(ဂ) အင်းခွန်ကြမ်းခင်းဈေးအရစ်ကျစနစ်ဖြင့်ချထားလုပ်ကိုင်ခွင့်ပြုရန်နှင့် သားငါးရှာဖွေရာတွင် အခွန်အခ မပေးဆောင်ရန်နှင့်စပ်လျဉ်းသည့်မေးခွန်း

 လေးစားအပ်ပါ သော ပြည်သူ့လွှတ်တော်ဥက္ကဋ္ဌကြီးနှင့် ပြည်သူ့လွှတ်တော်ကိုယ်စားလှယ်များ၊ ဖိတ်ကြားထားတဲ့ ဧည့်သည်တော်ကြီးများ စိတ်၏ချမ်းသာခြင်း၊ ကိုယ်၏ကျန်းမာခြင်းနှင့် ပြည့်စုံကြပါစေလို့ ဆုတောင်း မေတ္တာပို့သရင်းနဲ့ နှုတ်ခွန်းဆက်သအပ်ပါတယ်။ ကျွန်တော်ကတော့ မွေးမြူရေးနှင့် ရေလုပ်ငန်း ဝန်ကြီးဌာန ဒုတိယဝန်ကြီး ဦးခင်မောင်အေး ဖြစ်ပါတယ်။ ပြည်ထောင်စုဝန်ကြီးတာဝန်အရ ပြည်တွင်း ခရီးစဉ်သွားရောက်နေတဲ့အတွက်ကြောင့်မို့လို့ ဝန်ကြီးရဲ့ကိုယ်စား ကျွန်တော်ဖြေကြားသွားမှာဖြစ်ပါ တယ်။ ပဲခူးတိုင်းဒေသကြီး၊ ကျောက်ကြီးမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဉာဏ်ဆွေဝင်း မေးမြန်းထားတဲ့ အင်းနေရာနယ်နိမိတ်ဝန်းကျင်တွင် အခြေချနေထိုင်လျက်ရှိတဲ့ သားငါးရှာဖွေ စားသောက်တဲ့ ရေလုပ်သားများအား အင်းခွန်ကိုကြမ်းခင်းဈေးအရစ်ကျစနစ်ဖြင့် ချထားလုပ်ကိုင်ခွင့် ပြုရန်အစီအစဉ် ရှိ၊ မရှိနှင့် ကျေးလက်ဒေသတွင် ရေပေါ်ရေလျှံသားငါးရှာဖွေစားသောက်ရာတွင် အခွန်အခမပေးဆောင်ရဘဲ လွတ်လပ်စွာရှာဖွေစားသောက်ခွင့်ပြုရန် အစီအစဉ်ရှိ၊ မရှိသိရှိလိုပါ ကြောင်း ကြယ်ပွင့်ပြမေးခွန်းနဲ့ မေးမြန်းထားသည်များကို ပြန်လည်ဖြေကြားသွားမှာဖြစ်ပါတယ်။ လေးစားအပ်ပါသော ပြည်သူ့လွှတ်တော်ဥက္ကဋ္ဌကြီးခင်ဗျား။ ၁၉၈၉ ခုနှစ်မတိုင်မီက မြန်မာနိုင်ငံ ငါးလုပ်ငန်းအက်ဥပဒေ (The Fisheries Act) အရ အင်းခွန်ငွေများကို အရစ်ကျပေးသွင်းခွင့်ပြုခဲ့ရာ အရကောက်ခံမှုအမှုတွဲ (Recovery Preceeding) များနှင့် အာမခံစာချုပ်များထားရှိပြီး စနစ်တကျ ဆောင်ရွက်ခဲ့သော်လည်း အင်းလုပ်ငန်းအလုပ်မှာ ရာသီဥတုအပေါ်တည်မှီပြီးတော့ဆောင်ရွက်ရတဲ့ လုပ်ငန်းဖြစ်တဲ့အတွက်ကြောင့်မို့လို့ အရှုံးပေါ်တဲ့နှစ်တွေမှာ ရေလုပ်သားအများစုဟာ အရစ်ကျငွေ များကို ပေးသွင်းနိုင်ခြင်းမရှိဘဲ အင်းခွန်ကြွေးကျန်များဖြစ်ပေါ်ခဲ့ကြောင်းတွေ့ရှိရပါတယ်။ အဲဒီ ကြွေးကျန်တွေကိုကောက်ခံတဲ့နေရာမှာ ရေလုပ်သားအများစုဟာ ဆင်းရဲနွမ်းပါးသူများဖြစ်တဲ့အတွက် ကြောင့်မို့လို့ အမှန်တကယ်ပေးသွင်းနိုင်မှုမရှိခြင်း၊ အာမခံတင်သွင်းထားသည့် နေအိမ်၊ ပစ္စည်း စသည်တို့ကိုသိမ်းဆည်းပြီး ကြွေးပေးသွင်းစေရန်မှာလည်း အခက်အခဲရှိခြင်းတို့ကြောင့် အင်းခွန်ငွေ အရစ်ကျပေးသွင်းစေသည့်စနစ်မှာ ရေလုပ်သားများနှင့် ဌာနအတွက် ဝန်ထုပ်ဝန်ပိုးဖြစ်စေကြောင်း