(ခ)-မန္တလေးတက္ကသိုလ်အား အဆင့်မြင့်ပညာရပ်များသင်ကြားရာ၊ သုတေသနလုပ်ငန်းများ ဆောင်ရွက်ရာ ရပ်ဝန်းကောင်းတစ်ခုအဖြစ် စနစ်တကျ အဆင့်မြှင့်တင်ပေးရန် အစီအစဉ်ရှိ၊ မရှိနှင့် စပ်လျဉ်းသည့် မေးခွန်း

ပညာရေးဝန်ကြီးဌာန၊ အဆင့်မြင့်ပညာဦးစီးဌာန၊ မန္တလေးတက္ကသိုလ်၏ ဧရိယာအကျယ်အဝန်းသည် စုစုပေါင်း ၂၂၀.၅၃ ဧကရှိပြီး မန္တလေးတက္ကသိုလ်အတွင်းရှိ အဆောက်အဦများကို ၁၉၂၄ ခုနှစ်မှစ၍ စတင်တည်ဆောက်ခဲ့ခြင်း ဖြစ်သည်ကို သိရှိရပါကြောင်း၊ အချို့အဆောက်အဦများသည် သက်တမ်း နှစ် ၁၀၀ နီးပါးရှိနေပြီး သက်တမ်း ၅၅ နှစ်နှင့်အထက် နှစ်ထပ်အုတ်တိုက် စာသင်ဆောင်နှစ်ဆောင်၊ တစ်ထပ်ဆောင် အုတ်ညှပ်၊ နံကပ် ၄၁ ဆောင်အနက် နှစ် ၄၀ ခန့်ရှိသော အဆောင်ခြောက်ဆောင်၊ နှစ် ၅၀ ခန့်ရှိသောအဆောင် ၁၈ ဆောင်၊ နှစ် ၉၀ ခန့်ရှိသော အဆောင်နှစ်ဆောင်၊ နှစ် ၇၀ ခန့်ရှိသော အဆောင်ငါးဆောင်၊ ၅၈ နှစ်ခန့်ရှိသော အဆောင်တစ်ဆောင် (အင်းဝဆောင်)၊ ၅၅ နှစ်ရှိသော အဆောင်ကိုးဆောင် အစရှိသဖြင့် သက်တမ်းကြာမြင့်စွာ ရှိနေခြင်းကြောင့် သစ်သားတိုင်များပိုးစားခြင်း၊ မျက်နှာကြက်များ ပြုတ်ကျပျက်စီးခြင်း၊ ကြမ်းခင်းများကျွံကျခြင်း၊ အုတ်နံရံများဆားပေါက်ခြင်း စသည်တို့ဖြစ်ပေါ်ခဲ့ပြီး အဆောက်အဦအများစု၏ သက်တမ်းကြောင့် ယိုယွင်းပျက်စီးသော အနေအထားရှိပါကြောင်း၊ မန္တလေးတက္ကသိုလ်ကြီး၏ ပင်မအဆောက်အဦတွင် သုံးထပ်အုတ်တိုက် အဆောက်အဦဖြစ်ပြီး ၁၉၂၄ ခုနှစ်တွင် တည်ဆောက်ခဲ့ခြင်း ဖြစ်သည့်အတွက် သက်တမ်းအားဖြင့် ၉၄ နှစ်ရှိပြီး တက္ကသိုလ်၏ သင်္ကေတလက္ခဏာလည်း ဖြစ်ပါကြောင်း၊ ပင်မဆောင်ကြီးကို အကြီးစားမွမ်းမံ ပြင်ဆင်ခြင်းလုပ်ငန်းကို ၂၀၁၈-၁၉ ဘဏ္ဍာရေးနှစ်တွင် ပြုပြင်ဆောင်ရွက်ရန်အတွက် ဘဏ္ဍာငွေလျာထားဆောင်ရွက် ထားပါကြောင်း၊ ထိုပင်မဆောင်ကြီးကို အကြီးစားမွမ်းမံရန် လိုအပ်သကဲ့သို့ သက်တမ်းရင့်နေသည့် တစ်ထပ်ဆောင်နေရာများတွင် အဆောင်အဦအသစ်များ၊ ခေတ်နှင့်လျော်ညီသော စာသင်ခန်းများ၊ လက်တွေ့ခန်းများ၊ သုတေသနဓာတ်ခွဲခန်းများအဖြစ် အသုံးပြုနိုင်ရန်အတွက် တည်ဆောက်ရေး လုပ်ငန်းများကို အဆင့်အလိုက် သတ်မှတ်ဆောင်ရွက်မည် ဖြစ်ပါကြောင်း၊ ၃.၄ ဧကအကျယ်အဝန်းရှိ တစ်ထပ်စာသင်ဆောင်များ နေရာတွင် ခေတ်မီငါးထပ်ဆောင် တည်ဆောက်ပေးခြင်း၊ ဘေးပတ်ဝန်းကျင် သာယာလှပရေးလုပ်ငန်းများ ဆောင်ရွက်ခြင်း၊ ဒုတိယ ဦးစားပေးအနေဖြင့်‌ ၂.