(ဆ)-ပြည်သူ့ဝန်ထမ်းများနှင့် အငြိမ်းစားဝန်ထမ်းများအတွက် စံစားခွင့်အရပ်ရပ်ကို အချိန်ကာလအလိုက် ပြန်လည်စိစစ်၍ လိုအပ်သလို ပြင်ဆင်တိုးမြှင့် စံစားခွင့်ပြုနိုင်ရေးနှင့်စပ်လျဉ်းသည့်မေးခွန်း

ယခုမေးခွန်းတွင် ဖော်ပြထားတဲ့ ရှင်းလင်းတင်ပြချက်များဟာ ကောင်းမွန်သင့်မြတ်မှန်ကန်ပြီး လက်ရှိ ပြည်သူ့ဝန်ထမ်းများနှင့် အငြိမ်းစားဝန်ထမ်းများအတွက် အမှန်တကယ်ဆောင်ရွက်ပေးသင့်တဲ့ ဆောင်ရွက်ပေးရမယ့် အကြောင်းအရာကိစ္စများဖြစ်ကြပါတယ်။ ဒီအကြောင်းအရာ အချက်အလက် များနှင့်စပ်လျဉ်းပြီး နိုင်ငံတော်က ဆောင်ရွက်ပေးခဲ့မှုများနှင့် လက်ရှိဆောင်ရွက်ပေးနေမှု၊ အနာဂတ် ဆောင်ရွက်ပေးရန် ရည်ရွယ်ထားရှိမှုအခြေအနေများကို ရှင်းလင်းတင်ပြလိုပါတယ်။ ယခင် နိုင်ငံတော် အစိုးရအဆက်ဆက်မှာ နိုင်ငံ့ဝန်ထမ်းများရဲ့ လစာ၊ လုပ်ခနှုန်းထားများ ပြင်ဆင်တိုးမြှင့်ပေးခြင်း၊ ရှားပါးစရိတ် ခွင့်ပြုပေးခြင်းနှင့် အပိုထောက်ပံ့ကြေးခွင့်ပြုပေးခြင်းတို့ကို ဆောင်ရွက်ပေးခဲ့ပါတယ်။ ဝန်ထမ်းများရဲ့ လစာနှုန်းထားတိုးမြှင့်ခြင်းကို ၁-၁၀-၁၉၇၂၊ ၁-၄-၁၉၈၉၊ ၁-၄-၁၉၉၃၊ ၁-၄-၂၀၀၀၊     ၁-၄-၂၀၀၆ နှင့် ၁-၁-၂၀၁၀ တို့မှာ ၆ ကြိမ်တိုင် ဆောင်ရွက်ပေးခဲ့ပါတယ်။ ယာယီရှားပါးစရိတ် ခံစားခွင့်ပြုခြင်းကို ၁-၇-၁၉၇၆ တွင် ၁ ကြိမ် ဆောင်ရွက်ပေးခဲ့ပြီး အပိုထောက်ပံ့ကြေးခံစားခွင့်ပြု ခြင်းကို ၁-၄-၁၉၈၁ နှင့် ၁-၈-၁၉၈၈ တို့မှာ ၂ ကြိမ် ဆောင်ရွက်ပေးခဲ့ပါတယ်။ ယခုပြည်ထောင်စု အစိုးရအဖွဲ့လက်ထက်မှာလည်း ၁-၇-၂၀၁၁ ရက်နေ့ကစပြီး အငြိမ်းစားဝန်ထမ်းများရဲ့ အငြိမ်းစား လစာငွေများကို တိုးမြှင့်ခံစား ခွင့်ပြုခဲ့ပါတယ်။ ထို့အပြင် ၁-၄-၂၀၁၂ ရက်နေ့ကစပြီး နိုင်ငံ့ဝန်ထမ်းများ ရဲ့ စားဝတ်နေရေးနှင့် သက်သာချောင်ချိရေးကို အထောက်အကူဖြစ်စေရန်အတွက် အပိုထောက်ပံ့ကြေး ငွေကျပ် ၃၀၀၀၀ ကိုလည်း လစဉ်တိုးမြှင့်ခံစားခွင့်ပြုခဲ့ပြီး နိုင်ငံတော်အတွင်း