(စ)-ဥတိုစိုက်ကွင်းကြီးတစ်ခုလုံးကို ဆက်လက်လုပ်ကိုင်ရန်အစီအစဉ်များနှင့်စပ်လျဉ်းသည့်မေးခွန်း

ရန်ကုန်မြို့တော်စည်ပင်သာယာရေး ကော်မတီသည်ဥတို၊ ကြာအင်းဒေသများရှိ ရေနက်ကွင်း ဧရိယာများအား နိုင်ငံတော်အစိုးရ၏ လမ်းညွှန်ချက်အရ စိုက်ပျိုးရေးလုပ်ငန်းမဖြစ်ထွန်းသည့် မြေလွတ်၊ မြေရိုင်းများအား နိုင်ငံတော်၏ အကျိုးဖြစ်ထွန်းစေမည့် လယ်ယာမြေများ၊ ငါးကန်များပြန်လည်ဖော်ထုတ် ဆောင်ရွက်သွားရန် ရည်ရွယ်၍ ရန်ကုန်တိုင်းဒေသကြီး၊ တိုက်ကြီးမြို့နယ် ဥတို၊ ကြာအင်းဒေသရှိ မြေလွတ်၊ မြေရိုင်းများ အား လယ်ယာစိုက်ပျိုးရေးလုပ်ငန်း၊ မွေးမြူရေးလုပ်ငန်း၊ စက်ရုံနှင့် ကုန်ထုတ်လုပ်မှုလုပ်ငန်းများကို အကောင်အထည်ဖော်ဆောင်ရွက်ခဲ့ရာ ဥတိုစိုက်ပျိုးမွေးမြူရေးစခန်းအား ၁၉၉၈ ခုနှစ်တွင် ဧရိယာ ၄၁၁၆.၃၆ ဧကဖြင့်လည်းကောင်း၊ ကြာအင်းစိုက်ပျိုးမွေးမြူရေးစခန်းအား ၁၉၉၉ ခုနှစ်တွင် ဧရိယာ ၂၂၉၆.၈၃ ဧကဖြင့်လည်းကောင်း၊ ဇီးကုန်းစိုက်ပျိုးမွေးမြူရေးစခန်းအား ၂၀၀၀ ခုနှစ်တွင် ဧရိယာ ၁၁၇၅.၄၁ ဧကဖြင့်လည်းကောင်း၊ အင်းတွင်းကြီးစိုက်ပျိုးမွေးမြူရေးစခန်းအား ၂၀၀၁ ခုနှစ်တွင် ဧရိယာ ၁၀၄၉.၉၄ ဧကဖြင့်လည်းကောင်း စုစုပေါင်းဧရိယာ ၈၆၃၈.၅၄ ဧကအား ရင်းနှီးမြှုပ်နှံ ဖော်ထုတ်၍ အကောင်အထည်ဖော်ဆောင်ရွက်လျက်ရှိပါတယ်။

စခန်းများအလိုက် စတင်အကောင်အထည်ဖော်ခဲ့သည့်နှစ်မှစတင်၍ ၂၀၀၃-၂၀၀၄ ဘဏ္ဍာရေး နှစ်အထိ ဥတိုစိုက်ပျိုးမွေးမြူရေးစခန်းမှ ဝင်ငွေကျပ်သိန်း ၁၃၂၉၅.၁၈သိန်း၊ ကြာအင်းစိုက်ပျိုး မွေးမြူရေးစခန်းမှဝင်ငွေကျပ်သိန်း ၁၂၇၃.၀၈ သိန်း၊ အင်းတွင်းကြီးစိုက်ပျိုးမွေးမြူရေးစခန်းမှ ဝင်ငွေကျပ်သိန်း ၅၁၃.၂၈ သိန်း၊ ဇီးကုန်းစိုက်ပျိုးမွေးမြူရေးစခန်းမှဝင်ငွေကျပ်သိန်း ၁၅၈၂၆.၈၂ သိန်း ရရှိခဲ့ပါတယ်။ ၂၀၀၃ ခုနှစ်တွင် လုပ်ငန်းများရပ်ဆိုင်းသွားခြင်းမရှိဘဲ ဆက်လက်ဆောင်ရွက်ခဲ့ရာ ၂၀၀၄-၂၀၀၅ ဘဏ္ဍာရေးနှစ်မှ ယနေ့အထိ ၉ နှစ်အတွင်း ဥတိုစိုက်ပျိုးမွေးမြူရေးစခန်းမှ ဝင်ငွေ ကျပ်သိန်း ၂၇၅၈၈.