မွန်ပြည်နယ်၊ ရေးမြို့နယ်တွင် ခုတင် ၅၀ ဆေးရုံတွင် လူနာများအတွက် လိုအပ်နေသော စက်ပစ္စည်း ကိရိယာများ လုံလောက်မှုမရှိပါကြောင်း၊ အရေးပေါ် လူနာများကို မော်လမြိုင်မြို့သို့ တစ်လလျှင် ၄၊ ၅ ခေါက်ခန့် ပို့ဆောင်နေရသည့်အပြင် တစ်ခါတစ်ရံ ရန်ကုန်ဆေးရုံကြီးသို့ ပို့ဆောင်နေရသည်ကိုလည်း လေ့လာတွေ့ရှိ ရပါကြောင်း၊ မော်လမြိုင်သို့သွားမည်ဆိုပါက ကားခ ၉၀၀၀၀ မှ ၁၀၀၀၀၀ ကြား၊ ရန်ကုန်မြို့သို့သွားမည်ဆိုပါက ၂၅၀၀၀၀ မှ ၃၀၀၀၀၀ ကြား ပေးဆောင်ရပါကြောင်း၊ မိမိတို့၏ လူဦးရေထူထပ်သော ရေးမြို့တွင် ခုတင် ၁၀၀ ဆေးရုံတစ်ရုံ တည်ဆောက်ပေးရန် အစီအစဉ် ရှိ/မရှိ၊ ဆေးရုံတွင် လိုအပ်နေသော ဆေးပစ္စည်း ကိရိယာများ လုံလောက်စွာဖြည့်စွက်ပေးရန် အစီအစဉ် ရှိ/မရှိ၊ ရေးမြို့နယ်၊ လမိုင်းမြို့နယ်ခွဲနှင့် ခေါစာမြို့နယ်ခွဲတို့တွင် ၁၆ ခုတင်မှ စံကိုက် ၂၅ ခုတင် ဆေးရုံအဆင့်သို့ တိုးမြှင့်ပေးရန် အစီအစဉ် ရှိ/မရှိ၊ အစီအစဉ်ရှိပါက မည်သည့် အချိန် တွင် ဆောင်ရွက်ပေးမည်နှင့် အစီအစဉ်မရှိပါက အဘယ့်ကြောင့်မရှိသည်ကို သိရှိလိုကြောင်း မေးမြန်းပါသည်။
ရေးမြို့နယ် ပြည်သူ့ဆေးရုံ ခုတင် ၁၀၀ အတွက် Dental Chair တစ်ခုကို ၂၀၁၃ သြဂုတ်လတွင် ထောက်ပံ့ထားရှိပြီး ဆေးရုံသုံးပစ္စည်းများ၏ လိုအပ်ချက်တင်ပြရန် မွန်ပြည်နယ်ကျန်းမာရေးဦးစီးမှူးဌာနမှ ကျန်းမာရေးဦးစီးမှူးကို ၂၁-၁၀-၂၀၁၃ ရက်နေ့ တွင် ညွှန်ကြားထားရှိပြီးဖြစ်ပါကြောင်း၊ မွန်ပြည်နယ်၊ ရေးမြို့နယ် ခုတင် ၅၀ ဆံ့ပြည် သူ့ဆေးရုံကြီးအား ခုတင် ၁၀၀ ပြည်သူ့ဆေးရုံကြီးအဖြစ်သို့ ကျန်းမာရေးဦးစီးဌာန၏ ၂၁-၁၂-၂၀၁၂ ရက်စွဲဖြင့် တိုးမြှင့်ရန် ခွင့်ပြုထားပြီး ဖြစ်ပါကြောင်း၊ တစ်နိုင်ငံလုံး ရှိ ၁၆ ခုတင်ဆံ့ ဆေးရုံများအား ၂၀၁၃-၁၄ ဘဏ္ဍာနှစ်တွက် စံကိုက်ဖွဲ့စည်းပုံ သို့ ပြင်ဆင်ရန် စီစဉ်ဆောင်ရွက်လျက်ရှိရာ ရေးမြို့နယ်၊ လမိုင်းမြို့နယ်ခွဲ ၊ ခေါဇာမြို့နယ်ခွဲများရှိ ၁၆ ခုတင်ဆံ့ဆေးရုံ နှစ်ရုံအား ၂၅ ခုတင်ဆံ့သို့ တိုးမြှင့်နိုင်ရေး အတွက် ဆေးရုံအတွင်း တက်ရောက်နေသော လူနာအခြေအနေ၊ ပြင်ပလူနာ အခြေအနေ၊ ဆေးရုံအသုံးချမှု ရာခိုင်နှုန်းအခြေအနေများကို မူတည်ပြီး တိုးမြင့်အောင်ဆောင်ရွက်နိုင်ရန် ဆက်လက်ဆောင်ရွက်သွားမည်ဖြစ်ကြောင်း ရှင်းလင်း ဖြေကြားပါသည်။