(င) စက်မှုလုပ်ငန်းအား မည်ကဲ့သို့ပြောင်းလဲပုံဖော်ဆောင်ရွက်မည်နှင့်စပ်လျဉ်းသည့်မေးခွန်း

လေးစားအပ်ပါသော ပြည်သူ့လွှတ်တော် ဥက္ကဋ္ဌကြီးနဲ့ ပြည်သူ့လွှတ်တော်ကိုယ်စားလှယ်အပေါင်းတို့ခင်ဗျား။ ကျွန်တော်ကတော့ စက်မှုဝန်ကြီး ဌာန ဒုတိယဝန်ကြီး ဦးမျိုးအောင်ဖြစ်ပါတယ်။ ကျွန်တော့်အနေနဲ့ မကွေးတိုင်းဒေသကြီး၊ ရေနံချောင်း မဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်ဝင်းမော်ထွန်းမှ မေးမြန်းခဲ့တဲ့ နိုင်ငံတော်ဖွံ့ဖြိုး တိုးတက်ရေးအတွက် အလွန်အရေးပါသော ပြည်တွင်းပုဂ္ဂလိက စက်မှုလုပ်ငန်းများအား နိုင်ငံတော် အစိုးရမှ မည်ကဲ့သို့ပြောင်းလဲပုံဖော်ကူညီဆောင်ရွက်မည်ကိုသိရှိလိုပါကြောင်း မေးခွန်းနဲ့ပတ်သက်၍ ပြန်လည်ရှင်းလင်းဖြေကြားသွားမှာဖြစ်ပါတယ်။
ပြည်ထောင်စုသမ္မတမြန်မာနိုင်ငံတော်ဟာ အာဆီယံအဖွဲ့ဝင်နိုင်ငံတစ်နိုင်ငံ ဖြစ်သည်နှင့်အညီ အာဆီယံဒေသအတွင်း ကုန်စည်များ လွတ်လပ်စွာ စီးဆင်းရေး၊ ဝန်ဆောင်မှုများ လွတ်လပ်စွာ စီးဆင်းရေး၊ အရင်းအနှီးများ လွတ်လပ်စွာ စီးဆင်းရေးနှင့် ကျွမ်းကျင်လုပ်သားများ လွတ်လပ်စွာ သွားလာရေးတို့အတွက် အခြားအဖွဲ့ဝင်နိုင်ငံများနည်းတူ ပူးပေါင်းဆောင်ရွက်ရန် တာဝန်ရှိလာပြီး ပူးပေါင်းဆောင်ရွက်လျက်လည်းရှိပါသည်။ မြန်မာနိုင်ငံသည် သယံဇာတကြွယ်ဝခြင်း၊ ရာသီဥတု၊ ရေ၊ ‌ြမေသဘာဝ အားသာချက်ရှိခြင်း၊ ပထဝီအနေအထားတည်နေရာ အားသာချက်ရှိခြင်း၊ အခြေခံ လုပ်သားအင်အားများရှိခြင်းစသည့် အားသာချက်များဖြင့် စိုက်ပျိုးရေးအ‌ြခေခံစက်မှုလုပ်ငန်းများနှင့် အသေးစားနှင့် အလတ်စားစက်မှုလုပ်ငန်းများ ဖွံ့ဖြိုးတိုးတက်စေရန် အလားအလာကောင်းများစွာ တည်ရှိလျက်ရှိပါတယ်။ မြန်မာနိုင်ငံအနေနဲ့ နိုင်ငံသားများရဲ့ ရင်းနှီးမြှုပ်နှံမှုကို အားပေးရန်အလို့ငှာ မြန်မာနိုင်ငံသားများ ရင်းနှီးမြှုပ်နှံမှုဥပဒေကိုလည်း ပြဋ္ဌာန်းပေးခဲ့ပြီး ကနဦးရင်းနှီးမြှုပ်နှံမှုကာလ အတွင်း လိုအပ်၍ ပြည်ပမှတင်သွင်းသော