ဝေးလံခေါင်သီဒေသများ တွင် တာဝန်ထမ်းဆောင်နေကြတဲ့ ဝန်ထမ်းများအတွက် လက်ရှိလစဉ်ထုတ်ယူနေတဲ့ လစာနှင့်ညီမျှတဲ့ ငွေကို ဒေသစရိတ်အဖြစ်သတ်မှတ်ပြီး ထပ်ဆောင်းခံစားခွင့်ပြုခဲ့ပါတယ်။ ထို့အပြင် နိုင်ငံတော်အစိုးရ အနေနဲ့ နိုင်ငံ့ဝန်ထမ်းများအတွက် အပိုထောက်ပံ့ကြေးကိုလည်း ပိုမိုတိုးမြှင့်ထောက်ပံ့ပေးနိုင်ရန် အစဉ်တစိုက် ကြိုးပမ်းဆောင်ရွက်လျက်ရှိပါတယ်။ နိုင်ငံ့ဝန်ထမ်းများရဲ့လစာနှင့် အငြိမ်းစားဝန်ထမ်း များရဲ့ ပင်စင်လစာငွေများကို တိုးမြှင့်ပေးနိုင်ရေးအတွက် နိုင်ငံတော်ရဲ့ ဘတ်ဂျက်အခြေအနေ၊ နိုင်ငံတော်အတွင်း လှည့်လည်သုံးစွဲနေတဲ့ ငွေကြေးအခြေအနေ၊ ငွေကြေးဖောင်းပွမှုနှင့် စားသုံးသူ ဈေးဆနှုန်းကိန်းများနှင့် တစ်မျိုးသားလုံးရဲ့ ပြည်တွင်းအသားတင်ထုတ်လုပ်မှုနှင့် ဝန်ဆောင်မှုတန်ဖိုး စတဲ့ အချက်အလက်များကိုလည်း ထည့်သွင်းစဉ်းစားတွက်ချက်ဆောင်ရွက်လျက်ရှိပါတယ်။ နိုင်ငံတော်ရဲ့ ဘဏ္ဍာရေးနှင့် ငွေရေးကြေးရေးအခြေအနေနဲ့ ၂၀၁၂-၂၀၁၃ ဘဏ္ဍာရေးနှစ် ပြုပြင်ပြီး ရသုံးခန့်မှန်းခြေငွေစာရင်းအရ နိုင်ငံတော်ရဲ့ ဘတ်ဂျတ်ဆိုင်ရာ အချက်အလက်တွေဟာ တင်ပြပါ အတိုင်း ဖြစ်ပါတယ်။ ရငွေစုစုပေါင်း ကျပ်သန်းပေါင်း ၁၂၇၇၄၅၂၀၊ သုံးငွေစုစုပေါင်း ကျပ်သန်းပေါင်း ၁၄၄၃၉၄၆၆ ထို့အတွက် လိုငွေ ကျပ်သန်းပေါင်း ၁၆၆၄၉၄၆ ဖြစ်ပါတယ်။ GDP တန်ဖိုးအနေနဲ့ သန်းပေါင်း ၅၁၂၇၅၇၇ ဖြစ်တဲ့ အတွက် လိုငွေနှင့် GDP အချိုးဟာ ၃.၂၅ ရာခိုင်နှုန်း ဖြစ်ပါတယ်။ နိုင်ငံတော်အတွင်းမှာ လှည့်လည် သုံးစွဲနေတဲ့ ငွေပမာဏ ကျပ်သန်းပေါင်း ၆၇၄၈၅၆၆ ဖြစ်ပါတယ်။ ငွေကြေးဖောင်းပွမှုအနေနဲ့ ၂၀၁၃ ခုနှစ် ဇန်နဝါရီလ ကိန်းဂဏန်းများအရ ၁.၉၅ ရာခိုင်နှုန်း ဖြစ်ပါတယ်။ စားသုံးသူဈေးဆနှုန်းကိန်း ၂၀၁၃ ခုနှစ် ဇန်နဝါရီလအရ ၁၇၀.