မေးခွန်း အကြောင်းအရာ
လယ်ဝေးမြို့နယ်သည် ကျေးရွာ ပေါင်း ၂၆၁ ရွာ၊ ရပ်ကွက်ကြီးခုနစ်ရပ်ကွက်နှင့် လူဦးရေ ၂၈၃၀၀၀ ကျော်ရှိသည့် မြို့ကြီးတစ်မြို့ဖြစ်ပါကြောင်း၊ လမ်းပန်းဆက်သွယ်ရေးခက်ခဲမှုများကြောင့် အစစအရာရာ ဖွံ့ဖြိုးတိုးတက်မှုနိမ့်ကျနေရသည့် မြို့တစ်မြို့ဖြစ်ပါကြောင်း၊ သွားလာရေးခက်ခဲနေသည့် ကျေးရွာများအနက်မှ ဦးစွာအနေဖြင့် သစ်ပုတ်ပင်ကျေးရွာ၊ လယ်မကျေးရွာ၊ မင်းပြင်ကျေးရွာ၊ အောင်မြေယာကျေးရွာနှင့် ဒလန်ချွန်စသည့် ကျေးရွာချင်းဆက်မြေသားလမ်းသည် ၁၇ မိုင် ၂ ဖာလုံ ရှည်လျားပြီး ၂၀၁၅-၂၀၁၆ ဘဏ္ဍာရေးနှစ်တွင် ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ ရန်ပုံငွေဖြင့် ၁၅ မိုင် ၇ ဖာလုံရှည်သည့် မြေသားလမ်းကို စတင်ဖောက်လုပ်ခဲ့ပါကြောင်း၊ ကျန်ရှိနေသည့် ၁ မိုင် ၃ ဖာလုံ မြေသားလမ်းနှင့် Box Culvert များကို ၂၀၁၆-၂၀၁၇ ဘဏ္ဍာရေးနှစ်တွင် ဆက်လက်လုပ်ကိုင် သွားမည်ဖြစ်ကြောင်းကိုလည်း သိရှိရပါကြောင်း၊ ယခင်ကဆိုလျှင် သစ်ပုတ်ပင်ကျေးရွာ၊ မင်းပြင်ကျေးရွာ၊ ဒလန်ချွန်စသည့် ကျေးရွာအုပ်စုများရှိ ပြည်သူများသည် ရထားလမ်းတစ်ခုတည်းကိုသာ မှီခိုအားထားနေသည့် အတွက် ပညာရေး၊ ကျန်းမာရေး၊ လူမှုရေး၊ စီးပွားရေးစသည့်ကိစ္စရပ်များ အစစအရာရာ နိမ့်ကျလျက် ရှိပါကြောင်း၊ ကျေးရွာချင်းဆက်မြေသားလမ်း ဖောက်လုပ်ပြီးစီးသည့်နောက်တွင် ဒေသခံ ပြည်သူများ၊ ကျောင်းသူ/ ကျောင်းသားများ၊ ဒေသထွက် သီးနှံများ၊ ကျန်းမာရေးစသည့်ကိစ္စရပ်များကို မော်တော်ကား၊ မော်တော်ဆိုင်ကယ်စသည့် ယာဉ်များဖြင့် နေ့စဉ်သွားလာနေရသည့် ဒေသခံပြည်သူများ အားထားနေရသည့် လမ်းဖြစ်ကြောင်းကိုလည်း သိရှိရပါကြောင်း။
ဖောက်လုပ်ပြီးစီးသွားသည့် မြေသားလမ်းများသည် တစ်နှစ်ဝန်းကျင်ခန့်တွင် မိုးရေတိုက်စားမှုများကြောင့် လမ်းများပျက်စီးနေပါကြောင်း၊ မြေသားလမ်းများ ပျက်စီးနေသောကြောင့် ဒေသခံပြည်သူများ သွားလာ၍မရတော့ဘဲ ဒုက္ခများစွာ ကြုံတွေ့နေရပါသဖြင့် ရာသီမရွေးသွားလာနိုင်သော ကျောက်ချောလမ်းခင်းပေးရန် လိုအပ်နေပါကြောင်း၊ ထို့ကြောင့် လယ်ဝေးမြို့နယ် အတွင်းရှိ သစ်ပုတ်ပင်-မင်းပြင်-ဒလန်ချွန်စသည့် ကျေးရွာအုပ်စုချင်းဆက်မြေသားလမ်းကို ရာသီမရွေးသွားလာနိုင်သော ကျောက်ချောလမ်းအဖြစ် ခင်းပေးရန် အစီအစဉ်ရှိ/မရှိနှင့် အစီအစဉ် ရှိမည်ဆိုပါက မည်သည့်ဘဏ္ဍာနှစ်တွင် ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။
