(က)စာရေးဆရာ ဦးသောင်းထွန်း ပြုစုသောပြစ်မှုဆိုင်ရာ ဥပဒေစာမူ နှင့် စပ်လျဉ်းသည့်မေးခွန်း

ပြန်ကြားရေးဝန်ကြီးဌာနရဲ့ မှတ်ပုံတင်ခွင့် ၁၀၂ ကြိမ်မြောက် အစည်းအဝေးမှာ ပုံနှိပ်သူများ၊ ထုတ်ဝေသူများ လိုက်နာရန် စာပေစိစစ်ရာတွင်ကျင့်သုံးတဲ့ စာပေစိစစ်ရေးမူများကို စည်းကမ်းသတ်မှတ် ပေးထားတာရှိပါတယ်။ အဲဒီ စည်းကမ်း သတ်မှတ်ချက် တွေကတော့-

(၁)     နိုင်ငံတော်၏ လွတ်လပ်ရေး၊ အချုပ်အခြာအာဏာတည်တံ့ခိုင်မြဲရေးနှင့် တရားဥပဒေ စိုးမိုးရေးကို ထိပါးသော ဆန့်ကျင်တိုက်ခိုက်သည့် စာပေများကို လုံးဝထုတ်ဝေခြင်း မပြုရန်။

(၂)     ပြည်ထောင်စုတည်တံ့ခိုင်မြဲရေးနှင့် တိုင်းရင်းသားအားလုံး ဥမကွဲ၊ သိုက်မပျက် အေးအတူ ပူအမျှ စည်းလုံးညီညွတ်စွာ အတူယှဉ်တွဲ နေထိုင်ရေးကို ထိပါးဆန့်ကျင် တိုက်ခိုက်သော ရေးသားခြင်းကို မပြုရန်။

(၃)     ဥပဒေပါ ပြဋ္ဌာန်းချက်များကို မဆန့်ကျင်လျှင် လွတ်လပ်စွာ စာပေပြုစုခွင့်ထုတ်ဝေခွင့် ရှိပါသည်။ သို့ရာတွင် ယင်းစာပေ လွတ်လပ်ခွင့်များကို အများပြည်သူတို့အတွက် မှန်ကန်စွာအသုံးပြုရန် ။

(၄)     လူပိုင်းဆိုင်ရာ ချို့ယွင်းချက်များ လုပ်နည်းလုပ်ဟန်များ၊ ချို့ယွင်းချက်များ ရေးသား ဝေဖန်သည့် စာပေများ ထုတ်ဝေခွင့်ရှိပါသည်။ သို့ရာတွင် အပြုသဘော ဖြစ်စေရမည်။ လက်တွေ့လုပ်ရပ်နှင့်ပတ်သက်၍ ပွင့်လင်းသောအမြင်၊ ပွင့်လင်းသော ဝေဖန်ချက်နှင့် ပွင်‌့လင်းသော ဆန္ဒမျိုး ပေါ်ထွန်းသည့်စာပေများ ထုတ်ဝေကြရာတွင်လည်း အပြု သဘောဖြစ်စေရန် ၊ အပျက်သဘောလုံးဝမပါစေရန်။

(၅)     နိုင်ငံတော်တည်ဆောက်ရာတွင် အများပြည်သူ နိုးကြားတက်ကြွစွာ ပါဝင်လာအောင် နှိုးဆော်ပညာပေးသည့် စာပေများကို ထုတ်ဝေရန်။

(၆)     ပြည်ထောင်စုမြန်မာနိုင်ငံ တိုင်းရင်းသားအပေါင်းတို့၏ ယဉ်ကျေးမှုဖွံ့ဖြိုးတိုးတက်ရေး ကို ရှေးရှု ရေးသားထားသော စာပေများကို အမျိုးသားဟန်စာပေများ ထုတ်ဝေရန်။

(၇)     ဘာသာတစ်ခုမှအခြားဘာသာတစ်ခုသို့ ပုတ်ခတ်ရေးသားသော စာပေများ ဘာသာတူ အချင်းချင်း အယူအဆကွဲပြားစေသော စာမူများကို ထုတ်ဝေခွင့်မပြုရန်။

