(င)-မြန်မာနိုင်ငံအတွင်းဟိုတယ်နှင့်တည်းခိုခန်းများ ဖွင့်လှစ်ရန် လုပ်ငန်းလိုင်စင်များလျှောက်ထားခြင်း၊ ခွင့်ပြုခြင်းတို့နှင့် စပ်လျဉ်း၍ ဟိုတယ်နှင့် ခရီးသွား လာရေးဝန်ကြီးဌာနကသာတာဝန်ယူဆောင်ရွက်ပေး ရန် အစီအစဉ်ရှိ၊မရှိနှင့်စပ်လျဉ်းသည့် မေးခွန်း

ဟိုတယ်နှင့်ခရီးသွားလာရေး ဝန်ကြီးဌာနအနေဖြင့် တည်ဆဲမြန်မာနိုင်ငံ ဟိုတယ်နှင့်ခရီးသွားလာရေးဥပဒေ၊ ခရီးသွားလာရေး ဥပဒေဆိုင်ရာ လုပ်ထုံးလုပ်နည်းများ၊ ဟိုတယ်နှင့်တည်းခိုရိပ်သာလုပ်ငန်း လိုင်စင်ဆိုင်ရာ အမိန့်တို့နှင့်အညီ ဟိုတယ်လုပ်ငန်းလိုင်စင် (ဟ-လိုင်စင်) နှင့် တည်းခိုရိပ်သာလုပ်ငန်း လိုင်စင် (တ-လိုင်စင်) ကို ခွင့်ပြုပေးလျက်ရှိပါကြောင်း၊

မြန်မာနိုင်ငံ ဟိုတယ်နှင့်ခရီးသွားလာရေး ဥပဒေပုဒ်မ ၈ အရ ဟိုတယ်လုပ်ငန်း သို့မဟုတ် တည်းခိုရိပ်သာလုပ်ငန်း လုပ်ကိုင်လိုသည့် ပြည်သူများသည် လုပ်ငန်းစီမံချက် စတင်အကောင်အထည် မဖော်မီ ကြိုတင်ပြီး ခွင့်ပြုချက်ရရှိရန် ဝန်ကြီးဌာနသို့ သတ်မှတ်ထားသည့် နည်းလမ်းများနှင့်အညီ လျှောက်ထားရမည်ဖြစ်ပြီး  ထိုသို့ လျှောက်ထားချက်ကို ခွင့်ပြုချက်ရရှိပြီးမှ  ဟိုတယ်တည်း ခိုရိပ်သာလုပ်ငန်းကို ဆောက်လုပ်ပြီး ဟိုတယ်လုပ်ငန်း သို့မဟုတ် တည်းခိုရိပ်သာလုပ်ငန်းအတွက် လိုင်စင်ရရန် လျှောက်ထားယူရမည် ဖြစ်ပါကြောင်း၊ ထို့အပြင် မြန်မာနိုင်ငံ ဟိုတယ်နှင့် ခရီးသွားလာရေး ဥပဒေပုဒ်မ ၁၃ တွင် တည်းခိုရိပ်သာလုပ်ငန်းနှင့် စပ်လျဉ်း၍ တည်ဆဲဥပဒေ တစ်ရပ်ရပ်တွင် မည်သို့ပင် ပါရှိစေကာမူ နိုင်ငံခြားသားများ၊ ဧည့်သည်များ အတွက်ဖြစ်စေ၊ ပြည်တွင်းခရီးသည်များနှင့် နိုင်ငံခြားသားခရီးသည်များ နှစ်မျိုးလုံးအတွက်ဖြစ်စေ၊တည်းခိုရိပ်သာလုပ်ငန်း လုပ်ကိုင်လိုသူသည် ဤဥပဒေအရသာ လိုင်စင်လျှောက်ထား ရမည်ဟု ပြဋ္ဌာန်းထားသဖြင့် နိုင်ငံခြားသားခရီးသည်များကို လက်ခံဆောင်ရွက်ရမည့် တည်းခိုရိပ်သာများသည် ဟိုတယ်နှင့်ခရီးသွားလာရေး