပ်များ အတိုင်းဖြစ်စေ၊ သင်ခန်းစာများ ထပ်စောင်း၍ဖြစ်စေ လေ့ကျင့်သင်ကြားပေးသော ပုဂ္ဂလိက တည်ထောင်ဖွင့်လှစ်သည့်  အခြေခံပညာကျောင်းများကို ကိုယ်ပိုင်ကျောင်း မှတ်ပုံတင်ဥပဒေ၊ နည်းဥပဒေများနှင့်အညီ ဖွင့်လှစ်ခွင့်ပြုပေးလျက် ရှိပါကြောင်း၊ အမျိုးသားပညာရေးဥပဒေ၏ ပုဒ်မ ၃၅ ပါ ပြဋ္ဌာန်းချက်ဖြစ်သည့်၊ ပြည်တွင်းပြည်ပမှ ဖွင့်လှစ်သည့် အခြေခံပညာရေးသင်တန်းကျောင်း၊ နည်းပညာနှင့် သက်မွေးပညာရေးကျောင်း၊ အဆင့်မြင့်ပညာရေး အဆင့်အတန်းရှိသည့် ကျောင်း၊ တက္ကသိုလ်၊ ဒီဂရီကောလိပ်၊ ကောလိပ်နှင့်သိပ္ပံများသည် ဤဥပဒေ သို့မဟုတ် တည်ဆဲပညာရေး ဥပဒေတစ်ရပ်ရပ်နှင့် ကိုက်ညီမှုရှိစေရမည်ဟု ဖော်ပြထားပါကြောင်း၊ လက်ရှိဖွင့်လှစ်ထားသည့် ပုဂ္ဂလိကသင်တန်းကျောင်းများ၊ ပညာရေးဝန်ဆောင်မှု လုပ်ငန်းများနှင့် ပြည်ပတက္ကသိုလ် သို့မဟုတ် ပညာရေးဆိုင်ရာ အဖွဲ့အစည်းများသည် ပညာရေးဝန်ကြီးဌာနနှင့် သက်ဆိုင်သည့် ဥပဒေများအရ ခွင့်ပြုထားခြင်း မဟုတ်ဘဲ ကုမ္ပဏီမှတ်ပုံတင်ဥပဒေနှင့် နည်းဥပဒေအရ စီမံကိန်းနှင့် ဘဏ္ဍာရေး ဝန်ကြီးဌာန၊ ကုမ္ပဏီများ ညွှန်ကြားမှုဦးစီးဌာနတွင် ပညာရေးဝန်ဆောင်မှု လုပ်ငန်းကုမ္ပဏီအဖြစ် မှတ်ပုံတင်၍ ဖွင့်လှစ်ခွင့်ပြုထားသည့် ကျောင်းများဖြစ်ပါကြောင်း၊ ၎င်းဖွင့်လှစ်ထားသည့် ကျောင်းများဖြစ်ပါက ပညာရေးဝန်ကြီးဌာနအနေနှင့် ထိုကျောင်းများက ပေးအပ်နေသည့် Diploma၊ Degree၊ မဟာဘွဲ့နှင့် ဒေါက်တာဘွဲ့လက်မှတ်များ၏ မှန်ကန်ခိုင်မာမှုနှင့် အရည်အသွေး ပြည့်မီမှုတို့ကို စိစစ်နိုင်ရန်အတွက် အမျိုးသားပညာရေးဥပဒေနှင့် ပြင်ဆင်သည့် ဥပဒေများအရ စိစစ်ဆောင်ရွက်ရန်အတွက် အခက်အခဲရှိပါကြောင်း၊ ပညာရေးဝန်ကြီးဌာနသည် မြန်မာ့ပညာရေး ကဏ္ဍာတွင် ပုဂ္ဂလိကရင်းနှီးမြှုပ်နှံမှုကို ကြိုဆိုလက်ခံပြီး မြန်မာနိုင်ငံရင်းနှီးမြှုပ်နှံမှု ကော်မရှင်မှတစ်ဆင့် ပေးပို့လျှောက်ထားသည့် ပညာရေးဝန်ဆောင်မှုဆိုင်ရာ လုပ်ငန်းများနှင့် စပ်လျဉ်း၍ ဥပဒေ၊ နည်းဥပဒေ၊ စည်းမျဉ်းစည်းကမ်း၊ လုပ်ထုံးလုပ်နည်းများနှင့် ကိုက်ညီပါက ပုဂ္ဂလိက ရင်းနှီးမြှုပ်နှံရန် ထောက်ခံဆောင်ရွက်ပြီး အချက်အလက်များနှင့် ကိုက်ညီမှုရှိ/မရှိတို့ကို စိစစ်ဆောင်ရွက်ပေးလျက် ရှိပါကြောင်း၊ ပညာရေးဝန်ကြီးဌာနသည့် မြန်မာ့ရင်းနှီးမြှုပ်နှံမှု