ထီးချိုင့်မြို့နယ်၊ မြတောင်ကျေးရွာ အခြေခံပညာအထက်တန်းကျောင်းတွင် မူလတန်း၊ အလယ်တန်း၊ အထက်တန်းကျောင်းသား စုစုပေါင်း ၁၈၁၇ ဦးရှိသည့်အတွက် လက်ရှိစာသင်ခန်းနှင့် ကျောင်းသား ညီမျှမှုမရှိကြောင်း၊ အဆိုပါ စာသင်ခန်းလို၏ အပ်ချက်များဖြည့်ဆည်းနိုင်ရန် ၂၀၁၃-၁၄ ပညာသင်နှစ်တွင် တိုးချဲ့ကျောင်းဆောင်သစ် ပေ ၁၂၀ ထ ၃၀၊ နံကပ်သွပ်မိုး နှစ်ထပ်အဆောက်အဦ ရန်ပုံငွေ ချထားပေးနိုင်ရန်အတွက် သက်ဆိုင်ရာဌာနမှ အမှုတွဲများအဖြစ် တင်ပြလျှောက်ထားခဲ့သော်လည်း ယခုအချိန်ထိ ခွင့်ပြုငွေမရရှိသေးကြောင်း၊ သို့ဖြစ်ပါ၍ ထီးချိုင့်မြို့နယ်၊ မြတောင်ကျေးရွာ အခြေခံပညာ အထက်တန်းကျောင်းကို တိုးချဲ့ကျောင်းဆောင်သစ် အမှန်လိုအပ်နေသည့်အတွက် ပညာရေးဝန်ကြီးဌာန၏ သတ်မှတ်ချက်နှင့် အညီ ပေ ၁၂၀ × ၃၀ RC နှစ်ထပ်ကျောင်းဆောင်သစ်အား ခွင့်ပြုရန်ပုံငွေချထားပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။
စစ်ကိုင်းတိုင်း၊ ထီးချိုင့်မြို့နယ်တွင် ၂၀၁၅-၁၆ ဘဏ္ဍာရေး ငွေလုံးငွေရင်းတည်ဆောက်ရေးခေါင်းစဉ်အောက်မှ အန္တရာယ်ရှိကျောင်း (၅)ကျောင်း၊ ဥပဓိရုပ်မကောင်းသောကျောင်း (၅)ကျောင်း၊ သိပ္ပံတစ်ကျောင်း၊ မူကြို (၇)ကျောင်း၊ လွှတ်တော်ကိုယ်စားလှယ်မှတင်ပြသောကျောင်း (၁)ကျောင်း စုစုပေါင်း အခြေခံပညာကျောင်း ၁၉ ကျောင်းအတွက် ငွေကျပ် ၆၁၅.၆ သန်း လျာထားတင်ပြဆောင်ရွက်ပြီးဖြစ်ပါသည်။ သို့ဖြစ်ပါ၍ ၂၀၁၅-၁၆ ပညာသင်နှစ်အတွက် လိုအပ်လျက်ရှိသော ထီးချိုင့်မြို့နယ်၊ မြတောင်ကျေးရွာ အခြေခံပညာအထက်တန်း ကျောင်းတွင် မူကြိုကျောင်းဆောင် ၆၀ ပေ × ၃၀ ပေ၊ သွပ်မိုးအုတ်ညှပ် တစ်ထပ်ဆောင်ဆောက်လုပ်ရန် ငွေကျပ် ၂၁.၆၀ သန်းကို ဘဏ္ဍာရေးစည်းမျဉ်းစည်းကမ်းများ၊ လုပ်ထုံးလုပ်နည်းများနှင့်အညီ ၂၀၁၅-၁၆ ဘဏ္ဍာရေးနှစ် ငွေလုံးငွေရင်း တည်ဆောက်ရေး ရန်ပုံငွေခေါင်းစဉ်အောက်မှ လျာထားတင်ပြပြီး ဖြစ်ပါသဖြင့် အဆိုပါကျောင်းတွင် တိုးချဲ့ကျောင်းဆောင်သစ် ဆောက်လုပ်ပေးရန်အစီအစဉ်မရှိပါကြောင်း ရှင်းလင်းဖြေကြားပါသည်။