(ဃ)-လမ်းတံတားကြေးကောက်ယူခွင့်ရကုမ္ပဏီ အဖွဲ့စည်းများ၏စာချုပ်ပါစည်းကမ်းနှင့်အညီဆောင် ရွက်မှုရှိ/မရှိစည်းကမ်းနှင့်မညီလုပ်ဆောင်မှုကိုမည်သို့ အရေးယူဆောင်ရွက်ပြီးကြီးကြပ် ကွပ်ကဲရန်ပျက် ကွက်သောတာဝန်ရှိဝန်ထမ်းအဖွဲ့ကိုမည်သို့အရေးယူ ရန်နှင့် စပ်လျဉ်းသည့်မေးခွန်း

မိုးတွင်းကာလတွင် AK ကုမ္ပဏီလုပ်ပိုင်ခွင့်ရသည့် မုဒုံမြို့နှင့် သံဖြူဇရပ်ကြား ပြည်ထောင်စု ကားလမ်း ပိုင်းသည်ကျင်း၊ ချိုင့်များစွာ ဖြစ်ပေါ်ပြီး ယာဉ်များ အန္တရာယ်ဖြစ်သည်အထိ ပျက်စီးခဲ့ပါကြောင်း၊ မွန်ပြည်နယ်လွှတ်တော်မှတစ်ဆင့် အမြန်ချိတ်ဆက်ပြီး အစိုးရအစီအစဉ်ဖြင့် လမ်းများကို အမြန်လိုက်လံဖာထေးခဲ့ကြရပါကြောင်း၊ အချို့လူမှုကွန်ရက်ကတစ်ဆင်‌့ လမ်းအခြေအနေသိရအောင်ဆိုပြီး ဓာတ်ပုံများဖြင်‌့ ပြည်သူလူထုမှ တင်ပြကြပါကြောင်း၊ မိမိတို့ကိုယ်စားလှယ်များရှုထောင့်မှနေပြီး နောင်ယခုလိုမဖြစ်ရန် မည်သည့်အတွက်ကြောင်‌့ ဖြစ်သည် ဆိုသည့်အကြောင်းရင်းကို ပြင်ဆင်နိုင်ရန်အတွက် စုံစမ်းပါကြောင်း၊  စာချုပ်ကို ဆောက်လုပ်ရေးဝန်ကြီးဌာနနှင့် AK ကုမ္ပဏီတို့ချုပ်ဆိုသည့် အချက်ကို လေ့လာစမ်းစစ်ကြည့် ခဲ့ပါကြောင်း၊ ၂၇-၁၂-၂၀၁၁ ရက်နေ့မှစပြီး စာချုပ်ချုပ်ဆိုခဲ့ပါကြောင်း၊ နှစ် ၄၀ လုပ်ပိုင်ခွင့် ပေးထားပြီးနှစ်စေ့လျှင် သက်တမ်းသုံးကြိမ်တိုးခွင့် ၅ နှစ်စီပေးထားသည့်အတွက် ၅၅ နှစ်တိုင် လုပ်ပိုင်ခွင့်ပေးခဲ့သည်ကို တွေ့ရပါကြောင်း၊ စပေါ်ငွေကို အာမခံစနစ်တွင် ရင်းနှီးမြှုပ်နှံသည့်ငွေ၏ ၁ ရာခိုင်နှုန်းကိုသာ တင်ခိုင်းထားသည်ကိုတွေ့ရပါကြောင်း၊ ယခု ၆ နှစ်အတွင်း ကောက်ခဲ့သည့်ငွေသည် ၁ ရာခိုင်နှုန်းမကတော့ပါကြောင်း၊ ထို့ကြောင်‌့ ၎င်း အာမခံစနစ် သည် အားနည်းသည်ကို သိရှိရပါကြောင်း၊ ၎င်းနှုန်းနှင့်ဆိုပါက အချိန်မရွေး စည်းကမ်းမလိုက်နာနိုင်ပါကြောင်း၊ အရည်အသွေးပိုင်း သတ်မှတ်မှုတွင် ဥပမာ- ရေပိတ်လွှာခင်းခြင်း ဆိုသည့်ခေါင်းစဉ် အောက်တွင် ၃ လက်မ သိပ်သည်းပြီး ကတ္တရာအလွှာ စခင်းပြီး ၎င်းပေါ်တွင် ၁.