(ဃ)-မြေပုံမြို့နယ် ငမန်းရဲကျွန်း အစိုးရတာအား နိုင်ငံတော်က ဆည်ဖို့ပေးခြင်းရည်ရွယ်ချက်နှင့်စပ်လျဉ်း သည့်မေးခွန်း

ရှေးဦးစွာ ရခိုင်ပြည်နယ်၊ ‌ွမေပုံမြို့နယ် ငမန်းရဲကျွန်းတာ၏ မူလတည်ဆောက်ခဲ့ပုံနှင့် လက်ရှိပြုပြင် ဆောင်ရွက်ဆဲကာလအခြေအနေကို ရှင်းလင်းတင်ပြလိုပါတယ်။ ရခိုင်ပြည်နယ်၊ မြေပုံမြို့နယ် ငမန်းရဲကျွန်းတာကို လယ်မြေများအတွင်းသို့ ပင်လယ်ဆားငန်ရေဝင်ရောက်ခြင်းမှ ကာကွယ်ရန် ရည်ရွယ်၍ ၁၉၈၇-၁၉၈၈ ခုနှစ်တွင် တည်ဆောက်ပြီးစီးခဲ့ပါတယ်။ တာတမံအလျားမှာ ၃၆ မိုင်ဖြစ်ပြီး လယ်ယာမြေဧရိယာ ၁၂၃၀၀ ဧကခန့်ကို ပင်လယ်ဆားငန်ရေဝင်ရောက်ခြင်းမှ ကာကွယ်နိုင်ပြီး နှစ်စဉ်မိုးစပါးစိုက်ဧရိယာ ပျမ်းမျှ ၈၅၀၀ ဧကခန့်ကို အောင်မြင်စွာ စိုက်ပျိုးဖြစ်ထွန်းလျက်ရှိပါတယ်။ ငမန်းရဲကျွန်းတာ၏ မြောက်ဘက်ခြမ်း မြေနိမ့်ပိုင်းတွင် ယခင်အစိုးရကာလကတည်းက ပုစွန်ကန်များ ရှိနေကြောင်း သိရှိရပါတယ်။

          ၂၀၁၂-၂၀၁၃ ဘဏ္ဍာရေးနှစ်အတွင်း ရခိုင်ပြည်နယ်အတွင်းရှိ လယ်သမားတာ(ကာရီ) များအား တာပေါင်ဆည်ဖို့ပြုပြင်ရာတွင် ငမန်းရဲကျွန်းတာလည်း အပါအဝင်ဖြစ်ပါတယ်။ ငမန်းရဲကျွန်း တာတမံ (ကာရီ) များအား တာပေါင်ဆည်ဖို့ရာတွင် ပုစွန်ကန်ဧရိယာများ၌ လုပ်ငန်းဆောင်ရွက်ရန် အခက်အခဲပေါ်ပေါက်သဖြင့် ပြည်နယ်ဆည်မြောင်းဦးစီးဌာနမှ ရခိုင်ပြည်နယ်အစိုးရအဖွဲ့သို့ အကျိုး အကြောင်းတင်ပြခဲ့ရာ အစိုးရအဖွဲ့၏ တာဝန်ပေးချက်အရ ပြည်နယ်စိုက်ပျိုးရေးနှင့် မွေးမြူရေး ဝန်ကြီးဌာနမှ ကွင်းဆင်းစိစစ်ခဲ့ပါတယ်။ စိစစ်တွေ့ရှိချက်များကို တင်ပြတဲ့အခါမှာ တင်ပြချက်အပေါ် ရည်ညွှန်း၍ ပြည်နယ်အစိုးရအဖွဲ့၏ ၂၁-၁-၂၀၁၃ ရက်စွဲပါစာအမှတ် ၀၃/၅-၁/အစိုးရအဖွဲ့(ရခိုင်) ဖြင့် ပြည်နယ်ဆည်မြောင်းဦးစီးဌာန စစ်တွေမြို့သို့ လိပ်မူအကြောင်းကြားခဲ့ပါတယ်။ အကြောင်းအချက် အပြည့်အစုံကို အောက်ပါအတိုင်းဖော်ပြအပ်ပါတယ်။ (၁) မြေပုံမြို့နယ် ငမန်းရဲကျွန်းဒေသ မဟိုင်းမြစ် နှင့် ကမ်းထောင်းကြီးချောင်း ၂ ခုကြားရှိ နေရာများတွင် ရေငန်ဝင်ရောက်မှုမရှိစေရန် ဆည်မြောင်း ဦးစီးဌာနမှ တာတမံ(ကာရီ)များအား တာပေါင်ဆည်ဖို့ရာတွင် ၎င်းဒေသရှိ ပုစွန်တစ်သား၊ စပါးတစ်သီး စိုက်ပျိုးရေးလုပ်ငန်းဆောင်ရွက်နေသည့် စီးပွားရေးလုပ်ငန်းရှင်များမှ ရေတံခါးများအား ဖယ်ရှား နေခြင်းကိစ္စနှင့်ပတ်သက်၍ စိစစ်ခဲ့ရာ မဟိုင်းမြစ်နှင့် ကမ်းထောင်းကြီးချောင်းတွင် ငမန်းရွှေမြေ ပုစွန်တစ်သား၊ စပါးတစ်သီးစိုက်ပျိုးရေးအစုအဖွဲ့ အဖွဲ့ဝင် ၂၅ ဦး ပိုင်ဆိုင်သည့်ဧက ၁၇၇၇ ဧက ရှိကြောင်း၊ မဟိုင်းမြစ်ကမ်းဘက်ခြမ်း (အရှေ့ခြမ်း)ရှိ စိုက်ပျိုးမြေ ၁၂၀၀ ဧကတွင် မိုးစပါးစိုက်ပျိုးပြီး ရေသွင်းရေထုတ်ပြုလုပ်ရန် ရေတံခါး ၄၀ ခုကိုလည်းကောင်း၊ ကမ်းထောင်းကြီးချောင်း အထက်ဘက် ခြမ်း (အနောက်ဘက်ခြမ်း) ဖြစ်ပါတယ်ခင်ဗျား။ စပါးစိုက်ပျိုးမြေဧရိယာ ၅၇၇ ဧကတွင် ရေတံခါး ၂၀ ကိုလည်းကောင်း တပ်ဆင်ထားရှိကြောင်း၊ ငမန်းရွှေမြေအစုပိုင်ဆိုင်သည့်မြေ၏ တောင်ဘက်တွင် တခြားလယ်မြေများနှင့် ခြားထားသည့် ဂျပန်လမ်းမကြီးတည်ရှိပြီး မြောက်ဘက်တွင် လယ်သမားများ၊ ပုစွန်သမားများ ကိုယ်ထူကိုယ်ထဆည်ဖို့ထားသည့်တမံ (ကာရီ) ရှိသဖြင့် ရေတံခါး ၆၀ ခုမှ ဝင်ရောက် သည့်ရေငန်များမှာ ၎င်းတို့ပိုင်ဆိုင်သည့်မြေ ၁၇၇၇ ဧကကိုသာဝင်ရောက်နိုင်ပြီး အခြားလယ်သမား များ၏ လယ်မြေများသို့ ရေငန်များဝင်ရောက်မှုမရှိသည်ကို စိစစ်တွေ့ရှိရကြောင်း၊ ငမန်းရွှေမြေအစု အဖွဲ့ပိုင် ရေတံခါး ၆၀ ခုမှ ဝင်ရောက်သည့် ရေငန်များသည် ၎င်းအသင်း၏ လယ်မြေများကိုသာ အကျိုးသက်ရောက်မှုဖြစ်ပေါ်စေပြီး အခြားလယ်သမားများ၏ လယ်မြေများအား ထိခိုက်မှုမရှိသဖြင့် စပါးတစ်သီး၊ ပုစွန်တစ်သားအစုအဖွဲ့၏ လုပ်ငန်းများ အရှိန်အဟုန်မပျက် ဆောင်ရွက်နိုင်ရန်အတွက် အဆိုပါ ရေတံခါး ၆၀ ခုအား ချန်လှပ်၍ တမံ(ကာရီ)ပေါင်ဆည်ဖို့ခြင်းကို ဆည်ဖို့သင့်ပါကြောင်း တင်ပြ လာပါတယ်။ (၂) အဆိုပါကိစ္စနှင့်ပတ်သက်၍ ငမန်းရဲကျွန်းဒေသရှိ ဆည်မြောင်းကာရီအတွင်း ဆားငန် ရေဝင်ရောက်မှုမရှိစေရန် တာတမံ(ကာရီ)ပေါင်ဆည်ဖို့ရာတွင် စပါးစိုက်လယ်သမားများအား