(င)-ရေဦး-တန့်ဆည်-ကလေးဝလမ်းနှင့်စပ်လျဉ်းသည့်မေးခွန်း

ရေဦး-တန့်ဆည်-ကလေးဝလမ်းကြီးဟာ စစ်ကိုင်းတိုင်း ဒေသကြီး၊ ‌ရွှေဘိုခရိုင်၊ ရေဦးမြို့၊ ဖန်းခါးစင်၊ တန့်ဆည်၊ ကဒူးမ၊ တောကျင် တို့ကိုဖြတ်သန်းသွားသော လမ်းဖြစ်ပါတယ်။ ကလေးခရိုင်မှာလည်း ပျဉ်ကိုင်း၊ သက်ကယ်ကျင်း၊ အောင်ချမ်းသာ၊ ကိုင်းရွာမှ တဆင့် ကလေးဝကိုဆက်သွယ်ထားတဲ့လမ်းဖြစ်ပြီးတော့ လမ်းဟာ ၁၀၅ မိုင်နဲ့လေးဖာလုံ ရှည်လျား ပါတယ်။ ၎င်းလမ်းပိုင်းဟာ အရှေ့အနောက်ဆက်သွယ်ထားသော ပြည်ထောင်စုလမ်းမကြီးဖြစ်တဲ့ အတွက် မုံရွာ-ရေဦး-တန့်ဆည်-ကလေးဝလမ်းပိုင်းမှာတည်ရှိနေပါတယ်။ ၃၁-၅-၂၀၁၁ ရက်နေ့ အထိ လမ်းအခြေအနေကတော့ ကတ္တရာလမ်းဟာ ၁၇ မိုင်နဲ့ ၆ဖာလုံ ကျောက်လမ်းဟာ ၄၀ မိုင်နဲ့  ၅ ဖာလုံ၊ အမာခံလမ်းက ၃၆ မိုင်နဲ့ ၄ ဖာလုံ၊ မြေလမ်းဟာ ၁၀ မိုင်နဲ့ ၅ ဖာလုံ စုစုပေါင်း ၁၀၅ မိုင်နဲ့ ၄ ဖာလုံ ရှိပါတယ်။ ၎င်းလမ်းပေါ်မှာ တံတားစာရင်းကတော့ ၅၀ ပေအောက်တံတား ၁၆၈ စင်း၊    ၅၀ ပေကနေ ၁၀၀ ပေအောက်ထိကတံတား ၃၉ စင်း၊ ၁၀၀ ပေမှ ၁၈၀ ပေအောက်တံတားက လေးစင်း၊ စုစုပေါင်း၂၁၁ စင်းရှိပါတယ်။

ရေဦး-တန့်ဆည်-ကလေးဝလမ်းဟာ မူလကကောင်းမွန်တဲ့လမ်းအခြေအနေရှိသော်လည်း သစ်တင်ကားများ အသွားအလာများတဲ့အတွက် မိုင် ၁၃ မိုင်(တန့်ဆည်)နဲ့မိုင် ၈၃ မိုင်(သက်ကယ်ကျင်း) အပိုင်းမှာလမ်းပုံစံလုံးဝပျောက်သွားပြီး မြေလမ်းအဆင့်ကိုရောက်သွားပါတယ်။ မိုးတွင်းမှာဗွက်ထပြီး ဆိုးရွားလျက်ရှိပါတယ်။ ယာဉ်သွားလာမှုအဆင်ပြေစေရန်နှစ်စဉ်ပွင့်လင်းရာသီရောက်တိုင်း မြေညှိစက် နဲ့မြေညှိပြီးဆောင်ရွက်ပေးလျက်ရှိပါတယ်။ ယင်းလမ်းပျက်စီးမှုကြောင့် ၈-၇-၂၀၁၁ နေ့ စစ်ကိုင်းတိုင်း ဒေသကြီး အစိုးရအဖွဲ့ကနေပြီးတော့ မြန်မာ့သစ်လုပ်ငန်းနဲ့ အစည်းအဝေးပြုလုပ်တဲ့ နေရာမှာ ၂၀၁၁-၂၀၁၂ ဘဏ္ဍာရေးနှစ်သစ်ထုတ်ရာသီမှာ သစ်ကားများဟာ ချင်းတွင်းမြစ်ကြောင်း တစ်လျှောက်ယာယီ သစ်သယ်ကားလမ်းရှာဖွေဖောက်လုပ်ပြီး ချင်းတွင်းမြစ်ကြောင်းအတိုင်းသစ်သယ်ရန်နှင့် မြစ်ကြောင်း မှတစ်ဆင့် မီးရထားလမ်းအတိုင်း အများဆုံးသယ်ပြီးအသုံးပြုဖို့လမ်းညွှန်ထားပါတယ်။ တကယ်လို့ ၎င်းကဲ့သို့ သယ်ပို့တဲ့နေရာမှာ ဆောက်လုပ်ရေးဝန်ကြီးဌာနပိုင်လမ်းများကို မလွှဲမရှောင်သာမှသာ အနည်းငယ်အသုံးပြုရန်နဲ့ အသုံးပြုပြီဆိုကလည်း ဆောက်လုပ်ရေးဝန်ကြီး ဌာနပိုင်လမ်းရဲ့ ဘေးယာယီ သစ်သယ်လမ်းဖောက်ပြီးတော့  သယ်ဆောင်ရန်တို့ကို ညှိနှိုင်းဆွေးနွေးခဲ့ကြပါတယ်။ အဲဒီလိုလုပ်ဆောင်မှသာလျှင် လမ်းတာပေါင်တင်ခြင်း၊ လမ်းပုံပြန်ဖော်ခြင်း၊ လမ်းအဆင့်မြှင့်တင်ခြင်း ကိုဆက်လက်ဆောင်ရွက်သွားမှာဖြစ်ပါတယ်။ ၂၀၁၁-၂၀၁၂ ဘဏ္ဍာရေးနှစ် ခွဲဝေရရှိမှုသာမန် ပြင်ဆင်ထိန်းသိမ်းခြင်းရန်ပုံငွေအရ အောက်ပါအတိုင်း လုပ်ငန်းများဆောင်ရွက်လျက်ရှိပါတယ် -

