(ဂ)-မယ်စဲ့မြို့နယ်၊ မယ်ဆည်နန်ကျေးရွာအုပ်စုရှိ ကျောက်စုကျေးရွာ၌ မြစ်ရေတင်စနစ်ဖြင့် ရာသီမရွေး သောက်သုံးရေရရှိရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ကျောက်စုကျေးရွာသည် နှစ်စဉ်နှင့်အမျှ ရေရှားပါးမှုပြဿနာနှင့် ရင်ဆိုင် ကြုံတွေ့နေရပြီး အထူးသဖြင့် ဆောင်းနှင့်နွေရာသီများတွင် ရေလုံးဝမရရှိပါကြောင်း၊ ယခုအခါ ပွင့်လင်းရာသီ ရောက်သည်နှင့် ရေပြဿနာကို စတင်ရင်ဆိုင်ကြုံတွေ့နေရပါပြီဖြစ်ပါကြောင်း၊

ယနေ့ နိုင်ငံတော်အနေဖြင့် ရေရှားပါးသောဒေသများမှာ ရေရရှိရေးအတွက် မြေအောက်တွင် ရေ ရှိ/မရှိ စမ်းသပ်တိုင်းတာသောကိရိယာများဖြင့် တိုင်းတာကာ အဝီစိတွင်းများကို စက်ယန္တရား များဖြင့် တူးဖော်နေသည်ကို အားရဝမ်းသာမြင်တွေ့နေရပါသော်လည်း ရေအနည်းငယ်သာရှိခြင်း၊ ရေလုံးဝမထွက်ရှိခြင်း စသည့်ပြဿနာများနှင့် ကြုံတွေ့နေရသည် သာမက တိုင်းပြည်၏ ဘဏ္ဍာငွေများကို ဖြုန်းတီးဘိသကဲ့သို့ ဝမ်းနည်းဖွယ်ရာမြင်တွေ့နေရပါကြောင်းနှင့် သဘာဝရေအရင်းအမြစ် မည်သို့မည်ပုံထိန်းသိမ်းရမည်၊ ကာကွယ်ရမည်၊ စောင့်ရှောက်ရမည် ဆိုသည့် အချက်ကို မေ့လျော့နေသည်ဟု ထင်မြင်ယူဆမိပါကြောင်း၊ ထို့ကြောင့် သဘာဝရေ သယံဇာတကို ထိန်းသိမ်းမည့့််နည်းလမ်းသာမကဘဲ ရေသယံဇာတကို မည်ကဲ့သို့အသုံးပြုမည့် နည်းလမ်းကို ထည့်သွင်းစဉ်းစားပေးစေလိုပါကြောင်း၊

ရေဆိုသည်မှာ မြင့်ရာမှနိမ့်ရာသို့ စီးဆင်းသည့်သဘောရှိသော်ငြားလည်း ယနေ့ နည်းပညာ တိုးတက်နေသည့် ခေတ်ကြီးတွင် နိမ့်ရာမှမြင့်ရာသို့ ပေးပို့နိုင်မည့် နည်းလမ်းကောင်း ရှိမည်ဖြစ်ပါကြောင်း၊ ထို့ကြောင့် မြန်မာနိုင်ငံအတွင်း စီးဆင်းနေသောမြစ်၊ ချောင်းများသည် ရေရှားပါးသောအရပ်ဒေသများကို ရေကွန်ရက်သဖွယ် ပိုက်လိုင်းများဖြင့် ဆက်သွယ် သွယ်တန်းပေးစေလိုပါကြောင်း၊

ယခင် မြန်မာနိုင်ငံ၏လူဦးရေသည် မြန်မာနိုင်ငံရှိတွင်း ရေစိမ့်စမ်းရေနှင့် လုံလောက်မှု ရှိသော်ငြားလည်း လူဦးရေထူထပ်ပေါများလာသည့် ယခုအချိန်တွင် ရေမလုံလောက် သည့်ပြဿနာကို စတင်ရင်ဆိုင်ကြုံတွေ့နေရသည့်အပြင် အနာဂတ်ကာလတွင် ယခင်ထက်ပိုမို၍ အခက်အခဲ ကြုံတွေ့လာရဖွယ်ရှိပါသောကြောင့် ကြိုတင်ပြင်ဆင်မှုများကို မဖြစ်မနေဆောင်ရွက် ရန် လိုအပ်လျက်ရှိကြောင်း၊ ပထဝီအနေအထားအရ ဖြစ်တည်နေသော ရေရှားပါးသော ဒေသ များတွင် နေထိုင်ကြသော ပြည်သူများ၏ ဘဝအခက်အခဲကို ကိုယ်ချင်းစာတရားရှေ့ထားပြီး ရေကိုရေလိုသုံးစွဲနိုင်ရန်အတွက်လည်း ရေတိုရေရှည်စီမံကိန်း ချမှတ်သင့်ပါကြောင်း၊

ကျောက်စုကျေးရွာတွင် ရေရရှိအောင် နှစ်စဉ်နှစ်တိုင်း စမ်းသပ်မှုများပြုလုပ်သော်လည်း ယနေ့အထိ ရေကို မရရှိသေးကြောင်း၊ ထိုသို့  ဘဏ္ဍာငွေများ အကုန်အကျခံပြီး စမ်းသပ်နေမည့် အစား သေချာမြင်တွေ့နိုင်သည့် မြစ်ရေတင်စနစ်ကိုသာ ဆောင်ရွက်ပေးစေလိုပါကြောင်း၊  ထို့ကြောင့် ကယားပြည်နယ်၊ မယ်စဲ့မြို့နယ်၊ မယ်ဆည်နန်ကျေးရွာအုပ်စုရှိ ကျောက်စုကျေးရွာ၌ မြစ်ရေတင်စနစ်ဖြင့် ရာသီမရွေး သောက်သုံးရေရရှိစေရန် အစီအစဉ်ရှိ/မရှိကိုသိရှိလိုပါကြောင်း မေးမြန်းပါသည်။