(ဃ)-လုပ်သက်(၂)နှစ်မှ (၁၇)နှစ်အထိနေ့စား ဝန်ထမ်းများကိုလုပ်သက်ရဝန်ထမ်းအဖြစ် တိုးမြှင့်ပေးရန်နှင့်အလုပ်လက်မဲ့ဖြစ်နေသော ဘွဲ့ရများကိုအလုပ်အကိုင်ရရှိရေးဆောင်ရွက်ပေး ရန် အစီအစဉ်ရှိ၊မရှိတို့နှင့်စပ်လျဉ်း သည့် မေးခွန်း

အစိုးရဌာနအသီးသီးတွင် နေ့စားဝန်ထမ်းများအဖြစ် နှစ်နှစ်မှ ၁၇ နှစ်အထိ တာဝန်ထမ်းဆောင်သူများကို In Service လုပ်သက်ရဝန်ထမ်းများအဖြစ် နေ့စားဝန်ထမ်းများ ခန့်အပ်ရာတွင် ဖွဲ့စည်းပုံအရ နေရာလစ်လပ်မှုနှင့် ပြည်ထောင်စုအစိုးရအဖွဲ့ရုံး၏ ခွင့်ပြုချက်အပေါ်မူတည်ပြီး သက်ဆိုင်ရာဝန်ကြီးဌာန စီမံခန့်ခွဲမှုကော်မတီမှ သတ်မှတ်ထားသော နေ့စားများကို အမြဲတမ်းဝန်ထမ်းများအဖြစ် ခန့်အပ်ခြင်းဆိုင်ရာ လုပ်ထုံးလုပ်နည်းနှင့်အညီ ဆောင်ရွက်လျက်ရှိပါကြောင်း၊ ယခုလိုဆောင်ရွက်သည့် နေရာတွင် နိုင်ငံတော်မှ ပြဋ္ဌာန်းထားသည့် နည်းဥပဒေ ၄၉တွင် ဝန်ကြီးဌာနနှင့်အဖွဲ့အစည်း အကြီးအမှူးသည် ဝန်ထမ်းအဖွဲ့အစည်း၏ လိုအပ်ချက်အရ ဖွဲ့စည်းပုံအင်အားအတွင်း လစ်လပ်လျက်ရှိသည့် ရာထူးတစ်နေရာကို ကျောထောက်နောက်ခံပြု၍ အောက်တစ်ဆင့်နိမ့်သော ရာထူးတစ်နေရာတွင် ဌာနအတွင်းမှ ဝန်ထမ်းများကို ခန့်ထားခြင်း၊ ရာထူးတိုးမြှင့်ခြင်း၊ ပြောင်းရွှေ့ခြင်းဖြင့် ခန့်ထားနိုင်သည်ဟု နည်းဥပဒေ၅၀တွင် ပြဋ္ဌာန်းထားပြီး နည်းဥပဒေ ၄၉အရ ခန့်ထားရာတွင် သတ်မှတ်ခွင့်ပြုထားသည့် ဝန်ထမ်းဖွဲ့စည်းပုံ အင်အားအတွင်း ဖြစ်ရမည်ဟူ၍ လည်းကောင်း၊ ရာထူးတိုးမြှင့်ပေးနိုင်မည့် သတ်မှတ်ထားသည့် အရည်အချင်းများနှင့် ကိုက်ညီရမည်ဟူ၍ လည်းကောင်း ပြဋ္ဌာန်းထားသောကြောင့် အစိုးရဌာနအသီးသီးမှ နေ့စားဝန်ထမ်းများအား သက်ဆိုင်ရာ အစိုးရဌာန၏ လုပ်ငန်းလိုအပ်ချက်အပေါ် မူတည်ပြီး လုပ်သက်ရဝန်ထမ်းများကို အမြဲတမ်းဝန်ထမ်းများအဖြစ် ခန့်အပ်ပေးနေပါကြောင်း၊ ထို့အပြင် သက်ဆိုင်ရာတိုင်းဒေသကြီးနှင့် ပြည်နယ်များတွင် လစ်လပ်ဝန်ထမ်းများ ခန့်ထားရာ နိုင်ငံတော်မှပြဋ္ဌာန်းထားသော နိုင်ငံဝန်ထမ်းဥပဒေ၊ နည်းဥပဒေများနှင့်အညီခန့်ထား ဆောင်ရွက် လျက်ရှိပါကြောင်း၊ တိုင်းဒေသကြီးနှင့် ပြည်နယ်များတွင် နေ့စားဝန်ထမ်းအဖြစ် လျှောက်ထားသူများမှာ သတ်မှတ် အရည်အချင်းနှင့် ကိုက်ညီသူများကိုရွေးချယ်ပြီး ခွင့်ပြုရန်ပုံငွေအပေါ် မူတည်ကာ အထက်ဌာနအဆင့်ဆင့်သို့ တင်ပြခွင့်ပြုချက်ဖြင့် နေ့စားဝန်ထမ်းခန့်ထားခြင်းကို ဆောင်ရွက်သလို နေ့စားဝန်ထမ်းများအား လုပ်ငန်း လိုအပ်ချက်အရ အမြဲတမ်းဝန်ထမ်းများ လစ်လပ်သည့်အခါများတွင် ၎င်းတို့ တာဝန်ထမ်းဆောင်ခဲ့သည့် အလိုက် ပညာအရည်အချင်းများနဲ့ ကိုက်ညီသူများကို လုပ်ထုံးလုပ်နည်း၊ ညွှန်ကြားချက်များနှင့်အညီ ရွေးချယ်ပြီး အထက်ဌာနအဆင့်ဆင့်သို့ တင်ပြခွင့်ပြုချက်ရယူပြီး အမြဲတမ်းဝန်ထမ်း (In Service) အဖြစ် ခန့်ထားခြင်းကို ဆောင်ရွက်လျက်ရှိပါကြောင်း။

