(ဇ)-မောက်မယ်မြို့နယ်အတွင်းရှိ အခြေခံပညာမူလတန်းကျောင်း ၅ ကျောင်းတို့အား မူလရုပ်နှင့်ဥပဓိရုပ် ထွက်ရှိရေး မည်သည့်ဘဏ္ဍာရေးနှစ်တွင် ဆောင်ရွက်ပေးမည်ကို သိလိုခြင်းနှင့်စပ်လျဉ်းသည့် မေးခွန်း

ပညာရေးဝန်ကြီးဌာနအနေနှင့် ကျောင်းဆောင်သစ်များ တည်ဆောက်ခြင်း၊ ပြုပြင်ထိန်းသိမ်းခြင်း၊ အပြီးသတ်ဆောက်လုပ်မှု လုပ်ငန်းများနှင့် ပတ်သက်ပြီး ဘဏ္ဍာရေးစည်းမျဉ်း စည်းကမ်းများ၊ ကျောင်းဆောက်လုပ်ရေးပြီးစီးသည့် သက်တမ်းကြာမြင့်ပြီး အန္တရာယ်ရှိမှုအခြေအနေ၊ လုပ်ထုံးလုပ်နည်းများ အရလည်းကောင်း၊ မြို့နယ်ဦးစားပေးအစီအစဉ် ကျောင်းအလိုက်နှင့် တန်းစီဇယားများမှ ထည့်သွင်း လျာထားခြင်းဖြင့်လည်းကောင်း၊ စီမံဆောင်ရွက်ပေးလျက်ရှိပါသည်။ ထို့ကြောင့် ရှမ်းပြည်နယ်(တောင်ပိုင်း)၊ မောက်မယ်မြို့နယ်အတွင်းရှိ ဥပဓိရုပ်မကောင်းသည့် ကျောင်းများဖြစ်သော ကုန်းလမ်း အခြေခံပညာ မူလ တန်းလွန်ကျောင်း၊ ပုန်းလော၊ နားသဲ၊ နားဟီးနှင့် နောင်ခမ်းအခြေခံပညာ မူလတန်းကျောင်းများတွင် ပေ ၆၀၊ ပေ ၃၀၊ သံကူကွန်ကရစ် တစ်ထပ်ကျောင်းဆောင်သစ်များ ဆောက်လုပ်ပေးရန်အတွက် ဘဏ္ဍာရေးစည်းမျဉ်း စည်းကမ်းများ၊ လုပ်ထုံးလုပ်နည်းများနှင့်အညီ တစ်ကျောင်းလျှင် ငွေကျပ် ၃၂.၄ သန်းနှုန်းဖြင့် ၂၀၁၅-၁၆ ဘဏ္ဍာရေးနှစ်၊ ငွေလုံးငွေရင်း ရန်ပုံငွေခေါင်းစဉ် အောက်မှလျာထားချက်စာရင်းတွင် လျာထားတင်ပြပြီး ဖြစ်ပါကြောင်း ရှင်းလင်းဖြေကြားပါသည်။