ကော်မရှင်မှတစ်ဆင့် ပေးပို့လျှောက်ထားသည့် ပညာရေးဝန်ဆောင်မှုဆိုင်ရာ လုပ်ငန်းများနှင့်ပတ်သက်ပြီး စိစစ်ဆောင်ရွက်ရာတွင် ရင်းနှီးမြှုပ်နှံသူ အဖွဲ့အစည်း၏ နိုင်ငံသားဖြစ်မှု၊ ရင်းနှီးမြှုပ်နှံမှုပုံစံ၊ ဖွင့်လှစ်မည့် ပုဂ္ဂလိကကျောင်း၊ သင်တန်းအမျိုးအစား၊ ဖွင့်လှစ်မည့် သင်တန်းဆင်းလက်မှတ်၊ အသိအမှတ်ပြု လက်မှတ်၊ အောင်လက်မှတ်၊ ဒီပလိုမာ၊ ဘွဲ့လက်မှတ် အမျိုးအစားနှင့် အသိအမှတ်ပြုသည့် အဖွဲ့အစည်း၊ ပေးအပ်မည့် သင်တန်းဆင်းလက်မှတ်၊ အသိအမှတ်ပြု အောင်လက်မှတ်၊ ဒီပလိုမာဘွဲ့ လက်မှတ်များ၏ နမူနာပုံစံ၊ သင်ရိုးညွှန်းတမ်းနှင့် သင်ရိုးမာတိကာ အမျိုးအစား၊ ပုဂ္ဂလိကကျောင်း၏ အုပ်ချုပ်ရေး၊ စီမံခန့်ခွဲရေး၊ သင်ကြားရေးဆိုင်ရာ ကိစ္စရပ်များကို တာဝန်ခံဆောင်ရွက်သည့် ပုဂ္ဂိုလ် သို့မဟုတ် အဖွဲ့အစည်းဝင်များ၏ ပညာအရည်အချင်း၊ အထောက်အထား၊ ပုဂ္ဂလိကကျောင်း၏ အတန်းများကို ဘာသာရပ်အလိုက် သင်ကြားမည့်ပုဂ္ဂလိက ကျောင်းဆရာများ၏ ဘွဲ့လက်မှတ်၊ အထောက်အထားများ၊ သင်ကြားရေး အတွေ့အကြုံများနှင့် ကိုယ်ရေးအကျဉ်း၊ ကျောင်းဆရာ၏ နိုင်ငံသားဖြစ်မှု၊ မြန်မာနိုင်ငံသား သို့မဟုတ် နိုင်ငံခြားသား၊ ပုဂ္ဂလိကကျောင်း၏ ဆရာဆရာမနှင့် စီမံခန့်ခွဲရေးဝန်ထမ်း လုံလောက်မှုရှိကြောင်း ဝန်ခံချက် ပုဂ္ဂလိကကျောင်း အမျိုးအစားအလိုက် ထားရှိရမည့် ကျောင်းပရဝုဏ် အဆောက်အဦ လုံလောက်မှုရှိ/မရှိနှင့် အသုံးပြုခွင့်ရှိသည့် အထောက်အထား၊ ပုဂ္ဂလိကကျောင်း ဖွင့်လှစ်ခြင်းနှင့်ပတ်သက်၍ ကန့်ကွက်ရန်မရှိကြောင်း၊ ပုဂ္ဂလိကကျောင်း တည်ထောင်ဖွင့်လှစ်မည့် ပရဝုဏ်၏ ဘေးပတ်ဝန်းကျင်တွင် အနီးစပ်ဆုံး နေထိုင်သူ အနည်းဆုံး ၁၀ ဦး၏ သဘောတူလက်မှတ် ရေးထိုးထားသည့် အထောက်အထားနှင့် ယင်းအထောက်အထား မှန်ကန်ကြောင်း သက်ဆိုင်ရာရပ်ကွက် အုပ်ချုပ်ရေးမှူး၏ ထောက်ခံချက် ပညာရေးဆိုင်ရာ ဝန်းကျင်ကောင်းရှိ/မရှိ၊ ဖွင့်လှစ်မည့် ပုဂ္ဂလိကကျောင်း အမျိုးအစားအလိုက် သက်ဆိုင်ရာဝန်ကြီးဌာန၏ သဘောထားမှတ်ချက်၊ အမျိုးသားပညာရေးဥပဒေ၊ တည်ဆဲပညာရေးဆိုင်ရာ ဥပဒေများကို လိုက်နာရန်နှင့် နောင်တွင်ပေါ်လာမည့် ပညာရေးဥပဒေများနှင့်အညီ လိုက်နာဆောင်ရွက်သွားရန် သတိပြုဝန်ခံချက်၊ ပုဂ္ဂလိကကျောင်း၏ ပရဝုဏ်အတွင်း အရက်သေစာနှင့် မူးယစ်ဆေးဝါး သုံးစွဲခြင်းမရှိစေရေး ကတိဝန်ခံချက်၊ ဆရာ/မနှင့် ကျောင်းသား/သူများ၏ ကာအိန္ဒြေထိခိုက်မှု မရှိစေရေး ကတိဝန်ခံချက်စသည့် အချက်များအပေါ်တွင် မူတည်ပြီး နိုင်ငံတကာတွင် ပုဂ္ဂလိကကျောင်းများနှင့်ပတ်သက်ပြီး ဆောင်ရွက်နေသည့် စိစစ်အကဲဖြတ်နေသည့် အချက်အလက်များကို မြန်မာနိုင်ငံ၏ ယဉ်ကျေးမှု၊ မြန်မာနိုင်ငံ၏ လူမှုစီးပွား ဖွံ့ဖြိုးတိုးတက်မှုကို အထောက်အကူပြုမည့် အချက်အလက်များကို စိစစ်ပြီးအချက် ၁၂ ချက်ဖြင့် စိစစ်ဆောင်ရွက်လျက် ရှိပါကြောင်း၊ ထိုကဲ့သို့ စိစစ်ဆောင်ရွက်သည့်အခါတွင် မြန်မာနိုင်ငံ ရင်းနှီးမြှုပ်နှံမှု ကော်မရှင်၏ မှတ်ပုံတင်ခွင့် ရရှိရန်အတွက် ပညာရေးဝန်ကြီးဌာနက ထောက်ခံပြီး၊ အထက်ဖော်ပြပါ အချက်အလက်များကို ဆက်လက်ပြီး ပညာရေးဝန်ကြီးဌာန၏ အသိအမှတ်ပြုခွင့် ရရှိရန်နှင့် အမျိုးသားပညာရေး မူဝါဒကော်မရှင်၏ အသိအမှတ်ပြုမှု ရရှိရန်အတွက်တို့ကို ပူးပေါင်းဆောင်ရွက်လျက်ရှိသည့်၊ လျှောက်ထားလာသည့် Science and Tech International Myanmar University၊ ဒုတိယအနေနှင့် East Asia Management University and East Asia International School in Myanmar၊ Myanmar Ivy College of Business and Technology၊ Eternal Technical Supporting (ပညာရေး ဝန်ဆောင်မှု လုပ်ငန်း)၊ Eternal Technical Supporting (ပညာရေးဝန်ဆောင်မှုလုပ်ငန်း) (အခြေခံပညာ အဆင့်)၊ Myanmar Imperial Investment Capital (တက္ကသိုလ်အဆင့်)၊ Higher National Diploma Level 4 and 5 သင်ကြားသည့် ကောလိပ်၊ Royal British International (အခြေခံပညာ အဆင့်)၊ Vitoria University College  စသည့် ဝန်ဆောင်မှု လုပ်ငန်းဆောင်ရွက်မည့် ကိုးခုအား ပညာရေးဝန်ကြီးဌာနမှ စိစစ်လျက်ရှိပါကြောင်းနှင့် ပညာရေးဝန်ကြီးဌာနသည့် ပုဂ္ဂလိကကျောင်းဥပဒေကို အတည်ပြုပြဋ္ဌာန်း နိုင်ရေးအတွက် ဆောင်ရွက်လျက်ရှိပြီး အဆိုပါ ဥပဒေပြဋ္ဌာန်းနိုင်ခြင်း မရှိသေးသည့် အချိန်များတွင် ပညာရေးဆိုင်ရာ ဝန်ဆောင်မှု လုပ်ငန်းများအား ဆောင်ရွက်ခွင့်ပြုရန်အတွက် မြန်မာနိုင်ငံရင်းနှီးမြှုပ်နှံမှု ကော်မရှင်မှတစ်ဆင့် ပေးပို့လျှောက်ထားလာသည့် ကိစ္စရပ်များအပေါ် ပညာရေးဝန်ကြီးဌာနက စိစစ်ပေးခြင်း၊ အကြံပြုချက်ပေးခြင်းများကို ပူးပေါင်းဆောင်ရွက်လျက်ရှိပါကြောင်း ရှင်းလင်းဖြေကြား ပါသည်။