(ခ)-တောင်ဥက္ကလာပမြို့နယ်၊ မေတ္တာလမ်းမကြီးကိုဖြတ်၍ မင်္လာဈေးသို့ရောက်ရှိသော မူလခရီးစဉ်အတိုင်း လိုင်းတစ်လိုင်း သို့မဟုတ် မေတ္တာလမ်းမမှ မင်္ဂလာဈေးသို့ရောက်ရှိသော လိုင်းတစ်လိုင်း လိုအပ်လျက် ရှိနေပါသဖြင့် မည်သို့စီစဉ်ထားသည်ကို သိလိုခြင်းနှင့်စပ်လျဉ်းသည့်မေးခွန

ယခင် မထသစီမံမှုအောက်တွင် မထသ (၃၁) ယာဉ်လိုင်းနှင့် အောင်သိဒ္ဓိယာဉ်လိုင်းသည် တောင်ဥက္ကလာပမြို့နယ်၊ မေတ္တာလမ်းကို ဖြတ်သန်း၍ မင်္ဂလာဈေးသို့ ပြေးဆွဲခဲ့ပါကြောင်း၊ ယခု YBS (၂၆) ယာဉ်လိုင်းမှ စီးတီးဘတ်စ် ယာဉ်စီးရေ ၂၅ စီးဖြင့် မေတ္တာလမ်းကို ဖြတ်သန်း၍ ရွှေဗဟိုလမ်းဆုံ (တာမွေဗလီ) မှတစ်ဆင့် သမိန်ဗရမ်းလမ်းသို့ ပြေးဆွဲပေးလျက်ရှိပြီး အခြားမြို့နယ်များမှ လာသော ယာဉ်လိုင်းများသည် တာမွေမြို့နယ်မှတစ်ဆင့် ဗညားဒလလမ်းပေါ်ရှိ မင်္ဂလာဈေးကို ဖြတ်သန်း၍ ပြေးဆွဲပေးလျက်ရှိပါကြောင်း၊ YBS (၂၆) နှင့်အတူ အရှေ့မြင်းပြိုင်ကွင်း လမ်းပေါ်တွင် YBS (၇) လိုင်းမှ နေ့စဉ် စီးတီးဘတ်စ်ယာဉ် ၁၅၇ စီးခန့်သည်လည်းကောင်း၊ YBS (၂၇) ယာဉ်လိုင်းမှ နေ့စဉ် စီးတီးဘတ်စ် ယာဉ် ၄၅ စီးခန့်သည်လည်းကောင်း၊ YBS (၃) ယာဉ်လိုင်းမှ နေ့စဉ် စီးတီးဘတ်စ်ယာဉ် ၄၂ စီးခန့်သည်လည်ကောင်း တာမွေအဝိုင်းမှတစ်ဆင့် ဗညားဒလလမ်းအတိုင်း မင်္ဂလာဈေးကို ဖြတ်သန်းပြေးဆွဲ ပေးလျက်ရှိသည့်အပြင် ရွှေဂုံတိုင်လမ်းမှလာသော YBS (၂၀)၊ (၆၅)၊ (၈၅) ယာဉ်လိုင်းများမှ နေ့စဉ် စီးတီးဘတ်စ်ယာဉ်စီးရေ ၂၂၁ စီးခန့်သည် တာမွေအဝိုင်းမှတစ်ဆင့် ဗညားဒလလမ်းအတိုင်း မင်္ဂလာဈေးကို ဖြတ်သန်းပြေးဆွဲ ပေးလျက်ရှိပါကြောင်း၊ ဗဟန်းမြို့နယ်  ဦးချစ်မောင် လမ်းမှလာသော YBS (၄၃)၊ (၆၄) ယာဉ်လိုင်းမှ နေ့စဉ် စီးတီးဘတ်စ်ယာဉ် ၇၃ စီးခန့် သည်လည်း တာမွေအဝိုင်းမှတစ်ဆင့် ဗညားဒလလမ်းအတိုင်း မင်္ဂလာဈေးအားဖြတ်သန်း၍ ပြေးဆွဲပေး လျက်ရှိပါကြောင်း၊ သာကေတမှလာသော YBS (၇၂) ယာဉ်လိုင်းမှ နေ့စဉ် စီးတီးဘတ်စ်ယာဉ်စီးရေ ၂၅ စီးခန့်သည်လည်း ရွှေဗဟိုလမ်းဆုံမှ ကျိုက္ကဆံလမ်း၊ ဗညားဒလလမ်းအတိုင်း မင်္ဂလာဈေးအား ဖြတ်သန်းပြေးဆွဲ ပေးလျက်ရှိပါကြောင်း၊