ကျေးလက်တောရွာများနှင့် မြို့များတွင်ဘွဲ့အမျိုးမျိုးရရှိပြီး အလုပ်လက်မဲ့များကို စာရင်းကောက်ယူပြီး စီမံချက်ရေးဆွဲကာ အလုပ်အကိုင်ရရှိရေးကို ဆောင်ရွက်ခန့်ထားပေးနိုင်ခြင်းရှိ/မရှိနှင့် ပတ်သက်၍ မိမိတို့ အလုပ်သမား၊ အလုပ်အကိုင်နှင့်လူမှုဖူလုံရေး ဝန်ကြီးဌာန၏ ရည်မှန်းချက်ဖြစ်သည့် ပြည်တွင်းပြည်ပ အလုပ်အကိုင် နေရာချထားရေးလုပ်ငန်းစဉ်တွင် သက်ဆိုင်ရာတိုင်းဒေသကြီး ပြည်နယ်နှင့်ကိုယ်ပိုင်အုပ်ချုပ် ခွင့်ရ ဒေသများတွင် အလုပ်အကိုင်အခွင့်အလမ်းများကို တိုးတက်စေရန် ပုဂ္ဂလိက၊ သမဝါယမ၊ ဖက်စပ်စက်ရုံ၊ အလုပ်ရုံနှင့် အလုပ်ဌာနများတွင် လိုအပ်သည့်နေ့စား၊ လစားဝန်ထမ်းများအတွက် ကျွမ်းကျင်ပြီး အရည်အချင်းပြည့်ဝသည့် အလုပ်သမားများရရှိရန်နှင့် အလုပ်အကိုင်လိုအပ်သည့် ဘွဲ့ရသူများ၊ ဘွဲ့မရသူများအတွက်ပါ ရည်ရွယ်၍ အလုပ်သမားမှတ်ပုံတင်ပြုလုပ်ပေးခြင်း၊ အလုပ်အကိုင်ရှာဖွေပေးခြင်း၊ အလုပ်ခန့်ထားပေးခြင်းစသည့် လုပ်ငန်းများကို နေပြည်တော်ကောင်စီနယ်မြေအပါအဝင် တိုင်းဒေသကြီး ပြည်နယ် ၁၅ ခုတို့တွင် အလုပ်အကိုင်နှင့် အလုပ်သမားရှာဖွေရေးရုံး ၇၈ ရုံးဖွင့်လှစ်၍ ဆောင်ရွက်ပေးပါကြောင်း။

ထို့အပြင် လမ်းပန်းဆက်သွယ်ရေးခက်ခဲပြီး အလုပ်အကိုင်နှင့်အလုပ်သမား ရှာဖွေရေးရုံး ဖွင့်လှစ်နိုင်ခြင်း မရှိသေးသည့် ဒေသများသို့ Mobile Team ဖြင့် ကွင်းဆင်းဆောင်ရွက်ပေးခြင်း၊ အလုပ်အကိုင် အခွင့်အလမ်းများ တိုးတက်ရရှိစေရန်အတွက် တိုင်းဒေသကြီးနှင့် ပြည်နယ်များတွင် အလုပ်အကိုင် အခွင့်အလမ်းပြပွဲ (Job Fair) များကို ကျင်းပပြုလုပ်ပြီး အလုပ်ခန့်ထားလိုသူနှင့် အလုပ်အကိုင် လိုချင်သူများအား တိုက်ရိုက်ချိတ်ဆက်၍ အလုပ်အကိုင်အခွင့်အလမ်းများ ရရှိစေရန် ဆောင်ရွက်ပေးလျက် ရှိပါကြောင်း၊ မိမိတို့ အလုပ်သမား၊ အလုပ်အကိုင်နှင့် လူမှုဖူလုံရေးဝန်ကြီးဌာနတွင် မှတ်ပုံတင်ထားရှိသော ပြည်တွင်းနှင့်ပြည်ပ အလုပ်အကိုင်ရှာဖွေရေး အကျိုးဆောင်လိုင်စင်ရ အေဂျင်စီများနှင့်လည်း အလုပ် သမားခန့်ထားလိုသည့် ကုမ္ပဏီများမှ အလုပ်လိုချင်သူများအား ချိတ်ဆက်ပြီးအလုပ်အကိုင် အခွင့်အလမ်းများ ဖော်ဆောင်ပေးခြင်း၊ အလုပ်အကိုင်အခွင့်အလမ်းများနှင့် ပတ်သက်၍ ဆောင်ရွက်ပေးသည့် နေရာတွင် ကျေးလက်တောရွာ၊ မြို့များရှိ ဘွဲ့ရရှိသူများနှင့် ဘွဲ့မရရှိသူများ အားလုံးကို ဆောင်ရွက်ပေးနေပါကြောင်း ရှင်းလင်းဖြေကြားပါသည်။