(ခ)-နိုင်ငံတော်၏ စားနပ်ရိက္ခာ စီမံခန့်ခွဲမှုကို မည်သို့ စီမံဆောင်ရွက်ထားရှိသည်နှင့် စပ်လျဉ်းသည့် မေးခွန်း

နိုင်ငံတော်အနေဖြင့် လယ်ယာစိုက်ပျိုးရေးကဏ္ဍ အရှိန် အဟုန်မြှင့်တင်လျက် ဆန်စပါးထွက်ရှိမှု တိုးတက်မြင့်မားရေးဆောင်ရွက်လျက် တိုင်းပြည်စီးပွားရေး ဖွံ့ဖြိုးတိုးတက်ရန် ပို့ကုန်မြှင့်တင်ရေး Export Promotion Policy အရ ဆန်ကို ပြည်ပသို့ တန်ချိန် သန်းနှင့်ချီ၍ တင်ပို့ရန် ကြိုးပမ်းဆောင်ရွက်လျက်ရှိကြောင်း သိရှိရပါတယ်။ ထိုသို့ဝင်ငွေတိုးတက် မြင့်မားရေး ကြိုးပမ်းဆောင်ရွက်လျက်ရှိတဲ့နည်းတူ တစ်ဖက်မှလည်း နိုင်ငံတော်အတွင်း စားနပ်ရိက္ခာ ဖူလုံစေရေးအတွက် နိုင်ငံတော်၏ စားနပ်ရိက္ခာစီမံခန့်ခွဲမှု (Food Management) ကို မဟာဗျူဟာ မြောက် မည်သို့စီမံ ဆောင်ရွက်ထားသည်ကို သိရှိလိုပါသဖြင့် ဖြေကြားပေးပါရန် မေးခွန်းနှင့် ပတ်သက်၍ လယ်ယာစိုက်ပျိုးရေးနှင့်ဆည်မြောင်းဝန်ကြီးဌာန ဝန်ကြီးကိုယ်စား ကျွန်တော် ဒုတိယ ဝန်ကြီးမှ ရှင်းလင်းတင်ပြသွားမှာ ဖြစ်ပါတယ်။ အခုလို မေးမြန်းပေးတဲ့ ဦးတင်မောင်ဦးကိုလည်း အထူးကျေးဇူးတင်ရှိပါတယ်။ စိုက်ပျိုးရေးကဏ္ဍ ဖွံ့ဖြိုးတိုးတက်စေရေးအတွက် အရည်အသွေးကောင်း၊ အထွက်နှုန်းကောင်း၊ ဈေးကွက်ဝင်သည့် သီးနှံမျိုးများ တိုးချဲ့စိုက်ပျိုးနိုင်ရေးကို ဆောင်ရွက်ပေးလျက် ရှိပါတယ်။ ဆန်စပါးကဏ္ဍတွင် အထွက်နှုန်းပိုမိုကောင်းမွန်သည့် အထူးအထွက်တိုးစပါးမျိုးများကို တောင်သူလယ်သမားများ မျိုးစေ့အလွယ်တကူရရှိစိုက်ပျိုးနိုင်ရေးအတွက် မျိုးစေ့ထုတ်လုပ်ငန်းများကို ပုဂ္ဂလိကကဏ္ဍမှ ပူးပေါင်းပါဝင်ဆောင်ရွက်၍ စနစ်တကျ ဖွံ့ဖြိုးလာစေရန် ဆောင်ရွက်ပေးလျက်ရှိပါ တယ်။ ထို့အတူ တောင်သူလယ်သမားများ မျိုးချန်၍ မျိုးထားစိုက်ပျိုးနိုင်တဲ့ အခြားအထွက်ကောင်းမျိုး စပါးဖြစ်တဲ့ ပေါ်ဆန်း၊ ရွှေသွယ်ရင်၊ ကျော်ဇေယျ၊ ဆင်းသွယ်လှ၊ ဧရာမင်းစတဲ့စပါးမျိုးများကိုလည်း မျိုးသန့်အဖြစ်နဲ့ စိုက်ပျိုးထုတ်လုပ်နိုင်ရေးအတွက် မိဘမျိုးစေ့၊ ဆင့်ပွားမျိုးစေ့၊ မျိုးသန့်မျိုးပွားစေ့၊ စီးပွားဖြစ်မျိုးသန့်မျိုးပွားမျိုးစေ့များကို