(ခ)-ကလေးမြို့နယ်၊ ရာဇဂြိုဟ်ဘက်စုံ ရေလှောင်တမံအား ပြန်လည်ပြုပြင်ပေးရန်နှင့် စပ်လျဉ်းသည့် မေးခွန်း

၂၀၁၅ ခုနှစ် ဇူလိုင်လကုန်ပိုင်းတွင် ဖြစ်ပေါ်ခဲ့သည့် ဆိုင်ကလုန်းမုန်တိုင်း (ကိုမန်) ၏ အရှိန်နှင့် ရာဇဂြိုဟ်ရေလှောင်တမံ၏ ရေဆင်းဧရိယာဖြစ်သည့် ချင်းပြည်နယ် တောင်ပေါ်ဒေသများတွင် တစ်ပတ်အတွင်း မိုးရေချိန်လက်မ ၃၀ ခန့် ရွာသွန်းမှုရှိခဲ့ပါကြောင်း၊   ယခုလိုအချိန်တိုအတွင်း မိုးရေချိန်လက်မများစွာ ရွာသွန်းသည့်အလျောက် ရာဇဂြိုဟ်ရေလှောင်တမံ အထက်ပိုင်း ရေဆင်း ဧရိယာများတွင် တောင်ပြိုခြင်း၊ မြေပြိုခြင်းများဖြစ်ပေါ်ခဲ့သည့်အတွက် နေရဉ္ဇရာချောင်းနှင့် ၎င်းချောင်း၏ လက်တက်ချောင်းငယ်များတွင် ရေစီးနှင့်အတူ သစ်လုံးများ၊ သဲနုန်းများ ပမာဏ များပြားစွာပါဝင် စီးမျောလာခဲ့ပြီး ရာဇဂြိုဟ်ရေလှောင်တမံအတွင်းကို ဝင်ရောက်ခဲ့မှု အခြေအနေရှိပါကြောင်း၊ တချို့က ရေပိုလွှဲပေါ်မှ ရေကျော်စီးဆင်းမှုနှင့်အတူ စီးထွက်ပါရှိသွားသော်ငြားလည်း တမံရေပြည့်မှတ်၏ အောက်ဘက် သဲနုန်းများသည် ထုထည်ပမာဏကြီးမားစွာ  တည်ရှိသည့်အတွက် အနည်ထိုင်မှုများ ဖြစ်ပေါ်ခဲ့ပါကြောင်း၊

ထို့အပြင် ၂၀၁၅ ခုနှစ် မိုးရာသီတွင်  မြေပြိုမှုများဖြစ်ပွားချိန် သဘာဝချောင်းကို မြေစာပုံများ ပိတ်ဆို့ခဲ့သည့်အတွက် တောင်ပေါ်ရေကန် (မြေပြိုကန်) များ ဖြစ်ပေါ်ခဲ့ပြီး ၂၀၁၆ ခုနှစ် ဇူလိုင် လဆန်းတွင် နေရဉ္ဇရာချောင်းဖျားရှိ ဟန်ကင်ရွာအနီး တောင်ပေါ်ရေကန် (မြေပြိုကန်) ကျိုးပေါက်မှု ဖြစ်ပေါ်ခဲ့ရာမှ သဲနုန်းများ ထပ်မံစီးဝင်ခဲ့မှု ကြုံတွေ့ခဲ့ရပါကြောင်း၊ တမံအတွင်းကို သဲနုန်းနှင့်သစ်လုံး များ ထပ်မံဝင်ရောက်မှုမှ ကာကွယ်နိုင်ရန်အတွက် တမံ၏အထက်ဘက် ၃ မိုင်ခွဲခန့်အကွာ နုန်းဖမ်းဆည်တစ်ခု၊ ၁ မိုင်ခွဲခန့်အကွာ သစ်လုံးကာတန်း (Long Boom) တစ်ခုတို့ကို တည်ဆောက် ကာကွယ်ပေးထားရပါကြောင်း၊

