(ဃ)-လွိုင်လင်မြို့ခုတင်(၂၀၀)ဆံ့အထွေထွေရောဂါ ကုဆေးရုံကြီးတွင်မျက်စိအထူးကုဆရာဝန်ကြီးများ၊ နား၊နှာခါင်း၊လည်ချောင်းအထူးကုဆရာဝန်ကြီး များနှင့်ဓာတ်မှန်အထူးကု ဆရာဝန်ကြီးများအား အလျင်အမြန် ခန့်အပ်တာဝန်ပေးရန်နှင့်စပ်လျဉ်း သည့်မေးခွန်း

ခုတင်(၂၀၀)ဆံ့ အထွေထွေရောဂါကုဆေးရုံကြီး မှာ လစ်လပ်လျက်ရှိသော မျက်စိအထူးကုဆရာဝန်၊ နား၊ နှာခေါင်း၊ လည်ချောင်း အထူးကုဆရာဝန်နှင့်  ဓာတ်မှန်အထူးကုဆရာဝန်ကြီးများ အမြန်ခန့်ရေးကိစ္စနှင်‌့ ပတ်သက်ပြီး ကျွန်တော်တို့ EC ကျန်းမာရေးနှင့်အားကစားဝန်ကြီးဌာန၏ အစည်းအဝေးတွင် ဆုံးဖြတ်တာဝန်ချထားပြီးဖြစ်သည့်အတွက် ၂၁ ရက်အတွင်း ရောက်ရှိမည်ဖြစ်ပါကြောင်း၊ ကျန်းမာရေးနှင့် အားကစားဝန်ကြီးဌာနတွင် လူ့စွမ်းအားအရင်းအမြစ်များကို ဦးစားပေးလိုက်၊ တာဝန်ချထားသည့်အတွက် တချို့ ဆေးရုံများတွင်  ဆရာဝန်မရှိသေးသည်များ အနည်းငယ်ကြုံမည်ဖြစ်ပါကြောင်း၊ သို့သော် လာမည့်နှစ်များတွင် တဖြည်းဖြည်း တိုးတက်ကောင်းမွန်လာမည့် အခြေအနေရှိပါကြောင်း၊

ရှမ်းပြည်နယ် (တောင်ပိုင်း) လွိုင်လင်မြို့ ကုတင် (၂၀၀) ဆံ့ အထွေထွေဆေးရုံကြီးတွင် လိုအပ်လျက်ရှိသော အောက်ဆီဂျင်ပေးစက်များ၊ ရောဂါရှာဖွေရေးပုံရိပ် (CT Screen) နှင့် အခြားဆေးရုံးသုံးပစ္စည်းများ ဖြန့်ဖြူးပေးရန်နှင့်ပတ်သက်ပြီး လိုအပ်သော ဆေးရုံသုံးပစ္စည်းများကို ဆေးရုံအဆင်‌့အလိုက် လုပ်ငန်းလိုအပ်ချက်၊ လူနာဦးရေပေါ်မူတည်ပြီး ဖြည့်ဆည်းဆောင်ရွက်ပေးပါကြောင်း၊ လွိုင်လင်မြို့ ပြည်သူ့ဆေးရုံကြီးတွင် 100 MA X Ray Machine-1 Unit နှင့် 16 Slices CT Scan-1 Unit အပါအဝင် တင်ပြတောင်းခံခဲ့သည့် ဆေးရုံသုံးပစ္စည်း စုစုပေါင်း ၁၉ မျိုးကို ၂၀၁၅-၂၀၁၆ အတွင်းထောက်ပံ့ပေးခဲ့ပါကြောင်းနှင့် အဆိုပါပစ္စည်းများအနက် CT Scan စက်အားတပ်ဆင်နိုင်ရေး အတွက်လည်း ရန်ကုန်ဗဟိုဆေးသိုလှောင်ရေးက စီစဉ်ဆောင်ရွက်လျက်ရှိပါကြောင်း၊ အခြား တင်ပြတောင်းခံလာသော ဆေးရုံသုံးပစ္စည်းများရှိကလည်း စိစစ်၍ ထောက်ပံ့ပေးမည်ဖြစ်ပါကြောင်း၊ အောက်စီဂျင်ပေးစက် Air Sets များနှင့် ပတ်သက်၍လည်း ဗဟိုဆေးသိုလှောင်ရေးဌာနကို တယ်လီဖုန်းနှင့်ဆက်သွယ်ပြီးဖြစ်သည့်အတွက် အချိန်မရွေးလာရောက်ထုတ်ယူနိုင်ပါကြောင်း၊

နမ်သမိုကျေးရွာအုပ်စု၊ ပန်လင်းကျေးရွာ ကျေးလက်ကျန်းမာရေးဌာနခွဲ ဆေးပေးခန်းအဆောက်အဦ အသစ်ဆောက်လုပ်ရန်နှင့် စပ်လျဉ်း၍ ရှမ်းပြည်နယ်(တောင်ပိုင်း)၊ လွိုင်လင်မြို့တွင် ကျေးလက်ကျန်းမာရေးဌာနက ၄ ခု၊  ကျေးလက်ကျန်းမာရေးခွဲ ၁၆ ခု၊ မိခင်နှင့်ကလေးကျန်းမာရေးဌာန သုံးခု၊ ကျောင်းကျန်းမာရေး ဌာန ၁ ခု၊ ပြည်သူ့ကျန်းမာရေးဝန်ထမ်း လက်ထောက်ကျန်းမာရေးမှူး နှစ်ဦး၊ သူနာပြုနှစ်ဦး၊ ကျန်းမာရေးဆရာမ ခုနစ်ဦး၊ သားဖွားဆရာမ ၂၅ ဦး၊ ကျန်းမာရေးကြီးကြပ်(၁) သုံးဦး၊ ကျန်းမာရေးကြီးကြပ်(၂) ၁၆ ဦးဖြင့် လွိုင်လင်မြို့နယ်ရှိ စုစုပေါင်း လူဦးရေ ၅၂၃၇၀ ကျော်တို့အား ပြည်သူ့ကျန်းမာရေးစောင့်ရှောက်မှုများ ပေးလျက်ရှိပါကြောင်း၊ ရှမ်းပြည်နယ်(တောင်ပိုင်း) လွိုင်လင်မြို့နယ် ပင်လုံမြို့မှာ ဆဟောင်းကျေးရွာအုပ်စု၊ လွယ်ကန်းကျေးရွာနှင့် နမ်သမိုကျေးရွာ အုပ်စု၊ ပန်လင်းကျေးရွာများ၌ ကျေးလက်ကျန်းမာရေးဌာနခွဲ အဆောက်အဦအသစ် ဆောက်လုပ်နိုင်ရန်အတွက် ၂၀၁၈-၂၀၁၉ ဘဏ္ဍာရေးနှစ်မှစ၍ နှစ်စဉ်စီမံကိန်းများမှ ရန်ပုံငွေရရှိရေးအတွက် ဦးစားပေးအစီအစဉ်ဖြင့် တင်ပြဆောင်ရွက်သွားမည်ဖြစ်ကြောင်း၊ အကယ်၍ ကျေးလက်ကျန်းမာရေးဌာနခွဲလေး တစ်ခု ဖွင့်မည်ဆိုပါက စံကိုက်အဆောက်အဦအတွက် ၆၃ သန်း၊ ပရိဘောဂ ပစ္စည်းကုန်ကျရန်အတွက် ၄.၉ သန်း၊ စုစုပေါင်း ၆၇.၉ သန်းကုန်ကျပါကြောင်း၊ ထို့ကြောင့် နိုင်ငံတော်ကချမှတ်ပေးသည့် ငွေပမာဏပေါ်မူတည်ပြီး လိုအပ်ချက်အရ ပံ့ပိုးပေးမည်ဖြစ်ပါကြောင်း၊

‌ဟွေတောက်ကျေးရွာအုပ်စု ထီအုံးနောင်ရွာတွင် ကျေးလက်ကျန်းမာရေးဌာနခွဲတစ်ခု၊ တန့်အယ် ကျေးရွာအုပ်စု နမ့်ခုတ်ရွာ ကျေးလက်ကျန်းမာရေးဌာနခွဲတစ်ခု၊ ဆနင်းကျေးရွာအုပ်စု ဟွေ့ဝမ်ရွာ ကျေးလက်ကျန်းမာရေးဌာနခွဲ တစ်ခု စုစုပေါင်းသုံးခု တိုးချဲ့ဖွင်‌့လှစ်ရန်ကိစ္စနှင်‌့ပတ်သက်၍ ထီအုံးနောင်ကျေးရွာသည် ခုတင် (၂၀၀)ဆံ့ မြို့နယ်ဆေးရုံနှင့် ၁၈ မိုင် ကွာဝေးပါကြောင်း၊ ခေါင်းနွဲ့ ကျေးလက်ကျန်းမာရေးဌာန ဖွင့်မည်ဆိုပါက အိမ်ခြေ ၅၁၄ အိမ်၊ လူဦးရေ ၂၈၃၀ တို့ကို ကျန်းမာရေးစောင်‌့ရှောက်မှုလွှမ်းခြုံနိုင်မည်ဖြစ်ပါကြောင်း၊ အဆောက်အဦဆောက်လုပ်ရန် ၉၀ ပေ x  ၆၀ ပေ မြေလည်းရှိပါကြောင်း၊ နမ့်ခုတ်ကျေးရွာသည် ခုတင်(၂၀၀)ဆံ့ ပြည်သူ့ဆေးရုံ နှင့် ၁၈ မိုင်ကွာဝေးပြီး ပင်လုံကျေးလက်ကျန်းမာရေးဌာနနှင်‌့ ကျေးရွာအုပ်စုတွင် ပါဝင်ပြီး ကျေးလက်ကျန်းမာရေးဌာနခွဲ ဖွင့်လှစ်ခွင့်ရရှိမည်ဆိုပါက ကျေးရွာ ၁၂ ရွာ၊ အိမ်ခြေ ၄၃၆ အိမ်၊ လူဦးရေ ၂၅၄၅ ဦးတို့အား ကျန်းမာရေးစောင့်ရှောက် လွှမ်းခြုံမှုပေးနိုင်မည်ဖြစ်ပါပြီး အဆောက်အဦးဆောက်လုပ်ရန် မြေဧက အကျယ်အဝန်း ပေ ၉၀ x ၆၀ ပေရှိပါကြောင်း၊