စက်ပစ္စည်းများ၊ စက်ကိရိယာအစိတ်အပိုင်းများနှင့် လုပ်ငန်းသုံးပစ္စည်းများ အပေါ်အကောက်ခွန်နှင့် အခြားပြည်တွင်းအခွန်အကောက်များမှ ကင်းလွတ်ခွင့်၊ စီးပွားရေးလုပ်ငန်းစတင်ပြီး တစ်ဆက်တည်း ၃ နှစ်အပေါ် ဝင်ငွေခွန်ကင်းလွတ်ခွင့်များလည်း ခွင့်ပြု ထားခဲ့ပါတယ်။ ၎င်းအပြင် ဆက်လက်၍ အခွန်အကောက်များကို လျှော့ပေါ့ပေးခြင်း၊ ပြည်တွင်း ပုဂ္ဂလိကဘဏ်များ ဖွင့်လှစ်ခွင့်ပေးခဲ့ပြီး ယင်းပုဂ္ဂလိကဘဏ်များကို နိုင်ငံခြားငွေကြေးကိုင်တွယ် ကျင့်သုံးခွင့်များပေးခဲ့ခြင်းစတဲ့ ဖြေလျော့မှုများ ပြုလုပ်ပေးလျက်ရှိပါတယ်။ မြန်မာ့စက်မှုလုပ်ငန်းရှင် များအနေနဲ့ မိမိနိုင်ငံအတွင်းမှာရှိတဲ့ နှိုင်းယှဉ်အားသာချက်(Comparative Advantages)များကို အကျိုးရှိရှိ ထိရောက်စွာ အသုံးချနိုင်ရေး စဉ်းစားဆောင်ရွက်သွားရမှာ ဖြစ်ပါတယ်။ နိုင်ငံတော်အစိုးရ အနေနဲ့ ပြည်တွင်းလုပ်ငန်းရှင်များရဲ့ လိုအပ်သောအရင်းအနှီးနှင့် နည်းပညာများရရှိရေးအတွက် နိုင်ငံခြားရင်းနှီးမြှုပ်နှံမှုနဲ့ နည်းပညာများ ဖိတ်ခေါ်ပေးခြင်း၊ ပြည်တွင်းလုပ်ငန်းများကို ဖက်စပ်စနစ် ဖြင့် ဆောင်ရွက်နိုင်ရန် နိုင်ငံခြားရင်းနှီးမြှုပ်နှံမှုမူဝါဒများကို ‌ြဖေလျော့ပေးခြင်း၊ ပုဂ္ဂလိက လုပ်ငန်းရှင် များအနေနဲ့ နိုင်ငံတကာနှင့် ကုန်သွယ်မှုပြုလုပ်ရာတွင် အဆင်ပြေချောမွေ့စေရေး၊ နိုင်ငံတကာမှ လာရောက် ရင်းနှီးမြှုပ်နှံသူများနှင့် ပြည်တွင်းလုပ်ငန်းရှင်များ လုပ်ငန်းလုပ်ကိုင်ရာတွင် အဆင်ပြေစေ ရေး၊ စားသုံးသူပြည်သူအများ ဈေးနှုန်းသက်သက်သာသာဖြင့် အရည်အသွေးမီ ကုန်စည်များကို စိတ်တိုင်းကျရွေးချယ်ဝယ်ယူနိုင်သည့် ဈေးကွက်ဖြစ်စေရေးစသည်ဖြင့် လုပ်ငန်းရှင်များ၊ ထုတ်လုပ်သူ များနှင့် စားသုံးသူများအတွက် ညှိနှိုင်းဖြေလျော့ပေးသူ(Facilitator)အဖြစ် ဆောင်ရွက်ပေးနေတာ ဖြစ်ပါတယ်။
