ပြည်သူ့လွှတ်တော်၊ လျှပ်စစ်နှင့်စွမ်းအင် ဖွံ့ဖြိုးတိုးတက်ရေးကော်မတီ ဥက္ကဋ္ဌ ဦးကြည်မိုးနိုင် သည် အမေရိကန်ပြည်ထောင်စု၊ ဝါရှင်တန်အခြေစိုက် INLE Advisory Group မှ ဥက္ကဋ္ဌ Ms. Erin Murphy အား ယနေ့ မွန်းလွဲ (၁:၃၀) နာရီအချိန်တွင် နေပြည်တော်ရှိ လွှတ်တော်အဆောက်အအုံ ရေးရာဆောင် အမှတ် (I-8) အစည်းအဝေးခန်းမ၌ လက်ခံတွေ့ဆုံသည်။
တွေ့ဆုံစဉ် မြန်မာနိုင်ငံတွင် အဓိကလိုအပ်လျက်ရှိသော လျှပ်စစ်စွမ်းအင်ပိုမိုရရှိရေး အတွက် မန္တလေးတိုင်းဒေသကြီးတွင် စတင်အကောင်အထည်ဖော် ဆောင်ရွက်မည့် လျှပ်စစ်စွမ်းအင်ထုတ်လုပ်မှု စီမံကိန်းအစီအစဉ်များ၊ လျှပ်စစ်စွမ်းအင်ထုတ်ယူမှုဆိုင်ရာ နည်းပညာပိုင်းနှင့် ၎င်းစီမံကိန်းအောင်မြင်ပါက ကျန်တိုင်းဒေသကြီးများနှင့် ပြည်နယ်များတွင် ဆက်လက်ဆောင်ရွက် သွားနိုင်ရေးအတွက် ဆွေးနွေးခဲ့ကြသည်။
အဆိုပါတွေ့ဆုံပွဲသို့ အတွင်းရေးမှူး ဦးစိုးမြင့်(ခ)ဦးအောင်ဇော်မြင့် နှင့်အတူ ကော်မတီ အဖွဲ့ဝင်များ တက်ရောက်ခဲ့ကြသည်။
၂၀၁၇ ခုနှစ်၊ ဖေဖော်ဝါရီလ ၂၇ ရက်