(ဃ)-ကြို့ပင်ကောက်မြို့နယ် ပြည်သူ့ဆေးရုံကြီးတွင် လူနာတင်ယာဉ်တစ်စီး ချမှတ်ပေးရန်နှင့် လယ်တီ ကျေးလက်ကျန်းမာရေးဌာနအား ၁၆ ခုတင်ဆံံ့တိုက်နယ်ဆေးရုံအဖြစ် အဆင့်တိုးမြှင့်ချမှတ်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

 ကျန်းမာရေးဝန်ကြီးဌာနအနေဖြင့် ဗဟိုအဆင့်ဆေးရုံကြီးတွေ၊ တိုင်းဒေသကြီး/ပြည်နယ်အဆင့် ဆေးရုံ ကြီးတွေကို လူနာတင်ယာဉ်များ ထောက်ပံ့ပေးလျက်ရှိပြီး ခရိုင်အဆင့်ဆေးရုံအချို့ကိုလည်း ဦးစားပေး အစီအစဉ်အလိုက် လူနာတင်ယာဉ်များကို ထောက်ပံ့ပေးနိုင်ခဲ့ပါတယ်။ အချို့မြို့နယ်များတွင်မူ ပုဂ္ဂလိကအလှူရှင်၊ စေတနာရှင်များမှလှူဒါန်းသော လူနာတင်ယာဉ်များကို အသုံးပြုလျက်ရှိပြီး တစ်ချိန်တည်းမှာပဲ မြို့နယ်အလိုက် မိမိတို့အလှူရှင်၊ စေတနာရှင်များမှ လှူဒါန်းလိုပါက ကျန်းမာရေး ဝန်ကြီးဌာနအနေဖြင့်လည်း တင်သွင်းခွင့်ရရှိရေးအတွက် ထောက်ခံပေးလျက်ရှိကြောင်း တင်ပြလို ပါတယ်။ သို့ဖြစ်ပါ၍ ကြို့ပင်ကောက်မြို့နယ် ပြည်သူ့ဆေးရုံအတွက် လူနာတင်ယာဉ်ထောက်ပံ့နိုင် ရန်မှာ ယခု လောလောဆယ် အစီအစဉ်မရှိသေးပါကြောင်း တင်ပြအပ်ပါတယ်။ 

ဆက်လက်ပြီး ဒုတိယအချက်အား ပြန်လည်ရှင်းလင်းတင်ပြလိုပါတယ်။ ပဲခူးတိုင်းဒေသကြီး၊ ကြို့ပင်ကောက်မြို့နယ်၊ လယ်တီကျေးရွာတွင် လူဦးရေ ၁၆၅၈၂ ဦး၊ အိမ်ခြေ ၄၀၈၇ အိမ်ရှိပြီး မြို့နယ် ဆေးရုံနှင့် ၉ မိုင် ၃ ဖာလုံ၊ ဘိုကုန်းကျေးလက်ကျန်းမာရေးဌာနနှင့် ၅ မိုင်ခန့်ကွာဝေးကြောင်း လေ့လာ တွေ့ရှိရပါတယ်။ ၂၀၁၄-၂၀၁၅ ဘဏ္ဍာနှစ်အတွင်း ပဲခူးတိုင်းဒေသကြီးအတွင်း၌ ၁၆ ခုတင်ဆံ့ ဆေးရုံ သုံးရုံဖြစ်တဲ့ ကျောက်တံခါး၊ အုတ်ဖိုနှင့် သနပ်ပင်မြို့နယ်များတွင် ဖွဲ့စည်းခွင့်ရရှိခဲ့ပြီး ဆောင်ရွက်လျက် ရှိကြောင်း တင်ပြလိုပါတယ်။ သို့ဖြစ်ပါ၍ မြို့နယ်ဆေးရုံနှင့် ၁၀ မိုင်အကွာမှာရှိနေတဲ့ ကျန်းမာရေး စောင့်ရှောက်မှုကို လွှမ်းခြုံနိုင်သဖြင့် ယခုလောလောဆယ်တွင် တင်ပြပါ လယ်တီကျေးရွာအား တိုက်နယ်ဆေးရုံအဖြစ် ဖွင့်လှစ်ရန် အစီအစဉ်မရှိသေးပါကြောင်း တင်ပြလိုပါတယ်။ တစ်ဖန် ကြို့ပင်ကောက်မြို့နယ်အတွင်း၌ ခုတင် ၅၀ ဆံ့ဆေးရုံတစ်ရုံ၊ အလယ်ကုန်းတိုက်နယ်ဆေးရုံမှာ တစ်ရုံ၊ ကျေးလက် ကျန်းမာရေးဌာနငါးခု၊ အလယ်ကုန်း၊ လှေကုန်း၊ ခုနှစ်ရွာ၊ အိုးဘိုကုန်းနှင့်လယ်တီတို့အား ဖွင့်လှစ်ထားရှိပြီးဖြစ်ရာ လုပ်ငန်းလိုအပ်ချက်အရ လိုအပ်လို့ရှိရင် ဆက်လက်ပြီးစီစဉ်ဆောင်ရွက်သွား မြည်ဖစ်ပါကြောင်း ပြန်လည်ဖြေကြားပါသည်။