(ခ)-နိုင်ငံ့ဝန်ထမ်းများ၊ဒေသအသီးသီးတွင်တာဝန် ထမ်းဆောင်ရာ၌ တာဝန်ထမ်းဆောင်မှု ကာလ တစ်ပြေးညီသတ်မှတ်ပေးရန်နှင့် မိုင်းခတ်မြို့နယ် အပါအဝင် ဒေသအသီးသီးတွင် ဝန်ထမ်းအင်အား ပြန်လည်ဖြည့်တင်းပေးနိုင်ခြင်းရှိ/မရှိနှင့်စပ်လျဉ်း သည့်မေးခွန်း

ဝန်ကြီးဌာနများအနေဖြင့် ဝေးလံခေါင်သီသော ဒေသများတွင် တာဝန်ထမ်းဆောင်နေသော နိုင်ငံ့ဝန်ထမ်းများကို သက်ဆိုင်ရာဒေသများတွင် တာဝန်ထမ်းဆောင်ကာလ အနည်းဆုံး နှစ်နှစ်မှ သုံးနှစ်အထိ တာဝန်ထမ်းဆောင်ပြီးပါက ပြောင်းရွှေ့ပေးခြင်းများ ဆောင်ရွက်ပေးလျက်ရှိပါကြောင်း၊ ထိုသို့ ပြောင်းရွှေ့တာဝန်ပေးအပ်ရန် ပြည်ထောင်စုမြန်မာနိုင်ငံတော်၊ ဝန်ကြီးချုပ်ရုံး၏ ၂၀၀၈ ခုနှစ်၊ ဖော်ဖော်ဝါရီလ ၂၇ ရက် ရက်စွဲဖြင့် ညွှန်ကြားထားရှိပြီး အဆိုပါ ညွှန်ကြား ချက်ဟာလည်း ယခုတိုင် ပယ်ဖျက်ခြင်း မရှိသေးသည့် အတွက် ညွှန်ကြားချက်နှင့်အညီ ဝန်ကြီးဌာနအားလုံးသည် လိုက်နာကျင့်သုံး ဆောင်ရွက်လျက်ရှိပါကြောင်း၊

ဝန်ကြီးဌာနများ၏ လုပ်ငန်းသဘောသဘာဝအပေါ်မူတည်၍ အချို့သောဝန်ကြီးဌာနများသည် ဝေးခံခေါင်သီသောဒေသများတွင် တာဝန်ထမ်းဆောင်လျက်ရှိသော နိုင်ငံ့ဝန်ထမ်းများကို အနည်းဆုံး နှစ်နှစ် တာဝန်ထမ်းဆောင်ပြီး ပြောင်းရွှေ့လိုပါက ဆန္ဒပြုလျှောက် ထားစေပြီး ဆန္ဒပြုသည့်နေရာ သို့မဟုတ် လစ်လပ်သည့်နေရာများသို့ ပြောင်းရွှေ့တာဝန်ချထား ပေးလျက်ရှိပါကြောင်း၊ အချို့သော ဝန်ကြီးဌာနများသည် ဒေသတစ်ခု၌ သုံးနှစ်တာဝန် ထမ်းဆောင်ပြီး ပါက သင်‌့လျော်သည့် နေရာဒေသများသို့ ပြောင်းရွှေ့ပေးခြင်း များကိုလည်း ဆောင်ရွက်ပေးလျက်ရှိပါကြောင်း၊ ထို့အပြင် ဒေသပြောင်းရွှေ့ရေး ဆောင်ရွက်ရာတွင် ကာယကံရှင်၏ လူမှုရေးအခက်အခဲ တင်ပြချက်၊ ကျန်းမာရေးအခြေအနေ တင်ပြချက်များအပေါ်တွင်လည်း ထည့်သွင်းစဉ်းစား ဆောင်ရွက်ပေးလျက် ရှိပါကြောင်း၊

ထို့သို့ ပြောင်းရွှေ့တာဝန်ချထားခြင်းကိုလည်း ဝန်ကြီးဌာနများအနေဖြင့် စီမံအဆင့် အရာထမ်း များကိုသာ ဌာန၏ လုပ်ငန်းသဘောသဘာဝကို အခြေခံ၍ ညွှန်ကြားချက်များနှင့်အညီ သတ်မှတ်ကာလအတွင်း ပြောင်းရွှေ့ခြင်းများကို ဆောင်ရွက်ပေးလျက်ရှိပါကြောင်း၊ အမှုထမ်း ဝန်ထမ်းများကို မူလခန့်အပ်စဉ်ကပင် ၎င်းတို့၏ နေထိုင်ရေး၊ စားသောက်ရေး၊ လူမှုရေးအခက်အခဲများ ပြေလည်စေရေးအတွက် ဒေသခံပြည်သူများကိုသာ ဦးစားပေး ခန့်အပ်လျက်ရှိသည့်အတွက် ၎င်းတို့၏ ဆန္ဒအလျောက် ဆက်လက် တာဝန် ထမ်းဆောင် လိုပါက သတ်မှတ်ကာလမထားဘဲ ဆက်လက်တာဝန် ထမ်းဆောင်စေလျက် ရှိပါကြောင်း၊