ဝန်ကြီးဌာနတွင် တည်းခိုရိပ်သာ လုပ်ငန်းလိုင်စင်ကို လျှောက်ထားရမည် ဖြစ်ပါကြောင်း၊ ကိုယ်စားလှယ်ကြီး မေးမြန်းသည့် နိုင်ငံခြားသားများ၊ Tourists များသည် ယခုအခါ မြန်မာပြည်ကို စတင်ဝင်ရောက်လာပြီ ဖြစ်ပါကြောင်း၊  Tours များ၏ သဘောသဘာဝက တန်ဖိုးနည်းနေရာများတွင် တည်းဖို့ဖြစ်ပါကြောင်း၊ ရန်ကုန်တိုင်းဒေသကြီးတွင် တည်းခိုခန်းများကို စည်ပင်သာယာက ဖွင့်လှစ်ပေးထားသည့် တိုင်းရင်းသားများ အတွက် ဖြစ်ပါကြောင်း၊ တိုင်းရင်းသားများအတွက် ဖြစ်သည့်နေရာတွင် Backed Travelers များက ၎င်းတို့ အစီအစဉ်ဖြင့် သူတို့ Online Booking မှ ၎င်း လုပ်ငန်းရှင်များနှင့် Booking တင်ပြီးမှလာရောက် တည်းခိုခြင်းဖြစ်ပါကြောင်း၊ ယခုလိုမျိုးတည်းခိုနေခြင်းကို ဟိုတယ်နှင့်ခရီးသွားလာရေး ဝန်ကြီးဌာနက ဝန်ကြီးတစ်ယောက်အနေဖြင့် သိရှိရသည့်အခါ တည်းခိုသည့်လူများ၏ ဧည့်စာရင်းပို့ခြင်း မှန်ကန်မှုရှိ/မရှိ၊ တည်းခိုသည့် ဧည့်သည်များဆီမှ ရရှိသည့်ငွေအပေါ် ရန်ကုန်တိုင်းဒေသကြီးအစိုးရက အခွန်ငွေကောက်ခံရရှိခြင်းရှိ/မရှိ။ စုံစမ်းလိုက်သည့်အခါ ရန်ကုန်တိုင်းဒေသကြီးအစိုးရက ဒီကိစ္စနှင့်ပတ်သက်၍ အခွန်ငွေရရှိခြင်းမရှိပါကြောင်း၊ ၎င်း ကိစ္စကိုလည်း ဂဃနဏမသိပါကြောင်းကို ပြောသည့်အတွက် တိုင်းရင်းသားတည်းခိုရိပ်သာ ဖြစ်ရမည့် တည်းခိုခန်းများတွင် ကွဲပြားသွားအောင် မြန်မာစာဖြင့် တိုင်းရင်းသားများ တည်းခိုရန်ဖြစ်သည့်အတွက် မြန်မာစာနှင့် တည်းခိုခန်း၏နာမည်ကို ရေးပါကြောင်း၊ နိုင်ငံခြားသားများ တည်းခိုရန်၊ တည်းခိုမှုမရှိစေရန်အတွက် ၎င်းနာမည်များကို အင်္ဂလိပ်စာနှင့် မရေးရန် ကန့်သတ်ခဲ့ရခြင်းဖြစ်ပါကြောင်း၊ ယခုလို ကန့်သတ်လိုက်ရသည့်အတွက် အခု Back Travelers များ တည်းနေသည့် တည်းခိုခန်းများသည် ရန်ကုန်တိုင်းစည်ပင်သာယာမှလာပြီး လျှောက်လွှာလာတင်ပါကြောင်း၊ ယခုဆိုလျှင် ၄၂ လုံးရှိပြီး ထို ၄၂ လုံးသည် Running Order တွင်ရှိနေပြီး ခွင့်ပြုချက်ပေးထားခြင်းမျိုး မဟုတ်ပါကြောင်း၊ နားလည်မှုဖြင့်သာ လုပ်နေခြင်းဖြစ်ပါကြောင်း၊ နောက်ထပ်လည်း စည်ပင်သာယာတွင် ၂၂ လုံး လျှောက်ထားဆဲ ဖြစ်ပါကြောင်း၊ ပြီးခဲ့သည့်ရက်သတ္တတစ်ပတ်က ရန်ကုန်တိုင်းအစိုးရ၊ ဟိုတယ်ဝန်ကြီးနှင့် မြို့တော်ဝန်တို့ ပူးပေါင်းပြီး တည်းခိုခန်းများကိုသွားပြီး လေ့လာဆန်းစစ်ခဲ့ပါကြောင်း၊ ဆန်းစစ်ခဲ့သည့်အခါတွင် (တ)လိုင်စင်ပေးထားသည့် ဟိုတယ်နှင့်ခရီးသွားလာရေး ဝန်ကြီးဌာနက သတ်မှတ်ထားသည့် စံချိန်စံနှုန်းနှင့် မည်သို့မျှမကိုက်ညီပါကြောင်း၊ ဟိုတယ်နှင့်ခရီးသွားလာရေး ဝန်ကြီးဌာန၏စံနှုန်းက တည်းခိုရိပ်သာ အတွက် အိပ်ခန်းအကျယ်အဝန်းသည် တစ်ယောက်အိပ်ခန်း အလျား ၁၀ ပေ၊ အနံ ၁၀ ပေ၊ အမြင့် ၉ ပေ၊ နှစ်ယောက်အိပ်ခန်းအတွက် အလျား ၁၂ ပေ၊ အနံ ၁၀ ပေ၊ အမြင့် ၉ ပေ၊ အိပ်ခန်းနှင်‌့တွဲလျက် ပါရှိရမည့် ရေချိုးခန်းနှင့် အိမ်သာသည် အလျား ၆ ပေ၊ အနံ ၆ ပေ၊ အမြင့် ၉ ပေ သို့မဟုတ် အလျား ၇ ပေ၊ အနံ ၅ ပေ၊ အမြင့် ၉ ပေရှိရန်လိုပါကြောင်း၊ ယခုမှာ Common Bed Basic ဖြစ်ပါကြောင်း၊ ရန်ကုန်တွင် သွားရောက်စစ်ဆေးသည့်အခါ အိပ်ခန်းများက စုပေါင်းအိပ်ပြီး အခန်းတစ်ခန်းထဲတွင် နှစ်ထပ်ခုတင်ဖြင့် ခြောက်ယောက်အိပ်ခြင်းမျိုးလည်းရှိပါကြောင်း၊ ရှစ်ယောက်အိပ်ခြင်းမျိုးလည်းရှိပါကြောင်း၊ ထို့ကြောင့် ရန်ကုန်တိုင်းဒေသကြီး အစိုးရနှင့်တိုင်ပင်ပြီး အခန်းများကို ပြန်တိုင်းတာပြီးမှ မည်သို့မည်ပုံခွင့်ပြုပေးမည်ကို မိမိတို့စဉ်းစားဆောင်ရွက်နေပါကြောင်း၊ ဟိုတယ်နှင့်တည်းခိုခန်း လိုင်စင်ထုတ်ပေးသည့် ဝန်ကြီးဌာနရှိပါလျက်နှင့် မည်သည့်အတွက်ကြောင့် မြန်မာတည်းခိုခန်းကို နိုင်ငံခြားသားများ တည်းခိုရန်အတွက် စံချိန်စံညွှန်းနှင့် ကိုက်ညီရန် ဧည့်စာရင်းတိုင်ရန်နှင့် ကျန်းမာရေးရှုထောင့်ကအစ ထိန်းသိမ်းရန်လိုအပ်ပါကြောင်း၊ ထို့ကြောင့် အဆိုပါကိစ္စရပ်များအပေါ် လုပ်ငန်းရှင်များနှင့် ညှိနှိုင်းပြီးပြုပြင်ဆောင်ရွက်ရန် အစည်းအဝေးခေါ်ယူရန်အတွက် စီစဉ်ထားရှိကြောင်း ရှင်းလင်းဖြေကြားပါသည်။

