(ဃ)-တောင်သူလယ်သမားများ၏ ဘဝဖွံ့ဖြိုးတိုးတက်စေရန်အတွက် လယ်ယာမြေ၊ မျိုးစေ့၊ ချေးငွေ၊ ပိုးသတ်ဆေး၊ စိုက်ပျိုးရေးနည်းပညာစသည့် ကိစ္စရပ်များနှင့်စပ်လျဉ်းသည့်မေးခွန်း

လွှတ်တော်များပြီးတဲ့အခါမှာ ကျွန်တော်တို့တစ်တွေဟာ မဲဆန္ဒနယ်အသီးသီးမှာရှိတဲ့ တောင်သူ  လယ်သမားတွေနဲ့တွေ့ဆုံပြီးတဲ့အခါမှာ လွှတ်တော်က တောင်သူလယ်သမားများရဲ့အကျိုးဆောင်ရွက် နိုင်တဲ့ ဥပဒေတွေနဲ့ နိုင်ငံတော်အစိုးရကလည်း ဆောင်ရွက်ပေးခဲ့တဲ့အခြေအနေများကို ရှင်းပြတဲ့ အခါမှာ တောင်သူလယ်သမားများက ၎င်းတို့လိုအပ်ချက်များ တင်ပြလာကြပါတယ်။ ဒါကြောင့်မို့လို့ ဒေသအသီးသီးမှာရှိတဲ့ တောင်သူလယ်သမားများရဲ့ တင်ပြချက်များကို စုစည်းလိုက်တဲ့အခါမှာ ကျွန်တော်တို့ မူလအဆိုမှာ အဆို ၆ ချက်ရှိပါတယ်။ ဒါကို ပြောင်းလဲပြင်ဆင်ပြီးတော့ လွှတ်တော် ဥက္ကဋ္ဌကြီးရဲ့ မေတ္တာရပ်ခံချက်အရ နိုင်ငံတော်အစိုးရမှာလည်း အခက်အခဲမရှိအောင်၊ တောင်သူ လယ်သမားများလည်း အဆင်ပြေအောင်ဆိုပြီးတော့ မေးခွန်းများပြောင်းခဲ့ခြင်း ဖြစ်ပါတယ်။ ဒီနေရာမှာ မေးခွန်းများအနေနဲ့ ကျွန်တော်တို့ပြောင်းတဲ့အခါမှာ နိုင်ငံတော်အစိုးရအနေနဲ့ အကြပ်အတည်း မဖြစ်ရအောင် မေးခွန်း ၃ ခုမှာ မူဆိုတဲ့ အရာထည့်သွင်းထားပါတယ်။ ဘာလဲဆိုတော့ ရေရှည် တောင်သူလယ်သမားများရဲ့အကျိုးကို ဆောင်ရွက်နိုင်စေဖို့အတွက် ထည့်သွင်းပြီးတော့ မေးထားခြင်း ဖြစ်ပါတယ်။ ဒီနေရာမှာ ကျွန်တော်တို့ ဆောင်ရွက်ပေးရန် အစီအစဉ်ရှိ၊ မရှိဆိုတဲ့ မေးခွန်းကို တာဝန်ရှိသူများက မရှိဘူးလို့ဖြေဆိုခဲ့လို့ရှိရင်လည်းပဲ လယ်သမားများရဲ့ နှလုံးသားမှာ ဒဏ်ရာရစေမှာ ဖြစ်ပါတယ်။ ဒါကြောင့်မို့လို့ မရစေရန်အတွက် နိုင်ငံတော်မှာလည်း အခက်အခဲမရှိစေရန်အတွက် မူဆိုတဲ့ အသုံးအနှုန်းကို ထည့်သွင်းပြီးတော့မေးရခြင်း ဖြစ်ပါတယ်။ တကယ်လို့များ ကျွန်တော့်မေးခွန်း နှင့်ပတ်သက်လို့ သက်ဆိုင်ရာများက အဆင်သင့်မဖြစ်သေးဘူးဆိုလို့ရှိရင်လည်း လာမယ့်လွှတ်တော် များမှာ ဖြေဆိုပေးဖို့ တစ်ဆက်တည်းပဲ ကြိုတင်ပြီးတော့ တင်ပြအပ်ပါတယ်ခင်ဗျား။ မေးခွန်း (၁) ကတော့ တောင်သူလယ်သမားများက မိမိရဲ့ လယ်ယာမြေများ ဓာတ်ခွဲစမ်းသပ်နိုင်ရေးအတွက် မြို့နယ်အသီးသီး၏ စိုက်ပျိုးရေးရုံးများမှာ ဓာတ်ခွဲစမ်းသပ်ခန်းများထားရှိ ဆောင်ရွက်ပေးရန် နိုင်ငံတော်အစိုးရမှ မူတစ်ရပ်ချမှတ်ဆောင်ရွက်ပေးရန် အစီအစဉ်ရှိ၊ မရှိဖြစ်ပါတယ်။ ဒါ ပထမ မေးခွန်း ဖြစ်ပါတယ်။

ခေတ်အဆက်ဆက်မှ ယနေ့အထိ လယ်ယာမြေများကို ပြုပြင်နိုင်ခဲ့ခြင်းမရှိခဲ့ပါဘူး။ တောင်သူလယ်သမားများက ဓာတ်ခွဲစမ်းသပ်နိုင်စွမ်းမရှိ၍ ဖြစ်ပါတယ်။ ယခင်က သီးနှံတစ်မျိုးမျိုးစိုက်ပျိုးပါက သီးနှံပင်များ စိမ်းစိုပြီး အထွက်နှုန်းကောင်း၊ အရည်အသွေး ကောင်းခဲ့သော်လည်းပဲ ယခုအခါမှာ သီးနှံစိုက်ပျိုး၍ အပင်ဖြစ်လာကတည်းက အမြစ်အားဆေး၊ အပင်အားဆေး၊ အပွင့်အားဆေး၊ အသီးအားဆေးများကို တောင်သူလယ်သမားများက သုံးစွဲခဲ့ကြရ ပါတယ်။ ရာသီဥတုအရဖြစ်စေ၊ ဖျက်ပိုးများကြောင့်ဖြစ်စေ၊ သီးနှံအထွက်နှုန်းများ လျော့နည်းတဲ့ အခါမှာ ဆေးဖိုးကုန်ကျငွေပိုများကိုမူ ဆေးဖိုးကုန်ကျငွေများကိုပင် တောင်သူလယ်သမားများက မဆပ်နိုင်ကြတော့ဘဲ ကြွေးတင်ခဲ့ကြရပါတယ်။ ကျွန်တော်တို့ မနှစ်ကဆိုရင် အဆိုးဆုံးဖြစ်ပါတယ်။ မနှစ်က တောင်သူလယ်သမားများဟာ အကြပ်ဆုံးနှစ်တစ်နှစ် ဖြစ်ပါတယ်။ တောင်သူလယ်သမား များက မိမိတို့ရဲ့ လယ်ယာမြေများကို ဓာတ်ခွဲစမ်းသပ်စေခြင်းဖြင့် သီးနှံအမျိုးအစားအလိုက် မြေများ ပြုပြင်နိုင်ပြီဆိုလျှင် ယနေ့သုံးစွဲနေကြရတဲ့ အမြစ်အားဆေး၊ အပင်အားဆေး၊ အပွင့်အားဆေးနှင့် အသီးအားဆေးများအတွက် ကုန်ကျရတဲ့ စရိတ်ငွေများသက်သာစေပြီး တောင်သူလယ်သမားများရဲ့ ထွက်ငွေလျော့နည်းစေကာ ဝင်ငွေများတိုးတက်မည်ဖြစ်တဲ့အတွက် အရည်အသွေးကောင်းတဲ့သီးနှံ များ အထွက်တိုးလာမှာ ဖြစ်ပါတယ်။ ဒီနေရာမှာ တောင်သူလယ်သမားများအနေနဲ့ အဘယ်ကြောင့် ဓာတ်ခွဲစမ်းသပ်နိုင်ခြင်းမရှိသလဲဆိုတာ တင်ပြရလျှင် လယ်သမားများဟာ နည်းပညာလည်း မရှိပါ ဘူး။ ဓာတ်ခွဲစမ်းသပ်တဲ့ကိရိယာလည်း မြို့နယ်များမှာ မရှိပါဘူး။ သို့သော် ငွေကြေးချမ်းသာတဲ့ တောင်သူလယ်သမားကြီးများကတော့ ရန်ကုန်မြို့တွေမှာ သွားရောက်ပြီးတော့ ဓာတ်ခွဲစမ်းသပ်ရပါ တယ်။ ဓာတ်ခွဲစမ်းသပ်တဲ့အခါမှာ ဓာတ်တစ်ခုကို အပြင်မှာ ၁၀၀၀၀ ပေးရပါတယ်။ အဓိကအားဖြင့် မြေမှာ နိုက်ထရိုဂျင်ဓာတ်၊ ဖော့ထရိတ်ဓာတ်၊ ပိုတက်ဆီယမ်ဓာတ်ဆိုတဲ့ ဓာတ် ၃ မျိုးဟာ အဓိက အချိုးညီစွာရှိဖို့ လိုပါမယ်။ အခြားဓာတ်အနည်းငယ်များကတော့ ၁၄ မျိုးရှိပါတယ်။ ဥပမာအားဖြင့် ကော့ပါး၊ မော်လတီနမ်၊ MO၊ ဆာလဖာဓာတ်၊ ကယ်ဆီယမ်ဓာတ်၊ အိုင်အိုဒင်းဓာတ်နှင့် မဂ္ဂနီဆီယမ်၊ ဇင့်စတဲ့ ဓာတ်များကတော့ အနည်းငယ်လိုမှာ ဖြစ်ပါတယ်။ အားလုံးပေါင်း ပြန်ကြည့်ရင် အနည်းငယ် လိုမယ့် ဓာတ်က ၁၄ မျိုးနှင့် အဓိကလိုတဲ့ ဓာတ်က ၃ မျိုး၊ စုစုပေါင်း ၁၇ မျိုးရှိပါတယ်။ ဒါကို ကျွန်တော်တို့ ပြင်ပမှာ ဓာတ်ခွဲစမ်းသပ်လို့ရှိရင် ၁၀၀၀၀ ဆိုရင် ၁၇ မျိုးဆိုရင် ၁၇၀၀၀၀ ကုန်ကျမှာ ဖြစ်ပါတယ်။ ဒါကြောင့်မို့လို့ တောင်သူလယ်သမားများဟာ ပြင်ပမှာ မိမိလယ်ယာမြေများကို ပြုပြင် နိုင်ဖို့အတွက် ငွေကြေးဟာမရှိပါဘူး။ ဒါကြောင့်မို့လို့ ကျွန်တော့်ရဲ့အဆို(၁)ဖြစ်တဲ့ တောင်သူလယ် သမားများက မိမိ၏လယ်ယာမြေများ ဓာတ်ခွဲစမ်းသပ်နိုင်ရေးအတွက် မြို့နယ်အသီးသီးရဲ့ စိုက်ပျိုးရေး ရုံးများမှာ ဓာတ်ခွဲစမ်းသပ်ခန်းများထားရှိဆောင်ရွက်ပေးရန် နိုင်ငံတော်အစိုးရမှ မူတစ်ရပ်အဖြစ် ချမှတ်ဆောင်ရွက်ပေးရန် အစီအစဉ်ရှိ၊ မရှိဆိုတဲ့မေးခွန်းကို မေးမြန်းရခြင်းဖြစ်ပါတယ်။

မေးခွန်း (၂)ကတော့ အဓိကအားဖြင့် မတ်ပဲမျိုးစေ့များအား မျိုးကောင်း မျိုးသန့်အထွက်နှုန်းကောင်းပြီး ဒေသနှင့်ကိုက်ညီတဲ့ မျိုးစေ့များအဖြစ် သုတေသနပြုထုတ်လုပ်ဖြန့်ဖြူး နိုင်ရေးအတွက် မူတစ်ရပ်ချမှတ်ပြီး ဆောင်ရွက်ပေးရန်အစီအစဉ်ရှိ၊ မရှိပဲ ဖြစ်ပါတယ်။ တောင်သူလယ်သမားများဟာ အဓိကတော့ စပါးကို စိုက်ပျိုးခဲ့ရပါတယ်။ စပါးပြီးတဲ့အခါမှာ အဓိကစိုက်ပျိုးတဲ့သီးနှံကတော့ မတ်ပဲ ဖြစ်ပါတယ်။ ဒီနေရာမှာ ဘာကြောင့် မူတစ်ရပ်ချမှတ်ပြီးတော့ သုတေသနပြုထုတ်လုပ်ပေးရန်ဆိုတဲ့ အကြောင်းကတော့ လယ်ယာစိုက်ပျိုးရေးနှင့် ဆည်မြောင်း ဝန်ကြီးဌာနက လယ်ယာစီးပွားဂျာနယ်များမှာကော၊ လွှတ်တော်မှာ ရှင်းတဲ့အခါမှာကော၊ မြေပြင် အနေအထားမှာကော ကြည်‌့တဲ့အခါမှာ သုတေသနလုပ်ငန်းကို စပါးရှိမယ်၊ အစေ့ထုတ်ပြောင်းရှိမယ်၊ ဝါရှိမယ်၊ ကြံရှိမယ်၊ ဆီထွက်သီးနှံများဖြစ်တဲ့ မြေပဲ၊ နေကြာနှင့်ပဲတီစိမ်းများကို သုတေသနပြုထုတ်လုပ် ဖြန့်ဖြူးလျက်ရှိကြောင်း တွေ့ရှိရသော်လည်းပဲ မတ်ပဲမျိုးစေ့နှင့်ပတ်သက်လို့ သုတေသနပြုထုတ်လုပ် ဖြန့်ဖြူးမယ့်အစီအစဉ် မတွေ့ရတဲ့အတွက် နိုင်ငံတော် သို့မဟုတ် ပုဂ္ဂလိကလုပ်ငန်းရှင်များမှ ပူးပေါင်း ပြီးတော့ မတ်ပဲမျိုးကောင်းမျိုးသန့်များကို ဒေသနှင့်ညီတဲ့ မျိုးစေ့များအဖြစ် သုတေသနပြုပြီးတော့ ဖြန့်ဖြူးစေချင်ပါတယ်။ ဘာကြောင့်လဲဆိုတော့ တောင်သူလယ်သမားများအနေနဲ့ မျိုးစပါးရိတ်သိမ်းပြီး ဆောင်းသီးနှံ မတ်ပဲသီးနှံကိုသာ အဓိကထားစိုက်ပျိုးကြရပါတယ်။ ထွက်ရှိလာတဲ့စပါးများ၊ သီးနှံများကို နောင်နှစ်အတွက် မျိုးထားခြင်း၊ ဝမ်းစာသိုလှောင်ခြင်း၊ ပိုလျှံက ရောင်းချပြီး ကြွေးများဆပ်ခြင်းများ ဆောင်ရွက်ကြရပါတယ်။ ဆောင်းသီးနှံဖြစ်တဲ့ မတ်ပဲများထွက်ရှိလာမှသာလျှင် ရရှိတဲ့ငွေနဲ့ မိသားစုရဲ့ ကျန်းမာရေး၊ ပညာရေး၊ လူမှုရေးနှင့် မီးဖိုချောင်သုံးပစ္စည်းများအား ဖြည့်ဆည်းရတဲ့ အဓိကထားရတဲ့ သီးနှံဖြစ်ပါတယ်။ ကမ္ဘာမှာ ပဲမျိုးစုံတင်ပို့တဲ့နိုင်ငံများမှာ မြန်မာနိုင်ငံဟာ ဒုတိယနေရာကရရှိ နေကြောင်း လေ့လာတွေ့ရှိရပါတယ်။ အဓိကကတော့ မတ်ပဲသီးနှံမှာ အဓိကဖြစ်ကြောင်း တွေ့ရှိရ ပါတယ်။ ဒါကြောင့် မေးခွန်းဖြစ်တဲ့ မတ်ပဲမျိုးစေ့များအား မျိုးကောင်းမျိုးသန့်အထွက်နှုန်းကောင်းပြီး ဒေသနှင့်ကိုက်ညီတဲ့ မျိုးစေ့များအဖြစ် သုတေသနပြုထုတ်လုပ်ဖြန့်ဖြူးနိုင်ရေးအတွက် မူတစ်ရပ် ချမှတ်ပြီး ဆောင်ရွက်ပေးရန် အစီအစဉ်ရှိ၊ မရှိဆိုတဲ့ ဒုတိယမေးခွန်း ဖြစ်ပါတယ်။

