(ဆ) စက်မှုလယ်ယာစနစ်ကို ဒဂုံမြို့သစ်ဒေသစိုက်ပျိုးရေးအထူးဇုန်(၁)နှင့်(၂)တွင် အကောင်အထည်ဖော် ဆောင်ရွက်နေမှုနှင့်စပ်လျဉ်းသည့်မေးခွန်း

 လေးစား အပ်ပါသော ပြည်သူ့လွှတ်တော်ဥက္ကဋ္ဌကြီးနှင့် ကိုယ်စားလှယ်တော်ကြီးများခင်ဗျား။ ရန်ကုန်တိုင်း ဒေသကြီး၊ ပုဇွန်တောင်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးအောင်ဇင်၏ မေးမြန်းချက် အပေါ်တွင် လယ်ယာစိုက်ပျိုး‌ရေးနှင့် ဆည်မြောင်းဝန်ကြီးဌာနကိုယ်စား ဒုတိယဝန်ကြီး ဦးအုန်းသန်းမှ ရှင်းလင်းဖြေကြားမှာဖြစ်ပါတယ်။ ယခင်အစိုးရကာလက နိုင်ငံတော်၏ လယ်ယာကဏ္ဍဖွံ့ဖြိုးတိုးတက် ရေးနှင့် အလုပ်အကိုင်အခွင့်အလမ်းများ ပေါ်ထွန်းလာစေရေးအတွက် ငွေကြေးပမာဏ ထိထိရောက် ရောက်အသုံးပြုရင်းနှီးမြှုပ်နှံနိုင်ကြသော လုပ်ငန်းရှင်ကြီးများအား တိုင်းဒေသကြီးနယ်မြေအလိုက် ခွင့်ပြုကုမ္ပဏီကြီးများ ဖွဲ့စည်းစေခြင်း၊ ထိုကုမ္ပဏီများအနေဖြင့် ငွေကြေးအရင်းအနှီးများစွာကို အသုံးပြု၍ မြေယာဖွံ့ဖြိုးတိုးတက်မှုလုပ်ငန်း (Land Development) အပါအဝင် စိုက်ပျိုး ရေသောက်စနစ်များကောင်းမွန်ရေး၊ စက်ယန္တရားကြီးများ အသုံးပြုဆောင်ရွက်နိုင်ခြင်းအားဖြင့်  နိုင်ငံတော်၏ မြေသယံဇာတများကို ထိရောက်စွာဖော်ထုတ်လုပ်ကိုင်စေခဲ့ခြင်း ဖြစ်ပါတယ်။ ရန်ကုန်တိုင်းဒေသကြီး၊ ဒဂုံမြို့သစ်မြို့နယ်အတွင်း မြို့ရွာနှင့်အိုးအိမ်ဖွံ့ဖြိုးရေးဦးစီးဌာနမှ ဒဂုံမြို့သစ် အိမ်ရာမြေ စီမံကိန်းမြေအဖြစ် အသုံးချရန် လန-၃၉ ခွင့်ပြုမိန့်ရရှိပြီးမြေများတွင် မြို့ပြစီမံကိန်း လုပ်ငန်းကြီးများ ဖော်ထုတ်အသုံးမပြုမီ မြေကွက်လပ်များအဖြစ် ဆုံးရှုံးမှုမရှိစေရေးအတွက် ယခင်နိုင်ငံတော်အစိုးရ၏ တာဝန်ပေးချက်အရ ခေတ်မီစက်မှုလယ်ယာစံပြအထူးစိုက်ပျိုးရေးဇုန် ဖော်ထုတ်လုပ်ကိုင်ရန် ဒဂုံ၊ ယုဇန၊ ထူး၊ ဆင်းရွှေလီ၊ ဦးပိုင်၊ ရွှေနဂါးမင်း၊ မက်စ်မြန်မာ၊ ရွှေဟိန်းထက်၊ အေဒင်၊ အေးရှားဝေါလ်၊ ဂရင်းအေးရှား၊ အမျိုးသားကြီးပွားတိုးတက်ရေး၊ ရွှေတောင်၊ ပင်လယ် ကိုးသွယ်၊ ဂွတ်ဘရားသား၊ မြရွှေဝါကုမ္ပဏီစတဲ့  ကုမ္ပဏီလုပ်ငန်းရှင်ကြီးများက လုပ်ကွက်များ သတ်မှတ်၍ စက်မှုလယ်ယာစံပြစိုက်ပျိုးရေးဇုန်အဖြစ် လုပ်ကိုင်ခွင့်ပြုခဲ့ခြင်းဖြစ်ပါတယ်။ စက်မှု လယ်ယာစံပြစိုက်ပျိုးရေးအထူးဇုန်နယ်မြေအတွင်း မြို့ရွာနှင့်အိုးအိမ်ဖွံ့ဖြိုးမှုဦးစီးဌာနက ဒေသဆိုင်ရာ အာဏာပိုင်များ၏ ကြီးကြပ်မှုဖြင့် ဇုန်အမှတ်(၁)နှင့် ဇုန်အမှတ်(၂)အတွင်းရှိ လယ်သမား ၁၀၈၅ ဦး၊ မြေဧရိယာ ၇၅၀၅ ဧကအတွက် တစ်ဧကလျှင် ကျပ် ၂၀၀၀၀ နှုန်းဖြင့် စုစုပေါင်းငွေကျပ် ၁၅၁၀ သိန်း ထောက်ပံ့ပေးခဲ့ပြီးဖြစ်ကြောင်း ဇုန်နယ်မြေအတွင်းရှိ လယ်တဲများနှင့် ဘုန်းကြီးကျောင်းများကိုလည်း မြို့ပြအိမ်ရာဖော်ထုတ်ပေးပြီး ရပ်ကွက်အတွင်း အိမ်ရာ မြေကွက်များအခမဲ့ပေး၍ ပြောင်းရွှေ့နေရာ ချထားပေးပြီး လမ်းဖောက်လုပ်ပေးပြီးဖြစ်ကြောင်း  စိစစ်သိရှိရပါတယ်။ အဆိုပါစံပြစိုက်ပျိုးရေး အထူးဇုန်နယ်မြေအတွင်း လုပ်ကွက်အလိုက် ကုမ္ပဏီများက လယ်သမားများအား လယ်မြေ တစ်ဧကလျှင် ကျပ် ၂၅၀၀၀ နှုန်း၊ ကျပ် ၄၀၀၀၀ နှုန်း၊ ကျပ် ၅၀၀၀၀ နှုန်းစသည်ဖြင့် စုစုပေါင်းမြေ ၄၈၇၅ ဧကအတွက်ငွေကျပ် ၂၀၈၂ သိန်းနှင့် နေအိမ်များအသစ် ဆောက်လုပ်ပေးခြင်းအတွက် ငွေကျပ် ၅၈၆ သိန်း၊ စုစုပေါင်း ၂၆၆၈ သိန်း ထောက်ပံ့ငွေထပ်မံပေးအပ်ခဲ့ကြောင်း သိရှိခဲ့ရပါတယ်။ ၂၀၀၈-၂၀၀၉ ခုနှစ်မှစတင်ပြီး စက်မှုလယ်ယာစနစ်စံပြအထူးဇုန်အဖြစ်သတ်မှတ်၍ ကုမ္ပဏီများ အနေဖြင့် တစ်ဆင်‌့ပြီးတစ်ဆင့်ရင်းနှီးမြှုပ်နှံ အကောင်အထည်ဖော်ခဲ့ရာ ရာနှုန်းပြည့်နီးပါး ဖော်ထုတ် လမ်းများ၊ ဟတ်တာကွက်များ၊ ဧကကွက်များနှင့် ရေတင်စနစ်၊ ရေထုတ်စနစ်များအပါအဝင် တည်ဆောက် အကောင်အထည်ဖော်ခဲ့ကြတဲ့အတွက် ကဏ္ဍအလိုက် ကျပ်သိန်းထောင်ပေါင်းများစွာ အသီးသီးရင်းနှီးမြှုပ်နှံကုန်ကျခဲ့ပြီး ဖြစ်ကြောင်းသိရှိခဲ့ရပါတယ်။ ယခုနှစ် နွေစပါးရာသီကာလမှာ ကုမ္ပဏီများအနေဖြင့် အရှိန်အဟုန်မြင့်တင်ပြီး စက်မှုလယ်ယာစနစ်သို့ ကူးပြောင်းနိုင်ရေးနှင့် အထူးအထွက်တိုး