၈၆ ဖြစ်ကြောင်း တင်ပြအပ်ပါတယ်။ အထက်ပါသုံးငွေစုစုပေါင်း ကျပ်သန်းပေါင်း ၁၄၄၃၉၄၆၆ မှာ နိုင်ငံ့ဝန်ထမ်းများရဲ့ လစာနှင့် အငြိမ်းစားဝန်ထမ်းများရဲ့ ပင်စင်လစာအတွက်သုံးငွေမှာ တင်ပြပါအတိုင်းဖြစ်ပါတယ်။ သုံးငွေစုစုပေါင်း ကျပ်သန်းပေါင်း ၁၄၄၃၉၄၆၆ ဖြစ်ပါတယ်။ ဝန်ထမ်းလစာအတွက် သုံးငွေစုစုပေါင်း ကျပ်သန်းပေါင်း ၁၃၉၀၅၅၀.၆၉၆ ဖြစ်ပါတယ်။ ဒါကြောင့် သုံးငွေစုစုပေါင်းမှာ ဝန်ထမ်းလစာရဲ့သုံးငွေ ပါဝင်မှုဟာ ၉.၆၃ ရာခိုင်နှုန်း ဖြစ်ပါတယ်။ ဒီထဲမှာ ပင်စင်လစာငွေအတွက်သုံးငွေအနေနဲ့ သန်းပေါင်း ၃၃၁၆၄၅.၅၁၁ ဖြစ်တဲ့အတွက် သုံးငွေ စုစုပေါင်းမှာ ပင်စင်လစာငွေ သုံးငွေအတွက်ပါဝင်မှုဟာ ၂.၃၀ ရာခိုင်နှုန်းပါဝင်ပါတယ်။ ဒီသုံးငွေ စုစုပေါင်းမှာ ဝန်ထမ်းလစာရော၊ ပင်စင်လစာပါ ပူးပေါင်းပြီးတော့ တွက်မယ်ဆိုရင် သုံးငွေပါဝင်မှု အချိုးအစားဟာ ၁၁.၉၃ ရာခိုင်နှုန်းပါဝင်နေကြောင်း တင်ပြအပ်ပါ တယ်။ အထက်ဖော်ပြပါ ကိန်းဂဏန်းများအရ နိုင်ငံ့ဝန်ထမ်းများရဲ့လစာနှင့် အငြိမ်းစားဝန်ထမ်းများရဲ့ ပင်စင်လစာတိုးမြှင့်ပေး နိုင်ရေးအတွက် နိုင်ငံတော်အနေနဲ့ ရငွေပိုမိုတိုးတက်ရရှိရေး၊ သုံးငွေစိစစ် လျှော့ချရေးတို့ကို စနစ်တကျဆောင်ရွက်ကြရမှာ ဖြစ်ပါတယ်။ နိုင်ငံတော်အစိုးရအနေနဲ့ နိုင်ငံတော်ရဲ့ စီးပွားရေးဖွံ့ဖြိုးတိုးတက်မှုအတွက် ပြုပြင်ပြောင်းလဲရေးမဟာဗျူဟာလုပ်ငန်းစဉ်များ ချမှတ်အကောင် အထည်ဖော် ဆောင်ရွက်လျက်ရှိသည့်အပြင် ဝန်ထမ်းများအပါအဝင် နိုင်ငံသားအားလုံးရဲ့ တစ်ဦးချင်း ဝင်ငွေ တိုးတက်ရေးအတွက် အစီအမံများ ချမှတ်ဆောင်ရွက်လျက်ရှိပါတယ်။ ထို့အပြင် နိုင်ငံတော်ရဲ့ ဘတ်ဂျက်ရသုံးခန့်မှန်းခြေငွေစာရင်းကိုလည်း ပြည်ထောင်စုအစိုးရအဖွဲ့က စနစ်တကျ စိစစ်ရေးဆွဲ တင်ပြပြီး ပြည်ထောင်စုလွှတ်တော်ကလည်း ပံ့ပိုးကူညီထိန်းကျောင်း ဆောင်ရွက်ပေးလျက်ရှိရာ အစိုးရနှင့် လွှတ်တော်အကြား ပွင့်လင်းမြင်သာမှုရှိစွာဖြင့် ပူးပေါင်းဆောင်ရွက်နေခြင်းကြောင့် လည်းကောင်း၊ နိုင်ငံတော်ရဲ့ မေခရိုစီးပွားရေးအခြေအနေကို အပြည်ပြည်ဆိုင်ရာငွေကြေး