ထို့အပြင် ရေအားလျှပ်စစ်စက်ရုံနှင့် ဆက်စပ်လုပ်ငန်းများ တည်ဆောက်ပြီးစီးပြီ ဖြစ်သည့်အတွက် စက်စမ်းသပ်လည်ပတ်ရန် ရေယူအဆောက်အဦ၏ ရေဝင်လမ်းကြောင်း ပွင့်စေရန်အတွက် သဲနုန်းများနှင့် သစ်လုံးများကို နည်းစုံလမ်းစုံ တူးဖော်ဖယ်ရှား ရှင်းလင်းခဲ့ရပါကြောင်း၊ ရေဝင်လမ်း ပွင့်သွားပြီးသည့်နောက် ရေအားလျှပ်စစ်စက်ရုံ စမ်းသပ်လည်ပတ်ခြင်း လုပ်ငန်းများကို အောင်မြင်စွာ ဆောင်ရွက်နိုင်ခဲ့ပြီးဖြစ်၍ လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာနအနေဖြင့် ကလေးမြို့ကနေ ရာဇဂြိုဟ်တမံကို 66 KV Single Circuit Transmission Line တည်ဆောက် သွယ်တန်းခြင်း လုပ်ငန်းကို ဆက်လက်ဆောင်ရွက်လျက်ရှိပြီး ယခု ၂၀၁၈ ခုနှစ် မတ်လတွင် ပြီးစီးမည် ဖြစ်ပါကြောင်း၊ 66 KV ဓာတ်အားလိုင်း တည်ဆောက်ပြီးရင် 11 KV ဓာတ်အားလိုင်းကို ဆက်လက်သွယ်တန်းပြီး ဆည်အနီးပတ်ဝန်းကျင်ရှိ ကျေးရွာများကို လျှပ်စစ်မီးပေးဝေနိုင်ရန် ဦးစွာစီမံဆောင်ရွက်သွားမည် ဖြစ်ပါကြောင်း၊ ဆက်လက်ပြီး ကလေးမြို့အထိ လျှပ်စစ်ဓာတ်အား ပို့လွှတ်သွားနိုင်ရေး စီမံဆောင်ရွက်သွားမည် ဖြစ်ပါကြောင်း၊

စိုက်ပျိုးရေပေးဝေရေးနှင့် ပတ်သက်ပြီး ဆည်ရေသောက်စနစ် တည်ဆောက်ခြင်းလုပ်ငန်းကို ၂၀၁၃ ခုနှစ်တွင် စတင်ဆောင်ရွက်ခဲ့ပြီးသည့်နောက် ၂၀၁၅ ခုနှစ်တွင် ပြီးစီးခဲ့ပါကြောင်း၊ ၂၀၁၄ ခုနှစ်မှ ၂၀၁၆ ခုနှစ်အထိ နှစ်စဉ်မိုးစပါး ၂၄၅၀ ဧကခန့်ကို စိုက်ပျိုးရေပေးဝေနိုင်လျက်ရှိပြီး ယခု ၂၀၁၇ ခုနှစ်တွင် မိုးစပါး ၃၄၀၀ ဧကခန့်အထိ ရေပေးစိုက်ပျိုးနိုင်ခဲ့ပါကြောင်း၊ ဆက်လက်ပြီးလည်း ၂၀၁၈ ခုနှစ် မိုးစပါးရာသီတွင် ရေအားလျှပ်စစ်ထုတ်လုပ်ရင်းနှင့် ထုတ်လွှတ်လိုက်သည့် ရေပေါ်တွင်စိစစ်ပြီး ဆည်ရေသောက် ဧရိယာများအတိုင်း စိုက်ပျိုးရေအပြည့်အဝပေးဝေ စိုက်ပျိုးသွားနိုင်ရေးအတွက် စီမံဆောင်ရွက်ထားရှိပြီး ဖြစ်ပါကြောင်း ရှင်းလင်းဖြေကြားပါသည်။