ဟွေ့ဝမ်ကျေးရွာသည် ခုတင် (၂၀၀)ဆံ့ ပြည်သူ့ဆေးရုံနှင့် ၄၂ မိုင် ကွာဝေးပါကြောင်းနှင့် နောင်လိုင် ကျေးရွာအုပ်စု ကျန်းမာရေးဌာနခွဲတွင် ပါဝင်ပါကြောင်း၊ ကျေးလက် ကျန်းမာရေးဌာနခွဲများ ဖွင်‌့လှစ်မည်ဆိုပါက ကျေးရွာ ၁၀ ရွာ၊ အိမ်ခြေ ၃၇၆ အိမ်၊ လူဦးရေ ၁၉၀၆ ယောက်တို့ကို ကျန်းမာရေးလွှမ်းခြုံမှုပေးနိုင်မည်ဖြစ်ပြီး အဆောက်အဦဆောက်လုပ်ရန် မြေနေရာလည်းရှိသည့်အတွက် ကျေးလက်ကျန်းမာရေးသုံးခု တည်ဆောက်ရန် ၂၀၁၇-၂၀၁၈ ဘဏ္ဍာရေးနှစ်တွင် ဖွဲ့စည်းပုံခွင့်ပြုမိန့်ရရှိရေးအတွက် ဆောင်ရွက်ပေးပါမည်ဖြစ်ပါကြောင်း၊ ကျေးလက် ကျန်းမာရေးဌာနခွဲများအဖြစ် အသစ်တိုးချဲ့ဖွင့်လှစ်ခွင့်ရပါက ကျေးလက်ကျန်းမာရေးဌာနခွဲတစ်ခုအတွက် ဝန်ထမ်းနှစ်ဦးလိုအပ်ပါကြောင်း၊ တစ်နှစ်လျှင် လစာနှင့်စရိတ်ဝတ်စုံအပါအဝင် ၃.၆ သန်း၊ ဆေးဝါးပစ္စည်းဝယ်ယူရန်  ဝ.၄၅ သန်း ကို ၂၀၁၇-၁၈ ပြည်သူ့ကျန်းမာရေးဦးစီးဌာန ဖြည့်စွက်ရန်ပုံငွေမှ ကျခံသုံးစွဲမည်ဖြစ်ပါကြောင်း၊

ရှမ်းပြည်နယ် လွိုင်လင်မြို့နယ် နားတစ်ကျေးရွာအုပ်စု နားတစ်ကျေးရွာအုပ်စု၊ ပန်ဟူးကျေးရွာ ကျေးလက်ကျန်းမာရေးဌာနခွဲဖွင့်ရန် ၂၀၁၇-၂၀၁၈ ဘတ်ဂျက်တွင် ဆောင်ရွက်ပေးမည်ဖြစ်ပါကြောင်း၊ ယခုအချိန်တွင် ၁၂ မိုင်ကျော် ကွာဝေးသော နောင်လိုင်ကျေးလက်ကျန်းမာရေးဌာနမှ လက်ထောက်ကျန်းမာရေးမှူး အမျိုးသမီး ကျန်းမာရေးဆရာမ သားဖွာဆရာမတို့မှ ကျန်းမာရေးစောင်‌့ရှောက်မှုများ ပေးလျက်ရှိကြောင်းနှင့် ပန်ဟူးကျေးလက် ကျန်းမာရေး ဌာနခွဲအသစ် ဖွင့်မည်ဆိုပါက သားဖွားဆရာမတစ်ဦးနှင့် ကြီးကြပ်(၂) တစ်ဦး ခန့်ထားပေးရန် ဆက်လက်ဆောင်ရွက်သွားမည်ဖြစ်ပါကြောင်း ပြန်လည်ဖြေကြားပါသည်။