ရန်ပုံငွေအဖွဲ့အပါအဝင် နိုင်ငံတကာစီးပွားရေးအဖွဲ့အစည်းများနှင့် ပူးပေါင်းလေ့လာစောင့်ကြပ် ထိန်းကျောင်းဆောင်ရွက်နေမှု ကြောင့်လည်းကောင်း နိုင်ငံတော်ရဲ့ ဘဏ္ဍာရေးအခြေအနေဟာ တစ်နှစ်ထက်တစ်နှစ်ပိုမိုတိုးတက် ကောင်းမွန်ပြီဖြစ်ကြောင်း သုံးသပ်တွေ့ရှိရပါတယ်။ နိုင်ငံတော်ရဲ့ စီးပွားရေးဖွံ့ဖြိုးတိုးတက်လာပြီး အစိုးရရဲ့ရငွေများ တိုးတက်ပြီးတော့ နိုင်ငံတော်ဘဏ္ဍာငွေ၊ ရန်ပုံငွေ တောင့်တင်းလာတာနှင့်အမျှ ရေမြင့်လျှင် ကြာတင့်ဆိုသကဲ့သို့ နိုင်ငံ့ဝန်ထမ်းများရဲ့ဘဝဟာလည်း မြင့်မားလာမှာဖြစ်ပါတယ်။ မြန်မာနိုင်ငံဟာ လူစွမ်းအားအရင်းအမြစ်၊ သဘာဝသယံဇာတ အရင်းအမြစ်များ ကြွယ်ဝတယ်ဆိုတာ မှန်ပေမယ့် အစိုးရရဲ့ဘဏ္ဍာရေးစီမံခန့်ခွဲမှုမှာ လိုအပ်ချက်တွေ ရှိနေသေးတဲ့အတွက် ပြုပြင်ပြောင်းလဲ ရေးများကို ဘက်ပေါင်းစုံကနေလုပ်ဆောင်နေရခြင်းဖြစ်သည်ကို အားလုံးအသိပဲ ဖြစ်ပါတယ်။ မိမိတို့အစိုးရရဲ့ ပြုပြင်ပြောင်းလဲမှုမဟာဗျူဟာအဆင့်ဆင့် ချမှတ်လုပ်ဆောင်နေမှုများရဲ့ အနှစ်ချုပ်ရည်မှန်းချက်ဟာ နိုင်ငံ့ဝန်ထမ်းများအပါအဝင် ပြည်သူလူထုတစ်ရပ်လုံး စားဝတ်နေရေးနှင့် လူနေမှုအဆင့်အတန်းမြင့်မားရေး၊ တစ်ဦးကျဝင်ငွေတိုးတက်စေရေးကိုပဲ ရည်ရွယ်ခြင်းဖြစ်ပါတယ်။ နိုင်ငံတော် ရငွေရရှိမှုမှာ အဓိကအခန်းကဏ္ဍကပါဝင်တဲ့ နိုင်ငံပိုင်စီးပွားရေးအဖွဲ့အစည်းများရဲ့ လုပ်ငန်း စွမ်းဆောင်ရည်တိုးတက်မြင့်မားရေး၊ ဝင်ငွေပိုမိုတိုးတက်ရရှိရေးအတွက် တွန်းအားပေးဆောင်ရွက် လျက်ရှိတဲ့အပြင် အရှုံးပေါ်နေတဲ့ နိုင်ငံပိုင်စီးပွားရေးအဖွဲ့အစည်းများအတွက် နိုင်ငံတော်ဘတ်ဂျက် ကနေ ကျခံသုံးစွဲထောက်ပံ့နေရမှု၊ ဝန်ထုပ်ဝန်ပိုးလျော့ကျသွားစေဖို့အတွက် ပုဂ္ဂလိကပိုင်လွှဲပြောင်း လုပ်ကိုင်ခွင့်ပြုရေးကိုလည်း စနစ်တကျစီမံဆောင်ရွက်လျက်ရှိပါတယ်။ ဒါ့အပြင် နိုင်ငံတကာနှင့် ကျင့်သုံးဆောင်ရွက်နေတဲ့ နည်းစနစ်များနှင့်ကိုက်ညီပြီး မိမိအခြေအနေနှင့် လိုက်လျောညီထွေ ဆောင်ရွက်နိုင်မယ့် အခွန်စနစ်ပြုပြင်ပြောင်းလဲရေးလုပ်ငန်းစဉ်များကိုလည်း ဆောင်ရွက်လျက်ရှိရာ နိုင်ငံတော်အတွက် ရသင့်ရထိုက်တဲ့ အခွန်အခဝင်ငွေများ တိုးတက်ရရှိအောင်လည်း အလေးထား ဆောင်ရွက်လျက်ရှိပါတယ်။ ဒါ့အပြင် နိုင်ငံတော်ရဲ့ ပြည်ပကြွေးမြီရှင်းလင်းရေးကိစ္စကိုလည်း ဆောင်ရွက်နိုင်ခဲ့ပြီဖြစ်ရာ ပြည်ပနိုင်ငံများနှင့် နိုင်ငံတကာအဖွဲ့အစည်းများထံမှ အထူးသက်သာတဲ့ အတိုးနှုန်းဖြင့် ချေးငွေများနှင့် အခြားအကူအညီ အထောက်အပံ့များ ပိုမိုရရှိနိုင်တော့မှာ ဖြစ်ခြင်း ကြောင့် နိုင်ငံ့ဖွံ့ဖြိုးရေးနှင့် ပြည်သူ့ဗဟိုပြုဖွံ့ဖြိုးရေးလုပ်ငန်းများကို ပိုမိုတိုးတက်ဆောင်ရွက်နိုင် တော့မှာ ဖြစ်ပါတယ်။ ယခုတင်ပြတဲ့အခြေအနေ အကြောင်းအရာအချက်အလက်များဟာ နိုင်ငံတော်ရဲ့ ဘဏ္ဍာရေးအခြေအနေတိုးတက်မှုကို ညွှန်ပြနေတာမို့ ဒီလိုတိုးတက်မှုနှင့်အတူ နိုင်ငံ့ဝန်ထမ်းများ ရသင့်ရထိုက်တဲ့ လက်ရှိအခြေအနေနဲ့ ကိုက်ညီတဲ့ နိုင်ငံ့ဝန်ထမ်းများရဲ့လစာ၊ လုပ်ခနှင့် ထောက်ပံ့ကြေးများ၊ အငြိမ်းစားဝန်ထမ်းများရဲ့ လစာများ တိုးမြှင့်ခံစားခွင့်ပြုရေးကိစ္စတို့ကို ဆောင်ရွက် နိုင်တော့မှာ ဖြစ်ပါတယ်။ ဒီလိုဆောင်ရွက်ရာမှာလည်း စနစ်တကျစီမံတွက်ချက်ဆောင်ရွက်သွားမှာ ဖြစ်ပါတယ်။ လက်ရှိအခြေအနေအရ ဝန်ထမ်းများအား ထောက်ပံ့ကြေးငွေ တိုးမြှင့်ခံစားခွင့်ပြုရန်ကို ဦးစွာစဉ်းစားဆောင်ရွက်လျက်ရှိပါတယ်။ ထို့အပြင် လစာတိုးမြှင့်ခြင်းနှင့် တိုးမြှင့်ပေးတဲ့ဝန်ထမ်းလစာ နှင့်အတူ ယှဉ်တွဲဖြစ်ပေါ်လာမယ့် အငြိမ်းစားပင်စင်လစာအတွက် တိုးမြှင့်ထောက်ပံ့ရမယ့် ပမာဏ အတွက် နိုင်ငံတော်မှ ရေတိုရေရှည်ကျခံနိုင်မှု အခြေအနေကိုလည်း ထည့်သွင်းတွက်ချက်စဉ်းစား ဆောင်ရွက်လျက်ရှိပါတယ်။ ထို့အပြင် နိုင်ငံတော်ရဲ့ ပင်စင်လစာကျခံသုံးစွဲမှုဝန်ထုပ်ဝန်ပိုးကို စနစ်တကျစီမံခန့်ခွဲနိုင်မယ့် ပင်စင်ရန်ပုံငွေတစ်ရပ်ထူထောင်ဆောင်ရွက်ရန်နှင့် အခြားနိုင်ငံများရဲ့ ပင်စင်စနစ်ကို လေ့လာသုံးသပ်ပြီး မိမိနှင့်ကိုက်ညီတဲ့ ပင်စင်စနစ်ကိုလည်း ကျင့်သုံးအကောင်အထည် ဖော်ဆောင်ရွက်နိုင်ရန်အတွက်လည်း စီမံဆောင်ရွက်သွားမှာ ဖြစ်ပါတယ်။

