၃၀-၁၁-၂၀၁၇ ရက်နေ့ ဆဋ္ဌမပုံမှန်အစည်းအဝေးတွင် မေးခွန်းတင်ခဲ့ခြင်း ဖြစ်သည့်အတွက် မေးခွန်း တင်စဉ်အခြေအနေနှင့် ယခုအခြေအနေ ကွာခြားချက်များက ရှိနေပြီဖြစ်သော်လည်း Comfortable and Safety လမ်းမကြီးဖြစ်မလာ သေးပါကြောင်း၊ ပုသိမ်-မုံရွာလမ်းသည် ဧရာဝတီတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီးနှင့် စစ်ကိုင်းတိုင်းဒေသကြီးစသည့် တိုင်းလေးတိုင်းနှင့် ရခိုင်ပြည်နယ်သို့သွားရာ အဓိကအားထားရသော ဧရာဝတီမြစ် အနောက်ဘက်ကမ်းရှိ အချက်အခြာ ကျသည့် လမ်းတစ်လမ်းဖြစ်ပါကြောင်း၊ ပွင့်လင်းရာသီတွင် အနယ်နယ်အရပ်ရပ်မှ ဘုရားဖူးသွားကြသော မော်တော်ယာဉ်များစွာ အသုံးပြုသောလမ်းလည်း ဖြစ်ပါကြောင်း၊ လမ်းမကြီး၏ အရှည် ၄၅၀ မိုင်ရှည်ပြီး အကျယ်တွင် တစ်မြို့နှင့်တစ်မြို့၊ တစ်နေရာနှင့်တစ်နေရာ မတူညီကြပါကြောင်း၊ မင်းတုန်းမြို့နယ်အတွင်း ကျရောက်နေသည့် ပုသိမ်-မုံရွာလမ်းမကြီး၏ အရှည် ၃၅ မိုင်ရှည်ပြီး အကျယ်မှာ ၁၆ ပေသာရှိပါကြောင်း၊ လမ်းတွင်ချိုင့်ခွက်များ ပေါများခြင်း၊ လမ်းပုခုံးသားများမရှိခြင်း၊ အဝေးပြေးလမ်းမကြီး ဖြစ်သော်လည်း တစ်လမ်းသွားအဆင့်သာ ရှိခြင်းကြောင့် ကားများတစ်စင်းနှင့် တစ်စင်းရှောင်ရန် ခက်ခဲလျက်ရှိပါကြောင်း၊
ယခု ၂၀၁၇-၁၈ ဘဏ္ဍာရေးနှစ် ထပ်ပိုးလွှာ ၆ မိုင် ၄ ဖာလုံနှင့် Level Seal ၅ မိုင် အုပ်ထားပြီ ဖြစ်ပါကြောင်း၊ မင်းတုန်းမြို့၏ ရာသီဥတုအခြေအနေတွင် မိုးများခြင်း၊ လမ်းအပေါ်သို့ နေရောင်ခြည် ကောင်းစွာမရခြင်း၊ ကုန်တင်ယာဉ်များနှင့် တန်ပိုယာဉ်များကြောင့် မကြာခဏ လမ်းပျက်ခြင်းများ ဖြစ်ပေါ်လျက် ရှိပါကြောင်း၊ ပြည်ထောင်စုလမ်းမကြီးဟု ဆိုသော်လည်း ပြည်ထောင်စုမှ ရန်ပုံငွေများ ခွဲဝေချထားခြင်း မရှိသလောက်နည်းပါးပြီး တိုင်းဒေသကြီးအစိုးရ ရန်ပုံငွေရရှိမှုအပေါ် မူတည်ပြီး အလွန်ညံ့သော အပိုင်းများကိုသာ ဦးစားပေးနှစ်အလိုက် အပိုင်းပိုင်းအပြတ်ပြတ် ဆောင်ရွက် နေရခြင်းကြောင့် ရှေ့ကပြင်နောက်ကပျက် မည်သည့်နှစ်မှ ကောင်းမွန်ခြင်း မရှိပါကြောင်း၊
သို့ဖြစ်ပါ၍ ဧရာဝတီအနောက်ဘက်ကမ်းတွင် အဓိကအရေးပါသော ပုသိမ်-မုံရွာလမ်းမကြီးအား ခရီးသွား ပြည်သူများ ယခုထက်ပိုမို အဆင်ပြေနိုင်စေရန် ထပ်ပိုးလွှာခင်းခြင်းနှင့် အကျယ်ချဲ့ခြင်းတို့ကို ဆောင်ရွက်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။
