(ဆ)-ဒေါပုံမြစ်တွင် နစ်မြုပ်လျက် ရှိသော ဓမ္မစေတီ ခေါင်းလောင်းတော် နှင့် စပ်လျဉ်းသည့်မေးခွန်း

ဒေါပုံမြစ် တွင်နစ်မြှုပ်လျက်ရှိသော ဓမ္မစေတီခေါင်းလောင်းတော်သည် လွှတ်တော် ကိုယ်စားလှယ်တော်ကြီး တင်ပြသွားသည့်အတိုင်း သမိုင်းတန်ဖိုးအရ အဖိုးမဖြတ်နိုင်သော ခေါင်းလောင်းကြီးဖြစ်သည်မှာ အမှန်တကယ် ဖြစ်ပါကြောင်း၊ ယင်းခေါင်းလောင်းတော်ကြီးကို ပြည်ပနိုင်ငံကုမ္ပဏီမှ ကူညီဆယ်ယူ ပေးရန် ကမ်းလှမ်းခြင်းဆိုသည်မှာ ၂၀၁၀ ခုနှစ် စင်ကာပူနိုင်ငံမှ SD Mark International LLP ကုမ္ပဏီမှ ကျွမ်းကျင်ပညာရှင်များ သင်္ဘောများငှမ်းရမ်းမှု အမေရိကန်ဒေါ်လာ ၁၀ သန်း အကုန်အကျခံကာ ရှာဖွေ ဆယ်ယူမည်ဖြစ်ကြောင်း စာရေးဆရာ ဦးချစ်စံဝင်းမှတစ်ဆင့် ယဉ်ကျေးမှု ဝန်ကြီးဌာနသို့ ကမ်းလှမ်းလာပါသည်။ ယင်းကိစ္စနှင့်ပတ်သက်ပြီး ၂၀၁၂ ခုနှစ်၊ မတ်လ ၉ ရက်နေ့တွင် မွန်ပြည်နယ် မဲဆန္ဒနယ်အမှတ်(၅) အမျိုးသားလွှတ်တော် ကိုယ်စားလှယ် ဦးနိုင်ထွန်းအုံမှလည်း ဒီရှေးခေတ် မွန်လူမျိုးတို့ရဲ့ လက်ရာတစ်ခုဖြစ်သော ဓမ္မစေတီခေါင်းလောင်းကြီး သယ်ယူရန် အစီအစဉ်ရှိ/မရှိ ကြယ်ပွင့်ပြမေးခွန်းကို မေးမြန်း လာရာ ယဉ်ကျေးမှုဝန်ကြီးဌာနက ဓမ္မစေတီခေါင်းလောင်းတော်ကြီး ဆယ်ယူရန် ကမ်းလှမ်းလာသော ကုမ္ပဏီ ရှိသော်လည်း နည်းပညာ၊ အတတ်ပညာ၊ ပညာရှင်များ၊ ငွေအင်အားလိုအပ်သော ခေတ်မီကိရိယာများ ပြည့်စုံမှသာ ဆက်လက်ဆောင်ရွက်သွားနိုင်မည် ဖြစ်ကြောင်း ဖြေကြားခဲ့ပါသည်။

ကမ်းလှမ်းသည့် ကုမ္ပဏီအနေဖြင့်လည်း စတင်ကမ်းလှမ်းသည့်အချိန်တွင် ငွေကြေးအတတ်ပညာ ပြည့်စုံပြီး အဆင့်သင့်ဖြစ်သော ကုမ္ပဏီမဟုတ်သည့်အပြင် ပွဲစားသဘောမျိုးဖြင့်သာ ကမ်းလှမ်းသည့်အတွက် ပျက်ပြယ် သွားခြင်းဖြစ်ပါကြောင်း၊ ယဉ်ကျေးမှုဝန်ကြီးဌာနအနေဖြင့်လည်း ငြင်းပယ်လိုက်ခြင်းမဟုတ်ပဲ ဓမ္မစေတီခေါင်းလောင်းတော်ကြီး ဆယ်ယူရန်အတွက် လိုအပ်သည့် အချက်အလက်နည်းပညာ အထောက်အပံ့ဖြစ်စေမည့် အလုပ်ရုံဆွေး နွေးပွဲတစ်ခုကို ၂၀၁၂ ခုနှစ်၊ ဇွန်လ ၃၀ ရက်နေ့က ရန်ကုန်မြို့ Chatrium Hotel မှာကျင်းပခဲ့ရာ အဆိုပါအလုပ်ရုံဆွေးနွေးပွဲတွင် သမိုင်းပညာရှင်များ၊ ရေကြောင်းဆိုင်ရာ ပညာရှင်များ၊ ဆယ်ယူမှုနည်း ပညာဆိုင်ရာပညာရှင်များနှင့် ကျွမ်းကျင်သူများမှ စာတမ်း ၁၁ စောင် ဖတ်ကြားခဲ့ပါသည်။ လိုအပ်မည့် နည်းပညာ၊ ရေကြောင်းပြောင်းလဲမှုနှင့် နုန်းမြေတင်မှုအခြေအနေများ၊ တူးဖော်သည့် စီမံကိန်းများတွင် အခြားလူမှုစီးပွားရေးအတွက် ထည့်သွင်းစဉ်းစားရန် လိုအပ်ပုံများကို အကြံပြု ဆွေးနွေးခဲ့ကြပါကြောင်း၊ ထိုပြင် အခြားလူမှုစီးပွားရေးအတွက် ထည့်သွင်းစဉ်းစားရန် လိုအပ်ပုံများကို အကြံပြု ဆွေးနွေး သွားကြပြီး ခေါင်းလောင်းကြီးနှင့်ပတ်သက်ပြီး ဒဏ္ဍာရီသဖွယ် ဖြစ်နေသော အချက်များအား ထောက်ပြရာ တွင် မြန်မာ့သမိုင်း ဆိုင်ရာ ကျောက်စာအထောက်အထားများ တင်ပြသွားမှုများလည်း ရှိပါကြောင်း၊ ထို့အပြင် နှစ် ၄၀၀ ကျော် အချိန်ကြာမြင့်ခဲ့ပြီးဖြစ်၍ ဒီရေစီးဆင်းမှုနှင့် သဲနှုန်းပို့ချမှုကြောင့် မြေအောက်သို့ ရောက်ရှိမှုများလည်း ရှိနိုင်ကြောင်း တင်ပြခဲ့သည်များ ကြားခဲ့ရပါကြောင်း၊ အထူးသဖြင့် ရေကြောင်းပညာရှင် ဦးချာလီသန်း က ဒီရေကြောင်းပြောင်းလဲမှုသည် နှစ်တစ်ရာတွင် ၁၂ မိုင် ရွေ့လျားသည့်အတွက် ဒီနှစ် ၄၀၀ မှာ ၄၈ မိုင်၊ မိုင် ၅၀ ရွေ့သွားမှာ ဖြစ်တဲ့အတွက် မလွယ်ကူနိုင်ကြောင်း သူတင်ပြခဲ့သည်များလည်း ရှိပါသည်။ ထို့ပြင် ယင်းခေါင်းလောင်းကြီးနဲ့ ပတ်သက်၍ နောက်ပညာရှင်ဦး၏ ဝေဖန်ချက်အရ “ဘရစ်တိုသည် ယင်းခေါင်းလောင်းကြီးအား သန်လျင်သို့ သယ်သွားဆောင်သွားခြင်းသည် သမိုင်းတန်ဖိုးနဲ့ ခေါင်းလောင်းကြီး၏ ယဉ်ကျေးမှုလက်ရာ အတွက် သယ်သွားခြင်းမဟုတ်ပဲ အရည်ကျိုပြီး လက်နက်ထုတ်လုပ်ရန် သယ်ဆောင်သွားခြင်း ဖြစ်သည့်အတွက် ရိုက်ချိုးဖျက်ဆီးပြီး အပိုင်းအစများအဖြစ်လည်း သယ်သွားနိုင်ကြောင်း” တင်ပြခဲ့ပါသည်။ ရှေးဟောင်းဗိသုကာတန်ဖိုးအဖြစ်နဲ့ အကဲဖြတ်ပါက ခေါင်းလောင်း အဖြစ်သာရှိပြီး ဆယ်ယူရရှိခြင်းသည် သာမန်တန်ဖိုးသာဖြစ်၍ ရေကြောင်းပြောင်းလဲနိုင်မှု၊ မြစ်ဝ လမ်းကြောင်းရှုပ်ထွေးနိုင်မှုတို့ ရှိနိုင်သည့် အတွက် ပို့ဆောင်ရေးဝန်ကြီးဌာန၏ သဘောထားလည်း ရယူသင်‌့ပါကြောင်းလည်း ဆွေးနွေးပွဲတွင် သုံးသပ်ခဲ့ကြပါသည်။

