(က)-ရန်ကုန်တိုင်းဒေသကြီးအတွင်းစက်မှုဇုန်များ တွင် မြေကွက်ပေါင်း မည်မျှဖော်ဆောင်ထား၍ စက်ရုံများတည်ဆောက်ခြင်းမရှိသည့်မြေကွက် များနှင့် ပတ်သက်၍ မည်သို့ စီမံထားသည်ကို သိလိုခြင်း နှင့် စပ်လျဉ်းသည့် မေးခွန်း

ရန်ကုန်တိုင်း ဒေသကြီးအတွင်း စက်မှုဇုန်များကို ဖော်ထုတ်ခဲ့ရာ တွင် ဆောက်လုပ်ရေးဝန်ကြီးဌာနမှ စက်မှုဇုန်အဖြစ် မြေကွက်များဖော်ထုတ်ခဲ့ပြီး ဆောက်လုပ်ရေးဝန်ကြီးဌာန၊ မြို့ရွာနှင့် အိုးအိမ်ဖွံ့ဖြိုးတိုးတက်ရေးဦးစီးဌာနနှင့် ရန်ကုန်တိုင်းဒေသကြီး အာဏာပိုင်အဖွဲ့အစည်းတို့မှ မြေကွက်နေရာချထားပေးမှုကို ညှိနှိုင်းဆောင်ရွက်ခဲ့ကြခြင်းဖြစ်ပါကြောင်း၊ ရန်ကုန်တိုင်းဒေသကြီးအတွင်း စက်မှုဇုန် ၂၄ ခုတွင် မြေကွက်ဖော်ထုတ်ထားရှိမှုမှာ မြေကွက်ပေါင်း ၁၀၃၀၁ ကွက် ဖော်ထုတ်၍ မြေနေရာချထားပေးခဲ့ပါကြောင်း၊ ယင်းမြေကွက်များအနက် စက်ရုံ၊ အလုပ်ရုံတည်ထောင်ပြီး လုပ်ငန်းလည်ပတ် ဆောင်ရွက်လျက်ရှိသော မြေကွက်ပေါင်း ၃၆၉၃ ကွက်၊ လုပ်ငန်းထူထောင်ဆဲနှင့် တည်ဆောက်ဆဲမြေကွက်ပေါင်း ၂၉၇၀ ကွက်၊ ဂိုဒေါင် သိုလှောင်ရုံအဖြစ် အသုံးပြုလျက်ရှိသောမြေကွက် ၁၂၉၉ ကွက်တို့ပါဝင်ပြီး စက်ရုံအဆောက်အအုံ ဆောက်လုပ်ခြင်းမရှိသော မြေကွက်များသည် စက်မှုဇုန်တည်ထောင်ခြင်း၏ ရည်ရွယ်ချက်နှင့် မကိုက်ညီ၍ စည်းကမ်းနှင့် မညီညွတ်သော မြေကွက်လွတ်ပေါင်း ၂၃၃၉ ကွက် ရှိနေပါကြောင်း။

ရန်ကုန်တိုင်းဒေသကြီးအတွင်းရှိ စက်မှုဇုန်များတွင် လက်ရှိမြေဈေးနှုန်းမှာ တည်နေရာဒေသအလိုက် မတူညီမှုများရှိသော်လည်း ပျမ်းမျှအားဖြင့် ၁ ဧကလျှင် ကျပ်သိန်း ၃၀၀၀ မှ ၄၀၀၀ အထိ ရှိနေပြီး အချို့နေရာများတွင် ၁ ဧကလျှင် ငွေကျပ်သိန်း ၇၀၀၀ မှ သိန်း ၈၀၀၀ အထိရှိနေသည်ကို ကြားသိရပါကြောင်း၊ စက်ရုံ/အလုပ်ရုံများ တည်ဆောက်ခြင်းမရှိသေးသော၊ စည်းကမ်းနှင့် မညီညွတ်သော မြေလွတ်မြေကွက်များနှင့်ပတ်သက်၍ အရေးယူဆောင်ရွက်ရန် စီစဉ်လျက်ရှိရာ စက်မှုလုပ်ငန်းဖွံ့ဖြိုး တိုးတက်ရေးကော်မတီ၏ လုပ်ငန်းတာဝန်များတွင် မြေကွက်များ နေရာချထားရေးနှင့် ဆက်စပ်သော ကိစ္စများအတွက် တာဝန်ပေးအပ်ထားခြင်းမရှိသည့်အတွက် သက်ဆိုင်ရာရန်ကုန်တိုင်းဒေသကြီးအစိုးရ အဖွဲ့ဝင်တစ်ဦးမှ ဥက္ကဋ္ဌအဖြစ်ပါဝင်ပြီး သက်ဆိုင်ရာဌာနများမှအဖွဲ့ဝင်များဖြင့် စီမံခန့်ခွဲမှုကော်မတီ တစ်ရပ်ဖွဲ့စည်း၍ ၎င်းကော်မတီမှ စက်ရုံများ တည်ဆောက်ခြင်းမရှိသည့်မြေကွက်လွတ်များ လုပ်ငန်းစဉ်များ ချမှတ်ဆောင်ရွက်နိုင်ရေး စီစဉ်ထားရှိပါကြောင်း။