(၈)     တစ်နိုင်ငံနှင့်တစ်နိုင်ငံ ပုတ်ခတ်သော စာပေများကို ထုတ်ဝေခြင်းမပြုရန် စသည့် အချက်များ၊ အကျုံးမဝင်သော စာပေများကိုထုတ်ဝေခွင့် မရှိဖို့ စည်းကမ်းသတ်မှတ် ထားပါတယ်။

လေးစားအပ်တဲ့ ပြည်သူ့လွှတ်တော်ဥက္ကဋ္ဌကြီးခင်ဗျား။ ယခုအခါမှာ ပြစ်မှုဆိုင်ရာဥပဒေ၊ သက်သေခံဥပဒေ၊ ပြစ်မှုဆိုင်ရာ ကျင့်ထုံးဥပဒေစတဲ့ ဥပဒေတွေကို စာရေးဆရာကြီးများဖြစ်ကြတဲ့ အငြိမ်းစားတရားသူကြီးများ၊ ဗဟိုတရားရုံးရှေ့နေများနဲ့ အခြားဥပဒေပညာရှင်တွေက ရေးသား ထုတ်ဝေလျက်ရှိကြပါတယ်။ ဥပဒေပညာရှင်များဟာ အများပြည်သူတို့နဲ့ ဥပဒေပညာသင်ကျောင်းသား များ၊ ရှေ့နေရှေ့ရပ်များအဖြစ် အသက်မွေးမယ့်သူများ၊ ပြည်သူ့ဝန်ထမ်းများအတွက် အုပ်ချုပ်ရေး၊ တရားရေး၊ ဥပဒေရေးရာ၊ ပြည်သူ့ရေးရာစတဲ့ အသိပညာတိုးပွား၊ ဗဟုသုတရစေတဲ့ အတွေးအခေါ် ကောင်းများ၊ မိမိတို့တွေ့ကြုံရတဲ့ အသိပညာများကို ရှုထောင့်အမျိုးမျိုးက ရေးသားထုတ်ဝေလျက် လည်း ရှိကြပါတယ်။

ယခုအခါ ၂၀၀၈ခုနှစ် ဖွဲ့စည်းပုံ အခြေခံဥပဒေ ပုဒ်မ ၃၅၄(က)မှာ နိုင်ငံသားတိုင်းသည် နိုင်ငံတော်လုံခြုံရေး၊ တရားဥပဒေစိုးမိုးရေး၊ ရပ်ရွာအေးချမ်း သာယာရေး သို့မဟုတ် ပြည်သူတို့၏ ကိုယ်ကျင့်တရားအကျိုးငှာ ပြဋ္ဌာန်းသည်‌့် ဥပဒေများနှင့် မဆန့်ကျင်လျှင် မိမိယုံကြည်ချက်၊ ထင်မြင်ချက်၊ ယူဆချက်များကို လွတ်လပ်စွာ ထုတ်ဖော်ပြောဆို ရေးသားဖြန့်ဝေခွင့် အခွင့်အရေးများ ပြဋ္ဌာန်းပြီးဖြစ်ပါတယ်။ ဒါကြောင့် ကျွန်တော် မေးလိုတဲ့ မေးခွန်း ကတော့ စာရေးဆရာ ဦးသောင်းထွန်း၊ အငြိမ်းစား ညွှန်ကြားရေးမှူး ဆရာ ဦးသောင်းထွန်း(ရှေ့နေ) ပြုစုတဲ့ ပြစ်မှုဆိုင်ရာဥပဒေစာမူကို စတားပုံနှိပ်တိုက်၊ ကျောက်တံတားမြို့၊ ရန်ကုန်မှ ထုတ်ဝေခွင့် ရရန် ၂၀၁၀ခုနှစ်က စာပေစိစစ်ရေးကို တင်ပြ ထားခဲ့ပါတယ်။ သို့သော်ဒီစာမူမှာ မည်သည့်အချက်မှ စည်းကမ်းနှင့်မညီသည်ကို မတွေ့ရ သော်လည်း ယခုတိုင် ထုတ်ဝေခွင့် မပေးခြင်းမှာ မည်သည့် အတွက် ဖြစ်ပါသနည်း။ ထိုစာမူကို ထုတ်ဝေခွင့် ချပေးရန် အစီအစဉ်ရှိပါသလားဆိုသည်ကို မေးမြန်းပါသည်။