(ဂ)-နန်းယွန်းမြို့နယ်၏ အဓိကဆက်သွယ်ရေး လမ်းကြောင်းဖြစ်သော ရှင်ဗွေယန်-နန်းယွန်း-ပန်ဆောင်လမ်းပိုင်းလီဒိုလမ်းမကြီးအားရာသီမရွေး သွားလာနိုင်သောလမ်းမကြီးအဖြစ်အဆင့်မြှင့်တင် ရန်အစီအစဉ်ရှိ/မရှိနှင့်စပ်လျဉ်းသည့်မေးခွန်း

စစ်ကိုင်းတိုင်းဒေသကြီးအတွင်းရှိ ရှင်ဗွေယန်-နန်းယွန်း-ပန်ဆောင်လမ်းသည် ၅၁ မိုင်ရှည်လျားပြီး စစ်ကိုင်းတိုင်းဒေသကြီး အစိုးရအဖွဲ့မှ စီမံခန့်ခွဲသည့်လမ်းဖြစ်ပါကြောင်း၊ ၃၁-၃-၂၀၁၆ ရက်နေ့ လမ်း အခြေအနေသည် ၁၂ ပေအကျယ် ကျောက်လမ်း ၂ မိုင် ၂ ဖာလုံ၊ ၁၂ ပေအကျယ် အမာခံလမ်း ၄၈ မိုင် ၆ ဖာလုံဖြစ်ပါကြောင်း၊ ရှင်ဗွေယန်-နန်းယွန်း- ပန်ဆောင်လမ်းတွင် ၂၀၁၂-၁၃ ဘဏ္ဍာနှစ်မှ ၂၀၁၅-၁၆ ဘဏ္ဍာနှစ်အထိ နှစ်စဉ်ခွဲဝေရရှိသည့် ရန်ပုံငွေကျပ်သန်းပေါင်း ၂၅၇၆.၅ သန်းနှင့် ၃၄ ပေအကျယ်ရှိသည့် မြေသားတာပေါင် တင်ခြင်းလုပ်ငန်း ၁၅ မိုင် ၄ ဖာလုံ၊ အမာခံလမ်းအပျက်ကိုပြုပြင်ခြင်း ၃၂ မိုင် ၂ ဖာလုံ၊ တောင်ပြို မြေဖယ်ရှားခြင်း ၁ မိုင် ၅ ဖာလုံ၊ ကျောက်ချောလမ်းခင်းခြင်း ၂ မိုင် ၂ ဖာလုံ၊ ရေထုတ်ပြွန် တည်ဆောက်ခြင်း ၉ စင်း၊ သစ်သားတံတားတည်ဆောက်ခြင်း ၂၄ စင်း၊ Box Culvert တည်ဆောက်ခြင်း ၁၉ စင်း၊ သံမဏိကြမ်းခင်းနှင့် ဘေလီတံတားတည်ဆောက်ခြင်း တစ်စင်း၊ တံတားပြုပြင်ခြင်းနှစ်စင်းနှင့် ကျောက်စီကမ်း ကပ်ခုံနှင့် သစ်သားတံတားတည်ဆောက်ခြင်း ငါးစင်းစသည့်လုပ်ငန်းများကို ဆောင်ရွက်ပြီးစီးပြီးဖြစ်ပါကြောင်း၊ ရှင်ဗွေယန်- နန်းယွန်း- ပန်ဆောင်လမ်းကို ၂၀၁၆-၁၇ ဘဏ္ဍာနှစ် စစ်ကိုင်းတိုင်းဒေသကြီး ပြင်ဆင်ထိန်းသိမ်းခြင်း ရန်ပုံငွေဖြင့် မူလအမာခံလမ်းမှ ကျောက်ခင်းလမ်း ၅ မိုင်၊ ကျောက်စီကမ်းကပ်ခုံနှင့် သစ်သားကြမ်းခင်းတံတားတည်ဆောက်ခြင်း တစ်စင်း၊ ဘေလီတံတား ဘီးလမ်းကြမ်းခင်းလဲလှယ်ခြင်း၊ ဆေးသုတ်ခြင်းတစ်စင်း၊ ကွန်ကရစ် ရေထုတ်ပြွန်တည်ဆောက်ခြင်း ခြောက်စင်း စသည့် လုပ်ငန်းများကို ဆောက်ရွက်သွားမည်ဖြစ်ပါကြောင်း၊

ရှင်ဗွေယန်- နန်းယွန်း- ပန်ဆောင်လမ်းကို ရာသီမရွေးသွားလာနိုင်သည့် ကျောက်ချောလမ်းအဖြစ် အဆင့်မြှင့်တင်နိုင်ရန်အတွက် ခန့်မှန်းခြေကုန်ကျငွေကို ကျပ် ၄.၅ ဘီလီယံ လိုအပ်မည်ဖြစ်ပြီး ၃ နှစ် အတွင်း စီမံချက်များရေးဆွဲဆောင်ရွက်သွား မည် ဖြစ်သည့်အတွက် နှစ်စဉ်ခွဲဝေရရှိသော ရန်ပုံငွေအပေါ် မူတည်ပြီး ရာသီမရွေးသွားလာနိုင်သည့် ကျောက်ခင်းကျောက်ချောလမ်း လုပ်ငန်းများ ဆောင်ရွက် ပေးသွားမည်ဖြစ်ပါကြောင်း ရှင်းလင်းဖြေကြားပါသည်။