စည်းကမ်းနှင့်မညီညွတ်သော မြေကွက်လွတ်များမှာ စက်ရုံ/အလုပ်ရုံများ တည်ဆောက်ရေးအတွက် စတင်တည်ဆောက်အကောင်အထည်ဖော်ရမည့် ကာလကို ၃ လ သို့မဟုတ် ၄ လ သတ်မှတ်၍ သက်ဆိုင်ရာလုပ်ငန်းရှင်များကို ခေါ်ယူတွေ့ဆုံ အသိပေးညှိနှိုင်း၍ လုပ်ငန်းအဆိုပြုချက် တင်ပြစေရန်၊ တည်ဆောက်မည့်လုပ်ငန်း၏ ပမာဏပေါ်မူတည်၍ လုပ်ငန်းရှင်၏ အဆိုပြုချက်နှင့် စီမံကိန်းကာလကို စီမံခန့်ခွဲရေးကော်မတီမှ စိစစ်အတည်ပြု၍ စဉ်ဆက်မပြတ်လုပ်ငန်းအကောင် အထည်ဖော်မှုရှိ/မရှိ ကြီးကြပ်ဆောင်ရွက်သွားရန်၊ အဆိုပြုချက်တင်သွင်းခြင်းမရှိသည့် မြေကွက်များကို နိုင်ငံတော်သို့ ပြန်လည်အပ်နှံစေရန်၊ အဆိုပြုစီမံကိန်းများကို တင်ပြပါစီမံကိန်းကာလအတွင်း ပြီးစီးအောင် ဆောင်ရွက်ခြင်းမရှိသည့် မြေကွက်လပ်များကို သတ်မှတ်ရက်လွန်ကြေး၊ ဒဏ်ကြေးပေးသွင်းစေ ခြင်းမှစ၍ မြေကွက်ကို ပြန်လည်ပေးအပ်စေခြင်းအထိ အဆင့်ဆင့်အရေးယူဆောင်ရွက်သွားရန် စီမံထားရှိပါကြောင်း၊ ယခုအချိန်တွင် အဆိုပြုချက်များကို ရရှိနေပြီး ရန်ကုန်တိုင်းဒေသကြီးအစိုးရအဖွဲ့များနှင့် အဆိုပြုချက် စိစစ်ရေးကော်မတီတစ်ခုကို ဖွဲ့စည်းပြီး ဆက်လက်အရေးယူဆောင်ရွက်ပါကြောင်း ရှင်းလင်းဖြေကြားပါသည်။

ဦးမြင့်ဦး (သနပ်ပင်) က ဆက်စပ်မေးခွန်း မေးမြန်းပါသည်။

မြေကွက်များကို စတင်ဖော်ဆောင်ချိန်တွင် ၁ ဧက တစ်ကွက်ကို သိန်း ၅၀ နှင့် ချပေးခဲ့သည်မှာ မှန်ကန်မှုရှိ/မရှိ၊ ကုမ္ပဏီတစ်ခုတည်းကိုသာ မြေကွက်ပေါင်း ၆၀၀၀ ခန့်အထိ ချပေးခဲ့သည်ဟု သိရှိရပါသဖြင့် ယင်းသတင်းသည် မှန်ကန်မှုရှိ/မရှိ၊ ယင်းသတင်းသည် မှန်ကန်ခဲ့ပါက ဆောက်လုပ်ရေးဝန်ကြီးဌာနလက်အောက်ရှိ အိုးအိမ်ဦးစီးဌာနက မည်သည့်မူများချပေးခဲ့သည်ကို သိရှိလိုကြောင်း မေးမြန်းပါသည်။

စက်မှုဝန်ကြီးဌာန၊ ဒုတိယဝန်ကြီး ဦးမျိုးအောင်

မြေကွက်များကို စတင်ဖော်ဆောင်ချိန်တွင် မည်သည့်ဈေးနှုန်းဖြင့် ချပေးခဲ့သည်ကို ဈေးနှုန်း အတိအကျကို ယခုအချိန်တွင် လက်တန်းပြော၍မရပါကြောင်း၊ သို့သော် ဈေးမများပါကြောင်း၊ မိမိတို့အနေဖြင့် လက်ရှိစိစစ်၍ရသော အချက်အလက်များအရ ကုမ္ပဏီတစ်ခု တစ်ဦးတည်းကို မြေကွက်ပေါင်း ထောင်နှင့် ချီချပေးခဲ့သည်မှာ စာရင်းဇယားထဲမှာ မပေါ်ပါကြောင်း၊ ယခုအချိန်တွင် ရန်ကုန်တိုင်းဒေသကြီး အစိုးရအဖွဲ့အနေဖြင့် သက်ဆိုင်ရာပုဂ္ဂိုလ်များထံမှ အဆိုပြုချက်များ ရယူပြီး ယင်းအဆိုပြုချက်များကို စိစစ်နေပြီး မကြာခင်အချိန်တွင် ထုတ်ပြန်ပေးမည်ဖြစ်ပါကြောင်း ရှင်းလင်းဖြေကြားပါသည်။