(ခ)-နန်းယွန်းမြို့နှင့် ပန်ဆောင်မြို့ကြား လမ်းကြောင်းပိုမိုခက်ခဲသောလမ်းပိုင်းအား ၂၀၁၈-၂၀၁၉ ဘဏ္ဍာရေးနှစ်တွင် ကျောက်ချောလမ်းအဆင့် တိုးမြှင့်ဆောင်ရွက်ပေးရန် အစီအစဉ်ရှိ/မရှိနှင့်စပ်လျဉ်းသည့် မေခွန်း

စစ်ကိုင်းတိုင်းဒေသကြီးရှိ မြစ်ကြီးနား-ပန်ဆောင်-လီဒိုလမ်းသည် မိုင်တိုင်အမှတ်(၁၇၇)မှ (၂၂၈) အထိ ၅၁ မိုင် ရှည်လျားပြီး စစ်ကိုင်းတိုင်း ဒေသကြီးအစိုးရအဖွဲ့မှ စီမံခန့်ခွဲသည့်လမ်းဖြစ်ပါကြောင်း၊ မြစ်ကြီးနား-ပန်ဆောင်-လီဒိုလမ်း၏ မိုင်တိုင် အမှတ်(၁၇၇)မှ(၂၀၅)အထိ ၂၈ မိုင်နှင့် မိုင်တိုင်အမှတ်(၂၂၁)မှ(၂၂၈)ထိ ၇ မိုင် စုစုပေါင်း ၃၅ မိုင်ကို ဆောက်လုပ်ရေးဝန်ကြီးဌာန၊ လမ်းဦးစီးဌာနမှလည်းကောင်း၊ မိုင်တိုင်အမှတ်(၂၀၅)မှ(၂၂၁) အထိ ၁၆ မိုင်ကို နယ်စပ်ဒေသနှင့်တိုင်းရင်းသားလူမျိုးများ ဖွံ့ဖြိုးတိုးတက်ရေးဦးစီးဌာနရန်ပုံငွေဖြင့် အမှတ်(၉၀၉) စစ်မြေပြင် အင်ဂျင်နီယာတပ်ရင်းမှလည်းကောင်း တာဝန်ယူဆောင်ရွက်လျက်ရှိပါကြောင်း၊  ၂၀၁၇-၁၈ ဘဏ္ဍာရေးနှစ်တွင်  တိုင်းဒေသကြီးရန်ပုံငွေ ကျပ် ၁၁၄၆.၃၂၅ သန်းနှင့် မိုင်တိုင်အမှတ် (၁၇၇)မှ(၁၈၇) အတွင်း ကျောက်ချောလမ်းခင်းခြင်း ၄ မိုင်၊ တောင်ပြိုမြေဖယ်ရှားခြင်း ၂၅၀ ပေ၊ မျောမြေကာရိုက်ခြင်း ၇၀ ပေ၊ ကွန်ကရစ်ရေထုတ်ပြွန် RCC Box Culvert တည်ဆောက်ခြင်း ၁၆ စင်း၊ သုံးလွှာ တစ်ထပ်ဘေလီနှင့် Steel Decking ကြမ်းခင်းခြင်းတစ်စင်းစသည့် လုပ်ငန်းများဆောင်ရွက်ခဲ့ပါကြောင်း၊၂၀၁၈ ဘဏ္ဍာရေးနှစ် ဧပြီလမှ စက်တင်ဘာလအထိ ၆ လရန်ပုံငွေတွင် စစ်ကိုင်းတိုင်းဒေသကြီးရန်ပုံငွေ ကျပ် ၁၈၉ သန်းနှင့် Box Culvert တည်ဆောက်ခြင်း ၁၃ စင်း ဆောင်ရွက်လျက်ရှိရာ နှစ်စင်းဆောင်ရွက်ပြီးဖြစ်ပါကြောင်း၊  ၎င်းအပြင် ၂၀၁၈-၁၉ ဘဏ္ဍာရေးနှစ်တွင် ကျောက်လမ်းခင်းခြင်း ၂ မိုင် ၂ ကျောက်လမ်းပျက် ပြုပြင်ခြင်း ၂ မိုင် ၆ ဖာလုံ၊ ကွန်ကရစ် တံတားတည်ဆောက်ခြင်းတစ်စင်း၊ တံတားပြုပြင်ခြင်းတစ်စင်း၊ တောင်ပြိုမြေဖယ်ရှားခြင်းနှင့် လမ်းသားပေါ်ရှိ ရေစားမြောင်းများ သဲကျောက်ဖြည့်ခင်းခြင်း ခြောက်နေရာ စသည့်လုပ်ငန်းများ ဆောင်ရွက်ရန် စစ်ကိုင်းတိုင်း ဒေသကြီး ပြင်ဆင်ထိန်းသိမ်းခြင်းရန်ပုံငွေ ကျပ် ၇၄၉.၁၇၅ သန်းကို လျာထားတင်ပြတောင်းခံထားပြီး ဆောင်ရွက်ရန်ကျန်ရှိသည့် အပိုင်းများကိုလည်း ဘဏ္ဍာရေးနှစ်အလိုက် ရန်ပုံငွေတင်ပြတောင်းခံပြီး ရန်ပုံငွေရရှိမှုအပေါ်မူတည်ပြီး ဆောင်ရွက်ပေးသွားမည် ဖြစ်ပါကြောင်း ပြန်လည်ဖြေကြားခဲ့ပါသည်။