(ဃ)-ဟဲဟိုးလေယာဉ်ကွင်း အနီး၌ လေယာဉ်ပျက်ကျမှုဖြစ်စဉ် နှင့် စပ်လျဉ်းသည့် မေးခွန်း

၂၀၁၂ ခုနှစ်၊ ဒီဇင်ဘာလ ၂၅ ရက်နေ့ နံနက် ၈ နာရီ ၅၁ မိနစ်မှာ အဲပုဂံလေကြောင်းလိုင်းပိုင် F.100 လေယာဉ် XY-AGC ဟာ ဟဲဟိုးလေယာဉ်ကွင်းသို့ ဆင်းသက်စဉ်မှာ လေယာဉ် မတော်တဆထိခိုက်ပျက်စီးမှုဖြစ်စဉ် ဖြစ်ပွားခဲ့ပါတယ်။ လေယာဉ်မတော်တဆထိခိုက်မှုဖြစ်ပွားတဲ့ နေ့မှာပဲ ကျွန်တော်တို့ နာရီပိုင်းအတွင်းမှာပဲ ပို့ဆောင်ရေးဝန်ကြီးဌာန ပြည်ထောင်စုဝန်ကြီးနှင်‌့ တာဝန်ရှိတဲ့သူတွေဟာ ဖြစ်ပွားရာနေရာကို သွားရောက်စစ်ဆေးခဲ့ပြီးတော့ အဲဒီနေ့မှာပဲ ကျွန်တော်တို့ အဖွဲ့ဝင်ငါးဦးပါတဲ့ စုံစမ်းစစ်ဆေးရေးအဖွဲ့ကို ဖွဲ့စည်းတာဝန်ပေးအပ်ခြင်းနှင့် အများပြည်သူသိရှိနိုင်ဖို့ နိုင်ငံတော်ပိုင် သတင်းမီဒီယာများမှတစ်ဆင့် သတင်းထုတ်ပြန်ခြင်းတို့ အချိန်နဲ့တစ်ပြေးညီ ဆောင်ရွက် ခဲ့ပါတယ်။

လေယာဉ်မတော်တဆဖြစ်ပွားမှုဟာ ယေဘုယျအားဖြင့်တော့ လေယာဉ်ကွင်းသို့ ချဉ်းကပ်တဲ့ အမြင့်ဟာ ရှိသင့်တာထက်နိမ့်၍ ချဉ်းကပ်တာကြောင့်လို့ ယူဆရပါတယ်။ အဲဒီလိုဖြစ်တဲ့ဖြစ်စဉ် ကတော့ Man, Machine, Media ဟူသောအကြောင်းအချက် သုံးချက်အနက်တစ်ခုခုကြောင့် ဖြစ်ပွားနိုင်ပါတယ်။ လူ၏အမြင် မှားယွင်းခြင်း၊ ဆုံးဖြတ်ချက်မှားယွင်းခြင်း၊ စက်ပစ္စည်းတို့၏ သဘော အရ အပူအအေးကြောင့် မှားယွင်း ညွှန်ပြတတ်ခြင်း၊ ရာသီဥတုအခြေအနေကလည်း မြူနှင်းများ ထူထပ်စွာကျရောက်သည့် ဆောင်းရာသီ ဖြစ်တဲ့အတွက် သဲကွဲစွာမမြင်ရတဲ့ အခြေအနေဖြစ်ခြင်းစတဲ့ အ‌ွခေအနေအချက်တွေကြောင့် ဖြစ်ပွားနိုင်ပါတယ်။

ကျွန်တော်တို့ စုံစမ်းရေးအဖွဲ့အနေနဲ့ အဲဒီအချင်းဖြစ်ပွားတဲ့ ၂၅-၁၂-၂၀၁၂ ရက်နေ့နှင့်        ၂၆-၁၂-၂၀၁၂ ရက်နေ့တွေမှာ လိုအပ်တဲ့ စုံစမ်းစစ်ဆေးမှုတွေပြုလုပ်ခဲ့ပြီးတော့ လေယာဉ်ရဲ့ ပျံသန်းမှု မှတ်တမ်းတင်ကိရိယာ Flight Data Recorder နှင့် လေယာဉ်မှူးနဲ့ လေကြောင်းညွှန်ကြားမှုဦးစီး ဌာန ဆက်သွယ်တဲ့ ကျွန်တော်တို့ အသံမှတ်တမ်းတင်ထားတဲ့ Cockpit Voice Recorder တို့ကို Download and Analysis ပြုလုပ်နိုင်ဖို့အတွက် စင်ကာပူနိုင်ငံမှာရှိတဲ့ Air Accident Investigation Bureau (AAIB)နဲ့ ညှိနှိုင်းခဲ့တဲ့အခါ မီးလောင်ပျက်စီးမှု အတိုင်းအတာများတဲ့အတွက် ကြောင့်မို့လို့ အဲဒီကနေအကြံပြုချက်အရ Facility ပိုမိုပြည့်စုံတဲ့ သြစတြေးလျနိုင်ငံမှာရှိတဲ့ Australia Transport Safety Bureau (ATSP) မှာဆောင်ရွက်ဖို့ဆိုပြီးတော့ ကျွန်တော်တို့  အဖွဲ့ဝင်ငါးဦးဟာ သြစတြေးလျနိုင်ငံ ကင်ဘာရာမြို့မှာရှိတဲ့ (ATSB) မှာ ၂၀၁၃ ခုနှစ်၊ ဇန်နဝါရီလ ၂၁ ရက်နေ့မှ ၂၅ ရက် နေ့အထိ သွားရောက်စစ်ဆေးပြီးတော့ ဖော်ထုတ်ခဲ့ပြီး ကနဦးအစီရင်ခံစာ ရရှိခဲ့ပါတယ်။

အဲဒါနဲ့ ပတ်သက်ပြီးတော့ ပြည်သူတွေပွင့်လင်းမြင်သာစွာ သိရှိနိုင်ရေးအတွက်လည်း သတင်းမီဒီယာများကို ဖိတ်ကြားပြီးတော့ ကနဦးအစီရင်ခံစာကိုအခြေပြုပြီး ယနေ့ ၂၀၁၃ ခုနှစ်၊ ဖေဖော်ဝါရီလ ၁ ရက်နေ့မှာပဲ ရန်ကုန်မြို့မှာရှိတဲ့ လေကြောင်းပို့ဆောင်ရေးညွှန်ကြားမှုဦးစီးဌာနမှ စုံစမ်းစစ်ဆေးရေးအဖွဲ့ ဥက္ကဋ္ဌ၊  လေကြောင်းပို့ဆောင်ရေးညွှန်ကြားမှုဦးစီးဌာန ဒုတိယညွှန်ကြား ရေးမှူးချုပ် ဦးဝင်းဆွေထွန်းမှ သတင်းစာရှင်းလင်းပွဲ ပြုလုပ်သွားမှာဖြစ်ကြောင်းလည်း တင်ပြ အပ်ပါတယ်။

ကျွန်တော်တို့ ပြည်သူ့လွှတ်တော်ကိုယ်စားလှယ်မေးမြန်းထားတဲ့ ပြည်တွင်း ပြည်ပခရီးသွားများ နားလည်ယုံကြည်မှုရရှိလာရေးအတွက် ကျွန်တော်တို့စုံစမ်းစစ်ဆေးရေးအဖွဲ့မှ အပြီးသတ်  အစီရင်ခံစာ (Final Report) ရရှိတဲ့အခါ ပြည့်ပြည့်စုံစုံလည်း ကျွန်တော်တို့ ထပ်မံပြီးတော့ သတင်းထုတ်ပြန် ကြေညာသွားမှာ ဖြစ်ပါတယ်။ နောင်အလားတူဖြစ်စဉ်မျိုး မဖြစ်ပွားစေရေးအတွက်ကိုလည်း လေယာဉ်မှူးများ၊ လေယာဉ်ထိန်းဌာနများကို ကျွန်တော်တို့  လိုအပ်တဲ့ညွှန်ကြားချက်တွေ ထုတ်ပြန် ထားပြီးသားဖြစ်ပါတယ်။ ဒါ့အပြင် ကျွန်တော်တို့ ဒီ  Final Report ရ  ပြီးတဲ့အခါမှာလည်း ဒီဖြစ်စဉ် မှတွေ့ရှိတဲ့ သင်ခန်းစာဖော်ထုတ်ချက်တွေ ပြုပြင်ဆောင်ရွက်ရန် ရှိတာတွေကို မြန်မာနိုင်ငံအတွင်း မှာရှိတဲ့ ပြည်တွင်းလေကြောင်းလိုင်းများမှ စီမံခန့်ခွဲသူများ၊ လေယာဉ်မှူး၊ လေယာဉ်သားများ၊ စက်မှုလက်မှု အင်ဂျင်နီယာများ၊ လေကြောင်းပို့ဆောင်ရေးညွန်ကြားမှုဦးစီးဌာန တာဝန်ရှိသူတွေကို ကျွန်တော်တို့ ဖိတ်ကြားပြီးတော့ ရှင်းလင်းဆွေးနွေးခြင်း၊ သင်တန်းတွေမှာ ထည့်သွင်းပြီးတော့ သင်ကြားသွားခြင်း ဒါတွေလည်း ဆောင်ရွက်သွားမှာ ဖြစ်ကြောင်းရှင်းလင်း ဖြေကြားပါသည်။