(င)-ပေါက်တောမြို့နယ်၊ မြေငူကျွန်းပင်လယ်ဘက်ခြမ်းရှိ သဲခုံ-ဆံတော်ရှင် မြေသားလမ်း ဖောက်လုပ်ခြင်း လုပ်ငန်းတွင် မပြီးမပြတ်ကျန်ရှိနေခဲ့သော အပိုင်းနှင့်စပ်လျဉ်း၍ ထိရောက်စွာ အရေးယူဆောင်ရွက် ပေးရန်အစီအစဉ်ရှိ/မရှိနှင့် စပ်လျဉ်းသည့် မေးခွန်း

ပေါက်တောမြို့နယ်၊ မြေငူကျွန်းပင်လယ်ဘက်ခြမ်းရှိ သဲခုံ-ဆံတော်ရှင် မြေသားလမ်း ဖောက်လုပ်ခြင်းလုပ်ငန်းတွင် မပြီးမပြတ်ကျန်ရှိနေခဲ့သော အပိုင်းနှင့်စပ်လျဉ်း၍ မည်သည့်ပုဂ္ဂိုလ်/ အဖွဲ့အစည်းတွင် တာဝန်ရှိကြောင်း စိစစ်ဖော်ထုတ်ပေးပါရန်နှင့် ထိရောက်စွာ အရေးယူဆောင်ရွက် ပေးရန်အစီအစဉ်ရှိ/မရှိနှင့် စပ်လျဉ်းသည့် မေးခွန်း

ကျွန်တော်မိမိမေးမြန်းသည့် ရည်ရွယ်ချက်ထဲတွင် အချက် (၃) ချက် ရှိပါကြောင်း၊ ပထမရည်ရွယ်ချက်က တာဝန်မကျေသည့် ပုဂ္ဂိုလ်များကိုထိရောက်စွာ အရေးယူရန်ဆိုသည့်ဥစ္စာ Letterhead ထဲတွင် ပါပြီးဖြစ်ပါကြောင်း၊ ဒုတိယရည်ရွယ်ချက်က မပြီးစီးသေးသည့်အပိုင်းကို ပြီးစီးအောင်လုပ်ပေးရန် ဆိုသည့်ပိုင်းပါပါကြောင်း၊ တတိယအချက်က ပင်လယ်နားနီးပြီး မိုးကြီးသောဒေသ ဖြစ်သည့်တွက် တစ်ဆင့်မြှင့်ပြီးလျှင် ကျောက်ချောလမ်း လုပ်ပေးရန်ဆိုသည့်အချက် (၃) ချက် ပါပါကြောင်း၊ မိမိ တင်ပြပါလမ်းကို ၂၀၁၅-၁၆ ဘဏ္ဍာရေးနှစ်အတွင်း ခုနပြောသည့်အတိုင်း သန်းပေါင်း ၁၈၃၂ သန်းနှင့် ဆောက်လုပ်ရေး ကုမ္ပဏီနှစ်ခုကို လမ်းအပိုင်းအလိုက် ရွေးချယ်တာဝန်ပေးခဲ့ပါကြောင်း၊ ၎င်းလမ်းများတွင် အကျယ်အားဖြင့် ၁၈ ပေ၊ အမြင့်က ၂ ပေ၊ အရှည် (အဖြောင့်) က ၂၂ မိုင် ၇ ဖာလုံနှင့် ကန့်လန့်ဖြတ်က ၃ မိုင် အားလုံးပေါင်း ၂၅ မိုင် ၇ ဖာလုံရှိပါကြောင်း၊ ထိုလမ်းကို ခင်းသည့်နေရာတွင် Estimate ပါအတိုင်း ၁ ပေ ခင်းပြီးတိုင်း Roller ကြိတ်ခြင်း၊ ရေဖြန်းမည် စသည်အားဖြင့် လုပ်ရမည့် ကိစ္စများကို တစ်ကြိမ်မှမလုပ်ခဲ့ပါကြောင်း၊ Roller ကြိတ်ရန် Roller သည် မြေငူကျွန်းခေါ် ကျွန်းပေါ်ကို ရောက်မလာခဲ့ပါကြောင်း၊ ထို့ကြောင့် ဖြစ်ချင်တိုင်းဖြစ်နေသည်ကို တွေ့ရှိရပါကြောင်း၊

ဦးသန်းနိုင်နှင့် မိသားစုကုမ္ပဏီက Culvert များ၊ RC တံတားများပါဝင်ပါကြောင်း၊ ရိုးမမြေကုမ္ပဏီက လုပ်သည့်အပိုင်းက တော်တော်လေးဆိုးရွားပြီး အများဆုံးဘန်ကာပျက်ခြင်း ဖြစ်ပါကြောင်း၊ ဘုရားကုန်းပေါ်ကိုတက်ရာတွင် ချုံနွယ်ကလည်း ပိတ်မှောင်နေသည့်အတွက် ဘုရားဖူးပုဂ္ဂိုလ်များ အခက်အခဲများစွာရှိပါကြောင်း၊ အဆိုပါလမ်းမှာ ပေါက်တောမြို့နယ်အတွင်း ကျရောက်သော်လည်း ရခိုင်ပြည်နယ်၊ စစ်တွေမြို့နယ်နှင့် နီးကပ်စွာတည်ရှိသည့်အတွက် ကုလားတန်မြစ်ဝကို ဖြတ်၍ ရေယာဉ်ဖြင့် နာရီဝက်ခန့်သွားလျှင် ရောက်ပါကြောင်း၊ လိုင်းအစပိုင်း သဲခုံကနေအဆုံပိုင်း ဆံတော်ရှင်စေတီတော်အထိ ရောက်ပါကြောင်း၊ ရခိုင်ပြည်နယ်အရပ်ရပ်မှ ဘုရားဖူးဧည့်သည်များ သိန်းချီပြီး လာရောက်သည့်အတွက် အလွန်စည်ကားသဖြင့် တစ်ဖက်မှကြည့်လျှင် ကမ်းခြေတွင်ရှိသည့် အုန်းတောများနှင့် ပင်လယ်ပြင်တို့သည် သဘာဝအခြေခံ ခရီးသွားလုပ်ငန်းလုပ်ကိုင်ရန် အင်မတန် အခွင့်အရေးသာသည့် နေရာဖြစ်ပါကြောင်း၊ ဒေသခံများ၏ ပညာရေး၊ ကျန်းမာရေး၊ ရေထွက်ပစ္စည်းတင်ပို့ရောင်းချရေးအတွက် ၎င်းလမ်းကို မပြီးမပြတ်ကျန်ရှိနေခဲ့သော အပိုင်းနှင့်စပ်လျဉ်း၍ မည်သည့်ပုဂ္ဂိုလ်/အဖွဲ့အစည်းတွင် တာဝန်ရှိကြောင်း စိစစ်ဖော်ထုတ်ပေးပါရန်နှင့် ထိရောက်စွာ အရေးယူဆောင်ရွက်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။