ထို့အပြင် ဆောက်လုပ်ရေးဝန်ကြီးဌာနအနေနဲ့ ပြည်သူလူထုရဲ့ နေထိုင်ရေးလိုအပ်ချက်ကို ဖြည့်ဆည်းပေးရန်ရည်ရွယ်ချက်နှင့် တန်ဖိုးနည်းအိမ်ရာစီမံကိန်းများနှင့် ဝယ်ယူနိုင်စွမ်းရှိတဲ့ အိမ်ရာ စီမံကိန်းများကို တိုင်းဒေသကြီး/ပြည်နယ်အစိုးရအဖွဲ့များနှင့်ညှိနှိုင်းကာ အကောင်အထည်ဖော် ဆောင်ရွက်ရန်စီစဉ်ဆောင်ရွက်လျက်ရှိပါတယ်။ ကိုယ်ပိုင်အိမ်ရာမရှိသေးတဲ့ဝန်ထမ်းတွေ၊ အငြိမ်းစား ဝန်ထမ်းတွေ၊ ပုဂ္ဂလိကကုမ္ပဏီဝန်ထမ်းများနှင့် ပြည်သူတွေ ကိုယ်ပိုင်အိမ်ရာပိုင်ဆိုင်ခွင့်ရရှိရေးအတွက် အဆင့်လိုက်သီးသန့်တန်ဖိုးနည်းအိမ်ရာများ ဆောက်လုပ်ပေးနိုင်ရေးအတွက်လည်း စီစဉ်ပေးလျက်ရှိ ပါတယ်။ ဒီလိုစီစဉ်တဲ့နေရာမှာ လစာငွေနည်းပါးတဲ့ ဝန်ထမ်းများအတွက် အိမ်ရာတွေ ဆောက်လုပ်ပေး ခြင်း၊ လစာဝင်ငွေအလယ်အလတ်ရှိတဲ့ ဝန်ထမ်းများအတွက် အိမ်ရာများ ဆောက်လုပ်ပေးခြင်း၊ အငြိမ်းစားဝန်ထမ်းများ၊ ပုဂ္ဂလိက ကုမ္ပဏီဝန်ထမ်းများနှင့် ပြည်သူများအတွက် အိမ်ရာများ ဆောက်လုပ်ပေးခြင်းတို့ ပါဝင်ကြောင်း သိရှိရပါတယ်။ အဆင့်လိုက်အိမ်ခန်းလိုအပ်ချက်များကို စိစစ် ပြီး မြေနေရာရရှိနိုင်မှုနှင့် မြေအသုံးချစီမံချက်အပေါ်မူတည်ပြီးတော့ သင့်လျော်ကောင်းမွန်တဲ့ အိမ်ရာများတည်ဆောက်ရန် စီမံကိန်းများရေးဆွဲပြီး ဦးစားပေးအစီအစဉ်လိုက် တာဝန်ထမ်းဆောင်ဆဲ ပြည်သူ့ဝန်ထမ်းများအား အငှားချဝန်ထမ်းအိမ်ရာများတွင် စီစဉ်ပေးခြင်း၊ ငွေပေးချေနိုင်မှု အင်အားပေါ် အခြေခံကာ ကျသင့်အိမ်တန်ဖိုးကို လစဉ်အရစ်ကျ လစာငွေမှ ပေးသွင်းစေခြင်း၊ အငြိမ်း စားယူတဲ့အခါမှာ လက်ကျန်ငွေတွေကို တစ်လုံးတစ်ခဲတည်း လုပ်သက်ဆုငွေမှ ဖြတ်တောက်ပေးသွင်း စေခြင်းနှင့် ထပ်မံလိုငွေကို