ထိခိုက် နိုင်မှုမရှိသည့် ငမန်းရွှေမြေအစုအဖွဲ့ပိုင် ရေတံခါး ၆၀ အားချန်လှပ်၍ တာပေါင်ဆည်ဖို့သွားရန်နှင့် ဆောင်ရွက်ထားရှိမှုအခြေအနေအား ပြန်လည်တင်ပြရန်ဆိုပြီးတော့ ရခိုင်ပြည်နယ်အစိုးရအဖွဲ့က ဆည်မြောင်းဌာနကို အကြောင်းကြားခဲ့ပါတယ်။

          ရခိုင်ပြည်နယ်အစိုးရအဖွဲ့၏ အကြောင်းကြားစာအရ ငမန်းရဲကျွန်းဒေသတွင် လယ်ယာစိုက်ပျိုး ရေးလုပ်ငန်းများကို ဆောင်ရွက်နေကြသလို ကျွန်း၏မြောက်ဘက်တွင် ပုစွန်တစ်သား၊ စပါးတစ်သီး စိုက်ပျိုးရေးလုပ်ငန်း ၁၇၇၇ ဧက ဆောင်ရွက်ခြင်းကိုလည်း ပြည်နယ်အစိုးရအဖွဲ့၏ ခွင့်ပြုချက်ဖြင့် ဆောင်ရွက်လျက်ရှိကြောင်း ပေါ်လွင်ထင်ရှားပါတယ်။ နိုင်ငံတော်ဖွဲ့စည်းပုံအခြေခံဥပဒေပုဒ်မ ၁၈၈ နောက်ဆက်တွဲဇယား(၂)အရ ၂၀၁၃-၂၀၁၄ ဘဏ္ဍာရေးနှစ်မှစတင်၍ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန ဆည်မြောင်းဦးစီးဌာန၏ လက်ရှိတည်ဆောက်ပြီးဖြစ်သော ဆည်၊ တာတမံ များနှင့် ရေသောက်စနစ်မြောင်းများအား ပြုပြင်ထိန်းသိမ်းခြင်း၊ မွမ်းမံပြင်ဆင်ခြင်း၊ ဆက်လက်၍ တိုးချဲ့ဆောင်ရွက်ခြင်းလုပ်ငန်းများအပါအဝင် ဘဏ္ဍာငွေလိုအပ်ချက်ကို သက်ဆိုင်ရာတိုင်းဒေသကြီး/ ပြည်နယ်အစိုးရမှ တာဝန်ယူဆောင်ရွက်သွားနိုင်ရေးနှင့် ဘဏ္ဍာငွေအသုံးစရိတ် လိုအပ်ချက်ကိုလည်း တိုင်းဒေသကြီးနှင့် ပြည်နယ်ဘဏ္ဍာရေး ရန်ပုံငွေခေါင်းစဉ်မှ တင်ပြတောင်းခံအကောင်အထည်ဖော် ဆောင်ရွက်သွားနိုင်ရန် နိုင်ငံတော်အစိုးရ၏ ညွှန်ကြားချက်အရ ၄-၁၂-၂၀၁၂ ရက်နေ့တွင် စတင်ပြီး ပြည်နယ်နှင့်တိုင်းဒေသကြီး အစိုးရအဖွဲ့အသီးသီးသို့ တာဝန်များ ခွဲဝေလွှဲပြောင်းပေးအပ်ခြင်း ဆောင်ရွက်ပြီးဖြစ်ပါတယ်။

          သို့ဖြစ်ပါ၍ ငမန်းရဲကျွန်းတာ ပြန်လည်ပြုပြင်ခြင်းလုပ်ငန်းအား ရခိုင်ပြည်နယ် အစိုးရအဖွဲ့ အနေဖြင့် နိုင်ငံတော်အစိုးရသို့ ရန်ပုံငွေတင်ပြတောင်းခံပြီး ပြည်နယ်အစိုးရအဖွဲ့၏ အစီအစဉ်အားဖြင့် လုပ်ငန်းများ ဆက်လက်ဆောင်ရွက်သွားနိုင်မည်ဖြစ်ပြီး