(ခ)-ရေးမြို့နယ်အတွင်းရှိ တပ်ရင်း၊ တပ်ဖွဲ့များမှ တပ်ပြင်ပစွန့်လွှတ်ရန်ကျန်ရှိနေသောလယ်ယာမြေ များအား ပြည်သူများလက်ထဲသို့ ပြန်လည် စွန့်လွှတ်ပေးရန်အစီအစဉ်ရှိ၊မရှိ နှင့်စပ်လျဉ်း သည့် မေးခွန်း

မိမိတို့ ကာကွယ်ရေးဝန်ကြီးဌာနအနေဖြင့် စွန့်လွှတ်မြေများနှင့် ပတ်သက်၍ တောင်သူများလက်သို့ လွှဲပြောင်းပေးလျက်ရှိရာ ၂၀၁၄ ခုနှစ်၊ ဇွန်လ ၃၀ ရက်နေ့ အထိ မွန်ပြည်နယ်အတွင်းရှိ တပ်ရင်း၊ တပ်ဖွဲ့များမှ မြေဧရိယာ  ၃၆၃၉.၆၄ ဧက ဖြစ်ပါကြောင်း၊ ကိုယ်စားလှယ်တော်ကြီးတင်ပြသွားသကဲ့သို့ တပ်ရင်းများအနေဖြင့် ၈၈၇.၃၈ ဧက ပြန်လည် စွန့်လွှတ်ပြီးဖြစ်ပါကြောင်း၊ တပ်ရင်း(၇)ရင်းနှင့် ပတ်သက်ပြီး ယခုအချိန်တွင် စွန့်လွှတ်ပေးရန် မရှိသေးပါကြောင်း၊ နိုင်ငံတော်အနေဖြင့် မြေအရင်းအမြစ်များသည် အဖိုးတန်မှန်း၊ အသုံးဝင်မှန်းသိသည့်အတွက် ကော်မတီများဖွဲ့၊ Workshop များဖွဲ့ပြီး ဆွေးနွေးဆောင်ရွက်နေပါကြောင်း၊ မိမိတို့ တပ်မတော်ဌာနအကြီးအကဲအနေဖြင့်လည်း မြေယာနှင့်ပတ်သက်ပြီး မူဝါဒခိုင်ခိုင်မာမာချမှတ်ကာ မိမိတို့ထံရောက်လာသော စာများ၊ တိုင်စာများ၊ အသနားခံစာများ ပြန်လည်စွန့်လွှတ်ပေးရန် တောင်းဆိုခြင်းနှင့်ပတ်သက်၍ အသေးစိတ် စဉ်းစားပေးခဲ့ပါကြောင်း၊ တပ်မတော်မှ ပြန်လည်စွန့်လွှတ်သော မြေနှင့်ပတ်သက်၍ တိုင်းဒေသကြီး/ပြည်နယ် မြေယာစီမံခန့်ခွဲရေးကော်မတီမှ စိစစ်လက်ခံသော မြေ ၂၀၈၆၄၉.၄၈၃ ဧက စွန့်လွှတ်ပြီးဖြစ်ပါကြောင်း၊ နောက်ပိုင်းတွင် တပ်မတော်အကြီးအကဲက ထပ်မံစွန့်လွှတ်ပေးထားသောမြေ ၄၂၄၂.၉၈ ဧက ထပ်မံ စွန့်လွှတ်ပေးထားပြီးဖြစ်ပါကြောင်း၊ ထို့အပြင် စစ်ကိုင်းတိုင်းဒေသကြီး ဟုမ္မလင်းလေယာဉ်ကွင်းအတွင်းရှိ လက်ဖက်စိုက်ခင်း ၇၂၆ ဧကကိုလည်း ပြန်လည်စွန့်လွှတ်ပေးရန် မူဝါဒအားဖြင့် သဘောတူပြီး ဖြစ်ပါကြောင်း၊  ကိုယ်စားလှယ်တော်ကြီး၏ တင်ပြချက်များကိုလည်း အလေးထားဆောင်ရွက်ပေးသွားမည်ဖြစ်ပါကြောင်း ရှင်းလင်းဖြေကြားပါသည်။

ဒေါ်မိမြင့်သန်း (ရေး) က ဆက်စပ်မေးခွန်း မေးမြန်းပါသည်။

ကျန်ရှိနေသော တပ်ရင်း ၇ ရင်းနှင့် လယ်မြေ ၁၃၅၆.၄၁ ဧက ကိုလည်း တစ်ချို့လယ်ယာများသည် ဆောင်ရွက်ထားခြင်း အခြေအနေမရှိပါသဖြင့် တပ်မတော်က ကျန်ရှိသော လယ်ယာများကို ပြန်လည်စဉ်းစားပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။

ကာကွယ်ရေးဝန်ကြီးဌာန၊ ဒုတိယဝန်ကြီး ဗိုလ်ချုပ်ကျော်ညွန့်

မိမိအနေဖြင့် ပြန်လည်ပြီး အသေးစိတ် ဆောင်ရွက်သွားမည်ဖြစ်ပါကြောင်း ရှင်းလင်းဖြေကြားပါသည်။