ဦးဖြိုးဇေယျာသော် (ခ) ဇေယျာသော် (ဇမ္ဗူသီရိမဲဆန္ဒနယ်) က ဆက်စပ်မေးခွန်း မေးမြန်းပါသည်။

မိမိအဓိကမေးမြန်းချင်သည်မှာ ဟိုတယ်နှင့်ခရီးသွားလာရေး ဝန်ကြီးဌာနကြီးရှိနေလျက် အခြားသောမြို့တော်၏ စည်ပင်သာယာရေးများကို လုပ်ငန်းလိုင်စင်ချပေးသည့် အတွက်ကြောင့် ယခုကဲ့သို့ ပြဿနာများ တွေ့ကြုံနေရသည်ဟု ယူဆပါကြောင်း၊ ထို့ကြောင့် အဆိုပါကိစ္စများကို ဝန်ကြီးဌာနအနေဖြင့် သီးသန့်ကိုင်တွယ် ဆောင်ရွက်မည်ဆိုပါက ကြုံတွေ့နေရတဲ့အခက်အခဲများကို ရင်ဆိုင်ကျော်လွှားသွားနိုင်သည်ဟု ယူဆသဖြင့် မေးရခြင်းဖြစ်ပါကြောင်း၊ ယခုလုပ်ငန်းငယ်လေးများကို ပိတ်သိမ်းပြစ်ရန် မဟုတ်ဘဲ မြို့တော်စည်ပင်သာယာရေးကော်မတီများက ချထားပေးသော လုပ်ငန်းလိုင်စင်များကို သက်ဆိုင်ရာဝန်ကြီးဌာနကတစ်ဆင့် အဆင့်အလိုက်လွှဲပြောင်းရယူပြီး ဝန်ကြီးဌာနကသာလျှင် တာဝန်ယူလုပ်ကိုင် ဆောင်ရွက်ရန် အစီအစဉ်ရှိ/မရှိ ဆက်စပ်မေးခွန်းမေးမြန်းပါသည်။

ဟိုတယ်နှင့်ခရီးသွားလာရေးဝန်ကြီးဌာန၊ ပြည်ထောင်စုဝန်ကြီး ဦးအုန်းမောင်

ဟိုတယ်ဝန်ကြီးဌာနကို တိုင်းရင်းသားတည်းခိုသည့် တည်းခိုခန်းပိုင်ရှင်များက နိုင်ငံခြားသားများ တည်းခိုခွင့် ပြုစေလိုပါကြောင်း လျှောက်ထားလာပါက အကြံဉာဏ်ပေးခြင်းနှင့် အဆင့်မြင့်စေခြင်းများကို ပြုလုပ်စေပြီး (တ) လိုင်စင်ကိုပဲ နိုင်ငံခြားသားတည်းခိုခွင့် ခွင့်ပြုထားပါကြောင်း၊ ယခုနှစ်တွင် ၁၄ လုံးခွင့်ပြုပြီး နောက်ထပ်လည်း ခွင့်ပြုရန် အဆင်သင်‌့ရှိပါကြောင်း၊ ၎င်း ကိစ္စကို တစ်တိုင်းတစ်ပြည်လုံးတစ်ပြေးညီဖြစ်အောင် ဆက်လက်ဆောင်ရွက်သွားရန် အစီအစဉ်ရှိပါကြောင်း ရှင်းလင်းဖြေကြားပါသည်။