(က)-ရှေ့နေလုပ်ငန်းကို မကြော်ငြာရဆိုသည့်အယူအဆကို ပြန်လည်စိစစ်သုံးသပ်ပြင်ဆင်ပေးရန် အစီအစဉ် ရှိ/မရှိနှင့်စပ်လျဉ်းသည့် မေးခွန်း

ရှေ့နေလုပ်ငန်းကို မကြော်ငြာရဟူသည့်အယူအဆသည် တရားလွှတ်တော်ရှေ့နေများကောင်စီက ရှေ့နေရှေ့ရပ်များ လိုက်နာကျင့်သုံးရန် လုပ်ငန်းလမ်းညွှန်အဖြစ်ထုတ်ဝေခဲ့သည့် ရှေ့နေရှေ့ရပ်များ၏ ကျင့်ဝတ်သိက္ခာများ၊ တာဝန်နှင့်အခွင့်အရေးများ စာစောင် အပိုဒ် ၄၁ ကို ရည်ညွှန်းခြင်းဖြစ်ပါကြောင်း၊ ရှေ့နေရှေ့ရပ်များ၏ ကျင့်ဝတ်သိက္ခာများ၊ တာဝန်များ၊ အခွင့်အရေးများနှင့် အမှုလိုက်ပါ ဆောင်ရွက်ခြင်းများနှင့် စပ်လျဉ်းသည့် ရှေ့နေရှေ့ရပ်များ၏ ကျင့်ဝန်သိက္ခာများ အပိုဒ် ၄၁ တွင် ရှေ့နေရှေ့ရပ်များသည် မိမိအမည်နှင့် နေရပ်လိပ်စာ ရိုက်နှိပ်ထားသည့်ကတ်ပြားများကို ဝေငှ၍ မိမိ၏ လုပ်ငန်းကိုကြော်ငြာခြင်း၊ လျှောက်လွှာပုံစံ ဗလာစာရွက်များပေါ်တွင် မိမိအမည်၊ လိပ်စာကို ရိုက်နှိပ်၍ ကြိုတင်လက်မှတ်ရေးထိုးကာ အခြားသူများလိုအပ်သလို အသုံးပြုရန်ပေးအပ်ခြင်းများသည် ကျင့်ဝတ် သိက္ခာနှင့်ညီညွတ်ခြင်းမရှိသဖြင့် သတိပြုသင့်ပါသည်ဟု ၁၉၆၈ ခုနှစ်၊ မြန်မာနိုင်ငံတရားစီရင်ထုံး၊ တရားရုံးချုပ်၊ စာမျက်နှာ(၂၀၈) ရှေ့နေကြီး ဦးအောင်သိန်းအမှုတွင် ရှေ့နေရှေ့ရပ်များအတွက် အမှု လိုက်ပါဆောင်ရွက်ရာတွင် လုပ်ငန်းလမ်းညွှန်အဖြစ် လိုက်နာကျင့်သုံးရန်သတ်မှတ်ပေးထားပါကြောင်း၊ ရှေ့နေရှေ့ရပ်များသည် ဥပဒေပညာနှင့် အသက်မွေးဝမ်းကျောင်းပြုနေကြရသူများ ဖြစ်ပါကြောင်း၊ ဥပဒေပညာရပ်ကို တတ်မြောက်သော ကျွမ်းကျင်သည့်ရှေ့နေရှေ့ရပ်ကြီးများအနေဖြင့် တရားရုံးများက အမှုကိုစစ်ဆေးဆုံးဖြတ်ရာတွင်၊ အမှန်တရားကိုဖော်ထုတ်ရှာဖွေရာတွင် တရားရုံးများကို ကူညီရန်နှင့် မိမိလိုက်ပါဆောင်ရွက်ပေးရသော အမှုသည်များအတွက် တရားဥပဒေနှင့်အညီ ရသင်‌့ရထိုက်သော တရားမျှတမှုရရှိရေးအတွက် အစွမ်းကုန်လိုက်ပါဆောင်ရွက်ပေးရန် တာဝန်များကို အဓိကအားဖြင့် ကြိုးပမ်းဆောင်ရွက်ပေးကြရပါကြောင်း၊ အခြားစီးပွားရေးလုပ်ငန်းများနှင့် သဘောသဘာဝတူညီမှု မရှိသည့် ရှေ့နေရှေ့ရပ်လုပ်ငန်းကို အခြားစီးပွားရေးလုပ်ငန်းများနှင့် တန်းတူထားပြီး ဈေးကွက် စီးပွားရေးစနစ်အရ လွတ်လပ်စွာဈေးကွက်ပြိုင်ဆိုင်ရန်အလို့ငှာ နည်းလမ်းအမျိုးမျိုးဖြင့် ရှေ့နေ လုပ်ငန်းကို ကြော်ငြာမောင်းခတ်ပါက ငွေရရှိရေးအတွက်သာ ရည်မှန်းချက်ထားရှိရာရောက်နိုင်ပြီး ဦးတည်ချက်မှာလည်း တရားမျှတရေး၊ အမှန်တရားဖော်ထုတ်ရေးအတွက်မဟုတ်ဘဲ မိမိအမှုသည် အနိုင်ရရှိရေး၊ အောင်နိုင်ရေးကိုသာ ဦးတည်ဆောင်ရွက်ရာရောက်နိုင်ပြီး ၂၀၀၈ ခုနှစ်၊ ဖွဲ့စည်းပုံ အခြေခံဥပဒေပုဒ်မ ၂၅ အရ နိုင်ငံတော်က အသိပညာရှင်၊ အတတ်ပညာရှင်များ၏အကျိုးကို ကူညီ ဆောင်ရွက်မည်ဟူသည့် ပြဋ္ဌာန်းချက်နှင့်လည်း ညီညွတ်မည်မဟုတ်သည်ကို သတိမူသင့်သည်ဟု ယူဆပါကြောင်း၊

ထို့ကြောင့် ရှေ့နေလုပ်ငန်းကို မကြော်ငြာရဟူသည့်အယူအဆကို နိုင်ငံတော်တရားရုံးချုပ်က စီရင်ထုံး တွင် မှတ်ချက်ပြုခဲ့သည်ကို တရားလွှတ်တော်ရှေ့နေများကောင်စီကညွှန်ပြ၍ အမှုလိုက်ပါ ဆောင်ရွက် ခြင်းနှင့်စပ်လျဉ်းပြီး ရှေ့နေရှေ့ရပ်များ၏ကျင်‌့ဝတ်သိက္ခာဖြင့်လိုက်နာရန် သတ်မှတ်ပေးခြင်းသာ ဖြစ်သည့်အတွက် ပြည်ထောင်စုတရားလွှတ်တော်ချုပ်က ပြင်ဆင်ဆောင်ရွက်ရန် မရှိပါကြောင်း ရှင်းလင်းဖြေကြားပါသည်။