ရန်ကုန်တိုင်းဒေသကြီး၊ မှော်ဘီမြို့နယ်အတွင်းရှိ မြို့ချောင်းလမ်းဟာ ရန်ကုန်-ပြည်လမ်းက နေပြီးတော့ မြို့ချောင်းတံတားအထိ ၂.၅ မိုင် ရှည်လျားပါတယ်။ ၎င်းလမ်းဟာ တိုက်ကြီးမြို့နယ်၊ ထန်းတပင်မြို့နယ်များအထိ ဆက်သွယ်သွားလာနိုင်တဲ့လမ်းမကြီးတစ်ခုလည်းဖြစ်ပါတယ်။ ယခုအခါ အဲဒီလမ်းတွေဟာပျက်စီးနေပြီး၊ ၁ မိုင်မှာကတ္တရာလမ်းခင်းပြီးဖြစ်ပါတယ်။ ကျန် ၁.၅ မိုင်မှာ ခင်းရန် ကျန်ရှိနေပါတယ်။ ၎င်းလမ်းဟာ အခုအချိန်မှာ အလွန်ပျက်ယွင်းနေပါသဖြင့် မော်တော်ယာဉ် များသွားလာရန် အခက်အခဲနဲ့ကြုံတွေ့နေရပါတယ်။ သို့ဖြစ်ပါ၍ ကျန် ၁.၅ မိုင်ကိုကတ္တရာလမ်း အဖြစ်အဆင့်မြှင့်တင်ဆောင်ရွက်ပေးရန်အစီအစဉ် ရှိ၊မရှိ နဲ့ ဆောင်ရွက်ပေးရန်ရှိပါက မည်သည့် ကာလတွင်ဆောင်ရွက်ပေးမည်ဖြစ်ကြောင်းကို သိလိုကြောင်း မေးမြန်းပါသည်။
ရန်ကုန်တိုင်းဒေသကြီး၊ မှော်ဘီမြို့နယ်အတွင်းမှာရှိတဲ့ မြို့ချောင်းလမ်းဟာ သီးခြားလမ်းလေးဖြစ်ပါတယ်။ ရေတွင်းကုန်း-မြို့ချောင်း-တော်လတီ-ရွာသာယာ ၂၄ မိုင် ၇ ဖာလုံရှိတဲ့လမ်းရဲ့ လမ်းအစပိုင်း လည်းဖြစ်ပါတယ်။ ရန်ကုန်-ပြည်လမ်းပေါ်ရှိ မိုင်တိုင် ၃၅ မိုင် ၄ ဖာလုံ၊ ရေတွင်းကုန်းမှ မြို့ချောင်းအထိအရှည် ၂ မိုင် ၅ ဖာလုံသာရှိတဲ့ လမ်းအပိုင်းလေးဖြစ်ပါတယ်။
ပြည်သူ့လွှတ်တော်ဥက္ကဋ္ဌကြီးခင်ဗျား။ ၂၀၁၁ -၂၀၁၂ ဘဏ္ဍာရေးနှစ်ပွင့်လင်းရာသီတွင် ယင်း ၂ မိုင် ၅ ဖာလုံလမ်းပိုင်းအား ကတ္တရာလမ်းအဆင့်မြှင့်တင်ရန် စီစဉ်ပြီးဖြစ်ပါတယ်။ လိုအပ်သော ပစ္စည်းများလည်းစုဆောင်းပြီးဖြစ်ပါတယ်။ ယခုအခါမှာ ၂၀၁၁ ခုနှစ်၊ ဒီဇင်ဘာလကုန်မှာ ကတ္တရာလမ်း အဆင့်သို့ဆောင်ရွက်ရန် ရန်ကုန်တိုင်းဒေသကြီးရဲ့ သာမန်ပြင်ထိန်းရန်ပုံငွေတွင် လျာထားပါဝင်ပြီး ဖြစ်ပါတယ်။ ဒါကြောင့်မို့လို့ ၎င်းလမ်းအားပွင့်လင်းရာသီမှာ ကတ္တရာလမ်းအဆင့်ဆောင်ရွက်သွား မည်ဖြစ်ကြောင်းဖြေကြားပါသည်။