(စ)-မကွေးတိုင်းဒေသကြီး မြန်မာ့စီးပွားရေးဘဏ်၊ သရက်ခရိုင်ဘဏ်ခွဲ အဆောက်အဦသည် နှစ်ကာလ ကြာမြင့်ပြီး ဟောင်းနွမ်းဆွေးမြည့်ခြင်း၊ အန္တရာယ်ရှိသည့်အတွက် အဆောက်အဦအသစ် တည်ဆောက်ခွင့်ပြုပါရန်နှင့် စပ်လျဉ်းသည့်မေးခွန်း

မြန်မာ့စီးပွားရေးဘဏ်အနေနဲ့ ရုံးချုပ်ဌာနကြီး ခြောက်ခုအပါအဝင် တိုင်းဒေသကြီး၊ ပြည်နယ်ရုံးပေါင်း ၁၄ ခု၊ ခရိုင်အဆင့်ကွပ်ကဲ ဘဏ်ခွဲ ၇၆ ခု၊ မြို့နယ်အဆင့်ဘဏ်ခွဲ ၂၁၅ ခု၊ ဘဏ်ငွေတိုက်ခွဲအဆင့် ၁၈ ခု၊ ငွေစုဘဏ်ရုံးခွဲတစ်ခုနှင့် ကိုယ်စားလှယ်ရုံးခွဲ ငါးခု စုစုပေါင်း ဘဏ်ခွဲပေါင်း ၃၃၅ ခု ဖွင့်လှစ်ပြီး ပြည်သူများကို ဘဏ်ဝန်ဆောင်မှု ပေးလျက်ရှိပါကြောင်း၊ မြန်မာ့စီးပွားရေးဘဏ်၏ သရက်ခရိုင်ဘဏ်ခွဲ အဆောက်အဦနှင့် ပတ်သက်ပြီး ၂-၄-၁၉၆၂ ရက်နေ့ နိုင်ငံတော်ကူးသန်းရောင်းဝယ်ရေး ဘဏ်လက်ထက်ကစပြီး လူနေအိမ်အဆောက်အဦကို ဘဏ်ခွဲအဆောက်အဦအဖြစ် ငှားရမ်းအသုံးပြုခဲ့ခြင်း ဖြစ်ပါကြောင်း၊  ၅-၃-၂၀၀၁ ခုနှစ်တွင် မြန်မာ့စီးပွားရေးဘဏ်က အပြီးအပိုင် ဝယ်ယူခဲ့ပါကြောင်း၊ ယခုအခါ သက်တမ်းအားဖြင့် ၅၆ နှစ်ကျော်ရှိလာပြီဖြစ်ပြီး မြေဧရိယာ (အလျား ၄၀ ပေ x အနံ ၄၉ ပေ) ဝ.၀၄၆ ဧကအကျယ်မှာ အဆောက်အဦ (အလျား ၄၀ ပေ x အနံ ၄၀ ပေ) နှစ်ထပ် RC အဆောက်အဦဖြစ်ပါကြောင်း၊ သက်တမ်းကြာမြင့်လာပြီ ဖြစ်သည့်အတွက်ကြောင့် အဆောက်အဦအသစ် ဆောက်လုပ်ရန် လိုအပ်လာပြီ ဖြစ်ပါကြောင်း၊

အဆိုပါဘဏ်ခွဲ အဆောက်အဦမှာ ဘဏ်ခွဲအချင်းချင်း လုပ်ငန်းဆောင်ရွက်မှု မြန်ဆန်စေရန်နှင့် ဘဏ်လုပ်ငန်း ဝန်ဆောင်မှုများဖြစ်သည့် ငွေလွှဲလုပ်ငန်း၊ ငွေစုဘဏ်လုပ်ငန်းများအပြင် နိုင်ငံ့ဝန်ထမ်း အငြိမ်းစား ၁၆၆၇ ဦးကိုလည်း လစဉ်ပင်စင်လစာများ ထုတ်ပေးခြင်းကို ဆောင်ရွက်လျက်ရှိပါကြောင်း၊ ဘဏ်သို့လာရောက်သည့် Customer များ နေရာကျဉ်းကြပ်မှု မရှိစေရန်နှင့် ဘဏ်၏ဥပဓိရုပ် ကောင်းမွန်စေရန်အတွက် အကြီးစားပြင်ဆင်မှု ဆောင်ရွက်နိုင်ရန် ၂၀၁၅-၁၆ ဘဏ္ဍာရေးနှစ်နှင်‌့ ၂၀၁၆-၁၇ ဘဏ္ဍာရေးနှစ်များတွင် ရန်ပုံငွေ ၄၅ သန်းထည်‌့သွင်းတောင်းခံရန် လျာထားခဲ့ပါကြောင်း၊ ရန်ပုံငွေ မူဘောင်သတ်မှတ်ချက်အရ ဘတ်ဂျက်တောင်းခံရရှိခြင်း မရှိခဲ့သည့်အတွက်ကြောင့်  ၂၀၁၇-၁၈ ဘဏ္ဍာရေးနှစ်တွင် အဆောက်အဦအကြီးစား ပြင်ဆင်ရန်အတွက် ငွေလုံးငွေရင်းရန်ပုံငွေကျပ် ၄၅ သန်း ထပ်မံလျာထားတောင်းခံခဲ့ပါကြောင်း၊ လွှတ်တော်၏ စိစစ်ချက်အရ ကျပ် ၂၁.၆ သန်းရရှိခဲ့သည့်အခါ အဆိုပါရရှိသည့် ရန်ပုံငွေဖြင့် မကွေးတိုင်းဒေသကြီး အစိုးရအဖွဲ့ကို လုပ်ငန်းအပ်နှံ ဆောင်ရွက်ခဲ့သော်လည်း အဆောက်အဦအခြေအနေအရ အကြီးစားပြင်ဆင်ရမည့် လုပ်ငန်းပမာဏ များပြားခြင်းနှင့် ဘတ်ဂျက်ခွင်‌့ပြုငွေအားဖြင့် လုံလောက်မှုမရှိခြင်းတို့ကြောင့် တင်ဒါတင်သွင်းသူ မရှိခဲ့သည့်အတွက်ကြောင့် တိုင်းဒေသကြီးအစိုးရအဖွဲ့မှ လုပ်ငန်းပြန်လည် အပ်နှံလာခဲ့ပါကြောင်း၊ ထို့ကြောင့် မြန်မာ့စီးပွားရေးဘဏ်၊ သရက်ခရိုင်ဘဏ်ခွဲ မူလအဆောက်အဦဟောင်းကို ဖျက်သိမ်းပြီး လာမည့် ၂၀၁၈ ခုနှစ် အောက်တိုဘာလတွင် စတင်မည့် ၂၀၁၈-၁၉ ဘဏ္ဍာရေးနှစ်တွင် ခရိုင် ဘဏ်ခွဲအဆင့်နှင်‌့ လျော်ညီသည့် ဘဏ်ခွဲအဆောက်အဦသစ်ကို ဆောက်လုပ်နိုင်ရန်အတွက် ငွေလုံးငွေရင်း ရန်ပုံငွေထည်‌့သွင်းတောင်းခံရန် စီစဉ်ဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။