ထုတ်လုပ်မှုလုပ်ငန်းများကိုလည်း စနစ်တကျ စီမံ ဆောင်ရွက် ပေးလျက်ရှိပါတယ်။ အရည်အသွေးကောင်း၊ အထွက်နှုန်းကောင်း စပါးမျိုးများ ကျယ်ကျယ်ပြန့်ပြန့် စိုက်ပျိုးလာစေရန်အတွက် ခေတ်မီသိပံ်ပနည်းကျ စိုက်ပျိုးနည်းစနစ်များ GAP စနစ်ကျင့်သုံး၍ စံပြကွက်များစိုက်ပျိုးကာ တိုင်းဒေသကြီး/ပြည်နယ်များမှ ဝန်ကြီးချုပ်များ၊ စိုက်ပျိုးမွေးမြူရေး ဝန်ကြီးများ၊ လွှတ်တော်ကိုယ်စားလှယ်ကြီးများနှင့် တောင်သူလယ်သမားများကို ဖိတ်ခေါ်ပြသခြင်း၊ နည်းပညာပြန့်ပွားရေးဆောင်ရွက်ပေးခြင်း၊ တောင်သူလယ်သမားများသို့ အနီးကပ်ကူညီပေးခြင်း တို့ကို ဆောင်ရွက်ပေးလျက်ရှိပါတယ်။ စိုက်ပျိုးရေးပညာရှင် ဝန်ထမ်းများရဲ့ အရည်အသွေး တိုးတက် မြင်‌့မားစေရေးနှင့် လက်တွေ့ကျကျ ဆောင်ရွက်နိုင်ရေးတို့ကိုလည်း စဉ်ဆက်မပြတ် ဆောင်ရွက်ပေး လျက်ရှိပါတယ်။ နိုင်ငံတော်အတွင်း မှီတင်းနေထိုင်ကြတဲ့ ပြည်သူများရဲ့ တစ်နေ့တာစားသုံးမှုအပေါ် အခြေခံပြီး ဆန်စပါးစိုက်ပျိုးထုတ်လုပ်မှု၊ ပြည်ပတင်ပို့မှုများကို လယ်ယာစိုက်ပျိုးရေးနှင့် ဆည်မြောင်း ဝန်ကြီးဌာနနှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနတို့မှ ပူးပေါင်းဆောင်ရွက်လျက် ရှိပါတယ်။ ပြည်တွင်းတွင် ဆန်ဈေးနှုန်းကျဆင်းပါက တောင်သူများအခက်အခဲနှင့်ရင်ဆိုင်ရမှာ ဖြစ်ပါ တယ်။ တောင်သူများအတွက် အထောက်အကူရရှိစေရန် ဆန်စပါးကို အရန်ရိက္ခာဆန်အဖြစ် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ စီမံဆောင်ရွက်ပေးလျက်ရှိပါတယ်။ လယ်ယာ စိုက်ပျိုးရေးနှင့်ဆည်မြောင်းဝန်ကြီးဌာနအနေနဲ့ ကြိတ်ခွဲရာမှာ ဆန်ပိုမို ထွက်ရှိနိုင်ရေးအတွက် ခေတ်မီ ဆန်စက်များ ထူထောင်ရေးကို ပုဂ္ဂလိကကဏ္ဍနဲ့ပူးပေါင်းဆောင်ရွက်လျက် ရှိပါတယ်။ ဆန်ပြည်ပ တင်ပို့မှုကို တန်ချိန် ၂ သန်းမှ ၃ သန်းထိ တိုးတက်တင်ပို့သွားနိုင်ရန် ပြုပြင်ပြောင်းလဲမှုများ Reform Strategy များဖြင့် ဆောင်ရွက်သွားလျက်ရှိပါတယ်။ ပဉ္စမကာလတို ၅ နှစ်စီမံကိန်းကာလရဲ့ ဒုတိယနှစ် ဖြစ်တဲ့ ယခု ၂၀၁၂-၂၀၁၃ ခုနှစ်မှာ စပါးကို ဧက ၁၉.