(ခ)-မင်းပြားမြို့ကမ်းပြိုထိန်းသိမ်းရေးဆောင်ရွက်ရာ၌ ကျွမ်းကျင်ပညာရှင်များက ကွင်းဆင်းလေ့လာ ပြီး ကောင်းမွန်သော နည်းပညာများဖြင့် ကမ်း ပြိုခြင်း ကို ထိန်းသိမ်းရန် အစီအစဉ် ရှိ/မရှိ နှင့် စပ်လျဉ်း သည့် မေးခွန်း

ရခိုင်ပြည်နယ်၊ မင်းပြားမြို့ ကမ်းပြိုကာကွယ်ရေးလုပ်ငန်း များအား ပို့ဆောင်ရေးဝန်ကြီးဌာန၊ ရေအရင်းအမြစ်နှင်‌့ မြစ်ချောင်းများ ဖွံ့ဖြိုးတိုးတက်ရေး ဦးစီးဌာနမှ ၁၉၉၉-၂၀၀၀ ဘဏ္ဍာရေးနှစ်မှ ၂၀၁၁-၂၀၁၂ ဘဏ္ဍာရေးနှစ်အထိ ကျပ်သန်းပေါင်း ၂၄၆.၄၀၆ သန်း ကိုသုံးစွဲပြီးတော့ သဲမွေ့ယာချထားခြင်း ၁၃၂၀ ပေ၊ Geotube ချထားခြင်း ၂၄၉၀ ပေ၊ ကျောက်စီတမံ ၅၃၀ ပေ၊ Steel Basket မြေထိန်းနံရံ ၁၂၀ ပေ၊ Steel Basket အခြေပြုကျောက်စီနံရံ ၈၀၀ ပေ၊ Timber Pile အခြေပြုကျောက်စီနံရံ ၅၀ ပေ၊ မျောတိုင်၊ တိုင်တန်း သဲအိတ်ခံကျောက်စီ ရေကာရေလွှဲ ရေကာ ၅၀ ပေ ၃ ခု ၁၅၀ ပေကို ဒီ ၁၂ နှစ် ကာလအတွင်းတွင် ဆောင်ရွက်ပေးခဲ့ပါကြောင်း၊ မင်းပြားမြို့ အထက် ဘက်ရှိ လေးမြို့မြစ်၏ မြစ်ကြောင်း ပုံသဏ္ဍာန်အရ ရေ လမ်းကြောင်း ပြောင်းလွှဲ၍ တူးမြောင်းဖောက်လုပ်ရန် မဖြစ်နိုင်ခြင်း၊ မင်းပြားမြို့မြစ်ကမ်းတစ်လျှောက်နှင့် မြို့အထက်ဘက်ရှိ မြစ်ကမ်းတစ်လျှောက်တွင် ရေအနက်မြင့်မားသောအတွက် ရေလွှဲ ရေကာများ တည်ဆောက်ရန် မလွယ်ကူ ခြင်းတို့ကြောင့် တိုက်ရိုက်ကာကွယ်နည်းစနစ်ဖြစ်သော ကမ်းထိန်းတမံများနှင့် ကမ်းထိန်း နံရံများအား တည်ဆောက် ကာကွယ်ပေးရခြင်း ဖြစ်ပါကြောင်း၊ မင်းပြားမြို့ ကမ်းပြိုကာကွယ်ရေး အတွက် ရေ လမ်းကြောင်း ပြောင်းလွှဲရန် မလွယ်ကူသည့်အတွက် ကမ်းထိန်းတမံများနဲ့ အတူ ရေကာတိုများအား အုန်းတိုင် သို့မဟုတ် ကွန်ကရစ်တိုင်များ အသုံးပြု၍ အဆင့်ဆင့် တည်ဆောက်ကာကွယ်ရန် လိုအပ်ပါသည်။ နှစ်စဉ် ခွင့်ပြုရရှိသော ရန်ပုံငွေ အပေါ်မူတည်ပြီး ကွင်းအခြေအနေအရ လုပ်ငန်းသုံး ပစ္စည်းများ အားရွေးချယ် အသုံးပြု သွားရမည်ဖြစ်ပါသည်။ ထို့အပြင် တိုးတက်ဖြစ်ပေါ်လာတဲ့ ကမ်းပါးအခြေအနေ အပေါ်မူတည်ပြီး နှစ်အလိုက် ဆက်လက် ဆောင်ရွက်သွား ရန်လည်း လိုအပ်မည်ဖြစ်ပါသည်။ ပို့ဆောင်ရေး ဝန်ကြီးဌာန၊ ရေ အရင်းအမြစ်နှင်‌့ မြစ်ချောင်းများ ဖွံ့ဖြိုးတိုးတက်ရေး ဦးစီးဌာနအနေဖြင့် ရေကြောင်းသွားလာမှုရှိသော အဓိကမြစ်ကြီးများ၏ ရေလမ်းကြောင်း ကောင်းမွန်ရေးအတွက် မြစ်ကြောင်း ပြုပြင်ထိန်းသိမ်းရေး လုပ်ငန်းများကို ဘဏ္ဍာငွေ လျာထားသတ်မှတ်တောင်းခံပြီး ဦးစားပေးဆောင်ရွက်လျက် ရှိပါကြောင်း၊ သို့ဖြစ်ပါ၍ ရခိုင်ပြည်နယ် ကျောက်တော် မဲဆန္ဒနယ် ပြည်သူ့လွှတ်တော် ကိုယ်စားလှယ် မေးမြန်းထားသော မင်းပြားမြို့ ရေ တိုက်စားမှု ကာကွယ်ရေး လုပ်ငန်းများအတွက် ပို့ဆောင်ရေး ဝန်ကြီးဌာန၊ ရေအရင်း အမြစ်နှင်‌့ မြစ်ချောင်းများ ဖွံ့ဖြိုးတိုးတက်ရေးဦးစီးဌာနမှ ခေတ်မီနည်းပညာများ ပံ့ပိုးကူညီမှုကိုသာ ဆောင်ရွက်ပေးနိုင်မည် ဖြစ်ပြီး ဘဏ္ဍာငွေရရှိရေးကဏ္ဍအား ရခိုင်ပြည်နယ်အစိုးအရ အဖွဲ့အနေဖြင့် ပြည်ထောင်စုအစိုးရအဖွဲ့သို့ တင်ပြတောင်းခံ ဆောင်ရွက်သွားသင့်ပါကြောင်း ဖြေကြားပါသည်။

ပြည်သူ့လွှတ်တော် ဥက္ကဋ္ဌကြီးမှလည်း

 ဦးဖေသန်းမေးမြန်းသော မေးခွန်းအပေါ်မူတည်ပြီး ပြည်ထောင်စု ဒုတိယ ဝန်ကြီး ဖြေကြားချက်တွင် “သက်ဆိုင်ရာ ရခိုင်ပြည်နယ်က ဘဏ္ဍာငွေ တောင်းရ မည် ဆိုသည်မှာ မှန်ကန်မှုရှိပါသလား” မေးမြန်းရာ ပို့ဆောင်ရေးဝန်ကြီးဌာန၊ ဒုတိယဝန်ကြီး ဦးဟံစိန်က မှန်ကန်ကြောင်းဖြေကြား ခဲ့သည့်အတွက် ပြည်သူ့ လွှတ်တော် ဥက္ကဋ္ဌကြီးက ရခိုင်ပြည်နယ်အစိုးရကို လွှတ်တော်အနေဖြင့် အကြောင်းကြားပေး သွားမည်ဖြစ်ပါကြောင်း၊ ရခိုင်ပြည်နယ်အနေဖြင့်လည်း ကမ်းပြိုကမ်းထိန်းကိစ္စနှင့် ပတ်သက်၍ အလေးထားပြီး တင်ပြပေးရန် ဆက်လက် ဆောင်သွားမည် ဖြစ်ပါကြောင်း၊ ဤကိစ္စရပ်များကို သက်ဆိုင်ရာ ပြည်ထောင်စု ဝန်ကြီးဌာနက သိရှိပြီး လိုအပ်သည်များ အား ပေါင်းစပ် ညှိနှိုင်းပေးရန်ဖြစ်ကြောင်း ညွှန်ကြားပါသည်။