လယ်ယာစိုက်ပျိုးရေးနှင့် ဆည်မြောင်းဝန်ကြီး ဌာနအနေဖြင့် နည်းပညာပိုင်းဆိုင်ရာနှင့် လိုအပ်သောအကူအညီများ စီစဉ်ဆောင်ရွက်ပေးသွားမည် ဖြစ်ပါတယ်။ လွှတ်တော်ကိုယ်စားလှယ်တော်ကြီး ဦးဖေသန်း၏ မေးမြန်းချက်များကို တစ်ချက်ချင်း လိုရင်းပြန်လည်ဖြေကြားလိုပါတယ်။ မေးခွန်း(၁) အနေနဲ့ ‌ွဖေကြားရမယ်ဆိုရင်တော့ ရခိုင်ပြည်နယ်၊ မြေပုံမြို့နယ် ငမန်းရဲကျွန်း အစိုးရတာအား လယ်ယာစိုက်ပျိုးရေးအတွက် နိုင်ငံတော်က ဆည်ဖို့ ပေးခြင်းဖြစ်ပါကြောင်း ဖြေကြားအပ်ပါတယ်။ မေးခွန်း(၂)နှင့်ပတ်သက်ပြီးတော့ စိုက်ပျိုးရေးကို မထိ ခိုက်သောဒေသ၏ စီးပွားတိုးတက်ရေးအတွက် ဒေသအာဏာပိုင်အဖွဲ့အစည်း၏ စီမံဆောင်ရွက်သည့် အပေါ်တွင် တစ်စုံတစ်ရာ ဝေဖန်ရန်မရှိပါကြောင်း ဖြေကြားအပ်ပါတယ်။ မေးခွန်း(၃) အနေနဲ့ ပြည်ထောင်စုအစိုးရဝန်ကြီးဌာနတစ်ခုခု၏ ဆောင်ရွက်နေသော လုပ်ငန်းများအား ပြည်နယ်အစိုးရ ဝန်ကြီးက ပိတ်ပင်ခွင့်မရှိပါ။ ညှိနှိုင်းခွင့်သာရှိပါကြောင်းဖြေကြားအပ်ပါတယ်။ မေးခွန်း(၄) အနေနဲ့ ပတ်သက်ပြီး ဖြေကြားရမယ်ဆိုရင် ငမန်းရဲကျွန်းတာတမံ၏စုစုပေါင်းအလျား ၃၆ မိုင်အနက် ၂၀၁၂-၂၀၁၃ ဘဏ္ဍာရေးနှစ်ကုန်တွင် အလျား ၁၇.၅ မိုင်ပြီးစီးပါမည်။ ပြုပြင်ရန်ကျန်ရှိသော တာတမံအလျား ၁၈.၅ မိုင်ကို ၂၀၁၃-၂၀၁၄ ဘဏ္ဍာရေးနှစ်တွင် ပြီးစီးရန်အတွက် လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနမှ ရခိုင်ပြည်နယ်အစိုးရအဖွဲ့အား လိုအပ်သလို ပံံ့ပိုးကူညီသွားမည်ဖြစ်ပါ ကြောင်းဖြေကြားပါသည်။

ဦးဖေသန်း (မြေပုံမဲဆန္ဒနယ်) ကဆက်စပ် မေးခွန်းမေးမြန်းပါသည်။

ပြည်ထောင်စုဝန်ကြီးဌာနကနေပြီးတော့ ပြည်နယ်ဝန်ကြီး တွေကို လက်ပြောင်းလက်လွှဲပေးတယ်ဆိုတာဟာ လုပ်ငန်းစီမံချက်တွေကို အကောင်အထည်ဖော်ဖို့ပဲ ဖြစ်ပါလိမ့်မယ်။ ဥပဒေတစ်ခုလုံးကို မင်းတို့ကြိုက်သလိုလုပ်ကြ။ သွန်ချင်သွန်မှောက်ချင်မှောက် တည်ဆဲဥပဒေကို ဂရုစိုက်စရာမလိုဘူး။ လုပ်ချင်တာလုပ်လို့ရတယ်။ ရုံးတစ်ရုံး ဓားတစ်စင်းအပ်နှင်း ထားတဲ့ပုံစံမျိုးတော့ ဟုတ်မယ်မထင်ပါဘူး။ ဒါကြောင့် ကျွန်တော်တို့ လယ်ယာမြေဥပဒေတွေ၊ ဆည်မြောင်းဥပဒေတွေ၊ မြေလွတ်မြေရိုင်းဥပဒေတွေဆိုပါတော့ ဥပမာ အဲဒီလို ဥပဒေမျိုးဟာ နိုင်ငံတော်က၊ ပြည်ထောင်စုအစိုးရက၊ ပြည်သူ့လွှတ်တော်က၊ ပြည်ထောင်စုလွှတ်တော်က တည်ဆဲ ဥပဒေတွေဖြစ်ပါတယ်။ ညှိနှိုင်းပြီးတော့ လုပ်ချင်တာကို လုပ်လို့မရဘူးထင်ပါတယ်။ ဥပဒေဟာ ဥပဒေ ပဲဖြစ်ပါလိမ့်မယ်။ အဲ့ဒီတော့ ကျွန်တော်တို့ ဒါကို ဘယ်သူပဲချိုးဖောက်ဖောက်၊ ပြည်နယ်ဝန်ကြီးကပဲ ချိုးဖောက်ဖောက်၊ သမ္မတကြီးကပဲချိုးဖောက်ဖောက် ဒါတော့ ကျွန်တော်တို့က ဥပဒေရဲ့အထက် မှာတော့ ဘယ်သူမှမရှိပါဘူး။ ခုနက ဝန်ကြီးပြောပါတယ်။ ဒါဟာ ပြည်နယ်အစိုးရက တားထားလို့ဖြစ် ပါတယ်ဆိုတာကို ဝန်ကြီးက ဝန်ခံပြောသွားပါတယ်။ ဒီတော့ ဥပဒေတစ်ခုကို ချိုးဖောက်လာမယ်ဆိုရင် ဘယ်သူကအရေးယူမလဲ။ လယ်သမားတွေအတွက် ဆည်ပေးတဲ့တာတမံဖြစ်ပါတယ်။ ရေငန်မဝင် ရအောင် ရည်ရွယ်ချက်နဲ့ ဆည်ပေးပါတယ်။ ဆည်မြောင်းဌာနဥပဒေအရလည်း တာတမံကို ချိုးဖောက် ခွင့်မရှိပါဘူး။ ပုစွန်ကွင်းမွေးဖို့ထား၊ ရိုးရိုးတစ်ခုခုလိုအပ်ချက်နဲ့ တာတမံကို ချိုးဖောက်ခွင့်မရှိပါဘူး။ လယ်ယာမြေဥပဒေမှာလည်း ဒီလယ်ယာမြေကို အခြားနည်းနဲ့ အသုံးမပြုရ။ ခွင့်ပြုချက်မရှိရင် ဥပဒေ ကြီးလည်းအထင်အရှားရှိတယ်။ အဲ့ဒီ ဥပဒေကို အခုချိုးဖောက်နေပါတယ်။ ကာယကံရှင်တွေ ချိုးဖောက်နေပါတယ်။ ဘယ်သူကအရေးယူမှာလဲ။ ညှိနှိုင်းလို့ရမလားခင်ဗျား။ နစ်နာသူတွေအတွက် ဘယ်သူကကုစားပေးမှာလဲ။ ဒီအထဲမှာရှိတဲ့ လယ်သမားတွေအတွက် မနစ်နာဘူးဆိုတာ လယ်ယာ စိုက်ပျိုးရေးနှင့်ဆည်‌ွမောင်းဝန်ကြီးဌာနက တာဝန်ရှိတဲ့ပုဂ္ဂိုလ်တွေကို စေလွှတ်ပြီးတော့ လေ့လာခဲ့ပါ သလား။ ပြည်နယ်အစိုးရအဖွှဲ့ရဲ့ ပြောကြားချက်ကို အတည်ကိုင်ခဲ့တာဖြစ်ပါသလား။ ရေငန်ကိုတား တယ်ဆိုတာ အပြင်က တာတမံက ၆ ပေရှိရင် အတွင်းတာတမံလည်း ၆ ပေရှိမှ အဲဒီရေငန် ဟိုဘက်ကို မကျော်မှာဖြစ်ပါတယ်။ ပုစွန်ကွင်းသမားတွေ ရေသွင်းတယ်ဆိုတာ  ရေကိုအပြင်နှင့် အရင်နီးပါး လောက်သွင်းတာ။ သူတို့တာတမံခိုင်မာစေလို့ ရေငန်မှာ ပုစွန်တွေ၊ သားပေါက်တွေ ဝင်ပါစေလို့ ဒီတော့ ဟိုဘက်မှာ လယ်သမားတွေနဲ့ ခွဲထားတဲ့တာက ၂ ပေလောက်ပဲကျယ်တယ်။ ၃ ပေလောက်ပဲ ကျယ်တယ်။ အမြဲတမ်းရေငန်ကျော်တယ်။ ရေငန်တက်တယ်။ ဒီရေထရက်တွေမှာရေသွင်းတယ်။ ဒီရေ သေတဲ့ရက်တွေမှာ ရေငန်ကို အပြည့်လောင်ထားတယ်။ ဟိုဘက်ကို တစိမ့်စိမ့်ရေတွေက ဝင်နေတယ်။ ဟိုဘက်ကစပါးကွင်းတွေ အကုန်လုံးပျက်တယ်။ အခုဆိုရင် တစ်ကျွန်းလုံးရှိတဲ့လယ်သမားတွေက ဝန်ကြီးချုပ်ဆီ လက်မှတ်ထိုးပြီးစာတင်ထားတယ်။ ဒါဟာ လယ်သမားတွေက နစ်နာလို့ ပြောနေ ကြတာပါ။ မနစ်နာပါဘူးဆိုတာ ပုစွန်ကွင်းသမားတွေပဲဖြစ်ပါလိမ့်မယ်။ သူတို့နဲ့ပူးပေါင်းတဲ့သူတွေပဲ ဖြစ်ပါလိမ့်မယ်။ အဲဒီလို ဆင်ခြေဆင်လက်မျိုးနဲ့ ကျွန်တော်တို့က အတည်မပြုသင့်ပါဘူး။ ဒါကြောင့် ဝန်ကြီးဌာနတွေက တာဝန်ရှိသူက သွားစစ်ဆေးပြီးတော့ ဒါဟုတ်၊ မဟုတ် အတည်ပြုသင့်ပါတယ်။ အဓိကပြောလိုတာကတော့ ဒါဥပဒေကို ချိုးဖောက်နေတယ်။ ဝန်ကြီးဌာနအနေနဲ့ နိုင်ငံတော်က တာတမံတွေကို ဆည်ပေးထားတဲ့ ဘဏ္ဍာငွေတွေ အလဟဿမဖြစ်အောင် တစ်ဖက်ပြည်သူတွေ ကိုလည်း ကာကွယ်လို့ရနိုင်အောင် နိုင်ငံတော်က ဆည်ထားတဲ့ ကွင်းထဲမှာ ဘာမှစရိတ်အကုန်အကျ မခံဘဲ စီးပွားရေးလုပ်နေတဲ့ လုပ်ငန်းတွေကို ရပ်တန့်အောင် အရေးယူပေးမယ့်တာဝန်ဟာ ဝန်ကြီးဌာန တာဝန်ပါ။ ဝန်ကြီးဌာနမှာတာဝန်ရှိပါတယ်။ ဒါကြောင့် ဒီဥပဒေချိုးဖောက်ခြင်းဟာ ဝန်ကြီးဌာနနဲ့ ဆိုင်၊ မဆိုင်ကိုသိလိုပါတယ်။ အရေးယူတာ ဘယ်သူက အရေးယူပေးမလဲဆိုတာကို သိလိုပါတယ်။ ဥပဒေ ချိုးဖောက်ခြင်းရှိ၊ မရှိကိုလည်း သိလိုပါတယ် ဝန်ကြီးခင်ဗျား။ လေးစားသောအားဖြင့် ပြည်သူ့ လွှတ်တော်ဥက္ကဋ္ဌကြီးမှတစ်ဆင့် တစ်ဆက်တစ်စပ်တည်း မေးမြန်းပါသည်။

လယ်ယာစိုက်ပျိုးရေးနှင့်ဆည်မြောင်းဝန်ကြီးဌာန၊ ဒုတိယဝန်ကြီး ဦးခင်ဇော်