၃၁ သန်း စိုက်ပျိုးသွားရန် ရည်မှန်းထားပြီး ၂၀၁၅-၂၀၁၆ ခုနှစ်မှာ ဧက ၁၉.၄၆ သန်း တိုးတက်စိုက်ပျိုးသွားရန် ရည်မှန်းထားပါတယ်။ စပါးထွက် ရှိမှုမှာလည်း ၂၀၁၂-၂၀၁၃ ခုနှစ်မှာ တင်းသန်းပေါင်း ၁၅၆၅ ကျော်ထွက်ရှိရန် ရည်မှန်းထားပြီး ၂၀၁၅-၂၀၁၆ ခုနှစ်မှာ တင်းသန်းပေါင်း ၁၆၁၃ ကျော်ထွက်ရှိရန် ရည်မှန်းထားပြီး စီးပွားရေးစီမံကိန်း ကိုလည်း အတည်ပြုပြဋ္ဌာန်းပြီးဖြစ်ပါတယ်။ နိုင်ငံတော်၏ ဆန်စပါးမူဝါဒမှာ မြန်မာနိုင်ငံတွင် နောင်ဖြစ်ပေါ်လာမည့် လူဦးရေသန်း ၁၀၀ ကို စားနပ်ရိက္ခာဖူလုံပြီးသည့်အပြင် ပိုလျှံသည်များကို ပြည်ပသို့ တင်ပို့ရောင်းချနိုင်ရန် ဆန်စပါးစိုက်ပျိုးထုတ်လုပ်မှု တိုးတက်စေရေး ကြိုးပမ်းဆောင်ရွက် နိုင်ရန် ဆန်စပါးမူဝါဒချမှတ်ထားပါတယ်။ ဤမူဝါဒနှင့်အညီ ဆန်စပါးအထွက်တိုးရေးကို အလေးထား ဆောင်ရွက်လျက်ရှိပြီး ဆန်စပါးကဏ္ဍဖွံ့ဖြိုးတိုးတက်စေရေးအတွက် ဝန်ကြီးဌာနများ၊ ဆန်စပါးနှင့် သက်ဆိုင်သည့် အသင်းအဖွဲ့များ၊ ဆန်စပါးအထူးပြုကုမ္ပဏီများ၊ ပြည်တွင်းပြည်ပသို့ တင်ပို့ရောင်းချ လျက်ရှိတဲ့ ကုမ္ပဏီလုပ်ငန်းရှင်များနှင့် Public, Private, Partnership (PPP) ပုံစံဖြင့် ဝိုင်းဝန်း ပူးပေါင်း ဆောင်ရွက်လျက်ရှိကြပါတယ်။ ဆန်စပါးဟာ ဈေးကွက်ဝယ်လိုအား ကောင်းမွန်ပြီး အလား အလာကောင်းတဲ့ ပို့ကုန်အမယ်ဖြစ်တဲ့အတွက် ပြည်ပပို့ကုန်ဝင်ငွေတိုးတက်ရရှိနိုင်ဖို့ ပို့ကုန်မြှင့်တင် ရေး Export Promotion Policy အရ ဆန်ကို ပြည်ပသို့ တင်ပို့နိုင်ရန် ကြိုးပမ်းလျက်ရှိသည့် နည်းတူ အခြားတစ်ဖက်မှာလည်း နိုင်ငံတော်အတွင်း စားနပ်ရိက္ခာဖူလုံစေဖို့အတွက် ကုန်သွယ်မှု မူဝါဒနှင့်အညီ ပြည်တွင်းစားသုံးမှုပိုလျှံမှသာ ပြည်ပပို့ကုန်များကို လုပ်ထုံးလုပ်နည်းနှင့်အညီ တင်ပို့ ခွင့်ပြုပေးလျက် ရှိပါတယ်။ နိုင်ငံတော်တွင် တောင်သူလယ်သမားများ ဆန်စပါးမှ ဝင်ငွေပိုမိုတိုးတက် ရရှိစေရန် ပြည်တွင်းပြည်ပဈေးကွက်များ ရှာဖွေပြီး အရည်အသွေးကောင်းဆန်များ ရောင်းချနိုင်ရန် လိုအပ်မည် ဖြစ်ပါတယ်။ ယင်းသို့ ဆောင်ရွက်နိုင်ရန်အတွက် ခေတ်မီဆန်စက်ကြီးများ၏ အခန်းကဏ္ဍမှ အရေးပါ ကြောင်း တွေ့ရှိရပါတယ်။ ယခင်က စပါးကြိတ်ခွဲရာမှာ Stone Roller များကို သုံးစွဲခဲ့သဖြင့် ဆန်ထွက် ရာခိုင်နှုန်း ၄၀ ရာခိုင်နှုန်းအောက်သာရရှိပြီး ယခု Rubber Roller များဖြင့် ကြိတ်ခွဲခြင်း၊ Colour Sorter များဖြင့် ခွဲခြားခြင်းတို့ကို ဆောင်ရွက်ခြင်းဖြင့် ဆန်အကျိုးအကြေနည်းခြင်း၊ အထွက်နှုန်း ပိုမိုခြင်းတို့ကြောင့် ဆန်အထွက်ရာခိုင်နှုန်း ၆၀ နှင့်အထက် တိုးတက်ထွက်ရှိလာမည် ဖြစ်ကြောင်းနှင့် အပြည်ပြည်ဆိုင်ရာ ဈေးကွက်မှာလည်း အရည်အသွေးကောင်းတဲ့ ဆန်များကို တင်ပို့နိုင်မည်ဖြစ် ကြောင်း သိရှိရပါတယ်။ ယင်းအချက်များအရ ခေတ်မီဆန်စက်များ ပြောင်းလဲခြင်းအားဖြင့် ဆန်အရည် အသွေးနှင့် ဆန်ထုတ်လုပ်မှုကို တိုးတက်ဖြစ်ထွန်းစေမည်ဖြစ်ပြီး နိုင်ငံတော်၏ စားနပ်ရိက္ခာ ဖူလုံမှုအား ကြီးမားသော အထောက်အပံ့ဖြစ်ပေါ်စေမည် ဖြစ်သည့်အတွက် ပုဂ္ဂလိကကဏ္ဍမှ နိုးကြားစွာပါဝင် နိုင်ရေး စည်းရုံးအကောင်အထည်ဖော်ဆောင်ရွက်လျက်ရှိပါကြောင်းနှင့် ယင်းအချက်များအပေါ် အခြေခံပြီး လယ်ယာစိုက်ပျိုးရေးနှင့်ဆည်မြောင်းဝန်ကြီးဌာနအနေနဲ့ မဟာဗျူဟာမြောက် ဆောင်ရွက် လျက် ရှိကြောင်းတင်ပြအပ်ပါတယ်။ ဒါ့အပြင် ပြည်ထောင်စုအစိုးရ မြန်မာနိုင်ငံဆန်စပါးအသင်းနှင့် ဗဟို သမဝါယမအသင်းတို့မှ ပြည်တွင်းဈေးကွက်မှာ ဆန်ပြတ်လပ်မှု မဖြစ်ပေါ်စေဘဲ ဖူလုံမှုရရှိစေရေး အတွက် နိုင်ငံတော်အရန်ဆန်အနေနဲ့ မိုးစပါး၊ နွေစပါးများကို တောင်သူလယ်သမားများထံမှ တိုက်ရိုက်ဝယ်ယူကာ စီစဉ်ဆောင်ရွက်ပေးလျက်ရှိပါတယ်။ ထို့နောက် ဆန်စပါးကို ပြည်တွင်းစားသုံးမှု ဖူလုံစေရေးနှင့် ပြည်ပတင်ပို့နိုင်ရေးအတွက်ပါ စိုက်ပျိုးထုတ်လုပ်သူ တောင်သူလယ်သမားများ စိုက် ပျိုးထုတ်လုပ်မှုအဆင်ပြေစေရေးအတွက် ဆန်အထူးပြုကုမ္ပဏီများ ဖွဲ့စည်းပြီး သွင်းအားစုများဖြစ်တဲ့ ဓာတ်မြေသြဇာပိုးသတ်ဆေးတို့ကို တောင်သူလယ်သမားများအတွက် ထောက်ပံ့ပေးခြင်း၊ အတိုးနှုန်း သက်သာစွာဖြင့် စိုက်ပျိုးစရိတ်များ ထုတ်ချေးခြင်း၊ အရည်အသွေးမြင့်မားပြီး အထွက်နှုန်းကောင်းတဲ့ မျိုးစပါးတွေကို