(ည)-ချောင်းဆုံမြို့နယ်ရှိ တောင်သူလယ်သမားများ တွေ့ကြုံနေရသော ရေကြီးရေလျှံခြင်း ဒုက္ခများအတွက် လိုအပ်သည်များ ဖြည့်ဆည်းဆောင်ရွက်ပေးရန်နှင့် ဆည်များတည်ဆောက်ပေးရန် အစီအစဉ်ရှိ၊ မရှိ နှင့်စပ်လျဉ်းသည့် မေးခွန်း

မွန်ပြည်နယ်၊ ချောင်းဆုံ မြို့နယ်တွင်တည်ရှိသော ဘီးလူးကျွန်းသည်  မိုးရာသီကာလတွင် ရေကြီးနစ်မြုပ် မှုများ နှစ်စဉ်ဖြစ်ပေါ်လေ့ရှိသဖြင့် ရေငန်တားတာများ ရှေးယခင်ကပင် တည်ဆောက်ပေးခဲ့ပါသော်လည်း ရေတံခါး များထည့်သွင်းတည်ဆောက်နိုင်ခဲ့ခြင်း မရှိခဲ့သည့်အတွက် မိုးသည်းထန်စွာ ရွာသွန်းသည့်ကာလနှင့် ထူးကဲ ဒီရေတက်သည့်ကာလတို့ ကြုံကြိုက်သည့်အချိန်တွင် လယ်ယာမြေများ ရေကြီးနစ်မြုပ်မှု၊ ပျက်စီးဆုံး ရှုံးမှုများ ဖြစ်ပေါ်လေ့ရှိပါကြောင်း၊ ထို့ကြောင့် လယ်ယာမြေများရေကြီးနစ်မြုပ်မှု လျော့နည်းသက်သာစေရန် အတွက် သဘာဝရေနုတ်‌မြောင်းများ တူးဖော်ခြင်းနှင့် ရေငန်တားတာများ တာပုံစံကျ ပြုပြင်ခြင်းလုပ်ငန်းများကို ဆည်မြောင်းဦးစီးဌာနမှ နှစ်စဉ်ဆောင်ရွက်ပေးလျက်ရှိရာ ၂၀၁၁မှ ၂၀၁၄ ဘဏ္ဍာရေးနှစ်အထိ ရေနုတ်‌မြောင်း ၁၂ ခုနှင့် ရေငန်တားတာပုံစံကျပြုပြင်ခြင်း  တစ်ခုကို ဆောင်ရွက်ပေးနိုင်ခဲ့ပြီး ဧရိယာဧက ၁၃၀၀၀ကျော်ကို ရေဘေးကာကွယ်ပေးနိုင်ခဲ့သည့်အပြင် ၂၀၁၄-၁၅ ဘဏ္ဍာရေးနှစ်တွင်လည်း ရေဘေးကာကွယ် ဧက ၂၂၀၀ ဧကကို အကျိုးပြုနိုင်မည့် မုကွဲ-မုခနိတူးမြောင်းနှင့် အဝပြဲချောင်းတူးမြောင်းတူးဖော်ခြင်း၊ ဇီးကုန်းဆယ်ပလာတာတမံပြုပင်ခြင်း လုပ်ငန်းများ ဆောင်ရွက်ပေးခဲ့ပြီးဖြစ်ပါကြောင်း၊ဆက်လက်၍ ဆပီလခတ်ချောင်းတူးဖော်ခြင်း လုပ်ငန်းကိုလည်း ပွင့်လင်းရာသီတွင်ဆောင်ရွက်ပေးသွားမည်ဖြစ်ပါကြောင်း၊ ကွမ်လှာတူးမြောင်း၊ ကွမ်တော်ချောင်းနှင့် မုဒွန်းကြီးချောင်း ပြန်လည်တူးဖော်ခြင်းလုပ်ငန်းမျ‌ား ဆောင်ရွက်ရန်အတွက် ကွင်းဆင်းလေ့လာ တိုင်းတာလျက်ရှိပြီး လာမည့်ဘဏ္ဍာရေးနှစ်များတွင် ရန်ပုံငွေရရှိမှုပေါ်မူတည်၍ ဆောင်ရွက်ပေးသွား မည်ဖြစ်ပါကြောင်း၊

ရေကြီးနစ်မြုပ်မှုများအား အပြည့်အဝကာကွယ်နိုင်ရန် ရေငန်တားတမံများ ပြုပြင်တည်ဆောက်ပေးရန်လည်း လိုအပ်သည့်အတွက် ပင်လယ်ရေငန် ဝင်ရောက်မှု ကာကွယ်ရန်အတွက် တည်ဆောက်ထားသော ရေငန်တားတမံများကို နှစ်စဉ်ရရှိသည့် ရန်ပုံငွေအခြေအနေအရ သာမန်ပြုပြင်ထိန်းသိမ်းခြင်းလုပ်ငန်းများသာ ဆောင်ရွက်ပေးနိုင်ခဲ့သည့်အတွက် တာတမံများကို ပုံစံကျပြန်လည်ပြုပြင်ရန်နှင့် လိုအပ်သည့်နေရာ များတွင် ရေချိုသိုလှောင်နိုင်မည့် ရေတံခါးများ ထည့်သွင်းတည်ဆောက်ပေးရမည်ဖြစ်ပါကြောင်း၊ ထိုသို့ ဆောင်ရွက်နိုင်ရန်အတွက် မြေပြင်တိုင်းတာခြင်းနှင့် ဇလဗေဒဆိုင်ရာ စူးစမ်းလေ့လာခြင်းလုပ်ငန်းများ ဆက်လက်ဆောင်ရွက်ပေးသွားမည် ဖြစ်ပါကြောင်း၊

နွေရာသီသီးနှံများ စိုက်ပျိုးနိုင်ရေးအတွက် စိန်မြတောင်ရေလှောင်တမံ နှင့် ကတောင်စိန်ရေလှောင်တမံ တို့အား တည်ဆောက်နိုင်ရန် ယခင်က ပဏာမစူးစမ်းလေ့လာမှုများ ဆောင်ရွက်ခဲ့ပြီးဖြစ်ပါသည့်အတွက် မြေပြင်တိုင်းတာ ခြင်းလုပ်ငန်းများ၊ ဇလဗေဒနှင့် ဘူမိဗေဒဆိုင်ရာ စူးစမ်းလေ့လာမှုများ၊ သဘာဝ ပတ်ဝန်းကျင်နှင့် လူမှု စီးပွားဘဝ ထိခိုက်နိုင်မှုဆန်းစစ်ချက် EIA,SIA လုပ်ငန်းများ ဆက်လက် ဆောင်ရွက်ပြီး နောက် အားသာ ချက်များရှိမှုအပေါ်တွင် ဆက်လက်ဆောင်ရွက် ပေးသွားမည်ဖြစ်ပါကြောင်း ပြန်လည် ဖြေကြားပါသည်။