တွေ့ရှိရပါတယ်။ ၁၉၈၉ ခုနှစ်တွင် နိုင်ငံတော်အစိုးရမှ ဈေးကွက်စီးပွားရေးစနစ်ကို ကျင့်သုံး ဆောင်ရွက်ခဲ့ခြင်းကြောင့် တည်ဆဲရေချိုငါးလုပ်ငန်းဥပဒေနှင့်အညီ ဂရန်အင်းများကို ဈေးပြိုင်စနစ် ဖြင့်လေလံတင်ရောင်းချ၍ အင်းခွန်ငွေများကို နိုင်ငံတော်သို့လက်ငင်းငွေချေစနစ်ဖြင့် အပြေအကျေ ပေးဆောင်စေလျက်ရှိပါတယ်။ သို့ပါ၍ အင်းဂရန်နယ်နိမိတ်ဝန်းကျင်တွင် အခြေကျနေထိုင်လျက်ရှိ သော ရေလုပ်သားများအနေဖြင့် တည်ဆဲရေချိုငါးလုပ်ငန်းဥပဒေအရ ဂရန်အင်းများကို ဈေးပြိုင် လေလံဆွဲဝယ်၍လည်းကောင်း၊ တစ်ဦးတစ်ယောက်တည်း ဆွဲဝယ်ရန်အခက်အခဲရှိပါက အစုအဖွဲ့ဖြင့် ဆွဲဝယ်၍လည်းကောင်း၊ အပြေအကျေပေးဆောင်ကာ လုပ်ကိုင်ဆောင်ရွက်နိုင်ပါကြောင်း တင်ပြအပ် ပါတယ်ခင်ဗျား။ ငါးလုပ်ငန်းဦးစီးဌာနအနေဖြင့် အခွန်ဆောင်ရေလုပ်သားများအတွက် ဝန်ထုပ်ဝန်ပိုး မဖြစ်စေတဲ့ သင့်တင့်တဲ့နှုန်းထားဖြင့် ကိရိယာခွန်ကောက်ခံရန်ပြဋ္ဌာန်းထားရှိပြီး လက်လုပ်လက်စား ကျေးလက်နေပြည်သူများ တစ်ဝမ်းတစ်ခါးရှာဖွေစားသောက်ရန် ဂရန်အင်း၊ သီးသန့်အင်းနှင့် တင်ဒါ ငါးဖမ်းကွက်များမှအပ ကျန်ရှိရေချိုငါးလုပ်ငန်းရေပြင်များတွင် ရေချိုငါးဖမ်းကိရိယာ ၁၆ မျိုးဖြစ်သည့် လက်ထွန်၊ ကိုင်းထောက်၊ ထောင်ကျင်း၊ ငါးမျှားတန်း၊ ဘူးမျှော၊ လက်ပစ်ကွန်၊ ရင်တွန်း၊ ပေါ်ခပ်၊ ယက်သဲ့၊ မြှုံးငယ်အမျိုးမျိုး၊ မြှုံးကြီး၊ တုတ်၊ တစောင်း၊ ဆောင်း၊ လှံထိုး၊ ဂုတ်နှင့် ရေငန်ငါးဖမ်းကိရိယာ ၆ မျိုးဖြစ်တဲ့ ပေါ်ခပ်၊ ယက်သဲ့၊ တိုင်ထောင်မျှင်၊ ပိုက်ဓမင်း၊ ပိုက်စိမ်း၊ ဓမင်းမြှုံးတို့ကို အခွန်အခပေး ဆောင်ခြင်းမှ ကင်းလွတ်ခွင့်ပြုပြီးတော့ လွတ်လပ်စွာရှာဖွေစားသောက်ခွင့်ပြုထားပြီးဖြစ်ပါတယ်။ သို့ဖြစ်ပါ၍ ရေလုပ်သားများအပါအဝင် ကျေးလက်နေပြည်သူများဟာ အထက်ဖော်ပြပါရေချိုငါးဖမ်း ကိရိယာ ၁၆ မျိုး၊ ရေငန်ငါးဖမ်းကိရိယာ ၆ မျိုးတို့ကို အခွန်ပေးဆောင်ရခြင်းမရှိဘဲ မိသားစုအတွက် တစ်နပ်တစ်အိုး ဟင်းစားရှာဖွေနိုင်သည်ကို ကျေးရွာအနှံ့အပြားတွေ့ရှိနိုင်ပါကြောင်းနှင့် အင်းဂရန် နယ်နိမိတ်ဝန်းကျင်တွင် နေထိုင်လျက်ရှိသော သားငါးရှာဖွေစားသောက်သည့် ရေလုပ်သားများ ကိုယ်စား စိတ်ဝင်စားစွာဖြင့်မေးမြန်းပေးတဲ့ ပဲခူးတိုင်းဒေသကြီး၊ ကျောက်ကြီးမဲဆန္ဒနယ် ပြည်သူ့ လွှတ်တော်ကိုယ်စားလှယ်၊ စိုက်ပျိုးရေး၊ မွေးမြူရေးနှင့် ရေလုပ်ငန်းဖွံ့ဖြိုးတိုးတက်မှုကော်မတီအဖွဲ့ဝင် ဦးဉာဏ်ဆွေဝင်းအား အထူးပင် ကျေးဇူးတင်ရှိကြောင်းပြောကြားရင်း နိဂုံးချုပ်အပ်ပါသည် ။