(ခ)-မောင်တောမြို့နယ်၊ အလယ် သံကျော်ဒေသနှင့် အခြားမြို့နယ်များတွင် စက်မှုလုပ်ငန်းများကို ပြည်တွင်း၊ ပြည်ပရင်းနှီးမြှုပ်နှံမှုများ လာရောက်လုပ်ကိုင်နိုင်ရေး စီစဉ်ပေးရန်နှင့် စပ်လျဉ်းသည့်မေးခွန်း

ရခိုင်ပြည်နယ်၊ ရသေ့တောင်မဲဆန္ဒနယ် ပြည်သူ့လွှတ်တော် ကိုယ်စားလှယ် ဒေါ်ခင်စောဝေရဲ့ မောင်တောမြို့နယ်၊ အလယ်သံကျော်ဒေသမှာ ကမ်းခြေတစ်လျှောက် သင်္ဘောပြင်ဆင်ခြင်းလုပ်ငန်း၊ သင်္ဘောတည်ဆောက်ခြင်းလုပ်ငန်း၊ ပင်လယ်ကမ်းနားအပန်းဖြေ လုပ်ငန်းများနှင့် အခြားသောမြို့နယ်များတွင် အထည်ချုပ်လုပ်ငန်းများ၊ လုပ်သားအင်အား အများအပြားလိုအပ်သော စက်မှုလုပ်ငန်းများကို ပြည်တွင်းပြည်ပရင်းနှီးမြှုပ်နှံမှုများလာရောက် လုပ်ကိုင်နိုင်ရေး စီစဉ်ပေးရန်အစီအစဉ်ရှိ၊ မရှိသိလိုကြောင်းမေးခွန်းနှင့် ပတ်သက်ပြီးတော့ ရှင်းလင်း ဖြေကြားသွားမှာဖြစ်ပါတယ်။

ပို့ဆောင်ရေးဝန်ကြီးဌာန၊ မြန်မာ့ဆိပ်ကမ်းအာဏာပိုင်အနေဖြင့် ပင်လယ်ကူးနိုင်ငံတကာ သင်္ဘောကြီးများဝင်/ထွက်ဆိုက်ကပ်ရာဆိပ်ကမ်းမြို့များတွင် ဆိပ်ကမ်းနယ်နိမိတ်များသတ်မှတ်ပြီးတော့ ဆိပ်ကမ်းဆိုင်ရာဝန်ဆောင်မှုလုပ်ငန်းများ၊ ဖွံ့ဖြိုးတိုးတက်ရေးလုပ်ငန်းများကိုဆောင်ရွက်လျက်ရှိရာမှာ ရခိုင်ပြည်နယ်မှာဆောင်ရွက်လျက်ရှိတဲ့ဆိပ်ကမ်းတွေကတော့ စစ်တွေဆိပ်ကမ်း၊ ကျောက်ဖြူဆိပ်ကမ်း နှင့် သံတွဲဆိပ်ကမ်းတို့ဖြစ်ပါတယ်။ ရခိုင်ပြည်နယ်အတွင်းမှာ ပြည်တွင်းရေကြောင်းပို့ဆောင်ရေးပိုင် စက်ရှိ၊ စက်မဲ့ရေယာဉ်များပြင်ဆင်ခြင်း၊ ရေယာဉ်တည်ဆောက်ခြင်းလုပ်ငန်းများကိုလည်း ပြည်တွင်း ရေကြောင်းပို့ဆောင်ရေးကြီးကြပ်မှုအောက်မှာ စစ်တွေသင်္ဘောကျင်းတွင်ဆောင်ရွက်လျက်ရှိကြောင်း ကိုလည်းသိရပါတယ်။ မောင်တောဒေသ၊ အလယ်သံကျော်ဒေသမှာ ကမ်းခြေတစ်လျှောက် သင်္ဘော‌ပြင်ဆင်ခြင်းလုပ်ငန်းများ၊ သင်္ဘောတည်ဆောက်ခြင်းလုပ်ငန်းများ၊ အထည်အချုပ်လုပ်ငန်းများ၊  လုပ်သားအင်အားအများအပြားလိုအပ်သော စက်မှုလုပ်ငန်းများ လုပ်ကိုင်နိုင်ရန်အတွက် အထူးစီးပွားရေးဇုန် သို့မဟုတ် စက်မှုဇုန်အသွင်တည်ဆောက်ရန် လိုအပ်သောမူဝါဒများချမှတ်ပြီး ပြည်တွင်းပြည်ပရင်းနှီးမြှုပ်နှံမှုများကို ဖိတ်ခေါ်သွားရန်လိုအပ်ပါကြောင်းတင်ပြလာပါတယ်။ ဒီကိစ္စ နှင်ပတ်သက်ပြီး ပြည်တွင်းပြည်ပမှရင်းနှီးမြှုပ်နှံမှုများပြုလုပ်လိုသူများကို ဖိတ်ခေါ်တဲ့နေရာမှာ လုပ်ငန်းဆောင်ရွက်မည့်ဒေသရဲ့ အခြေခံအဆောက်အဦဖွံ့ဖြိုးတိုးတက်မှု၊ ထုတ်လုပ်မည့်ကုန်ချော ပစ္စည်းများအား ပြည်တွင်းပြည်ပသို့ပြန်လည်တင်ပို့ရောင်းချနိုင်မှု၊ စီးပွားရေးအရတွက်ချေကိုက်မှု အလားအလာရှိ၊ မရှိတို့ကို သိရှိနိုင်ရေးအတွက်လိုအပ်သော Feasibility Study အားပြုလုပ် ဆောင်ရွက်သွားရန်လိုအပ်မည်ဖြစ်ပါတယ်။ ပြည်တွင်းပြည်ပစီးပွားရေးလုပ်ငန်းရှင်များအနေဖြင့် လည်း စီးပွားရေးတွက်ချေကိုက်မှုရှိမှသာလျှင် လာရောက်ရင်းနှီးမြှုပ်နှံကြမည်ဖြစ်ပါတယ်။ လက်ရှိ အခြေအနေအရ ရခိုင်ပြည်နယ်တွင် ရေယာဉ်များပြင်ဆင်ရေးအတွက်လည်း စစ်တွေသင်္ဘောကျင်း တစ်ခုတည်းနဲ့လုံလောက်မှုရှိကြောင်းကိုလည်း လေ့လာတွေ့ရှိရပါတယ်။ သို့ဖြစ်ပါ၍ ရခိုင်ပြည်နယ်၊ မောင်တောမြို့နယ်၊ အလယ်သံကျော်ဒေသမှာ ပင်လယ်ကမ်းခြေမှာသာယာလှပသော်လည်း လက်ရှိ အခြေအနေမှာသွားလာလည်ပတ်ရန် လမ်းပန်းဆက်သွယ်ရေးမှအစ အခြေခံအဆောက်အဦများ ပြည့်စုံရန်လိုအပ်နေသေးသဖြင့် အပန်းဖြေစခန်းအပြင် စက်မှုလုပ်ငန်းများ ဆောင်ရွက်နိုင်ရေးအတွက် ပြည်တွင်းပြည်ပရင်းနှီးမြှုပ်နှံသူများ ဖိတ်ခေါ်နိုင်မည့်အခြေအနေ လောလောဆယ်မရှိသေးပါကြောင်း ရှင်းလင်းဖြေကြားပါသည်။