ပြည်ထောင်စုနယ်မြေ၊ နေပြည်တော်၊ လယ်ဝေးမြို့နယ်၊ သစ်ပုတ်ပင်-မင်းပြင်-ဒလန်ချွန် ကျေးရွာချင်း ဆက်လမ်းသည် ၁၇ မိုင် ၂.၂ ဖာလုံရှိပြီး ကျေးရွာခုနစ်ရွာ၊ အိမ်ခြေပေါင်း ၃၂၉၄၊ လူဦးရေ ၁၄၂၄၈ ဦးတို့အား အကျိုးပြုနေပါကြောင်း၊ ၂၀၁၅-၂၀၁၆ ဘဏ္ဍာရေးနှစ် ကျေးလက်ဒေသဖွံ့ဖြိုးတိုးတက်ရေးဦးစီးဌာန ခွင့်ပြု ရန်ပုံငွေကျပ် ၂၈၁.၄၃၆ သန်းဖြင့် သစ်ပုတ်ပင်-လယ်မ-မင်းပြင်ကျေးရွာချင်းဆက် မြေသားလမ်း ၇ မိုင်၊ မင်းပြင်-အောင်မြေယာ-ဒလန်ချွန်ကျေးရွာချင်းဆက် မြေသားလမ်း ၈ မိုင် ၇.၂ ဖာလုံ၊ သစ်သားတံတားတစ်စင်း ၄၀ ပေ၊ Box Culvert သုံးစင်း၊ ၂ ပေ ရေပြွန်သုံးစင်း ဆောင်ရွက်ခဲ့ပြီးဖြစ်ပါကြောင်း၊ ၂၀၁၆-၂၀၁၇ ဘဏ္ဍာရေးနှစ် ကျေးလက်ဒေသဖွံ့ဖြိုးတိုးတက်ရေးဦးစီးဌာန ခွင့်ပြုရန်ပုံငွေဖြင့် ကျန် ၁ မိုင် ၃ ဖာလုံနှင့် Box Culvert ၁၆ စင်းတို့အား လျာထားဆောင်ရွက်လျက်ရှိပါကြောင်း၊ အဆိုပါ ကျေးရွာချင်းဆက်လမ်း ၁၇ မိုင် ၂.၂ ဖာလုံအား ကျောက်ချောလမ်းခင်းပါက ကျပ်သန်းပေါင်း ၁၁၈၄.၀၂၈ သန်းခန့် ကုန်ကျမည် ဖြစ်ပါကြောင်း။
ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ ဘတ်ဂျက်လျာထား ဆောင်ရွက်ရာတွင် ပြည်နယ်/ တိုင်းဒေသကြီးများ အတွင်းရှိ လူဦးရေအချိုးအစားအရ လျာထားရသည့်အပြင် ပြည်နယ်/တိုင်းဒေသကြီး အတွင်းရှိ မြို့နယ်အားလုံးကိုလည်း ပါဝင်လျာထားပါကြောင်း၊ ထို့အပြင် ကျေးရွာများ၏ လိုအပ်ချက်ကို မြို့နယ်၊ ခရိုင်နှင့် ပြည်နယ်/တိုင်းဒေသကြီးများမှတစ်ဆင့် ထောက်ခံတင်ပြလာမှုများအပေါ် ဦးစားပေးအစီအစဉ်အတိုင်း ရွေးချယ်ပြီး လျာထားပေးပါကြောင်း၊ လယ်ဝေးမြို့နယ်အတွက် ၂၀၁၆-၁၇ ဘဏ္ဍာနှစ်အထိ လျာထားသည့် စုစုပေါင်းရန်ပုံငွေ ကျပ် ၄၆၉.၆၈ သန်းသာရှိပါကြောင်း၊ တင်ပြသည့် ကျောက်ချောလမ်းတစ်ခုအတွက်သည် ကျပ် ၁၁၈၄ သန်းဖြစ်နေသည့်အတွက် မြို့နယ်အားလုံးအတွက် လျာထားချက်ထက် မြင့်မားနေသည့်အတွက် သစ်ပုတ်ပင်-မင်းပြင်-ဒလန်ချွန်ကျေးရွာချင်းဆက်လမ်းအား ၂၀၁၆-၁၇ ဘဏ္ဍာရေးနှစ်တွင် ဆောင်ရွက်ရန် ကျန်ရှိသည့် မြေသားလမ်း ၁ မိုင် ၃ ဖာလုံ နှင့် Box Culvert ၁၆ စင်း ဆောင်ရွက်ရန် လျာထားပြီးဖြစ်ပါသဖြင့် အဆိုပါ လမ်း ၁၇ မိုင် ၂.၂ ဖာလုံအား ကျောက်ချောလမ်းခင်းပေးရန် လတ်တလောဆောင်ရွက်ပေးနိုင်ခြင်း မရှိပါကြောင်းနှင့် နှစ်အလိုက်ဦးစားပေးအတိုင်း လျာထားတင်ပြ ပေးသွားမည်ဖြစ်ပါကြောင်း ရှင်းလင်း ဖြေကြားပါသည်။