ပြည်ထောင်စုအစိုးရအဖွဲ့ရုံး၏ ၂၀၁၃ ခုနှစ်၊ ဖော်ဖော်ဝါရီလ ၂၂ ရက်နေ့ ထုတ်ပြန်ခဲ့သည့် ညွှန်ကြားချက်အရ ပညာရေး၊ ကျန်းမာရေး၊ ပြည်ထဲရေးဝန်ကြီးဌာနများကို ဦးစားပေးပြီး ဖွဲစည်းပုံ အပြည့် ခန့်အပ်ခွင့်ပြုခဲ့ပါကြောင်း၊ အခြားသော ဝန်ကြီးဌာန၊ ဦးစီးဌာနများ အနေဖြင့် ဝန်ထမ်းသစ်များ ခန့်ထားရေးနှင်‌့စပ်လျဉ်း၍ ခွင့်ပြုအင်အား၏ သုံးပုံနှစ်ပုံသာ ခန့်ထားဆောင်ရွက်ရန် အစိုးရအဖွဲ့ရုံး၏ ၂၀၀၉ ခုနှစ်၊ စက်တင်ဘာလ ၁၇ ရက်နေ့တွင်  လမ်းညွှန်မှုပြုထားခဲ့ပါကြောင်း၊

ဝန်ကြီးဌာနများအနေဖြင့် သတ်မှတ်ခွင့်ပြုထားသည့် ခွင့်ပြုအင်အားအတိုင်း အင်အားပြည့်မီစေ ရေးအတွက်ကိုလည်း ဖြည့်တင်းဆောင်ရွက်နိုင်ရေး အလေးထားလိုက်နာဆောင်ရွက်လျက် ရှိပါကြောင်း၊ သို့ရာတွင် နှစ်စဉ်ပြုန်းတီးအင်အားများ ဖြစ်ပေါ်နေသော်လည်း ဝေးလံသည့် ဒေသများတွင် ဌာနအလိုက် သတ်မှတ်ထားသော အရည်အချင်းပြည့်မီသူများမှ တာဝန်လျှောက်ထားမှုများ နည်းပါးလျက်သည့်အတွက် ဝန်ထမ်းများ သတ်မှတ်ချက်အတိုင်း အင်အား ပြည့်မီစေရန် ခန့်ထားနိုင်မှုမရှိသေးသည်ကို တွေ့ရှိရပါကြောင်း၊ ဝန်ကြီးဌာနများအနေဖြင့် သက်ဆိုင်ရာဒေသအလိုက် လုပ်ငန်းတာဝန် အနည်းအများပေါ်မူတည်ပြီး လက်ရှိအင်အားဖြင့် ချင့်ချိန်လျက် ဝန်ထမ်းများကို တာဝန်ချထားဆောင် ရွက်ပေးလျက်ရှိပါကြောင်း၊ ထို့အပြင် အချို့ဒေသများ၌ ဒေသခံများနှင့်သာ သင်‌့လျော်မှုရှိသော ရာထူးနေရာများအတွက် သတ်မှတ်ချက်နှင့် ကိုက်ညီသည့် ဒေသခံများမှ လျှောက်ထားလာပါက ခန့်အပ်ထားနိုင်သည့် အင်အားအတွင်း ဦးစားပေး ခန့်ထားနိုင်ရေးအတွက်လည်း ဝန်ကြီးဌာနများအနေဖြင့် အလေးထား ဆောင်ရွက်လျက်ရှိပါကြောင်း၊ တွဲဖက် တာဝန်ချထားသည့် ဝန်ထမ်းများနှင့်စပ်လျဉ်းပြီး လုပ်ငန်းအခြေအနေနှင့် ဝန်ထမ်းအင်အား အခြေအနေပေါ် မူတည်ပြီး ဝန်ကြီးဌာနအစီအစဉ်ဖြင့် ခေတ္တ တွဲဖက်ထားခြင်းသာ ဖြစ်ပါကြောင်း၊ ရေရှည်တွဲဖက်ထားရမည့်ဝန်ထမ်းများရှိပါက ဝန်ထမ်းအင်အား ရရှိမှုပေါ်မူတည်ပြီး အစားထိုး ခန့်အပ်သွားမည် ဖြစ်ကြောင်းလည်း သက်ဆိုင်ရာဝန်ကြီးဌာန အားလုံး၏ ပေါင်းစပ်ဖြေကြားချက် များအရ သိရှိရပါကြောင်း၊

သို့ပါ၍ နိုင်ငံ့ဝန်ထမ်းများကို ဒေသအသီးသီးတွင် တာဝန်ပေးအပ်ရာ၌ နိုင်ငံတော်လုံခြုံရေး၊ အုပ်ချုပ်ရေး၊ စီးပွားရေး၊ လူမှုရေးကဏ္ဍအလိုက် ဝန်ကြီးဌာန၊ ဦးစီးဌာနအသီးသီး၏ ရည်မှန်းချက် လုပ်ငန်း တာဝန်များနှင့် လက်တွေ့အကောင်အထည်ဖော် ဆောင်ရွက် မှုများအပေါ် မူတည်ပြီး တာဝန် ထမ်းဆောင်မှုကာလကို အနည်းဆုံး နှစ်နှစ်မှ သုံးနှစ်အထိ သတ်မှတ်၍ ပြောင်းရွှေ့ ဆောင်ရွက်ပေးလျက် ရှိပါကြောင်းနှင့် ဝန်ကြီးဌာနများအနေဖြင့်လည်း ဝန်ထမ်းအင်အား ပြည့်မီစွာ ခန့်အပ်ထားနိုင်ရေးကို သတ်မှတ်ချက်များနှင့်အညီ အလေးထားလိုက်နာ ဆောင်ရွက်လျက်ရှိပါကြောင်း ဝန်ကြီးဌာန အားလုံး၏ ပေါင်းစပ်ညှိနှိုင်း ဖြေကြားချက်အရ ပြန်လည်ရှင်းလင်းဖြေကြားပါသည်။