မံစီမြို့နယ်သည် တရုတ်ပြည်နှင့်နယ်နိမိတ်ချင်းထိစပ်နေသည့် မြို့တစ်မြို့လည်းဖြစ်ပါကြောင်း၊ထို့ကြောင့် နယ်နိမိတ်ချင်းထိစပ် နေသည့်နေရာဒေသများတွင် မံစီမြို့နယ်၊ မန်ဝိန်းကြီးဒေသမှာရှိသည့် တောင်သူ လယ်သမားများနှင့် တစ်ဖက်နိုင်ငံမှ တောင်သူလယ်သမားများနှင့် မြေယာပြဿနာ မကြာခဏ ဖြစ်ပွားလျက်ရှိပါကြောင်း၊ မိမိသိလိုသည်မှ မံစီမြို့နယ်၊ မန်ဝိန်းကြီးဒေသမှာရှိသည့် တရုတ်- မြန်မာ နယ်စပ် ဖြစ်သည့် (၅၃/၂)ကျောက်တိုင်အနီး တရုတ်ဘက် ကနေမှ မြန်မာဘက်ကို လယ်သမား များ ဝင်ရောက် စိုက်ပျိုးလုပ်ကိုင်နေခြင်းကို တားမြစ်ပေးဖို့အစီအစဉ်ရှိ/မရှိနှင့် နယ်နိမိတ်ကျောက်တိုင်အမှတ် (၅၃/၄) ကိုလည်း ချောင်းအတွင်းမှာပြိုကျခါနီးဖြစ်နေတဲ့အတွက်ကြောင့်မို့လို့ အချိန်မီ ချောင်းရိုးတစ်လျှောက် မြေထိန်းနံရံ တည်ဆောက်ပေးဖို့ အစီအစဉ်ရှိ/မရှိကို သိရှိလိုပါကြောင်းမေးမြန်းပါသည်။
ကချင်ပြည်နယ်၊ဗန်းမော်ခရိုင်၊မံစီမြို့နယ်၊မန်ဝိန်းကြီးဒေသ၊ပန်ခမ်းကျေးရွာအုပ်စုဟာ တရုတ်နိုင်ငံနှင့် နယ်နိမိတ်ချင်းထိစပ်နေသည့် နယ်မြေဖြစ်ပါကြောင်း၊ မြန်မာ-တရုတ်နယ်စပ်နယ်ခြားမျဉ်းသည် ပန်ခမ်း ကျေးရွာ ရှိ နမ့်ဝမ်ချောင်း အလယ်တွင်တည်ရှိပြီး နယ်နိမိတ်မှတ်တိုင်အမှတ်(၅၃/၂)သည် မြန်မာနိုင်ငံဘက်ခြမ်းရှိ ပန်ခမ်းအုပ်စု၊ နောင်မွန်းကျေးရွာနှင့် တရုတ်နိုင်ငံဘက်ခြမ်းရှိ ကောင်းခမ်းကျေးရွာနှင့် လွယ်ဝိန်းကျေးရွာ၊ နယ်နိမိတ်မှတ်တိုင်အမှတ်(၅၃/၄)သည် မြန်မာနိုင်ငံဘက်ခြမ်းမှာရှိ မန်အိုက်ကျေးရွာနှင့် တရုတ်နိုင်ငံ ဘက်ခြမ်း ရှိ မန်ပန်ကျေးရွာတို့ နှင့်ထိစပ်လျက် ရှိပါကြောင်း၊ အဆိုပါနယ်စပ်ဒေသသည် မံစီမြို့နယ်အတွင်း တည်ရှိ သော်လည်း မံစီမှ တိုက်ရိုက်သွားရောက်ရန်ခက်ခဲပြီး မန္တလေး-မူဆယ်-နမ့်ခမ်း-မန်ဝိန်းကြီးဘက်မှတစ်ဆင့် သွားရောက် ရသည့်ဒေသ လည်းဖြစ်ပါကြောင်း၊
မံစီမြို့နယ်၊မန်ဝိန်းကြီးဒေသ၊ပန်ခမ်းဂိတ်အနီး၊ မြန်မာ-တရုတ်နယ်ခြားနယ်နိမိတ်မှတ်တိုင် (၅၃/၂)အနီး မြန်မာဘက်ခြမ်း မြန်မာ့လယ်ယာမြေပေါ်တွင် တရုတ်စီးပွားရေးလုပ်ငန်းရှင်များမှ မြန်မာတောင်သူများကို ကြိုတင်ငွေ အရင်းအနှီး စိုက်ထုတ်ပေးပြီး သီးနှံပေါ်ချိန်တွင် ကာလပေါက်ဈေး ဖြင့် ငွေအရင်းအနှီး စိုက်ထုတ် ပေးသူထံ ပြန်လည်ရောင်းချကာ ချေးယူထားသည့်ငွေကို ပြန်လည်ပေးဆပ် သည့်စနစ်ဖြင့် စိုက်ပျိုးနေခြင်းများ ရှိကြောင်း၊ အဆိုပါ နယ်နိမိတ် မှတ်တိုင်(၅၃/၂)အနီးမှာရှိတဲ့ မြန်မာ့ လယ်ယာမြေပေါ်မှာ တရုတ်နိုင်ငံသားများ ဝင်ရောက်လုပ်ကိုင်နေကြောင်း စိစစ်တွေ့ရှိရပါက ၁၉၄၇ ခုနှစ် မြန်မာနိုင်ငံလူဝင်မှုကြီးကြပ်ရေး ပြဋ္ဌာန်းချက်များ အက်ဥပဒေများနှင့်အညီ အရေးယူဆောင်ရွက်သွားမည်ဖြစ်ကြောင်း၊