ကတ္တရာလမ်းပျက်အပိုင်းအား လမ်းမျက်နှာပြင်ညှိ၍ ရေပိတ်လွှာလောင်းခြင်းက ၆ မိုင်နဲ့        ၆ ဖာလုံ၊ ကတ္တရာထပ်ပိုးလွှာတင်ခြင်းက ၄ မိုင်နဲ့ ၃ ဖာလုံ၊ လမ်းချိုင့်ကြီးများအားကျောက်ဖြည့် ပြီးတော့ ဂျင်းမြေတင်ခင်းခြင်းက ၁၁ မိုင်နဲ့ ၃ ဖာလုံ၊ လမ်းသားနိမ့်ကျသွားသော အပိုင်းများအား ရွေးချယ်မြေသားများဖို့ခြင်းက ၇ ဖာလုံ၊ တောင်ပြိုမြေဖယ်ရှားခြင်းက ၅ မိုင်၊ မြင့်တက်နေသော လမ်းပခုံးများ ဖယ်ထုတ်ခြင်းက ၁၉ မိုင် ၅ ဖာလုံ၊ မြေညှိစက်ဖြင့် လမ်းပုံဖော်ခြင်းက ၂၂ မိုင်  ကျောက်များတင်ပြီး ခင်းကြိတ်ခြင်းက ၂ မိုင်၊ မိုင်တိုင် ၇ မိုင် ၇ ဖာလုံမှ ၈ မိုင်ကြားမှာ ရေတိုက်စားပြီး ပျက်စီးသွားသောအပိုင်း ပေ ၁၀၀ အရှည်အား ၂၄ ပေ အကျယ် ကွန်ကရစ်ရေကျော် တံတားပြုလုပ်ခြင်းကတစ်ခု၊ ကျောက်စီမြေကာနံရံ စုစုပေါင်းဆောက်လုပ်ခြင်းက ၃၈၅ ပေ က        ငါးခု၊ သစ်သားတံတား မြေကာနံရံအသစ် ဖောက်လုပ်ခြင်းက ၆၈၀ ပေ က ၁၄ ခု၊ သစ်သားမြေကာနံရံပြုလုပ်ခြင်း စုစုပေါင်း ၃၈၀ ပေက ၁၀ ခု၊ ၅၀ ပေအောက်သစ်သား တံတား အသစ်တည်ဆောက်ခြင်းက လေးစင်း၊ ၅၀ ပေမှ ၁၀၀ ပေအောက်သစ်သားတံတားတည်ဆောက် ခြင်းက နှစ်စင်း၊ ၅၀ ပေအောက် သစ်သားတံတားများနှင့် တိုင်စင်၊ ယက်မ၊ ကြမ်းခင်း၊ လက်ရန်း၊ ဘီးလမ်းများပြင်ဆင်ခြင်းက သုံးစင်း၊ တံတားအမှတ် ၁/၉၃နဲ့ ၁/၉၉ တို့ရဲ့ မြေကာနံရံနဲ့ ဘေး‌ပေါင်များ တပ်ဆင်ခြင်းက နှစ်စင်း၊ ၁၀၀ ပေအရှည် ဘေလီတံတားပြင်ဆင်ခြင်းက နှစ်စင်း၊ ၅ ပေ x ၂၈ ပေသံကူကွန်ကရစ်တံတားအသစ် တည်ဆောက်ခြင်းကတစ်စင်း၊ ၄၄ ပေအရှည်ရှိသော RSJ  အောက်ခံသစ်သားကြမ်းခင်းတံတား တည်ဆောက်ခြင်းက တစ်စင်းတို့ ဖြစ်ပါတယ်။

ဥက္ကဋ္ဌကြီးခင်ဗျား။ ၂၀၁၂-၂၀၁၃  ဘဏ္ဍာရေးနှစ်တွင်လည်းငွေလုံးငွေရင်းရန်ပုံငွေနဲ့ ပြင်ဆင် ထိန်းသိမ်းခြင်းရန်ပုံငွေများ တိုးမြှင့်တောင်းခံသွားပြီး ၎င်းလမ်းကောင်းမွန်ရေးအတွက် ဆက်လက် ဆောင်ရွက်သွားမည်ဖြစ်ကြောင်း ဖြေကြားပါသည်။