(ခ)-ပေါက်မြို့နယ်အတွင်းရှိ 11 KV ဓာတ်အား လိုင်းနှင့် (၂)မိုင်ခန့်အကွာရှိသောကျေးရွာပေါင်း (၄၀)ခန့် တို့ကို၂၀၁၅-၁၆ဘဏ္ဍာရေးနှစ်အတွင်း လျှပ်စစ်မီးလင်းပေးနိုင်ရေး ဆောင်ရွက်ပေးရန်နှင့် စပ်လျဉ်းသည့်မေးခွန်း

ယခုအချိန်တွင် နိုင်ငံတော်မှ ၂၀၁၄-၁၅ ဘဏ္ဍာနှစ်မှ စတင်ပြီး ပေါက်မြို့နယ်အတွင်းရှိ ချောင်းဦး ဓာတ်အားခွဲ စက်ရုံကြီးမှ ပေါက်မြို့သို့ လျှပ်စစ်ဓာတ်အားပေးနိုင်ရန် ဆောင်ရွက်ပေးမှုများကြောင့် မကြာခင်ကာလအတွင်း ပေါက်မြို့ကို လျှပ်စစ်မီး စတင်ပေးနိုင်မည်ဖြစ်ပါကြောင်း၊ ပေါက်မြို့အား လျှပ်စစ်မီးပေးပြီးနောက် ယခင်က ပေါက်မြို့နှင့် ကံမကျေးရွာအထိ ချိတ်ဆက်ထားသော 11 KV ဓာတ်အားလိုင်း အောက်ရှိကျေးရွာများနှင်‌့ ယခုချိတ်ဆက်မည့် ချောင်းဦးကျေးရွာဓာတ်အားခွဲစက်ရုံမှ ပေါက်မြို့သို့ချိတ်ဆက်မည့် 11 KV ဓာတ်အားလိုင်း ၏ ၂ မိုင်ခန့်အကွာတွင် ကျေးရွာပေါင်း ရွာ ၄၀ ခန့်ရှိပါကြောင်း၊ အဆိုပါကျေးရွာများမှ နိုင်ငံတော်၏ပံ့ပိုးမှုနှင့် ၎င်းတို့၏ကြိုးစားမှုတို့ကို ပေါင်းစပ်ကာ ၂၀၁၅-၁၆ ဘဏ္ဍာနှစ်ထဲတွင် လျှပ်စစ်မီးရရှိနိုင်မည်ဟု  ယုံကြည် နေသည့်အတွက် ကျေးရွာမီးလင်းရေးကော်မတီများ ဖွဲ့စည်းကာ မီးလင်းရေးရန်ပုံငွေများအဖြစ် ကြိုးစား စုဆောင်းပြီး ပေါက်မြို့၊ မြန်မာ့စီးပွားရေးဘဏ်တွင် ကျေးရွာအလိုက် ဘဏ်စာအုပ်များ ဖွင့်လှစ်ထားရှိ ဆောင်ရွက်နေကြသည်ကို တွေ့ရှိရပါကြောင်း၊ အဆိုပါကိစ္စနှင့် စပ်လျဉ်း၍ သက်ဆိုင်ရာ၊ ဌာနဆိုင်ရာအဖွဲ့ အစည်းများမှ လည်း လုပ်ထုံးလုပ်နည်းများနှင့်အညီ တင်ပြထားသည်ကို သိရှိရပါကြောင်း၊ ထို့ကြောင့်  ပေါက်မြို့နယ်အတွင်း 11 KV ဓာတ်အားလိုင်းနှင့် ၂ မိုင်ခန့် ကွာရှိသော ကျေးရွာပေါင်း ၄၀ ခန့်ကို ၂၀၁၅-၁၆ ဘဏ္ဍာနှစ်တွင် လျှပ်စစ်မီးလင်းပေးနိုင်ရေး အတွက် ဆောင်ရွက်ပေးရန် အစီအစဉ်ရှိ/မရှိ၊ ရှိပါကမည်သည့် ကာလတွင် စတင်ဆောင်ရွက်ပေးမည်နှင့် အစီအစဉ် မရှိပါက မည်သည့် အတွက်ကြောင့် ဖြစ်သည်ကို သိရှိလိုပါကြောင်း မေးမြန်းပါသည်။