၄၃ သိန်း၊ ကြာအင်းစိုက်ပျိုးမွေးမြူရေးစခန်းမှဝင်ငွေကျပ်သိန်း ၃၁၆၅.၆၉ သိန်း၊ အင်းတွင်းကြီးစိုက်ပျိုးမွေးမြူရေးစခန်းမှဝင်ငွေကျပ်သိန်း ၅၅၂.၈၂ သိန်း၊ ဇီးကုန်းစိုက်ပျိုး မွေးမြူရေး စခန်းမှ ဝင်ငွေကျပ်သိန်း ၇၉၈.၄၉ သိန်း၊ စုစုပေါင်းဝင်ငွေကျပ်သိန်း ၃၂၁၀၅.၄၂ သိန်းရရှိခဲ့ပါတယ်။ ဥတို၊ ကြာအင်းဒေသရှိစိုက်ပျိုးရေးစခန်း ၄ ခုသည် စတင်အကောင်အထည်ဖော်ခဲ့သည့် နှစ် ၂၀၀၃-၂၀၀၄ ဘဏ္ဍာရေးနှစ်အထိ ဝင်ငွေကျပ်သိန်း ၁၅၈၂၆.၈၂ နှင့် ၂၀၀၄-၂၀၀၅ ဘဏ္ဍာရေး နှစ်မှ ယနေ့အထိဝင်ငွေကျပ်သိန်း ၃၂၁၀၅.၄၂ သိန်းဖြစ်ပါ၍ စခန်းများစတင်တည်ဆောက်စဉ်မှ ယနေ့အထိ စုစုပေါင်းဝင်ငွေမှာကျပ်သိန်း ၄၇၉၃၂.၂၄ သိန်းဖြစ်ပါသဖြင့် ထိုက်သင့်သော အကျိုးကျေးဇူးများရရှိခဲ့ပြီးဖြစ်ပါ၍ ဥတိုကြာအင်းဒေသရှိ စိုက်ပျိုးရေးစခန်း ၄ ခုအား ရန်ကုန်မြို့တော် စည်ပင်သာယာရေးကော်မတီမှ ဆက်လက်လုပ်ကိုင်သွားမည်ဖြစ်ပါကြောင်း ပြန်လည်ဖြေကြားအပ်ပါ တယ်။

ဆက်လက်ပြီး ပုဂ္ဂလိကလုပ်ငန်းရှင်များနှင်‌့ အကျိုးတူပူးပေါင်းဆောင်ရွက်ရန်အစီအစဉ် ရှိ/မရှိဆိုတဲ့မေးခွန်းနှင့်ပတ်သက်၍ ရန်ကုန်မြို့တော်စည်ပင်သာယာရေးကော်မတီသည် ဥတို၊ ကြာအင်း၊ အင်းတွင်းကြီး၊ ဇီးကုန်းစိုက်ပျိုးမွေးမြူရေးစခန်းများစတင်တည်ဆောက်စဉ်မှ ၂၀၀၃-၂၀၀၄ ဘဏ္ဍာရေးနှစ်အထိ စိုက်ပျိုးမွေးမြူရေးလုပ်ငန်းများအား ကော်မတီမှဝန်ထမ်းများဖြင့်စိုက်ပျိုးမွေးမြူ ဆောင်ရွက်ခဲ့ပါတယ်။ ၂၀၀၄-၂၀၀၅ ဘဏ္ဍာရေးနှစ်မှစ၍ စိုက်ပျိုးရေးလုပ်ငန်းများအား စခန်း ၄ ခုမှ မိုးစပါး ၁၉၁၆.၅ ဧက၊ နွေစပါး ၄၆၀ ဧက၊ ဆောင်းသီးနှံမတ်ပဲ ၂၈၆ ဧကတို့အား ဒေသခံတောင်သူ လယ်သမားများနဲ့အကျိုးတူပူးပေါင်းစိုက်ပျိုးလုပ်ကိုင်လျက်ရှိပါတယ်။ အလားတူ ငါးမွေးမြူရေး လုပ်ငန်းအား စခန်း ၄ ခုမှ ငါးကန် ၉၃ ကန်၊ ဧရိယာ ၁၁၉၆.၅၆ ဧကအား ပုဂ္ဂလိကငါးလုပ်ငန်းရှင် ၁၅ ဦးဖြင့် အကျိုးတူပူးပေါင်းမွေးမြူလုပ်ကိုင်လျက်ရှိပါကြောင်းနှင့် ဥတိုစိုက်ပျိုးမွေးမြူရေးစခန်းရှိ အပန်းဖြေလုပ်ငန်း၊ ဟိုတယ်နှင့် ဂေါက်ကွင်းအား ပုဂ္ဂလိကလုပ်ငန်းရှင်များနှင့် ပူးပေါင်းဆောင်ရွက် လျက်ရှိပြီး ဆက်လက်၍လည်း လုပ်ကိုင်လိုသူပုဂ္ဂလိကလုပ်ငန်းရှင်များနှင့် ပူးပေါင်းဆောင်ရွက် သွားမည်ဖြစ်ပါကြောင်းနှင့် ဒေသခံတောင်သူလယ်သမားများနဲ့လည်း ဆက်လက်အကျိုးတူပူးပေါင်း ဆောင်ရွက်သွားမည်ဖြစ်ပါကြောင်း ပြန်လည်ဖြေကြားအပ်ပါတယ်။ လက်ရှိအခြေအနေတွင်လည်း ရန်ကုန်မြို့တော်စည်ပင်သာယာရေးကော်မတီမှ ဒေသဖွံ့ဖြိုးတိုးတက်အောင်ဆောင်ရွက်လျက်ရှိပြီး ဥတို၊ ကြာအင်းဒေသရှိပြီး ဖော်ပြပါစခန်း ၄ ခုစတင်တည်ထောင်သည်မှ ယနေ့အထိမတည်ရင်းနှီးငွေ ကျပ်စုစုပေါင်းကျပ်သိန်း ၈၂၅၈၁.၀၅ ရှိပြီး ပေးသွင်းပြီးစုစုပေါင်းကျပ်သိန်း ၄၃၈၆၄.၂၃ ရှိ၍ ပေးသွင်းရန်ကျန်ငွေစုစုပေါင်းကျပ်သိန်း ၃၈၇၁၆.၈၂ ဖြစ်ပါတယ်။ မတည်ရင်းနှီးထားသည့်ငွေများ အရင်းကျေပြီးသည်‌့နောက်တွင်လည်း ရန်ကုန်မြို့တော်စည်ပင်သာယာရေးကော်မတီမှ ဆက်လက် လုပ်ကိုင်ဆောင်ရွက်မည်ဖြစ်ပါတယ်။ ပုဂ္ဂလိကလုပ်ငန်းရှင်များမှစိတ်ဝင်စားပါကလည်း ဒေသ ဖွံ့ဖြိုးရေး၊ စီးပွားရေးအရတွက်ချေကိုက်မှု၊ အလုပ်အကိုင်အခွင့်အလမ်းများရှာဖွေဖော်ထုတ်ပေးနိုင်မှု များနဲ့ကိုက်ညီပါက ပူးပေါင်းဆောင်ရွက်ခြင်းနည်းလမ်းများဖြင့် စဉ်းစားဆောင်ရွက်သွားမည်ဖြစ် ပါကြောင်း ရန်ကုန်တိုင်းဒေသကြီးအစိုးရအဖွဲ့မှ ရှင်းလင်းဖြေကြားတာကို တင်ပြခြင်းဖြစ်ပါတယ်။

ဆက်လက်ပြီး လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနနှင့် ပူးပေါင်းဆောင်ရွက်ခြင်း သို့မဟုတ် လွှဲပြောင်းဆောင်ရွက်ခြင်းများလုပ်ကိုင်ဆောင်ရွက်ရန် အစီအစဉ်ရှိ/မရှိမေးခွန်းနှင့် ပတ်သက်၍ ရှင်းလင်းဖြေကြားပါမယ်။ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနအနေဖြင့် နည်းပညာအကူအညီများကို မြို့နယ်၊ ခရိုင်၊ တိုင်းဒေသကြီးရှိ လယ်ယာစိုက်ပျိုးရေးနှင့် ဆည်မြောင်း ဝန်ကြီးဌာနဝန်ထမ်းများဖြင့် ပူးပေါင်းပါဝင်ကူညီဆောင်ရွက်ပေးလျက်ရှိပါတယ်။ လွှဲပြောင်းလုပ်ကိုင် ဆောင်ရွက်ခြင်းများ ဆောင်ရွက်ရန် အစီအစဉ်မရှိပါကြောင်း ရှင်းလင်းဖြေကြားပါသည်။