ဈေးကွက်စီးပွားရေးစနစ်တွင် စက်မှုလုပ်ငန်းရှင်များအနေနဲ့ ထုတ်လုပ်မယ့်ကုန်စည်များကို ရွေးချယ်ထုတ်လုပ်ရာတွင် ကုန်ကြမ်းရရှိနိုင်မှု၊ မိမိတို့ထုတ်လုပ်မည့် ကုန်ချောအတွက် ဈေးကွက် ရရှိနိုင်မှုအနေအထား၊ ထုတ်လုပ်မှုနည်းပညာ ပြည့်စုံမှု၊ ထုတ်ကုန်၏ အရည်အသွေးပြည့်မီမှုနှင့်  ဈေးနှုန်းအရ ယှဉ်ပြိုင်နိုင်မှုတို့ကို လေ့လာစိစစ်ပြီးမှသာ ထုတ်လုပ်သင့်ပါတယ်။ ထို့အတူ အချိန်တို အတွင်း အကျိုးအမြတ်ရရှိရေးထက် ကာလရှည်ရည်မှန်းချက်များဖြင့် လုပ်ငန်းလုပ်ကိုင်သွားကြပြီး မိမိတို့လုပ်ငန်းများမှ တစ်ဆင့်ပြီးတစ်ဆင့် အောင်မြင်ကြီးထွား၍ နိုင်ငံတကာသို့ ဝင်ဆန့်နိုင်တဲ့ စက်မှုလုပ်ငန်းကြီး ဖြစ်လာစေရန်အတွက်လည်း ရည်မှန်းချက်ထားရှိသင့်ပါတယ်။ ပြည်တွင်းစက်မှု လုပ်ငန်းများအနေနဲ့ အရင်းအနှီးမလုံလောက်သည့် အားနည်းချက်များကြောင့် တစ်ဦးတစ်ယောက်ချင်း တည်ထောင်ဆောင်ရွက်ခြင်းထက် ပူးပေါင်း၍ဆောင်ရွက်ပါက ပိုမိုထိရောက်အောင်မြင်နိုင်မည် ဖြစ်ပါတယ်။ အားသာချက်ရှိသော ပြည်တွင်းစိုက်ပျိုးရေးထွက်ကုန်များကို အ‌ြခေခံပြီး တန်ဖိုးမြှင့် ထုတ်ကုန်များ ထုတ်လုပ်သော စက်မှုလုပ်ငန်းများအနေဖြင့် အမည်သစ်အမယ်သစ် ပြည်ပပို့ကုန် များကို ပိုမိုထုတ်လုပ်၍ ပြည်ပပို့ကုန်များ မြှင့်တင်နိုင်ပါက လုပ်ငန်းရှင်အတွက်ရော နိုင်ငံတော် အတွက်ပါ အကျိုးကျေးဇူး  ခံစားရမည်ဖြစ်ပါတယ်။ နိုင်ငံတော်ဘက်မှလည်း ပြည်တွင်းထုတ်လုပ်မှုနှင့် ဝန်ဆောင်မှုလုပ်ငန်းများရဲ့ ၉၂ ရာခိုင်နှုန်း ပါဝင်အကျုံးဝင်နေတဲ့ အသေးစားနှင့် အလတ်စား လုပ်ငန်းများ Small and Medium Enterprises များ ဖွံ့ဖြိုးတိုးတက်ရေးအတွက် သုတေသန ပြုလုပ်မှုများ၊ ဆွေးနွေးပွဲများ၊ မူဝါဒဆိုင်ရာညှိနှိုင်းရေးဆွဲမှုများ ပြုလုပ်လျက်အသေးစားနှင့် အလတ်စားလုပ်ငန်းဆိုင်ရာမူဝါဒ(မူကြမ်း) (Small and Medium Enterprises Policy, Draft)ကို ရေးဆွဲပြီး ဖြစ်ပါတယ်။