ငွေသားွဖင့်ပေးသွင်းစေခြင်း၊ အငြိမ်းစားဝန်ထမ်းများ၊ ပုဂ္ဂလိက ကုမ္ပဏီဝန်ထမ်းများနှင့် ပြည်သူများအတွက် ကျသင့်တန်ဖိုးကို တစ်လုံးတစ်ခဲတည်း ပေးသွင်းစေခြင်း နည်းလမ်းများနှင့် ကိုယ်ပိုင်အိမ်ဖြစ်စေရေးအတွက် ဆောက်လုပ်ရေးဝန်ကြီးဌာနအနေနဲ့ စီစဉ် ဆောင်ရွက်လျက်ရှိပါတယ်။

နိုင်ငံတော်အတွက် အစစအဆင်ပြေသော အချိန်၌ ဆောင်ရွက်ပေးနိုင်ပါရန်ဟု ဖော်ပြထားရာ ယခုမေးမြန်းချက်သည် အမှန်တကယ်လိုအပ်ချက် ဖြစ်သော်လည်း နိုင်ငံတော်အစိုးရအနေဖြင့် ရင်ဆိုင်ဖြေရှင်းရမယ့်၊ စဉ်းစားသုံးသပ်တွက်ချက် ဆောင်ရွက်ရမယ့် အခြေအနေများအပေါ် စာနာနားလည်စိတ်ဖြင့် ဖော်ပြထားခြင်းဖြစ်ကြောင်း တွေ့ရှိရတဲ့အတွက် များစွာကျေးဇူးတင်ရှိကြောင်း တင်ပြအပ်ပါတယ်။ နိုင်ငံတော်သမ္မတကြီးရဲ့          ၁-၁-၂၀၁၃ ရက်နေ့မှာ ပြည်ထောင်စုလွှတ်တော်နာယက၊ ပြည်သူ့လွှတ်တော်ဥက္ကဋ္ဌနှင့် လွှတ်တော် ကိုယ်စားလှယ်များထံသို့ ပေးပို့တဲ့ နှစ်သစ်ကူးသဝဏ်လွှာ၌ ပြည်ထောင်စုရဲ့ ဘဏ္ဍာငွေအရအသုံး ဆိုင်ရာဥပဒေကို တစ်နှစ်ထက်တစ်နှစ်ပိုမိုစနစ်ကျစွာ ပြဋ္ဌာန်းနိုင်မည်ဖြစ်ပြီး နိုင်ငံ့ဝန်ထမ်းများရဲ့ ထောက်ပံ့ကြေးတွေကိုလည်း တစ်ဆင့်ပြီးတစ်ဆင့် တိုးမြှင့်ပေးနိုင်တော့မည်ဖြစ်ကြောင်းကိုလည်း ထုတ်ဖော်ပြောကြားထားပါတယ်။ သို့ဖြစ်ပါ၍ ချင်းပြည်နယ်၊ ကန်ပက်လက်မဲဆန္ဒနယ် ပြည်သူ့ လွှတ်တော်ကိုယ်စားလှယ် သူရဦးအောင်ကိုရဲ့ ပြည်သူ့ဝန်ထမ်းများနှင့် အငြိမ်းစားများအတွက် စံစားခွင့်အရပ်ရပ်ကို အချိန်ကာလအလိုက် ပြန်လည်စိစစ်၍ လိုအပ်သလို ပြင်ဆင်တိုးမြှင့် စံစားခွင့် ပြုနိုင်ရေးမေးခွန်းတွင် ဖော်ပြပါရှိသည့်အချက်များနှင့် အစီအမံများအား ပြည်သူ့ဝန်ထမ်းများနှင့် အငြိမ်းစားဝန်ထမ်းများအတွက် အမှန်တကယ်ဖြည့်ဆည်းဆောင်ရွက်ပေးရန် လိုအပ်ပါကြောင်းနှင့် ပြည်ထောင်စုအစိုးရအဖွဲ့အနေဖြင့် အစဉ်အလေးထားဆောင်ရွက်သွားမည် ဖြစ်ပါကြောင်းရှင်းလင်း ဖြေကြားပါသည်။