ဓမ္မစေတီခေါင်းလောင်း ဆယ်ယူရေးအတွက် ကျိုက်ထီးဆောင်းဆရာတော်က နိုင်ငံတော်သမ္မတရုံးကို ၂၀၁၃ ခုနှစ် ၄ လပိုင်း ၂၉ ရက်နေ့မှာ တင်ပြခဲ့သည့်အတွက် သမ္မတရုံးမှ ယဉ်ကျေးမှုဝန်ကြီးဌာန၏ သဘောထားကို တောင်းခံခဲ့ရာ ယဉ်ကျေးမှု ဝန်ကြီးဌာနအနေဖြင့် သီးခြားသဘောထား ပြန်ကြားရန် မရှိပါကြောင်း နှင့် အစိုးရအဖွဲ့၏ လုပ်ငန်းလမ်းညွှန်အဖြစ် ခွင့်ပြုပါက ဆရာတော်နှင့် အဖွဲ့သည် ရန်ကုန်တိုင်းဒေသကြီး အစိုးရအဖွဲ့သို့ တင်ပြ ဆောင်ရွက်သင်‌့ကြောင်း တင်ပြပြန်ကြားခဲ့ပြီး ဖြစ်ပါသည်။

ပြည်ပနိုင်ငံမှ ကူညီဆယ်ယူခွင့်ကို ယဉ်ကျေးမှုဝန်ကြီးဌာနက ခွင့်မပြုသေးပါသဖြင့် ဆယ်စုနှစ်များ စွာ စောင့်ဆိုင်းခဲ့ရသည့်ကိစ္စမှာ မှန်ကန်မှုမရှိပါကြောင်း၊ ယင်းပြည်ပ ကုမ္ပဏီမှလည်း ကုမ္ပဏီမိတ်ဆက်နဲ့ အတွေ့အကြုံကိုသာ တင်ပြနိုင်ပြီး ငွေကြေးခိုင်ခိုင်မာမာရှိသော အထောက်အထား၊ သုတေသန ပြုစုဆောင်ရွက် မှုများ၊ အဆိုပါ ကုမ္ပဏီနှင့်ပတ်သက်ပြီး ဆောင်ရွက်မှုမှတ်တမ်း အထောက်အထားများနှင့် ပြည့်စုံခိုင်လုံစွာ တင်ပြနိုင်မှု မရှိသည့်အချက်များကြောင့် ကူညီခွင့်ပြုနိုင်ရေးအတွက် ထောက်ခံချက် ပေးနိုင်ခြင်း မရှိပါကြောင်း၊ ယဉ်ကျေးမှုဝန်ကြီးဌာန တစ်ခုတည်းအနေဖြင့်လည်း ထောက်ခံခွင့်ပြု၍ မရသည့်အပြင် ဓမ္မစေတီ ခေါင်းလောင်းတော်ကို ဆယ်ယူရေး ကိစ္စရပ်တွင် တွေ့ကြုံနေရသည့် အခက်အခဲများ၊ ခေတ်မီ နည်းပညာပစ္စည်း အပြည့်အဝ မသုံးစွဲနိုင်ခြင်း၊ ကုန်ကျစရိတ်ကြီးမားမှုကြောင့် ပညာရပ်နယ်ပယ် အသီးသီးမှ ပညာရှင်များ ပံ့ပိုးပါဝင်မှုအားနည်းခြင်း၊ လောကီ၊ လောကုတ္တရာ ယုံကြည်မှုအစွဲအလမ်းများ ရှိနေကြခြင်း၊ ခေါင်းလောင်းတော်ကြီး ရေတွင်ကျခဲ့သည့် အချိန်မှစ၍ နှစ်ပေါင်း ၅၀၀ ခန့်အကြာ ရေကြောင်းပြောင်းလဲမှု၊ နုန်း‌မြေပို့ချမှု၊ ပထဝီအနေအထားပြောင်းလဲမှု၊ ငလျင်နှင့် မိုးလေဝသအန္တရာယ်များ ပေါ်ပေါက်မှု၊ မြို့ပြဧရိယာချဲ့ထွင်မှု၊ လူနေမှုသိပ်သည်းမှု စသော အခက်အခဲများရှိနေပြီး ဆယ်ယူရရှိရန်အတွက် လျာထားသတ်မှတ်ထားသော အချိန်ကာလ မရှိသေးပါကြောင်း ပြန်လည်ဖြေကြားပါသည်။