မကွေးတိုင်းဒေသကြီးအတွင်းရှိ ပုသိမ်-မုံရွာလမ်းသည် မကွေးတိုင်းဒေသကြီး အစိုးရအဖွဲ့မှ စီမံခန့်ခွဲသော လမ်းဖြစ်ပြီး သရက်ခရိုင်၊ မင်းတုန်းမြို့နယ်အပိုင်းတွင် မိုင်တိုင်အမှတ် ၁၉၅ မှ ၂၁၉ ထိ ၂၄ မိုင် ၃ ဖာလုံသည် ၁၆ ပေအကျယ် ကတ္တရာလမ်းနှင့် မိုင်တိုင်အမှတ် ၂၁၉ မှ ၂၂၈ ထိ ၈ မိုင် ၅ ဖာလုံသည် ၁၈ ပေအကျယ် ကတ္တရာလမ်းတို့ဖြစ်ပြီး စုစုပေါင်း ၃၃ မိုင် အရှည်ရှိပါကြောင်း၊ ၂၀၁၇-၁၈ ဘဏ္ဍာရေးနှစ်တွင် မကွေးတိုင်းဒေသကြီးအစိုးရအဖွဲ့ ငွေလုံးငွေရင်းရန်ပုံငွေနှင့် အထူးပြင်ဆင် ထိန်းသိမ်းခြင်း ရန်ပုံငွေကျပ် ၈၄၅ သန်းဖြင့် မိုင်တိုင်အမှတ် ၂၀၃ မှ ၂၂၈ အတွင်း ၇ မိုင် ၄ ဖာလုံကို ထပ်ပိုးလွှာခင်းခြင်းလုပ်ငန်း ဆောင်ရွက်ပေးခဲ့ပြီး ဖြစ်ပါကြောင်း၊ ၂၀၁၈ ခုနှစ် ဧပြီလမှ စက်တင်ဘာလအထိ ၆ လ ရန်ပုံငွေတွင် ပြည်ထောင်စုပြင်ဆင် ထိန်းသိမ်းခြင်း ရန်ပုံငွေဖြင့် လမ်းတာပေါင်ခတ်ခြင်း၊ မျောတုတ်ရိုက်ခြင်းလုပ်ငန်းများ မကွေးတိုင်းဒေသကြီးအစိုးရအဖွဲ့ ရန်ပုံငွေဖြင့် မြေထိန်းနံရံ ၃၇၄ ပေ တည်ဆောက်ခြင်း၊ မကွေးတိုင်း ဒေသကြီး ပြင်ထိန်းရန်ပုံငွေဖြင့် ထပ်ပိုးလွှာခင်းခြင်း၊ မိုင်တိုင်အမှတ် ၁၉၅ မှ ၂၁၉ အထိ ကျောက်စီရေမြောင်း ၂၉၅၃ ပေ တည်ဆောက်ခြင်းများ လက်ရှိဆောင်ရွက်လျက် ရှိပါကြောင်း၊
၂၀၁၈-၁၉ ဘဏ္ဍာရေးနှစ်တွင်လည်း မိုင်တိုင် ၁၉၅ မှ ၂၁၉ အတွင်း ၆ မိုင် ၃ ဖာလုံအား လမ်းတာပေါင်အကျယ် မပြည့်မီသည့် လမ်းတာနိမ့်ကျနေသော အပိုင်းများကို လမ်းတာချဲ့ခြင်း၊ မိုင်တိုင်အမှတ် ၂၁၉ မှ ၂၂၆ အတွင်း ၂ မိုင် ၇ ဖာလုံကို ထပ်ပိုးလွှာခင်းခြင်း လုပ်ငန်းများ ဆောင်ရွက်ရန်နှင့် မိုင်တိုင်အမှတ် ၁၉၅ မှ ၂၁၉ အတွင်း ပြင်ဆင်ထိန်းသိမ်းခြင်း လုပ်ငန်းများ ဆောင်ရွက်ရန်အတွက် မကွေးတိုင်းဒေသကြီးအစိုးရအဖွဲ့ ရန်ပုံငွေတွင် ထည့်သွင်းလျာထားပြီး ဖြစ်ပါကြောင်း၊
ပုသိမ်-မုံရွာလမ်း မင်းတုန်းမြို့နယ်အပိုင်းတွင် လမ်း၏လက်ရှိ အခြေအနေနှင့် လမ်းလွှာဒီဇိုင်းများအရ လိုအပ်သည့် အပိုင်းများအလိုက် ထပ်ပိုးလွှာခင်းခြင်း၊ လမ်းအကျယ်ချဲ့ခြင်း လုပ်ငန်းများကို နှစ်အလိုက် ရန်ပုံငွေများ လျာထားတင်ပြတောင်းခံ၍ ရန်ပုံငွေရရှိမှုအပေါ် မူတည်ပြီး ဆောင်ရွက်ပေးသွားမည် ဖြစ်ပါကြောင်း ရှင်းလင်းဖြေကြားပါသည်။