(ခ)-ပြစ်မှုဆိုင်ရာဥပဒေပုဒ်မ ၃၀၄(က)အရ စွဲဆိုထားသောအမှုများကို ကျေအေးခွင့်၊ ရုတ်သိမ်းခွင့်မပြုရန် ညွှန်ကြားထားသည့်ကိစ္စနှင့် စပ်လျဉ်းသည့် မေးခွန်း

ပြစ်မှုဆိုင်ရာဥပဒေပုဒ်မ ၃၀၄(က)မှာ အရမ်း သို့မဟုတ် ပေါ့လျော့စွာပြုမှုကြောင့် လူသေ စေမှုအတွက်ပြဋ္ဌာန်းထားခြင်းဖြစ်ပြီး ထောင်ဒဏ် ၇ နှစ်အထိချမှတ်နိုင်သော ပြစ်မှုဖြစ်ပါတယ်။ သေစေတန်ရာသည်ကိုသိလျက်နဲ့ကျူးလွန်လျှင် ထောင်ဒဏ်ကို ၁၀ နှစ်အထိ တိုးမြှင့်ချမှတ်နိုင်တဲ့ ပြစ်မှုအမျိုးအစားလည်းဖြစ်ပါတယ်။ မော်တော်ယာဉ်ကို အရမ်း သို့မဟုတ် ပေါ့လျော့စွာမောင်းနှင်မှု ကြောင့် လူသေဆုံးရသည့်ယာဉ်တိုက်မှုများကို ပြစ်မှုဆိုင်ရာဥပဒေပုဒ်မ ၃၀၄ (က)အရ တရားရုံးများမှာ တရားစွဲဆိုကြပါတယ်။ ပြစ်မှုဆိုင်ရာဥပဒေပုဒ်မ ၃၀၄(က)အရ စွဲဆိုတဲ့ယာဉ်တိုက်မှုတွေဟာ ပြစ်မှုဆိုင် ရာကျင့်ထုံးဥပဒေပုဒ်မ ၃၄၅ အပိုဒ်ခွဲ(၁)(၂)တို့အရ ကျေအေးခွင့်ရှိတဲ့အမှုများမဟုတ်တဲ့အတွက် အမှု ကျေအေးခွင့်မရရှိနိုင်ပါ။ ကျေအေးခွင့်မရတဲ့အမှုများကို ရုပ်သိမ်းခွင့်ပြုဖို့အတွက် လျှောက်ထားနိုင်ပါ တယ်။ ယင်းအမှုကို သက်ဆိုင်ရာဥပဒေအရာရှိက အမှုရုပ်သိမ်းခွင့်ပြုဖို့အတွက် တင်ပြလျှောက်ထား လာလျှင် တရားရုံးကပြစ်မှုဆိုင်ရာကျင့်ထုံးဥပဒေပုဒ်မ ၄၉၄ အရ ရုပ်သိမ်းခွင့်ပြုသင့်ပါက ရုပ်သိမ်း ခွင့်ပြုနိုင်ပါတယ်။ သို့သော်လည်း အမှုရုပ်သိမ်းခွင့်ပြုဖို့အမှုသည်များထံမှတိုက်ရိုက်တင်ပြတဲ့ လျှောက်လွှာတွေအပေါ် တရားရုံးကလက်ခံစဉ်းစားခြင်းမပြုနိုင်ပါ။ ရာဇဝတ်မှုများမှာအများပြည်သူ ကိုထိခိုက်နစ်နာစေတဲ့ပြစ်မှုများဖြစ်တဲ့အတွက် ကာယကံရှင်ကရုပ်သိမ်းလိုရုံမျှဖြင့် ရုပ်သိမ်းခွင့်မပြု နိုင်ခြင်းဖြစ်ပါတယ်။ တရားစွဲအဖွဲ့အစည်းကသာ ရုပ်သိမ်းခွင့်လျှောက်ထားနိုင်ပါတယ်။ သက်ဆိုင်ရာ ရဲတပ်ဖွဲ့ သို့မဟုတ် တရားစွဲအဖွဲ့အစည်းကတစ်ဆင့် ရုပ်သိမ်းခွင့်တင်ပြလျှောက်ထားလာရင် သူတို့ရဲ့ သဘောထားမှတ်ချက်များတောင်းခံစိစစ်ပြီးနောက် ခွင့်ပြုသင့်တယ်လို့ ယူဆတဲ့အခါ သက်ဆိုင်ရာ အမှုလိုက်ဥပဒေ အရာရှိက ပြစ်မှုဆိုင်ရာကျင့်ထုံးဥပဒေပုဒ်မ ၄၉၄ အရ အမှုကိုရုပ် သိမ်းခွင့်ပြုဖို့ တရားရုံးကိုတင်ပြ လျှောက်ထားရပါတယ်။ အဲ့ဒီလို တင်ပြလျှောက်ထားလာတဲ့အခါ လျှောက်ထား မှုဟာ တရားလိုဘက်က ပြစ်မှုထင်ရှားပေါ်လွင်အောင် သက်သေအထောက်အထားများ မတင်ပြ နိုင်ခြင်း၊ အမှုကိုစွဲတင်ပြီးမှ စွပ်စွဲခံရသူတစ်ဦးကိုဖြစ်စေ၊ အချို့ကိုဖြစ်စေသက်သေအဖြစ်ပြောင်းလဲ အသုံးပြုနိုင်ရန်အကြောင်း ပေါ်ပေါက်လာတဲ့အတွက် အဆိုပါစွပ်စွဲခံရသူအပေါ်တွင် စွဲဆိုသောအမှုကို ရုပ်သိမ်းရန်လိုအပ်လာခြင်း၊ အမှုကိုစစ်ဆေးနေစဉ်အတွင်း အမှုသည်များသည် သွေးရင်းသားရင်း ဖြစ်ကြ၍ အမှန်တရားကို ထုတ်ဖော်ပြောဆိုမည်မဟုတ်သောကြောင့် အမှုကိုဆက်လက်စစ်ဆေးခြင်း အားဖြင့် အကျိုးထူးဖွယ်ရာ မမြင်ခြင်းစတဲ့အကြောင်းတွေကြောင့် လျှောက်ထားခြင်း ဟုတ်၊ မဟုတ်နှင့် အမှုကိုရုပ် သိမ်းခွင့်ပြုခြင်းအားဖြင့် အလားတူအမှုမျိုးတိုးတက်ဖြစ်ပွားလာစေရန် အကြောင်းရှိ၊ မရှိကို စဉ်းစားသုံးသပ်ပြီး ရုပ်သိမ်းခွင့် ပြုသင့်တယ်လို့ယူဆတဲ့အခါ တရားရုံးကအမှုကို ရုပ်သိမ်းခွင့်ပြု ကြောင်း အမိန့်ချမှတ်ရပါတယ်။ အမှုရုပ်သိမ်းခွင့်မပြုလျှင် ဘာကြောင့်ရုပ်သိမ်းခွင့်မပြုကြောင်း အကျိုးအကြောင်းပြပြီးအမိန့်ချမှတ်ရပါတယ်။ တရားရုံးကအမှုကို ဆက်လက်စစ်ဆေးရပါတယ်။ အမှုရုပ်သိမ်းခြင်းနှင့်ပတ်သက်ပြီး ချမှတ်သောအမိန့် အပေါ်မကျေနပ်တဲ့သူက   အဆင့်မြင့်တရားရုံး သို့ ပြင်ဆင်မှုလျှောက်ထားရန်ဖြစ်ပါတယ်။

မေးခွန်းအမှတ်(၁)နှင့်စပ်လျဉ်းပြီး ပြစ်မှုဆိုင်ရာဥပဒေပုဒ်မ ၃၀၄(က)အရ စွဲဆိုတဲ့အမှုတွေကို ကျေအေးရုပ်သိမ်းခွင့်မပြုဆိုခြင်းမှာ မှန်ကန်ခြင်းမရှိပါကြောင်း ပြစ်မှုဆိုင်ရာကျင်‌့ထုံးဥပဒေပုဒ်မ ၃၄၅ အရ အမှုကျေအေးခွင့်မပြုနိုင်သော်လည်းပဲ ပြစ်မှုဆိုင်ရာကျင့်ထုံးဥပဒေပုဒ်မ ၄၉၄ အရ အမှု ရုပ်သိမ်းခွင့်ပြုသင့်ပါက ရုပ်သိမ်းခွင့်ပြုပါကြောင်းရှင်းလင်းဖြေကြားအပ်ပါတယ်။ မေးခွန်းအမှတ် (၂)နှင့် စပ်လျဉ်းပြီး ပြစ်မှုဆိုင်ရာဥပဒေပုဒ်မ ၃၀၄ (က)အရ စွဲဆိုသောအမှုများ ကျေအေးခွင့်မရှိခြင်း သည် တည်ဆဲဥပဒေပြဋ္ဌာန်းချက်များနဲ့ညီညွတ်မှုရှိပါကြောင်း၊ အမှုရုပ်သိမ်းခွင့် မပြုရန်တားမြစ်ထား ခြင်းမရှိပါကြောင်း ဥပဒေနှင့်အညီအမှုရုပ်သိမ်းခွင့်ပြုသင့်သည့်အမှုများကို ရုပ်သိမ်းခွင့်ပြုပြီး ရုပ်သိမ်း ခွင့်မပြုသင့်သည့်အမှုများကို ရုပ်သိမ်းခွင့်မပြုကြောင်း ရှင်းလင်းဖြေကြားအပ်ပါတယ်။ အထက်ပါ ဖြေဆိုချက်များအရ မေးခွန်းအမှတ်(၃)နှင့်ပတ်သက်ပြီး ရှင်းလင်းဖြေဆိုရန် လိုအပ်မည်မဟုတ်ပါကြောင်း ရှင်းလင်းဖြေကြားပါသည်။