စပ်မျိုးစပါးများကို မျိုးစေ့ထုတ်လုပ်ငန်းအပါအဝင် စံနမူနာပြဇုန်အဖြစ်ပါဝင် ဆောင်ရွက်လျက်ရှိကြောင်း သိရှိရပါတယ်။ မူလက ထိုဒေသအနီးပတ်ဝန်းကျင်တစ်ဝိုက်မှာ ရှိနေ ကြသော လယ်ယာလုပ်သားများအပါအဝင် ဒေသအသီးသီးမှ အလုပ်လုပ်လိုသူများအတွက်လည်း ခေတ်မီစက်ကိရိယာ မောင်းနှင်ခြင်းလုပ်ငန်း၊ ခေတ်မီစက်ကိရိယာထိန်းသိမ်းခြင်းလုပ်ငန်း၊ ကိုယ်တိုင် ပါဝင် စိုက်ပျိုးရေးလုပ်ငန်းစတဲ့ အသီးသီးအလုပ်အကိုင်အခွင့်အလမ်းများနဲ့ဝင်ငွေများ တိုးတက်ခံစား ရရှိလျက်ရှိနေကြောင်း သိရှိရပါတယ်။ ဂရင်းအေးရှားကုမ္ပဏီ၊ ဒဂုန်အင်တာနေရှင်နယ် ကုမ္ပဏီတို့ အနေနဲ့ နိုင်ငံခြားပညာရှင်များနှင့်ပူးပေါင်းပြီး စပ်မျိုးစပါးမျိုးစေ့များကို ခေတ်မီစိုက်ပျိုး ထုတ်လုပ် သည့် စက်များဖြင့် အသုံးပြုထုတ်လုပ်ပေးလျက်ရှိနေပြီဖြစ်ရာ ရန်ကုန်တိုင်းဒေသကြီးအတွက်သာမက နိုင်ငံတော်၏ လယ်ယာကဏ္ဍဖွံ့ဖြိုးတိုးတက်ရေးအတွက် များစွာအထောက်အကူပြုနိုင်မည် ဖြစ်ကြောင်း သိရှိရပါတယ်။ ကိုယ်စားလှယ်တော်ကြီးများအနေနဲ့ ၁၅-၂-၂၀၁၀ ရက်နေ့ထုတ် လယ်ယာစီးပွားသတင်းဂျာနယ် မျက်နှာဖုံးမှာ အသေးစိတ်ဖော်ပြထားရှိချက်ကို ဖတ်ရှုလေ့လာပါက သိရှိနိုင်မည်ဖြစ်ကြောင်း တင်ပြအပ်ပါတယ်။ အလားတူ ကိုယ်တိုင်ကွင်းဆင်းလေ့လာမည်ဆိုပါက လည်း နိုင်ငံတော်၏လယ်ယာကဏ္ဍ ဖွံ့ဖြိုးတိုးတက်ရေးအတွက် ကုမ္ပဏီများ၏ တက်ကြွစွာဖြင့် ရင်းနှီးမြှုပ်နှံကြိုးပမ်းဆောင်ရွက်ချက်များကိုလည်း တွေ့ရှိနိုင်မည်ဖြစ်ပါတယ်။ ထွက်ရှိလာသော အထူးအထွက်တိုး စပ်မျိုးစပါးများကို ရန်ကုန်တိုင်းဒေသကြီးအတွင်းသာမက တစ်ဆင်‌့ပြီး တစ်ဆင့် တိုးတက်စိုက်ပျိုးထုတ်လုပ်နိုင်ခြင်းအားဖြင့် နိုင်ငံတော်၏ ဆန်စပါးသီးနှံထုတ်လုပ်မှုကို များစွာ အထောက်အကူဖြစ်စေပြီး ခေတ်မီစက်မှုလယ်ယာ စံပြစိုက်ပျိုးရေးအထူးဇုန်အဖြစ် မြင်တွေ့ကြရ တော့မည်ဖြစ်ပါကြောင်း တင်ပြအပ်ပါတယ်။ ယခင်လည်း အလားတူမေးခွန်းများကို လွှတ်တော်တွင် ဖြေကြားခဲ့ပြီးဖြစ်ပါကြောင်း တင်ပြအပ်ပါသည် ။