ပြည်နယ်အစိုးရအဖွဲ့ရဲ့ ကွင်းဆင်းစစ်ဆေးပြီးတော့ တွေ့ရှိချက် ပေါ်မှာဖော်ပြထားတဲ့ထဲမှာ ငမန်းရဲကျွန်းတာထဲမှာ မူလကတည်ဆောက်တာကတော့ ရေငန်ကာကွယ် မှုဆိုတဲ့ကျွန်းကို ပတ်တာမှန်ပါတယ်။ ဒါပေမယ့် မြောက်ဘက်ပိုင်းမှာ အနိမ့်ပိုင်းဖြစ်နေတဲ့အပိုင်းတွေမှာ ပုစွန်နဲ့ စိုက်ပျိုးရေး အဲဒီကန်တွေ သူတို့ အရင်ကတည်းကလည်း ရှိခဲ့တယ်။  အခုလည်း ရှိနေတဲ့ သဘောရှိတာ။ ဒါကြောင့်မို့လို့ ဒီကိစ္စမှာ ကျွန်တော်တို့ အနိမ့်ပိုင်းကျတဲ့နေရာမှာ ပျိုးနေတဲ့လုပ်ငန်း ကလည်း ကျွန်တော်သိသလောက် ဒီအထဲမှာ လုပ်နေတဲ့ စိုက်ပျိုးရေးနဲ့ ဆက်နွယ်ပြီးတော့ မွေးမြူရေး ရော၊ စိုက်ပျိုးရေးရောလုပ်နေတဲ့ လူတွေပဲဖြစ်ပါတယ်။ ဒါကြောင့်မို့လို့ ခုနက ကိုယ်စားလှယ်တော်ကြီး ဦးဖေသန်း မေးတဲ့မေးခွန်းနှင့်ပတ်သက်ပြီးတော့ မှန်ပါတယ်။ လယ်ယာစိုက်ပျိုးရေးနှင့် ဆည်မြောင်း ဝန်ကြီးဌာန ဆည်မြောင်းဦးစီးဌာနအနေနဲ့ ဆောင်ရွက်ပေးနိုင်တာကတော့ လက်ရှိဖြစ်နေတဲ့ အခြေအနေကို ကျွန်တော်တို့ ပြန်ပြီးတော့ စိစစ်ပေးပါမယ်။ စိစစ်ပြီးလို့ရှိရင် သက်ဆိုင်ရာ ပြည်နယ် အစိုးရအဖွဲ့နှင့်အတူ သက်ဆိုင်ရာ တောင်သူလယ်သမားတွေအပါအဝင် ညှိနှိုင်းပြီးတော့မှ ဒီအပေါ်မှာ အားလုံးကျေကျေနပ်နပ်သဘောတူတဲ့ အနေအထားပေါ်မှာ ဆောင်ရွက်ပေးသွားမယ်လို့ ကျွန်တော် ကတိပြုပါတယ်။ အကယ်၍ သူတို့ညှိနှိုင်းပြီးလို့ ‌ွမောက်ပိုင်းအနိမ့်ပိုင်းသည် သူတို့ဆိုထားတဲ့ ပုစွန် တစ်သား၊ စပါးတစ်သီး ဧရိယာလို့သာ လယ်သမားအများစုက သူတို့နဲ့ပတ်သက်တဲ့ လယ်သမားတွေ က သဘောတူတယ်ဆိုရင် ကျွန်တော်တို့က အတွင်းမှာရှိတဲ့ လယ်မြေဧက ၈၀၀၀ ကျော် သူတို့လည်း စိုက်ပျိုးအောင်မြင်နေပါတယ်။ ဒီအတွင်းပိုင်းကနေပြီးတော့ ပုစွန်ကန်ကြောင့် အထဲကိုရေမဝင်အောင် တစ်နည်းနည်းနဲ့ကာပြီးတော့ လယ်ယာစိုက်ပျိုးမှုကို ထိန်းသိမ်းသွားရမယ်ဆိုတဲ့ အကြောင်း တာဝန်ရှိ ပါတယ်။ ဒါကြောင့်မို့လို့ ကျွန်တော်စိစစ်ပါမယ်။ စိစစ်ပြီးတော့ သက်ဆိုင်ရာ ပြည်နယ်အစိုးရအဖွဲ့နဲ့ ကျွန်တော်တို့ အားလုံးညှိနှိုင်းပြီးတော့ တောင်သူလယ်သမားတွေအပါအဝင် အားလုံးသဘောတူချက် ပေါ်မှာမူတည်ပြီးတော့ ဆက်လက်ဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။