လယ်ယာမြေဥပဒေနှင့်အညီ ဘဏ်များမှ စိုက်ပျိုး ထုတ်လုပ်မှု ချေးငွေများ၊ လုံလောက်စွာထုတ်ချေးပေးရန် အစီအစဉ်ရှိ၊ မရှိပဲ ဖြစ်ပါတယ်။ တောင်သူလယ်သမားများ လယ်ယာမြေပြုပြင်နိုင်ရေးနှင့် စိုက်ပျိုးစရိတ်များ၊ စက်ကိရိယာ များ ဝယ်ယူအသုံးပြုနိုင်ရေးအတွက် လယ်ယာမြေဥပဒေ ပုဒ်မ ၁၂(င)အရ  နိုင်ငံတော်ဘဏ်  သို့မဟုတ် ပုဂ္ဂလိကဘဏ်များမှ လယ်ယာမြေလုပ်ပိုင်ခွင့်အား အပေါင်ထား၍ ချေးငွေခွင့်ပြုရန် ရှိကြောင်းဥပဒေမှာ ဒီအတိုင်းပဲ ကျွန်တော် ပြဋ္ဌာန်းခဲ့ပြီး ဖြစ်ပါတယ်။ ဒီနေရာမှာ အလျဉ်းသင့်လို့ တင်ပြလိုတာက လက်ရှိတောင်သူလယ်သမားများရဲ့ ချေးငွေကို ထုတ်ပေးနေတာက လယ်ယာစိုက်ပျိုး ရေးဖွံ့ဖြိုးရေးဘဏ်များ ဖြစ်ပါတယ်။ နောက်တစ်ခု မြို့နယ်အသီးသီးမှာရှိတာက မြန်မာ့စီးပွားရေး ဘဏ်ဖြစ်ပါတယ်။ ဒီနေရာမှာ လယ်ယာစိုက်ပျိုးရေးဘဏ်က အခုနိုင်ငံတော်အစိုးရက တောင်သူ လယ်သမားများအတွက် အလေးထားပြီး အဆင်ပြေစေရန်အတွက် စိုက်ပျိုးစရိတ်များကို တစ်သိန်း အထိချေးပြီး ယာသမားများကို တစ်ဧက ၂၀၀၀၀ အထိချေးပေးတယ်ဆိုတာလည်း တောင်သူ လယ်သမားများအတွက် ဝမ်းသာကြောင်း တင်ပြလိုပါတယ်။ ကျွန်တော်ဆိုလိုတာက လယ်ယာမြေ ဥပဒေနှင့်အညီ လယ်ယာမြေလုပ်ပိုင်ခွင့်ကို ကျွန်တော်တို့က ဘဏ်များမှာ အပေါင်ထားပြီးတော့ ချေးခြင်းလုပ်ငန်းသက်သက်ဖြစ်ပါတယ်။ ဒီနေရာမှာ တင်ပြလိုတာက လက်ရှိညောင်တုန်းမြို့နယ် မှာဆိုရင် မြန်မာ့စီးပွားရေးဘဏ်တစ်ခုပဲ ရှိပါတယ်။ နိုင်ငံတော်အစိုးရက အသိအမှတ်ပြုတဲ့ အခြားဘဏ်များဖွင့်လှစ်ပေးမှသာလျှင် လယ်ယာမြေဥပဒေအရ လုပ်ပိုင်ခွင့်ကို အပေါင်ထားပြီးတော့ ချေးတဲ့လုပ်ငန်းဟာ အချိန်မီဆောင်ရွက်နိုင်မှာဖြစ်ပါကြောင်း တင်ပြလိုပါတယ်။ မေးခွန်း(၄)ကတော့ သီးနှံစိုက်ပျိုးထုတ်လုပ်မှုကို အာမခံတဲ့ ပိုးသတ်ဆေးဥပဒေအဖြစ် ဖော်ဆောင်ပေးရန် အစီအစဉ်ရှိ/မရှိပဲ ဖြစ်ပါတယ်။

ကျွန်တော်တို့ လက်ရှိတည်ဆဲ ပိုးသတ်ဆေးဥပဒေနှင့် နည်းဥပဒေများဟာ သီးနှံစိုက်ပျိုးထုတ်လုပ်တဲ့ တောင်သူလယ်သမားများအတွက် အကာအကွယ် သို့မဟုတ် အာမခံချက် မရှိနိုင်ကြောင်း လေ့လာတွေ့ရှိရပါတယ်။ ယနေ့အခြေအနေမှာ တောင်သူလယ်သမားများအနေနဲ့ ပိုးသတ်ဆေးအမျိုးမျိုးအား ဝယ်ယူသုံးစွဲခဲ့ကြရသော်လည်းပဲ ဆေးညွှန်းပါ အရည်အသွေးမမီတဲ့ အတွက် ပိုးများသေဆုံးမှုမရှိဘဲ သီးနှံများပျက်စီးဆုံးရှုံးခဲ့ရတဲ့အတွက် ဆေးဖိုးများပင် အကြွေးတင် လျက်ရှိပါတယ်။ ဒါကြောင့် ပိုးသတ်ဆေးများသည် အညွှန်းပါအတိုင်း အရည်အသွေးအာနိသင်မမီပါ က ဆုံးရှုံးသွားသော သီးနှံဖိုးနှင့် ဆေးဖိုးများအား ဆေးရောင်းသူ သို့မဟုတ် ဆေးကိုယ်စားလှယ်  သို့မဟုတ် ဆေးထုတ်လုပ်သည့် ကုမ္ပဏီများမှ ပေးလျော်ရမည်ဆိုသည့် အာမခံချက်အား ပိုးသတ်ဆေး ဥပဒေတွင်ပါရှိသင့်ပါကြောင်း တင်ပြလိုပါတယ်။ တည်ဆဲပိုးသတ်ဆေးဥပဒေနှင့် နည်းဥပဒေများဟာ တောင်သူလယ်သမားများ၏ စိုက်ပျိုးထုတ်လုပ်မှုအတွက် အာမခံချက်မပါရှိတဲ့အတွက် တည်ဆဲ ပိုးသတ်ဆေးဥပဒေအား ပြင်ဆင် သို့မဟုတ် ဖြည့်စွက် သို့မဟုတ် အသစ်ပြန်လည်ရေးဆွဲပေးရန် အစီအစဉ်ရှိ၊ မရှိမေးမြန်းရခြင်း ဖြစ်ပါတယ်။ တစ်ဆက်တည်းတင်ပြလိုတာက သက်ဆိုင်ရာဝန်ကြီးဌာန များက မပြင်ဆင်နိုင်သေးဘူးဆိုရင်လည်းပဲ လွှတ်တော်က ဖွဲ့စည်းထားတဲ့ ကော်မတီများက ဒီပိုးသတ်ဆေးဥပဒေကို ပြန်လည်သုံးသပ်ပေးပါရန် တင်ပြအပ်ပါတယ်။

 (၅)မေးခွန်းကတော့ ဒေသအသီးသီးရှိ တောင်သူလယ် သမားများရဲ့ ဘွဲ့ရပညာတတ်သားသမီးများအား စိုက်ပျိုးရေးနည်းပညာများကို စာတွေ့၊ လက်တွေ့ လေ့ကျင့်သင်ကြားပေးပြီး ဒေသအသီးသီးမှာ ပြန်လည်တာဝန်ပေးအပ်စေရန်အတွက် မူတစ်ရပ် ချမှတ်ပြီး ဆောင်ရွက်ပေးရန် အစီအစဉ်ရှိ၊ မရှိ ဖြစ်ပါတယ်။ ဥက္ကဋ္ဌကြီးခင်ဗျား။ နိုင်ငံတော်အစိုးရ အနေနဲ့ နေပြည်တော်နှင့် တိုင်းဒေသကြီး/ပြည်နယ်ဝန်းကျင်များမှာ စိုက်ပျိုးရေးနည်းပညာများဖြင့် စိုက်ပျိုးထုတ်လုပ်လျက်ရှိကြောင်း တွေ့မြင်နေရပါတယ်။ မြို့နယ်များမှာလည်း စိုက်ပျိုးရေးပညာပေး စခန်းများထားရှိဆောင်ရွက်သည်မှာ နှစ်ပေါင်းဆယ်လီအကြိမ်ကြိမ်ရှိနေပြီ ဖြစ်သော်လည်း စိုက်ပျိုးရေးနည်းပညာများမှာ ဒေသအသီးသီးမှာ ပျံ့နှံမှုမရှိသေးပါဘူး။ နိုင်ငံတော်အစိုးရအနေဖြင့် စိုက်ပျိုးရေးနည်းပညာများကို သင်ကြားပေးရန်မှာ စိုက်ပျိုးရေးတက္ကသိုလ်နှင့် ဒီပလိုမာသင်တန်းများ ဖြင့် ဖွင့်လှစ်သင်ကြားပေးလျက်ရှိပြီး နည်းပညာထွန်းကားတဲ့ ပြင်ပနိုင်ငံများသို့လည်း ဝန်ထမ်းများကို ပညာသင်များစေလွှတ်သည်ကို တွေ့ရှိရပါတယ်။ သို့သော်လည်းပဲ နှစ်ပေါင်းဆယ်လီ အကြိမ်ကြိမ်ရှိပြီး ဖြစ်သော်လည်းပဲ စိုက်ပျိုးရေးနည်းပညာအသုံးပြု၍ ဒေသအသီးသီးရှိ တောင်သူလယ်သမားများရဲ့ လယ်ယာမြေများတွင် စိုက်ပျိုးနိုင်မှုယခုတိုင် မရှိသေးပါ။ ဒါကြောင့် ဒေသအသီးသီးတွင် စိုက်ပျိုးရေး နည်းပညာဖြင့် စိုက်ပျိုးနိုင်ရန်အတွက် တောင်သူလယ်သမားများရဲ့ သားသမီးဘွဲ့ရ ပညာတတ်များ အား စိုက်ပျိုးရေးနည်းပညာများအား စာတွေ့၊ လက်တွေ့သင်ကြားလေ့ကျင့်စေပြီး မိမိတို့ဒေသ အသီးသီးမှာ ပြန်လည်တာဝန်ပေးအပ်စေရန်အတွက် မူတစ်ရပ်ချမှတ်ပေးပြီးတော့ နိုင်ငံတော်အစိုးရမှ ဆောင်ရွက်ပေးစေလိုပါတယ်။ ဒါကြောင့်မို့လို့ ဒီမေးခွန်းကို မေးရခြင်းဖြစ်ပါတယ်။ ဥက္ကဋ္ဌကြီးခင်ဗျား။ ဒီနေရာမှာ အလျဉ်းသင့်လို့ တင်ပြလိုတာက လွှတ်တော်ကိုယ်စားလှယ်အသီးသီးက တောင်သူ လယ်သမားများနှင့်တွေ့ပြီးတော့ လွှတ်တော်အတွေ့အကြုံများ ဆွေးနွေးဖိတ်ကြားတဲ့အခါမှာ ကျွန်တော်တို့နှင့်အတူ စိုက်ပျိုးရေးမှ တာဝန်ရှိသူများ၊ ကျန်းမာရေးမှ တာဝန်ရှိသူများလည်းပဲ ရှိပါ တယ်။ ရှိသော်လည်းပဲ ပါတဲ့အခါမှာ၊ ဆွေးနွေးပြီးတဲ့အခါမှာ တောင်သူလယ်သမားများက နားထောင် ပြီးတော့ အကြံပြုသော်လည်းပဲ စိုက်ပျိုးရေးဌာနက ပညာရှင်များ စိုက်ပျိုးရေးကဏ္ဍ ဆှေးနွေးတဲ့ အခါမှာထပြီးတော့ ပြန်သွားတာတွေ့ရပါတယ်။ ပြန်ကြည်‌့ရင် ကျွန်တော်တို့သက်တမ်းအရ ကျေးလက် မှာ ဘွဲ့ရပညာတတ်နည်းပါတယ်။ ယခုအခါမှာတော့ တောင်သူလယ်သမားသားသမီးများ  ဘွဲ့ရ ပညာတတ်များဟာ လွန်စွာမှရှိနေပြီ ဖြစ်ပါတယ်။ ဒါကြောင့် လယ်ယာစိုက်ပျိုးရေးကို သိပံ်ပနည်းကျ နည်းပညာဖြင့် စိုက်ပျိုးထုတ်လုပ်မယ်ဆိုပါက တောင်သူလယ်သမားသားသမီးများ ဘွဲ့ရများကို လေ့ကျင့်သင်ကြားပေးပြီးတော့ ဆောင်ရွက်မယ်ဆိုမှသာလျှင် စိုက်ပျိုးရေးကို သိပ္ပံနည်းကျဖြင့် ဒေသ အသီးသီးအောင်မြင်မှာ ဖြစ်ပါတယ်။ ဒါကြောင့်မို့လို့ ဒီမေးခွန်းကို မေးရခြင်း ဖြစ်ပါတယ်။ နောက်ဆုံး မေးခွန်းကတော့ စိုက်ပျိုးထုတ်လုပ်တဲ့ သီးနှံများကို တန်ဖိုးသင့်တင့်မျှတတဲ့ တန်ဖိုးရှိအောင် ဆောင်ရွက်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။