၅ လက်မရှိသည့် ကတ္တရာစီးဝင်လွှာကို  နှစ်ကြိမ်ခင်းရမည်ဟု ပါရှိပြီး၊ (၂) အချက် (ဌ) တွင် ယာဉ်နှင့်ကုန်အလေးချိန် တန် ၆၀ ရှိသော ခံနိုင်ဝန်ရှိလမ်းဖြစ်ရမည်ဟု ဖော်ပြထားသည့်အတွက် စံချိန်စံညွှန်းသတ်မှတ်ချက်မှာ အလွန်ကောင်းပါ ကြာင်း၊ သို့သော် လမ်းခင်းပေးသူသည် ၎င်းအတိုင်းခင်းခဲ့ခြင်းရှိမရှိနှင့် စစ်ဆေးကြီးကြပ်ရန် တာဝန်ရှိသူအနေဖြင့် စေ့စပ်သေချာစွာ စစ်ဆေးကြီးကြပ်ခဲ့ခြင်း တို့ကို ဆန်းစစ်ကြည့်သည့်အခါ တာဝန် ပျက်ခဲ့ကြသည့် အတွက် မိုးရွာတာနှင့် လမ်းမကြီးတွင် ကျောက်ပေါက်မရောဂါများ ဖြစ်ခဲ့ခြင်း သည် သက်သေထင်ရှား ဖြစ်ပါကြောင်း၊  ထို့ကြောင့် နောင်ယခုလိုမဖြစ်အောင် တစ်နိုင်ငံလုံးကိုခြုံပြီး စာချုပ်များကို ပြန်စိစစ်ပြင်ဆင်ရန်လိုအပ်ပါကြောင်း၊ မိမိလေ့လာချက်အရ အကြံပြုတိုက်တွန်းချင်သည့် အချက်(၅)ချက်ရှိပါကြောင်း၊  (၁) အခြေခံ Data များကို အကြံပြုစုစေလိုပါကြောင်း၊  မိမိတို့ဒေသတွင် တစ်နေ့ပျမ်းမျှအစီးရေ ၂၅၀ ဖြတ်ပါက ၁၈ ပေကျယ်မှ ၂၄ ပေကျယ်လမ်းကို ခင်းပေးရမည်၊ မည်သည့်အဖွဲ့မှ မည်သူစစ်ဆေးနေသည်ကိုတော့ မသိပါကြောင်း၊ အစီးရေ ၂၀၀၀ ကျော်ပါက ကွန်ကရစ်ကတ္တရာ ၂၄ ပေခင်းရမည်ဟု ရေးထားပါကြောင်း၊  ကျိုက္ခမီဘုရားပွဲနှင့် သြင်္ကန်ကာလ ဖြတ်သည့် ကားအစီးရေသည် ၇ မိုင်အရှည်ကို ယာဉ်ကြောပိတ်ဆို့မှုဖြစ်လောက်အောင် များပါကြောင်း၊ ထို့ကြောင့် မိမိတို့ဒေသခံများက နိုင်လွန်ကတ္တရာ ခင်းပေးရန်သင့်နေပြီ  တောင်းဆိုခြင်းဖြစ်ပါကြောင်း၊ (၂) ဒေသစားသောက်ကုန်တင်ယာဉ်နှင့် အစိုးရတာဝန်ကြီးကြပ်သည့် ထုတ်ကုန်များနှင့် ပတ်သက်၍ လျှော့ပေါ့ကောက်ရမည်ဟု ပါရှိပါကြောင်း၊ ၎င်းကို ဘယ်နှစ်ရာခိုင်နှုန်းလျှော့မည်ဟု တိတိကျကျ မချုပ်ဆို ထားပါကြောင်း၊ လူထုလည်းမသိရပါကြောင်း၊ ထို့ကြောင့်‌ သိအောင်ဖော်ပြသင့်ပါကြောင်း ၊ (၃) ငါးနှစ်တစ်ကြိမ်အစိုးရလဲသည့်အတွက် အစိုးရတိုင်းကို နှစ်စဉ်စာချုပ်များအသိပေးသင့်ပါကြောင်း၊ (၄) လမ်းအရည်အသွေးပိုင်းစစ်ဆေးမှုကို ဌာနဝန်ထမ်းလောက် နှင့်မလုံလောက်သည့်အတွက် လူထုပါဝင်သည့်အဖွဲ့ ဖွဲ့စည်းပြီး စစ်ဆေးသင့်ပါကြောင်း၊(၅) ယခုဖြစ်သမျှအပြီးတွင် စံချိန်စံညွှန်း စည်းကမ်းနှင့်မညီသည့်ကုမ္ပဏီကို အရေးယူမှုများလုပ်ရန် လိုအပ်ပါကြောင်းနှင့် လမ်းတံတားကြေး ကောက်ယူခွင့်ရ ကုမ္ပဏီအဖွဲ့အစည်းများ၏ စာချုပ်ပါစည်းကမ်းနှင့်အညီ ဆောင်ရွက်မှုရှိ/မရှိ၊ စည်းကမ်း နှင့်မညီ လုပ်ဆောင်မှုကို မည်သို့အရေးယူဆောင်ရွက်ပြီး ကြီးကြပ်ကွပ်ကဲရန် တာဝန် ပျက်ကွက်သော တာဝန်ရှိဝန်ထမ်းအဖွဲ့ကို မည်သို့အရေးယူရန် စီစဉ်ဆောင်ရွက်လျက်ရှိသည်နှင့် ပတ်သက်၍ သိလိုပါကြောင်း မေးမြန်းပါသည်။