ယခုအခါ အသေးစားနှင့်အလတ်စားလုပ်ငန်းများ ဖွံ့ဖြိုးတိုးတက်ရေးဗဟိုဌာန(Small and Medium Enterprises Development Center)ကို ရန်ကုန်၌ ဖွင့်လှစ်တည်ထောင်ပြီး Data များ ဖြန့်ချိခြင်း၊ Media ကဏ္ဍမှ အသိပေးဆောင်ရွက်ခြင်း၊ သိပ္ပံနှင့်နည်းပညာဝန်ကြီးဌာနရှိ ကျောင်းနှင့် တက္ကသိုလ်များအပြင် အခြားပြည်ပအကူအညီများဖြင့် Incubator များ ဖန်တီးပေးခြင်း၊ ပြည်နယ်/ တိုင်းဒေသကြီးအသီးသီးရှိ စက်မှုကြီးကြပ်ရေးနှင့် စစ်ဆေးရေးဦးစီးဌာနနှင့် ပြည်ထောင်စုသမ္မတ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ မြန်မာနိုင်ငံစက်မှုကုန် ထုတ်လုပ်သူများအသင်းတို့ ပူးပေါင်းအ‌ြခေခံ၍ Small and Medium Enterprises Agencies များ ထားရှိပြီး ဈေးကွက်နှင့်နည်းပညာများ ပံ့ပိုးမှုဆောင်ရွက်ခြင်းဖြင့် အသေးစားနှင့် အလတ်စား လုပ်ငန်းများ ဖွံ့ဖြိုးတိုးတက်ရေးကို SME Actor များနှင့်အတူ တက်ညီလက်ညီ တွန်းအားပေး ဆောင်ရွက်သွားမည် ဖြစ်ပါတယ်။ ၎င်းအပြင် အသေးစားနှင့် အလတ်စားလုပ်ငန်းများ ဖွံ့ဖြိုးတိုးတက် ရေးအတွက် ဘဏ္ဍာရေးဆိုင်ရာပံ့ပိုးမှုအနေနဲ့ အသေးစားနှင့်အလတ်စားစက်မှုနှင့် ဝန်ဆောင်မှု လုပ်ငန်းများသို့ မြန်မာ့စက်မှုလက်မှုဖွံ့ဖြိုးရေးဘဏ်မှ လိုအပ်‌သောချေးငွေများကို စိစစ်ထုတ်ချေးပေး လျက်ရှိပါတယ်။ မကြာမီကာလအတွင်း မြန်မာ့စက်မှုလက်မှုဖွံ့ဖြိုးရေးဘဏ်ရှိ အစုရှယ်ယာရှင်များ၏ ထည့်ဝင်ငွေများ၊ အမတော်ကြေးကဲ့သို့ နိုင်ငံတော်အစိုးရ၏ ထည့်ဝင်ငွေများနှင့် နိုင်ငံခြားရှိ Small and Medium Enterprises Development Bank များမှ သက်သာသောအတိုးနှုန်းဖြင့် ထုတ်ချေးမည့်ငွေများဖြင့် ပေါင်းစပ်၍ အသေးစားနှင့်အလတ်စားလုပ်ငန်းများဖွံ့ဖြိုးတိုးတက်ရေး ဘဏ် Small and Medium Enterprises Development Bank အသွင်ဖြင့် စနစ်တကျ ဖွဲ့စည်းတည်ထောင်၍ အသေးစားနှင့်အလတ်စားလုပ်ငန်းများအတွက် ငွေကြေးဆိုင်ရာ ဝန်ဆောင်မှုနဲ့ ငွေအရင်းအနှီးပံ့ပိုးကူညီရေး ဆောင်ရွက်မှုများကိုပါ လုပ်ဆောင်ပေးနိုင်ရန် စီစဉ်ဆောင်ရွက် ပေးသွားမည်ဖြစ်ပါကြောင်း ဖြေကြားထားပါသည် ။