သို့ဖြစ်ပါ၍ တောင်ဥက္ကလာပမြို့နယ် မေတ္တာလမ်းမှ မင်္ဂလာဈေးသို့ သွားရောက်ကြမည့် ခရီးသည်များ အနေဖြင့် လက်ရှိအခြေအနေတွင် ရွှေဗဟိုလမ်းဆုံမှ မင်္ဂလာဈေးခရီးစဉ်သို့ ဗညားဒလလမ်းအတိုင်း နေ့စဉ်ပြေးဆွဲနေသော အထက်ပါ YBS ယာဉ်ကြီးလိုင်း ကိုးလိုင်းမှ ပြေးဆွဲယာဉ် ၅၅၉ စီး ခန့်အား စီးနင်း သွားလာနိုင်ပါကြောင်း၊ ရွှေဗဟိုလမ်းမဆုံမှ ဗညားဒလလမ်းအတိုင်း မင်္ဂလာဈေးအထိ YBS (၉) လိုင်း စီးတီးဘတ်စ် ၅၅၉ စီးခန့် နေ့စဉ်ဖြတ်သန်း ပြေးဆွဲနေခြင်းကြောင့် အထက်ပါခရီးစဉ်တွင် ယာဉ်လိုင်း တစ်လိုင်း ထပ်မံဖြည့်တင်းပြေးဆွဲပါက ဗညားဒလလမ်းတစ်လျှောက် ယာဉ်ကြော ကြပ်တည်းမှု အခြေအနေနှင့် ယာဉ်လိုင်းများလမ်းကြောင်း တူညီမှုအခြေအနေအရ ယှဉ်ပြိုင်မောင်းနှင်မှု ပြုလုပ်မည့် အခြေအနေကိုလည်း စဉ်းစားရမည် ဖြစ်သည့်အပြင် မေတ္တာလမ်းနှင့်ယှဉ်လျက်ရှိသော ရတနာလမ်းကို ဖြတ်သန်း၍လည်း YBS (၂၇) ယာဉ်လိုင်းသည် မင်္ဂလာဈေးအထိ ပြေးဆွဲပေးလျက် ရှိပါကြောင်း၊ ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ (YRTA) အနေဖြင့် ရန်ကုန်မြို့အတွင်း ပြေးဆွဲလျက်ရှိသော YBS ယာဉ်လိုင်းလမ်းကြောင်းများအား ခရီးသွားပြည်သူများ ပိုမို အဆင်ပြေ ချောမွေ့စေရန်အတွက် လေ့လာစီမံ ဆောင်ရွက်လျက်ရှိပါသဖြင့် ယာဉ်လိုင်းလမ်းကြောင်း စိစစ် ဆောင်ရွက်သည့် အချိန်တွင် တောင်ဥက္ကလာပမြို့နယ် မေတ္တာလမ်းရှိ ပြည်သူများ အထက်ပါ ခရီးစဉ်သို့ သွားလာမှုအထောက်အပံ့ ဖြစ်နိုင်ရန် စီမံဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။

ဒေါက်တာစောနိုင် (တောင်ဥက္ကလာပမဲဆန္ဒနယ်) က ဆက်စပ်မေးခွန်း မေးမြန်းပါသည်။

ဒုတိယဝန်ကြီး ဖြေကြားသွားသည်မှာ YBS (၂၆) လိုင်းက ၂၅ စီးပြေးဆွဲနေသည်ဟု ပြောပါကြောင်း၊ ၂၅ စီး ကလည်း မနက် ၅ နာရီမှ ညနေ ၉ နာရီအထိ ပြေးဆွဲမည်ဆိုလျှင် အချိန်အားလုံးပေါင်း ၁၆ နာရီတွင် ၂၅ စီး ဆိုတာလည်း တော်တော်လေးနည်းပါးပါကြောင်း၊ ထို့ကြောင့် ယာဉ်စီးရေကို ထပ်မံတိုးမြှင့်ရန်နှင့် YBS ကထုတ်သည့် စာအုပ်ထဲတွင် YBS (၂၆) ယာဉ်လိုင်းသည် ၎င်း တာမွေမှ ကျောက်မြောင်း-သီတာ-အောင်မင်္ဂလာ-ယုဇနပလာဇာ-မင်္ဂလာဈေးဆိုပြီး ယာဉ်လမ်းကြောကို ရေးထားပေးသော်လည်း အပြင်တွင် လေ့လာကြည်မိသည်မှာ တာမွေကမှတစ်ဆင့် ကြက်ပဲဈေးကိုသွားနေခြင်း ဖြစ်သည့်အတွက် YBS ကထုတ်ထားသည့် ခရီးစဉ်လမ်းကြောနှင့် အပြင်တွင်ပြေးဆွဲနေသည့် ခရီးစဉ်လမ်းကြောကလည်း ဝန်ကြီးပြောသွားသည့် YBS (၂၆) လိုင်းကလည်း ယခုလိုခရီးစဉ် လွဲနေသည့်အတွက် စာအုပ်ထဲတွင် ပါသည့်အတိုင်း လမ်းကိုဆောင်ရွက်လျှင် ပြင်ဆင်ဆောင်ရွက် ပေးလိုခြင်းရှိ/မရှိ သိရှိလိုပါကြောင်း ဆက်စပ်မေးခွန်း မေးမြန်းပါသည်။

ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ဒုတိယဝန်ကြီး ဦးသာဦး

အခုတင်ပြတဲ့ကိစ္စနှင့် ပတ်သက်ပြီး ရန်ကုန်တိုင်းဒေသကြီး အစိုးရအဖွဲ့နှင့် ညှိနှိုင်းပြီး ပြန်လည်ဖြေကြား ပေးမည် ဖြစ်ပါကြောင်း ရှင်းလင်းဖြေကြားပါသည်။