ထုတ်လုပ်နိုင်ဖို့အတွက် ဆန်အထူးပြုကုမ္ပဏီများနှင့် အကျိုးဆောင်တောင်သူများ ပူးပေါင်း၍ စမ်းသပ်စိုက်ပျိုးထုတ်လုပ်တာတွေကိုလည်း ဆောင်ရွက်ပေးလျက်ရှိပါကြောင်း ဖြေကြား အပ်ပါတယ်။ နေပြည်တော်ကောင်စီနယ်မြေအတွင်းမှာလည်း တစ်ကွင်းတစ်စပ်တည်း စိုက်ပျိုးထားတဲ့ အထူးအထွက်တိုး စပါးသီးနှံများ စိုက်ပျိုးထုတ်လုပ်ဆောင်ရွက်ရာမှာ ဆန်စပါးအထူးပြုကုမ္ပဏီများက ဈေးကွက်ခိုင်မာမှုနှင့် ဈေးကွက်အလားအလာအရ တင်း ၁၀၀ လျှင် အာမခံဈေး ကျပ် ၄၀၀၀၀၀ သိန်းဖြင့် ဝယ်ယူရန်နှင့် အထွက်တိုးစပါးစိုက်ပျိုးသည့် တောင်သူများသို့ တင်း ၁၀၀ လျှင် ငွေကျပ် ၂၀၀၀၀၀ နှုန်းဖြင့် ကြိုတင်ငွေများ ထုတ်ချေးလျက်ရှိကြောင်း တင်ပြအပ်ပါတယ်။ နိုင်ငံတော် အစိုးရ ဘက်မှလည်း တောင်သူများအတွက် တတ်နိုင်တဲ့ဘက်က ပံ့ပိုးကူညီပေးလျက်ရှိပါတယ်။ နိုင်ငံတော် ဘဏ္ဍာငွေမှ ၂၀၁၁ ခုနှစ် မိုးချေးငွေများကို တောင်သူလယ်သမားဦးရေ ၁.၄၂ သန်းအား ချေးငွေ ကျပ်သန်း ၁၇၇၉၃၈.၄၀ ထုတ်ချေးခဲ့ပြီး ဖြစ်ပါတယ်။ တောင်သူလယ်သမားများ၏ စပါးစိုက်ပျိုးစရိတ် အား ယခင်က တစ်ဧက ကျပ် ၂၀၀၀၀ ဖြင့် ချေးပေးခဲ့ရာမှ တောင်သူလယ်သမားများ စိုက်ပျိုးစရိတ် အရင်းအနှီးပိုမိုရရှိစေရန် နိုင်ငံတော်အနေနဲ့ နှစ်ဆတိုးမြှင့်ပြီး ယခု ၂၀၁၂-၂၀၁၃ ခုနှစ်မှာ လယ်သမား စပါးတစ်ဧကလျှင် ကျပ် ၅၀၀၀၀ ထုတ်ချေးနိုင်ရန် စီစဉ်ဆောင်ရွက်ပြီး ထုတ်ချေးလျက်ရှိကြောင်း တင်ပြအပ်ပါတယ်။ ဒီလိုဆောင်ရွက်နိုင်ခြင်းအားဖြင့် နိုင်ငံရဲ့ပြည်တွင်းအသားတင်ထုတ်လုပ်မှု တန်ဖိုး ကို ပဉ္စမကာလတို ငါးနှစ်စီမံကိန်းမှာ ရည်မှန်းထားတဲ့ တိုးတက်မှုနှုန်းထက်သုံးဆမျှ တိုးတက်အောင် ဆောင်ရွက်နိုင်မယ်လို့ ရည်မှန်းထားပါတယ်။ ယင်းတိုးတက်ခြင်းမှ ပြည်သူတစ်ဦးချင်းရဲ့ ဝင်ငွေကိုပါ နှစ်ဆသုံးဆအထိ တိုးတက်လာစေနိုင်မှာ ဖြစ်ပါတယ်။ နိုင်ငံတော်အစိုးရအနေနဲ့ နိုင်ငံရဲ့အဓိက စီးပွားရေးကဏ္ဍကြီးဖြစ်တဲ့ လယ်ယာကဏ္ဍဖွံ့ဖြိုးတိုးတက်ရေးကို အချိန်တိုအတွင်း ဖြစ်တည်လာစေဖို့ နည်းလမ်းသစ်များ၊ နည်းပညာအသစ်များ ရှာဖွေဆောင်ပေးလျက်ရှိပါကြောင်း ရှင်းလင်းဖြေကြားပါသည်။