၈၉ ဧရိယာကျယ်ဝန်းသည့် တစ်ထပ်ဆောင်စာသင်ဆောင် နေရာများတွင် ပြုပြင်ထိန်းသိမ်းရန် အဆောက်အဦများ အကြီးစားမွမ်းမံပြင်ဆင်ရန် လျာထားဆောင်ရွက်မည် ဖြစ်ပါကြောင်း၊ တတိယဦးစားပေးအနေဖြင့် ၂.၅၇ ဧက ကျယ်‌ဝန်းသော တစ်ထပ်ဆောင်နေရာဟောင်းများတွင် ငါးထပ်ဆောင်အသစ် ဆောက်လုပ်ခြင်း လုပ်ငန်းများ ဆောင်ရွက်မည်ဖြစ်ပါကြောင်း၊ စတုတ္ထဦးစားပေး အနေဖြင့် ၆.၄၂ ဧကကျယ်ဝန်းသော ညောင်ပင်ဝိုင်းနေရာကို ခေတ်မီလေးထပ်ဆောင် စာသင်ဆောင် တည်ဆောက်ခြင်းနှင့်‌ ပတ်ဝန်းကျင်သာယာလှပရေး လုပ်ငန်းများ ဆောင်ရွက်ရန် လျာထားဆောင်ရွက်မည် ဖြစ်ပါကြောင်း၊

ထို့အပြင် မန္တလေးတက္ကသိုလ်၏ ဆရာဝန်ထမ်းလက်ရှိ ဖွဲ့စည်းပုံကို ပြင်ဆင်ရေးဆွဲတင်ပြထားပြီး ဖြစ်ပါကြောင်း၊ ဖွဲ့စည်းပုံအသစ် အတည်ပြုချက်ရရှိပါက လူမှုစီးပွားရေးဖွံ့ဖြိုး တိုးတက်ရန်နှင့် အလုပ်အကိုင်အခွင့်အလမ်းများ ပိုမိုရရှိနိုင်မည့် ဘာသာရပ်သင်တန်းများ တိုးချဲ့သင်ကြားခြင်း၊ နိုင်ငံတကာတက္ကသိုလ်များနှင့် ပူးပေါင်းပြီးသင်တန်းများ တိုးချဲ့ဖွင်‌့လှစ်ခြင်းများ ဆက်လက်ဆောင်ရွက်မည် ဖြစ်ပါကြောင်း၊ ယခုလက်ရှိတင်ပြချိန်အထိ နိုင်ငံတကာ တက္ကသိုလ်အဖွဲ့အစည်း ၃၃ ခုနှင့် ပညာရေးဆိုင်ရာ နားလည်မှုစာချွန်လွှာများ ရေးထိုးပြီး သင်ကြားရေး၊ သင်ယူရေးနှင့်သုတေသန လုပ်ငန်းပေါင်းများစွာကို ပူးပေါင်းဆောင်ရွက်နေပါကြောင်း၊ ၎င်းအပြင် နိုင်ငံခြားသား ဆရာ/မများနှင့် နိုင်ငံခြားသား ကျောင်းသား/သူများ လာရောက်ပညာသင်ကြားခြင်း၊ နိုင်ငံတကာဆွေးနွေးပွဲများ၊ အလုပ်ရုံဆွေးနွေးပွဲများ၊ သုတေသနကွန်ဖရင့်များနှင့် အခြားပညာရပ်ဆိုင်ရာများကို ပူးပေါင်းဆောင်ရွက်လျက် ရှိပါကြောင်း၊ သို့ဖြစ်ပါ၍ မန္တလေးတက္ကသိုလ်အား အဆင့်မြင့်ပညာရပ်များ သင်ကြားသင်ယူနိုင်ရေး၊ သုတေသနလုပ်ငန်းများ ဆောင်ရွက်ရာပညာသင်မှု ရပ်ဝန်းကောင်းအဖြစ် စနစ်တကျအဆင့်တိုးတက်ရေး၊ အဆင့်မြှင့်တင်ရေး လုပ်ငန်းများ ဆောင်ရွက်နိုင်ရန် မန္တလေးတက္ကသိုလ် ဘက်စုံအဆင့်မြှင့်‌တင်ရေး ကော်မတီကို ဖွဲ့စည်းပြီး ဖြစ်ပါကြောင်းနှင့် ဘက်စုံကော်မတီမှ စီမံကိန်းများအဆင့်ဆင့်‌ရေးဆွဲပြီး မန္တလေးတက္ကသိုလ် အဆင့်မြှင့်တင်ခြင်းကို စနစ်တကျဆောင်ရွက် သွားမည်ဖြစ်ပါကြောင်း ရှင်းလင်းဖြေကြား ပါသည်။