မြန်မာ-တရုတ်နယ်နိမိတ်မှတ်တိုင်အမှတ်(၅၃/၄)ကို ကမ်းပါးပြိုကျမှုနှင့်အတူ ပြိုလဲမကျစေရေးအတွက် ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ကချင်ပြည်နယ် ရေအရင်းအမြစ်နှင့်မြစ်ချောင်းများ ဖွံ့ဖြိုး တိုးတက်ရေးဦးစီးဌာန၊ ဒေသ-၁၀ မှ ဗန်းဗော်ခရိုင်၊ မံစီမြို့ရှိ မြန်မာ-တရုတ် နယ်နိမိတ်မှတ်တိုင်များအနီး ကမ်းပြိုမှုများကို ကာကွယ်နိုင်ရန်အတွက် မြန်မာနိုင်ငံရဲ့ပိုင်နက်နယ်မြေ ရေတိုက်စားဆုံးရှုံးမှု မဖြစ်စေရန် အတွက် ရေဦးထိုးတိုက်စားလျက်ရှိသည့် နေရာများကို နှစ်အလိုက် ဦးစားပေးဆောင်ရွက်လျက်ရှိပါကြောင်း၊ ထို့အပြင် မြန်မာ-တရုတ် နယ်နိမိတ်မှတ်တိုင်အမှတ် (၅၃/၄)အနီး ကမ်းပါးပြိုကျမှုကာကွယ်ခြင်းလုပ်ငန်းတွေကို ၂၀၀၉-၁၀ ဘဏ္ဍာရေးနှစ်မှာ အလျား ပေ ၆၀၀ ၊၂၀၁၀-၁၁ ဘဏ္ဍာရေးနှစ်တွင် အလျား ၂၁၀ ပေနှင့် ၂၀၁၄-၁၅ ဘဏ္ဍာရေးနှစ်တွင် အလျား ၆၇၅ ပေတို့ကို ဆောင်ရွက်ပေးခဲ့ပါကြောင်း၊ နယ်နိမိတ်မှတ်တိုင်အမှတ် (၅၃/၄) သည် မံစီမြို့နယ်၊ မန်အိုက်ကျေးရွာ၊ နမ့်ဝမ်ချောင်းကမ်းပါး တွင်တည်ရှိပြီး ရေကြောင်းပြောင်းလဲမှုကြောင့် ရေတိုက်စားမှုကြောင့်ကမ်းပါးပြိုကျပြီး နမ့်ဝမ်ချောင်းအတွင်းသို့ ယိမ်းယိုင်စပြုနေပြီဖြစ်ပါကြောင်း၊ ထို့ကြောင့် နယ်နိမိတ်မှတ်တိုင်အမှတ်(၅၃/၄)၏ အရှေ့ကမ်းပြိုကာကွယ်ရေး လုပ်ငန်းအဖြစ် Steel Basket(သံခြင်း) အခြေပြုကျောက်စီမြေထိန်းနံရံအလျား ပေ ၁၀၀ တည်ဆောက်ရန်အတွက် ခန့်မှန်း ကုန်ကျငွေ ကျပ်သိန်း ၂၀၆ သိန်းဖြစ်ကြောင်း၊ လုပ်ငန်းရန်ပုံငွေရရှိရေးအတွက် ကချင်ပြည်နယ်၊ ရေအရင်းအမြစ်နှင့်မြစ်ချောင်းများ ဖွံ့ဖြိုးတိုးတက်ရေးဦးစီးဌာန၊ ဒေသ-၁၀ မှ ကချင် ပြည်နယ်အစိုးရအဖွဲ့သို့ တင်ပြခဲ့ပါကြောင်း၊ ကချင် ပြည်နယ် အစိုးရအဖွဲ့မှ ပြည်နယ်ရန်ပုံငွေအစီအစဉ်တွင် ထည့်သွင်း လျာထားခဲ့ခြင်းမရှိသည့်အတွက် နိုင်ငံတော်သမ္မတ ၏သီးသန့်ရန်ပုံငွေမှ ကျခံသုံးစွဲခွင့်ရရှိရေး တင်ပြခဲ့ရာ ပြုပြင်ပြီးခန့်မှန်းခြေငွေစာရင်း(RE)တွင် ထည့်သွင်း လျာထားရန် ညွှန်ကြားခဲ့ပါကြောင်း၊ သို့သော် RE နှင့် BE တို့တွင် ထည့်သွင်းရန် အချိန်မမီ သည့်အတွက် ၂၀၁၇-၁၈ ဘဏ္ဍာရေး နှစ် မူလလျာထားချက်တွင် ခေါင်းစဉ် ပြောင်းလဲသုံးစွဲခြင်း သို့မဟုတ် တင်ဒါခေါ်ယူရာ တွင် ပိုလျှံရန်ပုံငွေ မှ ကျခံသုံးစွဲနိုင်ရေး စီစဉ်ဆောင်ရွက်သွားရန် လျာထား ထားရှိပါကြောင်း ဖြေကြား ပါသည်။