ပြည်ထောင်စုလွှတ်တော် နာယက၊ ပြည်သူa့လွှတ်တော် ဥက္ကဋ္ဌ သူရဦးရွှေမန်း အာရှ-ပစိဖိတ်ရေးရာ နိုင်ငံခြားရေးပူးတွဲကော်မတီဥက္ကဋ္ဌ Congressman Matt Salmon နှင့် တွေ့ဆုံ

ပြည်ထောင်စုလွှတ်တော် နာယက ပြည်သူ့လွှတ်တော် ဥက္ကဋ္ဌ သူရဦးရွှေမန်း သည် အာရှ-ပစိဖိတ်ရေးရာ နိုင်ငံခြားရေး ပူးတွဲကော်မတီဥက္ကဋ္ဌ Congressman Matt Salmon နှင့် ဧပြီလ ၃၀ ရက်နေ့ ညနေ ၄ နာရီခွဲတွင် အောက်လွှတ်တော် အဆောက်အအုံရှိ ၎င်း၏ရုံးခန်း၌ တွေ့ဆုံဆွေးနွေးခဲ့သည်။

အဆိုပါတွေ့ဆုံပွဲသို့ ပြည်ထောင်စုလွှတ်တော် နာယက နှင့်အတူ ပြည်သူ့လွှတ်တော် ကော်မတီဥက္ကဋ္ဌ နှင့် အဖွဲ့ဝင်များဖြစ်ကြသော ဦးလှမြင့်ဦး၊ ဒေါက်တာ ဝင်းမြင့်၊ ဦးသိန်းထွန်း၊ ဦးဝင်းသန်း၊ အမေရိကန်နိုင်ငံဆိုင်ရာ မြန်မာသံအမတ်ကြီး ဦးကျော်မျိုးထွဋ်နှင့် ပြည်သူ့လွှတ်တော်ရုံးမှ တာဝန်ရှိသူများ တက်ရောက်ခဲ့ကြသည်။

ထိုသို့တွေ့ဆုံရာတွင် လွှတ်တော်နှစ်ရပ်ကြား ပူးပေါင်းဆောင်ရွက်ရေးနှင့် မြန်မာနိုင်ငံ၏ ဒီမိုကရေစီ ပြုပြင်ပြောင်းလဲရေးဆိုင်ရာများကို ရင်းနှီးပွင့်လင်းစွာ အမြင်ချင်းဖလှယ် ဆွေးနွေးကြပြီး တွေ့ဆုံပွဲ အပြီးတွင် အမှတ်တရ စုပေါင်းမှတ်တမ်းတင် ဓာတ်ပုံရိုက်ကူးခဲ့ကြသည်။

၂၀၁၅ ခုနှစ် မေလ ၄ ရက်