ဦးဝမ်းလှ(နန်းယွန်းမဲဆန္ဒနယ်)က ဆက်စပ်မေးခွန်း မေးမြန်းပါသည်။

မိမိတို့ ၂၀၁၂ မှ ၂၀၁၅-၁၆ တွင် ရှင်ဗွေယန်-နန်းယွန်း လမ်းအပိုင်းအတွက် ဝန်ကြီးဖြေကြားသွားသည့် အထဲတွင် ရေထုတ်ပြွန်များလည်း တစ်ခုမှမရှိပါကြောင်း၊ ထို့ကြောင့် ဝန်ကြီးဌာနတွင် တင်ပြလာသည့် စာရင်းများကို၊ ဓာတ်ပုံအကြမ်းများ ရိုက်ထားသည်ကိုပြန်ပြီး မဖြေကြားစေချင်ပါကြောင်း၊ မိမိတို့ လက်တွေ့ မြေပြင်တွင် ဖြစ်ပျက်နေသည့် အရာများကို လာရောက်အသေးစိတ်လေ့လာပြီး မိမိတို့ဒေသ၏ အကျိုးကို စေတနာရှိရှိနှင့် ဆောင်ရွက်ပေးခြင်းကို မိမိတို့ လိုချင်ပါကြောင်း၊ မိမိတို့ဆီတွင် Bus Car ၊ Car များ နန်းယွန်းနှင့် ရှင်ဗွေယန်လမ်းအပိုင်း တစ်ခုမှမရှိပါကြောင်း၊ ထို့ကြောင့် နောင်လာမည့်အချိန်တွင် လုပ်သည့် လုပ်ငန်းများတစ်ခုစီတိုင်းကို ဝန်ကြီးဌာနများမှ အသေးစိတ်ကြီးကြပ် ဆောင်ရွက်ပေးရန်အတွက်လည်း တင်ပြလိုပါကြောင်း၊ ယနေ့အချိန်အထိ ရှင်ဗွေယန်နှင့် နန်းယွန်းကြားတွင် ညအိပ်ပြီးသွားရပါကြောင်း၊ ဆိုင်ကယ်ခရီးကိုလည်း ခက်ခက်ခဲခဲသွားရပါကြောင်း၊ နန်းယွန်း-ရှင်ဗွေယန်လမ်းအပိုင်း၊ နန်းယွန်း-ပန်ဆောင်လမ်းအပိုင်းကို အချိန်မီအဆင့်မြင့်လမ်း ဖောက်လုပ်ပေးရန်အတွက် ဆက်စပ်မေးခွန်း မေးမြန်းပါသည်။

ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးဝင်းခိုင်

မိမိအနေဖြင့်လည်း တင်ပြချက်အပေါ် ပြန်လည်စိစစ်ပေးပါမည်။ မိမိအနေဖြင့် ဒီနှစ်ထဲတွင် ကျောက်ခင်းလမ်း ၁ မိုင်လုပ်ရန် လျာထားခြင်းဖြစ်ပါကြောင်း၊ သို့သော် ၎င်း ဒေသ၏ အရေးကြီးသည့် အနေအထားရှိသည့်အတွက် မိမိအနေဖြင့် ဒီနှစ်ကို ကျောက်ခင်းလမ်း ၅ မိုင်အထိ တိုးချဲ့ပါဆိုပြီးမိမိ၏ ဦးဆောင်မှုဖြင့် ၅ မိုင်ကျောက်ခင်း လမ်းဖြစ်အောင် ဖြည့်တင်းထားခြင်းလည်းဖြစ်ပါကြောင်း၊ ၎င်း လမ်းကိုလည်း ရာသီမရွေးသွားလာနိုင်သည့် လမ်းတစ်ခုဖြစ်ရန်အတွက် အခုနက တင်ပြသည့်အတိုင်း သုံးနှစ်အတွင်း ဘဏ္ဍာငွေ ၄.၅ ဘီလီယံ၊ တစ်နှစ်ကို ၁.၅ ဘီလီယံ ထည့်ပြီး ဖော်ပြပါ ရှင်ဗွေယန်-နန်းယွန်း-ပန်ဆောင်လမ်းကြီးကို ရာသီမရွေးသွားလာနိုင်သည့် အနည်းဆုံးကျောက်ချော၊ ကျောက်ခင်း လမ်းကြီး ဖြစ်အောင် ဆောင်ရွက်ပေးမည်ကို ရှင်းလင်းဖြေကြားပါသည်။